Ака́фист Преподобному́ченику Фео́дору (Абро́симову), Пече́нжскому. Па́мять ме́сяца ию́ля в 20-й день (2 а́вгуста по н.ст.).
Конда́к 1
Восхва́лим днесь пе́сньми страда́льца земли́ на́шея Ко́льския, / преподобному́ченика Фео́дора. / Сей бо, измла́да Христа́ возлюби́в, / оста́ви Помо́рскую зе́млю оте́чествия своего́ / и оты́де в сла́вную оби́тель Пече́нжскую, / иде́же, неле́ностно Бо́гу и бра́тии угожда́я, / му́жественно не оста́вил есть вины́ сла́ве оби́тели, / да́же до кро́ве ста́ проти́ву ху́льников, гони́телей и досади́телей Це́ркве; / и, та́ко подвиза́вся, Небе́сныя сла́дости вкуси́л есть страстоте́рпец ди́вный. / Сего́ ра́ди, любо́вию простирáющеся к нему, / воспева́ем си́це: / Ра́дуйся, преподобному́чениче Фео́доре, // те́плый моли́твенниче о душа́х на́ших.
И́кос 1
Днесь соше́дшеся, / пою́ще и благословя́ще Го́спода, / в благопочита́ние ле́тныя па́мяти твоея́ / си́це из глубины́ се́рдца на́шего к тебе́ взыва́ем, / преподобному́дре Фео́доре: / я́ко во́ин Христо́в добропобе́дный, / Це́ркве Правосла́вней и Христо́ву во́инству ве́рен пребы́л еси́ / и сто седмина́десятым му́чеником Пече́нжским / в наро́де Бо́жии наре́клся еси́. / Того́ ра́ди житие́м твои́м пра́ведным / и́стинный нам путь к Небеси́ указу́еши, / те́мже почита́ем па́мять твою́ всечестну́ю и, благогове́йне чту́ще вся лю́тая твоя́, / воспева́ем ти си́це: Ра́дуйся, я́ко от ю́ности своея́ Бо́га се́рдцем возлюби́л еси́; Ра́дуйся, я́ко в ю́нем телеси́ кре́пость му́жескую яви́л еси́.
Ра́дуйся, оте́честву земно́му в чи́не во́инстем досто́йно послужи́вый; Ра́дуйся, последи́ во́инству Христо́ву приобщи́тися зело́ возжеле́вый. Ра́дуйся, и́гу благо́му служе́ния Христо́ва вы́ю подклони́вый; Ра́дуйся, слáдость словéс Госпо́дних всегда́ в души́ храни́вый. Ра́дуйся, о́браз бо страдáния за Христа́ Бо́га нaм являя́й; Ра́дуйся, на те́сный пу́ть и у́зкая врата́ спасéния нaс наставля́яй. Ра́дуйся, преподобному́чениче Фео́доре, // те́плый моли́твенниче о душа́х на́ших.
Конда́к 2
Вседержи́теля глас услы́шав, смире́нный Фео́доре, / мирска́я вся отри́нул еси́ / и реце́ Пече́нзе стопы́ своя́ от ве́си Ча́ваньжския напра́вил еси́, / иде́же, во оби́тели святе́й всели́вся, / трудолю́бно подвиза́лся еси́ / и в послуша́ние Бо́гу всеце́ло себе́ вручи́л еси́. / Рясофо́рный мних был еси́ и служе́бник преподо́бнаго Паи́сия игу́мена, / и сей бе ти друг ве́рен и кров кре́пок. / Ны́не же, отцы́ святи́и, Тро́ице предстоите́, / сия́юще отту́ду блиста́нии, / и восхваля́юще, и благословя́ще Го́спода пребога́тно: // Аллилу́иа.
И́кос 2
Испо́лнишася дни́е, и наста́ша времена́ лю́та, / и, я́ко бегле́ц, ты во Фи́нскую страну́ изгна́н бысть, / преподобному́чениче Фео́доре. / Со свято́ю оби́телию Пече́нжскою Христу́ после́довав, / Оте́чество свое́ оста́вил еси́, / и со бра́тиею мни́шескою прише́лец в земли́ чужде́й и иносла́вней пребы́л еси́, / и ве́рный раб яви́лся еси́ Христа́ Вседержи́теля. / Сего́ рaди покланя́ющеся Всеми́лоcтивому Спа́су, / воспевáем тя, я́ко еди́наго от избрáнных Его́, / хвале́нии таковы́ми: Ра́дуйся, из мла́да добро́ту Влады́ки Христа́ возлюби́вый; Ра́дуйся, в правове́рии и благоче́стии ве́рно послужи́вый.
Ра́дуйся, мудрова́ний ве́ка сего́ вознося́щихся посрамле́ние; Ра́дуйся, от волко́в, в оде́жди о́вчей входя́щих, огражде́ние. Ра́дуйся, в пе́ниих и ли́цех ны́не любо́вию прославля́емый; Ра́дуйся, подви́жниче, благода́тию Бо́жиею охраня́емый. Ра́дуйся, к ли́ку преподобному́чеников сопричте́нный; Ра́дуйся, в ри́зу чи́стаго ве́ры испове́дания облече́нный. Ра́дуйся, преподобному́чениче Фео́доре, // те́плый моли́твенниче о душа́х на́ших.
Конда́к 3
Про́мыслом Бо́жиим и челове́ческим избра́нием / был еси́ друг ве́рен Паи́сию преподобному́ченику, игу́мену оби́тели Пече́нжския, / и помо́щник в ско́рбех преизря́дных, обре́тших бра́тию зело́. / Та́ко да́же до кро́ве постра́дасте, / проти́ву гони́телей Це́ркве подвиза́стеся, / Небе́сныя сла́дости вкуси́ли есте́, / страстоте́рпцы ди́внии. / Испроси́те и нам, о́тче Фео́доре со бра́тиею, у Христа́ Спа́са на́шего, ди́внаго во Святы́х Свои́х, грехо́в оставле́ние, / да в ве́ре и́стинней утверди́тися / и Небе́сныя сла́дости вкуси́ти при́сно воспева́ющим: // Аллилу́иа.
И́кос 3
В бра́тстве и́ночестем усе́рдно подвиза́вся, Фео́доре всехва́льне, / восходи́л еси́ от си́лы в си́лу, / украше́ние и́ноков яви́лся еси́, преподобному́чениче, / до́бре сих к Небеси́ наставля́я. / Те́мже ны́не, во тме грехо́вней су́щия ны просвети́ / и, я́ко име́яй дерзнове́ние ко Го́споду, Спа́су на́шему, / Того́ моли́ спасти́ся на́м, / ве́рно чту́щим па́мять твою́ / и песнопою́щим ти такова́я: Ра́дуйся, с терпе́нием мно́гим го́ресть изгна́ния вкуси́вый; Ра́дуйся, ве́ру соверше́нную в ско́рбех сугу́бых яви́вый. Ра́дуйся, во страда́ниих твои́х плоть бе́дне смири́вый; Ра́дуйся, пло́д досто́йный терпе́ния и любве́ сотвори́вый.
Ра́дуйся, бога́тство земно́е ни во что́же вмени́вый; Ра́дуйся, ве́рный ра́бе, да́нный тебе́ мна́с возрасти́вый. Ра́дуйся, со мно́гими скорбьми́ рáдость о Го́споде прие́мый; Ра́дуйся, си́ми страда́нии плод Христо́выя любве́ в души́ возрасти́вый. Ра́дуйся, преподобному́чениче Фео́доре, // те́плый моли́твенниче о душа́х на́ших.
Конда́к 4
Заве́ты сострада́льцев Христо́вых восприе́мь, / ду́шу свою́ за ве́ру оте́ческую положи́л еси́, свя́те Фео́доре, / ве́рный ору́жниче Христо́ва во́инства, / в же́ртву Бо́гу себе́ сама́го принося́. / Ны́не же, ру́це твои́ в моле́нии со А́нгелы простира́я, / помина́й Ко́льскую зе́млю рожде́ния своего́ / и оби́тель Пече́нжскую, ю́же возлюби́л еси́, / и моли́ о спасе́нии сла́вящих тя благоче́стно / и во умиле́нии серде́ц взыва́ющих: // Аллилу́иа.
И́кос 4
Во оби́тели Пече́нжстей по́двигом и́ноческим до́бре подвиза́вся, / пресла́вный Фео́доре, / и досто́йно зва́нию ходи́в, / плоды́ прине́сл еси́ Христо́ва смире́ния, / я́ко дре́во благосенноли́ственное. / И нас научи́ смиря́ти ду́ши на́ша пред Отце́м Небе́сным / в ско́рбех и разли́чных обстоя́ниих, / да обря́щем ве́чную побе́ду с тобо́ю, Христо́вым страда́льцем, / и воспое́м тя си́це: Ра́дуйся, от нечести́вых уничиже́ние в честь себе́ вмени́вый; Ра́дуйся, оби́дящим вседу́шно прегреше́ния прости́вый. Ра́дуйся, би́сере дража́йший, Пече́нжския бра́тии украше́ние; Ра́дуйся, си́лам бесо́вскаго зла необори́мое устраше́ние. Ра́дуйся, томле́ния и труды́ тя́жкия в заточéнии терпе́вый; Ра́дуйся, о осквернéнии оби́тели матероле́пней скорбе́вый.
Ра́дуйся, Христо́ва во́инства ра́тниче честны́й и ве́рный; Ра́дуйся, пра́вды и исти́ны носи́телю добропобе́дный. Ра́дуйся, преподобному́чениче Фео́доре, // те́плый моли́твенниче о душа́х на́ших.
Конда́к 5
Ревну́я о ве́ре Правосла́вней, / возскорбе́л еси́ печа́лию ве́лиею, / я́ко ве́ра сия́ от безбо́жных попира́ется, / и гоне́ния мно́гая претерпе́л еси́ за ню, / и кро́вию муче́ний зе́млю Ко́льскую освяти́л еси́, / со́нму новому́чеников сопричте́нный. / Ны́не же, предстоя́ Престо́лу Госпо́дню, за ны мо́лишся, / да и мы Ца́рствию Христо́ву приобщи́мся, / со умиле́нием вопию́ще ко Го́споду: // Аллилу́иа.
И́кос 5
Ра́дуйся, мона́хов похвало́, / да возвели́чиши люде́й правосла́вных достохва́льным житие́м твои́м / и сла́вным стоя́нием в ве́ре Христо́вой. / Ты, сле́зы и по́ты оби́льно пролива́я, / ду́шу свою́ от страсте́й очи́стил еси́, / та́же му́ченическими кровьми́ себе́ сама́го в же́ртву Го́споду прине́сл еси́, / от безбо́жных му́ку претерпе́в. / Сего́ рáди песносло́вим твоя́ по́двиги страстоте́рпческия / и прино́сим ти хвале́ния сицевáя:
Ра́дуйся, непра́ведный пригово́р с кро́тостью прия́вый;
Ра́дуйся, смире́нием ду́ха се́ти вра́жия попра́вый.
Ра́дуйся, в ско́рби свое́й от любве́ Христо́выя не отлуче́нный;
Ра́дуйся, во страда́нии твое́м си́лою Бо́жиею укрепле́нный.
Ра́дуйся, ти́хостию свое́ю безбо́жных суро́вство обличи́вый;
Ра́дуйся, и́стинным веледу́шию и кро́тости нас научи́вый.
Ра́дуйся, похвалы́ и сла́вы Бо́жия ве́лий ревни́телю;
Ра́дуйся, ве́рных оте́чествия твоего́ Небе́сный храни́телю.
Ра́дуйся, преподобному́чениче Фео́доре, // те́плый моли́твенниче о душа́х на́ших.
Конда́к 6
Сокруши́л еси́ терпе́нием всю си́лу вра́жию, / мужеуби́йц и ху́льников зле́йших, влады́к, погу́бльших се́рдце, / су́щих дале́че от пра́вды и претя́щих ти, не убоя́лся еси, / Фео́доре добропобе́дный, / и, муче́ния путь до́блестно проше́д, дости́гл еси́ в несконча́емый поко́й Небе́сный, / иде́же со А́нгелы лику́еши / и Еди́ному Христу от всего́ се́рдца воспева́еши: // Аллилу́иа.
И́кос 6
Ра́дуйся, преподобному́чениче Фео́доре, / боле́зни и труды́ благоду́шно претерпе́вый, / и посреде́ мяте́жей мно́гих ве́ру кре́пкую до конца́ сохрани́вый, / и за Христа́ сла́вную кончи́ну прия́вый. / Оба́че ин суд Бо́жий, ин челове́ческий: / ско́рый и непра́вый тя на сме́рть осуди́, / Небе́сный же и Боже́ственный по́честьми побе́дными венча́. / Ны́не же, вшед в Ца́рствие Небе́сное, / Престо́лу Бо́га Жива́го предстои́ши, / те́мже у́бо ра́дующеся и благогове́юще, / вопие́м ти благохвале́ния сия́:
Ра́дуйся, о́браз кре́пости ве́ры нам яви́вый;
Ра́дуйся, в ско́рби Крест свой терпели́вно носи́вый.
Ра́дуйся, му́чениче, ри́зы своя́ в крови́ А́гнца убели́вый;
Ра́дуйся, те́лом уме́рый, ду́шу же свою́ не погуби́вый.
Ра́дуйся, а́нгельским чино́м сликовству́яй в вы́шних;
Ра́дуйся, от челове́к похвалы́ прие́мляй в ни́жних.
Ра́дуйся, вся лю́тая твоя́ до конца́ за Христа́ претерпе́вый;
Ра́дуйся, безпреткновéнно в Го́рняя чи́стою душéю возлете́вый.
Ра́дуйся, преподобному́чениче Фео́доре, // те́плый моли́твенниче о душа́х на́ших.
Конда́к 7
Егда́ прии́де во оби́тель Пече́нжскую гоне́ние от безбо́жных, / столп непоколеби́м яви́лся еси́, добропобе́дный Фео́доре; / со отце́м свои́м духо́вным преподобному́чеником Паи́сием, / пра́вды ра́ди стра́ха безбо́жных не убо́яся, ниже́ смути́ся, / и всех святы́х земли́ Ко́льския, я́ко бли́жних сро́дник, в по́мощь призыва́л еси́, / с ни́миже ку́пно ны́не прославля́ешися / и песнь побе́дную благода́рственно воспева́еши: // Аллилу́иа.
И́кос 7
Изгна́ние и разлуче́ние с бра́тиею свое́ю / му́жественне претерпе́л еси́, преподобному́чениче Фео́доре, / жесто́кия терпя́ на те́ле боле́зни, / уязвля́емь быв от руки́ си́льных и злоко́знивых мучи́телей, / оба́че ни ка́я тва́рь возмо́жет разлучи́ти тя от любве́ Бо́жия, / я́же о Христе́ Иису́се, Го́споде на́шем. / Утверди́ и нас терпе́ти вся му́ки и ско́рби / и да́же до сме́рти подвиза́тися о и́стине. / Мы же, наде́ждою на предста́тельство твое́ окрыля́еми, / с ве́рою прино́сим ти похвалы́ таковы́я: Ра́дуйся, дни́ страда́ния своего́ му́жественне испо́лнивый; Ра́дуйся, свети́льниче, ду́шу свою́ еле́ем свя́тости напо́лнивый.
Ра́дуйся, богоху́льная умышле́ния ору́жников дерзосе́рдых посрами́вый;
Ра́дуйся, му́жеству во искуше́ниих ве́лиих всех нас научи́вый. Ра́дуйся, свеще́ неугаси́мая, огне́м Ду́ха Свята́го возжже́нная; Ра́дуйся, лоз́о избра́нная, росо́ю благода́ти Бо́жия напое́нная. Ра́дуйся, в руга́нии и ра́нах за Христа́ с молча́нием пострада́вый; Ра́дуйся, притека́ющим к тебе́ ско́рое вспоможе́ние яви́вый.
Ра́дуйся, преподобному́чениче Фео́доре, // те́плый моли́твенниче о душа́х на́ших.
Конда́к 8
О́тче преподо́бне Фео́доре, / в тя́жкую годи́ну испыта́ний ве́ру Христо́ву поруга́ему соблю́л еси́ / и себе́ сама́го, я́ко же́ртву живу́ю, Бо́гу прине́сл еси́. / Ны́не Госпо́дь показа́ тя, свети́льника Своего́, / сия́юща на све́щнице Це́ркве / и со́нма новому́чеников Российских / украше́ние пресве́тлое я́вльшагося. / Сего́ ра́ди, я́ко победи́тель, / воспева́еши с безпло́тными си́лами / песнь побе́дную Христу́ Бо́гу: // Аллилу́иа.
И́кос 8
Испове́да пред А́нгелы и челове́ки И́мя Госпо́дне, / поруга́ние и бие́ние претерпе́ от безбо́жных, / вене́ц добро́ты восприя́в, сла́вне Фео́доре: / те́ло бо твое́ во вну́тренних моги́лы безве́стныя поко́ится, / душа́ же высоте́ хвале́ния угото́вася / и та́ко пред Го́сподем духо́в / вознесе́на бысть от юдо́ли сме́ртныя / в вы́шняя Небе́сная селе́ния; / да твои́ми моли́твами спасе́мся, / славосло́вяще тя си́це: Ра́дуйся, тяготы́ злострада́ния моли́твою побежда́ти научи́вый; Ра́дуйся, засту́пниче, в гоне́ниих наде́жду и ве́ру укрепи́вый. Ра́дуйся, боля́щих душе́ю и те́лом безме́здный цели́телю; Ра́дуйся, коле́блющимся в ве́ре сил духо́вных пода́телю.
Ра́дуйся, мук несе́нием тле́нная на нетле́нная премени́вый; Ра́дуйся, мно́гия бо от жесто́ких ско́рбей разреши́вый. Ра́дуйся, бра́тии Пече́нжския оби́тели приле́жный храни́телю; Ра́дуйся, звездо́ Полно́щная, ве́рным ко спасе́нию путеводи́телю. Ра́дуйся, преподобному́чениче Фео́доре, // те́плый моли́твенниче о душа́х на́ших.
Конда́к 9
Укрепле́н быв ра́зумом Боже́ственным, / облича́л еси́ отмета́ющихся и́стинныя ве́ры Христо́вы, я́ко пребезу́мных, / скве́рных проде́рзостию и си́лою о кня́зе бесо́встем напы́щенных. / Ты же крестоноше́нием страда́ний плоть свою́ умертви́л еси́, блаже́нне Фео́доре, / те́мже Небе́сныя две́ри ти отверзо́шася, / воспева́ющу Христа́ во вся ве́ки. / Сего́ ра́ди лю́дие Пече́нжстии и помо́рстии / просла́вльшаго тя Го́спода сла́вят, / с ни́миже и мы вопие́м: // Аллилу́иа.
И́кос 9
А́ще и го́рькими рабо́ты уби́ша врази́ те́ло твое́, / преподобному́чениче Фео́доре, / оба́че души́ твоея́ тма не косну́ся. / Те́мже яви́лся еси́ луч Со́лнца Пра́вды, / и столп огнегоря́щ Це́ркве Христо́вы, и хода́тай ве́рен / пред Бо́гом о нас, тя вы́ну прославля́ющих. / Мо́лим тя, страда́льче святы́й: / моли́ся за ны ко Го́споду, / по́прище жития́ на́шего нам досто́йно проити́ / и во́ины све́та неуко́рными яви́тися, / вопию́ще ти си́це: Ра́дуйся, моля́щимся к тебе́ ско́рую по́мощь подава́яй; Ра́дуйся, отча́янных и безнаде́жных в гоне́ниих ободря́яй. Ра́дуйся, ти́хость и мир несму́тен в души́ всегда́ име́вый; Ра́дуйся, дáнный ти Крест любо́вию и ве́рою претерпе́вый. Ра́дуйся, яко стяжа́л еси́ веледу́шие и на Бо́га наде́яние; Ра́дуйся, земе́ль полно́щных ве́рное от бед спасе́ние. Ра́дуйся, путе́м у́зким и приско́рбным проше́дый; Ра́дуйся, жизнь ве́чную во Христе́ Иису́се обреты́й. Ра́дуйся, преподобному́чениче Фео́доре, // те́плый моли́твенниче о душа́х на́ших.
Конда́к 10
Мона́шескаго жития́ о́браз ты яви́ / и му́чеников красоту́ страда́льчеством твои́м просла́ви, о́тче Фео́доре, / му́ки и я́звы
претерпе́в, / ны́не по заве́ту Христо́ву живо́т ве́чный обре́л еси, / те́мже и Христо́с сокро́вищем безсме́ртия на Небеси́ обогати́ тя. / Мы же, чту́ще пресве́тлую па́мять твою́, / вопие́м ко Госпо́ду, Ди́вному во святы́х Свои́х, / подаю́щему нам образ безприкла́дный и ве́лие наде́яние: // Аллилу́иа.
И́кос 10
Ра́нами и боле́зньми вели́кими помрачи́ся добро́та телесе́ твоего́, / оба́че благода́тию Свята́го Ду́ха све́тлость душе́вная презе́льне возсия́, / преподо́бне страда́льче. / Те́мже моли́ся Христу́ Бо́гу, / да сподо́бятся ве́рная ча́да Це́ркве Правосла́вныя жи́зни будуща́го ве́ка, / иде́же присе́щает свет Лица́ Бо́жия. / Мы же твою́ па́мять при́сно пе́сньми восхваля́ем ве́рно / и вопие́м ти с любо́вию такова́я: Ра́дуйся, благода́ть и сла́ву от Пече́нжских уго́дников прия́вый; Ра́дуйся, по́двиг мучени́чества на ра́мена своя́ подъя́вый. Ра́дуйся, я́ко ле́стчее злосмра́дие вра́жие дале́че отгна́л еси́; Ра́дуйся, я́ко еди́ное на потре́бу, я́ко благу́ю ча́сть, избра́л еси́. Ра́дуйся, я́ко предлежа́щий ти по́двиг в кро́тости прия́л еси́; Ра́дуйся, я́ко в се́ни сме́ртней, в темни́цах и у́зах томи́лся еси́. Ра́дуйся, кро́тце за досажда́ющих и истяза́ющих тя моли́выйся; Ра́дуйся, ра́дости Небе́сныя в по́двизе ве́ры причасти́выйся. Ра́дуйся, преподобному́чениче Фео́доре, // те́плый моли́твенниче о душа́х на́ших.
Конда́к 11
В темни́цах градо́в Му́рмана, я́ко в се́ни сме́ртней, томи́лся еси́, / по́слежде го́рькия рабо́ты в заточе́нии земли́ Ко́ми претерпе́л еси́ / и узи́лище после́днее земнáго жития́ твоего́ во гра́де Ухте́ обре́л еси́, / а́може приведé тя Христо́с, / жéртвы но́выя всещéдрыя твоея́ желáя. / Ты же благопоко́рне принéсл еси́ о́ную, / смири́в себе́
да́же до сме́рти, / богоблаже́нный Фео́доре, / любо́вию воспевáя Го́сподеви: // Аллилу́иа.
И́кос 11
Но́вое чу́до показа́ Христо́с, / егда́ сле́зными моли́твами му́ченика Своего́, преподо́бнаго Феодо́ра, / и страда́ньми с го́рькою нужде́ю, и у́зами с темни́цею, / мглу безбо́жия и злообы́чия над Оте́чеством на́шим разсе́ял еси́. / И оби́тель Пече́нжская из пе́пла возста́, / и но́вая бра́тия прии́де на ме́сто подвиго́в и скорбе́й его́, / и поруга́ний и бие́ний от гре́шник. / Ны́не единокро́внии твои́, о́тче Фео́доре, / на благопло́дную моли́тву твою́ уповáюще, / ублажа́ют тя похвалы́ сицевы́ми: Ра́дуйся, свети́льниче златы́й, во мрáце безбо́жия све́тло сия́яй; Ра́дуйся, о́бразом до́браго испове́дания ве́ры бра́тию умудря́яй. Ра́дуйся, я́ко не убоя́ся и не скры́ся от сме́ртию ти грозя́щих; Ра́дуйся, я́ко терпе́нием и ве́рою тече́ на по́двиг ти предлежа́щий. Ра́дуйся, яко о́браз испове́дания от игу́мена Паи́сия восприя́л еси́; Ра́дуйся, я́ко во́лю Бо́га Вы́шняго всем се́рдцем взыска́л еси́. Ра́дуйся, оби́тели Пече́нжския изве́стное укрепле́ние; Ра́дуйся, лю́да земе́ль Се́верных кре́пкое защище́ние. Ра́дуйся, преподобному́чениче Фео́доре, // те́плый моли́твенниче о душа́х на́ших.
Конда́к 12
Зе́млю Ру́сскую, безбо́жными гоне́нии неща́дно жего́мую, / слеза́ми и кровьми́ твои́ми напои́л еси́, преподобному́чениче Фео́доре. / Сконча́вся вма́ле, испо́лни ле́та до́лга своего́, / уго́дна бо бе Го́сподеви душа́ твоя́, / сего́ ра́ди потща́ся от среды́ лука́вствия: / я́ко благода́ть и ми́лость в преподо́бных Его́ / и посеще́ние во
избра́нных Его́, / и́бо вмени́ся, сла́вный му́чениче, в сыне́х Бо́жиих, / и во святы́х жре́бий твой есть. / Те́мже, о́тче преподо́бне, / стяжа́л еси́ благода́ть моли́тися о нас ко Го́споду, Ему́же благода́рственно воспева́ем: // Аллилу́иа.
И́кос 12
Све́та нетва́рнаго зри́тель / и ра́дости Боже́ственныя прича́стник яви́лся еси, / новому́чениче Фео́доре, / темже мо́лим тя: / не преста́ни моли́тися о нас ку́пно со все́ми новому́ченики Це́ркве Ру́сския, / да поми́лует нас Госпо́дь, призирáя с высоты́ Небе́cныя, / и приклоня́я к нaм вы́шнее милоcе́рдие. / Та́ко на твое́ заступлéние наде́ющеся / и на благопло́дную моли́тву твою́ уповáюще, / ублажа́ем тя сицевы́ми похвалы́: Ра́дуйся, преподо́бне, стезе́ю мона́шескою усе́рдно подвиза́выйся; Ра́дуйся, подви́жниче, на ни́ве Христо́вой изря́дно потруди́выйся. Ра́дуйся, на Нача́льника и Соверши́теля ве́ры Иису́са взира́вый; Ра́дуйся, му́жественно ра́ди бра́тии своея́ да́же до кро́ве пострада́вый. Ра́дуйся, яко ны́не во све́те Ца́рствия Бо́жия пребывáеши; Ра́дуйся, я́ко и нас благода́тным того́ све́том осиява́еши. Ра́дуйся, пресла́вне Фео́доре, Пече́нжский пресве́тлый свети́льниче; Ра́дуйся, в возраще́нии ве́ры и благоче́стия кре́пкий помо́щниче. Ра́дуйся, преподобному́чениче Фео́доре, // те́плый моли́твенниче о душа́х на́ших.
Конда́к 13
О, страда́льче многосве́тлый и страстоте́рпче ди́вный Фео́доре, / святы́й му́чениче за ве́ру Христо́ву, / Це́ркве Ру́сския украше́ние, / оби́тели Пече́нжския и земли́ Ко́льския ра́дование! / Услы́ши на́ше неиску́сное и ма́лое сие́ моле́ние, / благогове́йно тебе́ приноси́мое, / и испроси́ у Всеми́лоcтиваго Влады́ки, / Ему́же ны́не со дерзновéнием предстои́ши, / проба́вити ми́лость Свою́ на ны / и дарова́ти оставлéние мно́гих грехо́в нáших, / да твои́ми моли́твами сподо́бимся во Ца́рствии Небе́снем / в ра́дости блаже́нней воспева́ти А́нгельскую песнь: // Аллилу́иа, Аллилу́иа, Аллилу́иа. (Э́тот конда́к чита́ется три́жды, зате́м 1-й икос и 1-й конда́к)
Моли́тва
свято́му преподобному́ченику Фео́дору Пече́нжскому
О, вели́кий уго́дниче Христо́в, святы́й преподобному́чениче Фео́доре! К тебе́ мы, гре́шнии и смире́ннии, я́ко к те́плому на́шему засту́пнику и ско́рому помо́щнику, моли́твенно прибега́ем и из глубины́ се́рдца взыва́ем: при́зри на ны ско́ро и умоли́ Человеколю́бца Бо́га, да не осу́дит нас, гре́шных, по беззако́нием на́шим, но да сотвори́т с на́ми по вели́цей Свое́й ми́лости. Огради́ нас свои́м заступле́нием от облежа́щаго ны суему́дрия и неправове́рия, и упаси́ заблу́ждшия о́вцы ста́да Христо́ва, и во дворы́ Госпо́дни сия́ всели́. Огради́ нас от собла́знов, ересе́й и раско́лов и наста́ви тве́рдо в ве́ре Правосла́вней подвиза́тися. Потщи́ся, ско́рый о нас предста́телю, благоприя́тным твои́м хода́тайством умоли́ти Го́спода, да низпосле́т нам ти́хое и богоуго́дное житие́, уврачу́ет Свое́ю благода́тию на́ша боле́зни, душе́вныя и теле́сныя, согре́ет на́ша сердца́ любо́вию друг ко дру́гу и сотвори́т ны братолю́бны и единомы́сленны.
Испроси́ та́кожде у Го́спода и всего́ потре́бнаго для жития́ на́шего теле́снаго: земли́ плодоро́дие, благорастворе́ние возду́хов и ми́рное устрое́ние. Страну́ на́шу, ве́си и гра́ды охрани́ моли́твами твои́ми от огня́, пото́па, тру́са, вра́жескаго наше́ствия и вну́тренних нестрое́ний. Утверди́ в нас па́мять сме́ртную, да и мы, во и́стиннем покая́нии и чи́стем све́дении со́вести на́шея предста́вше ко Го́споду, сподо́бимся десна́го стоя́ния и со все́ми святы́ми воспое́м сла́ву Отцу́, и Сы́ну, и Свято́му Ду́ху во ве́ки веко́в. Ами́нь.