МЕ́СЯЦА ИЮ́ЛЯ В 20-Й ДЕНЬ (2 А́ВГУСТА ПО Н. СТ.)
Преподобному́ченика Фео́дора (Абро́симова), Пече́нжскаго
НА МА́ЛОЙ ВЕЧЕ́РНИ
На Го́споди, воззва́х: стихи́ры на 4. Глас 6:
Восхва́лим днесь пе́сньми страда́льца земли́ на́шея Ко́льския, / преподобному́ченика Фео́дора. / Сей бо, измла́да Христа́ возлюби́в, / оста́ви Помо́рскую зе́млю оте́чествия своего́ / и оты́де в да́льную страну́, / иде́же, неле́ностно Бо́гу и бра́тии угожда́я, / во утвержде́ние ве́ры Правосла́вныя во язы́цех, / су́щих дале́че от коне́ц земли́, бде и насле́ди. / Ны́не же, во оби́тели Небе́сныя прия́тый, / моли́ Христа́ Бо́га // поми́ловати ду́ши на́ша.
Я́коже Се́ргий вели́кий с бра́том Стефа́ном, / та́кожде и ты, о́тче Фео́доре, / оста́вль дом оте́ц свои́х, во оби́тель Пече́нжскую всели́лся еси́, / бра́т же твой мни́й по дне́х мно́зех оста́ви бо Три́фоново селе́ние / и па́ки возврати́ся в родно́е Помо́рие. / Ты же в любви́ Госпо́дни кре́пость обре́л еси́, / и вся претерпе́л еси́, я́ко во́ин Христо́в добропобе́дный, / и, ду́шу свою́ за Христа́ положи́в, // житие́ свое́ венце́м страда́ния увенча́л еси́.
Испо́лнишася дни́е, наста́ша времена́ лю́та, / и, я́ко бегле́ц, ты во Фи́нскую страну́ изгна́н бысть, / преподобному́чениче Фео́доре. / Со свято́ю оби́телию Пече́нжскою Христу́ после́довав, / Оте́чество свое́ оста́вил еси́, / и со бра́тией мни́шеской прише́лец в земли́ чужде́й и иносла́вней был еси́, / и ве́рный раб яви́лся еси́ Спа́са Вседержи́теля; // те́мже почита́ем па́мять твою́ всечестну́ю.
Вся прило́ги лука́выя претерпе́л еси́, доброхва́льне Фео́доре, / упова́нием неукло́нным на Бо́га, Спа́са твоего́. / Сро́дницы твои́ единокро́внии / стра́ха ра́ди сме́рти от безбо́жных отверго́шася тя. / Ты же, зело́ скорбя́, моли́лся еси́ о спасе́нии их, / да и мы сохрани́мся твои́ми моли́твами, // и Бо́га всех ми́лующаго заступле́нием.
Сла́ва, глас 6:
Изря́днаго уго́дника Христо́ва пе́сньми благохва́льными почти́м, / я́ко и́го злоключе́ний и страда́ний за Христа́ восприя́л есть. / От Него́ же в
Ца́рствии Бо́жием, / я́ко до́блий во́ин, в поди́р сла́вы облече́н был еси́, / Изба́вителю Бо́гу вопия́: // благослови́те, вся дела́ Госпо́дня, Го́спода.
И ны́не, Богоро́дичен, глас то́йже:
Ра́дуйся, звездо́ светоза́рная, / Све́т, пре́жде денни́цы от Отца́ возсия́вший, неизрече́нно ро́ждшая, / Того́ сия́нием озари́ ду́ши на́ша, // спя́щия во тьме и се́ни сме́ртней.
На стихо́вне стихи́ры, глас 4:
Про́мыслом Бо́жиим и челове́ческим избра́нием / был еси́ друг ве́рен Паи́сию преподобному́ченику, игу́мену оби́тели Пече́нжския, / и помо́щник в ско́рбех преизря́дных, обре́тших бра́тию зело́. / Помози́ и нам, о́тче Фео́доре, / ве́рно чту́щим па́мять твою́, // в ве́ре и́стинней утверди́тися.
Стих: Честна́ пред Го́сподем / смерть преподо́бных Его́.
Земна́я отри́нув, Небе́сная себе́ уготовля́я, / я́ко страда́лец за и́стину, / му́жественно ра́ди бра́тии своея́ не оста́вил вины́ сла́ве оби́тели. / Да́же до кро́ве пострада́вый, проти́ву ху́льников, / гони́телей и досади́телей Це́ркви подвиза́выйся, / Небе́сныя сла́дости вкуси́л еси́, страстоте́рпче ди́вный, / сея́ сла́дости испроси́ и нам у Христа́, Спа́са на́шего, // я́ко моли́твенник о душа́х на́ших.
Стих: Блаже́н муж, боя́йся Го́спода, / в за́поведех Его́ восхо́щет зело́.
Днесь соше́дшеся, и́скренняя твоя́ / поя́ху и благословля́ху Го́спода / в благопочита́ние ле́тния па́мяти твоея́, / преподобному́чениче Фео́доре: / я́ко во́ин Христо́в добропобе́дный, / ве́ре Правосла́вней и Христо́ву во́инству ве́рен пребы́л еси́ / и сто седмина́десятым му́чеником Пече́нжским / в наро́де Бо́жии наре́клся еси́. / Того́ ра́ди житие́м твои́м пра́ведным / и́стинный нам путь к Небеси́ указу́еши // и мо́лишися пред Го́сподем о спасе́нии душ на́ших.
Сла́ва, глас то́йже:
Ра́дуйся, преподобному́чениче Фео́доре, / му́жественне возвра́щся во Оте́чество свое́, / иде́же ве́ру Христо́ву поруга́ему обре́л еси́ / и себе́ сама́го, я́ко же́ртву живу́ю, Бо́гу прине́сл еси́. / Ны́не Христу́ предстоя́, моли́ся, свя́те, // дарова́ти лю́дем на́шим мир и ве́лию ми́лость.
И ны́не, Богоро́дичен, глас то́йже:
К покро́ву Твоему́ прибега́ем, / Де́во Богоро́дице, / и мо́лим Тя: ско́ро на по́мощь нас, ве́рно чту́щих Тя, предвари́ / и от враг ви́димых и неви́димых изба́ви, // Ты бо еси́ заступле́ние на́ше.
Тропа́рь пи́сан на вели́цей вече́рни. Ектения́ ма́лая и отпу́ст.
НА ВЕЛИ́ЦЕЙ ВЕЧЕ́РНИ
Блаже́н муж: 1-й антифо́н.
На Го́споди, воззва́х: стихи́ры на 8, глас 8:
Ду́шу твою́ и те́ло от страсте́й очи́стил еси́, / я́коже разжиза́ется сребро́, и я́коже искуша́ется зла́то, / кра́сная ми́ра от ю́ности твоея́ презре́л еси́, / из земли́ Помо́рския, от ве́си Ча́ваньжския / с бра́том ме́ньшим во оби́тель преподо́бнаго Три́фона отше́л еси́ / и, ра́дуяся, после́довал еси́ Христу́, и́го крестоноше́ния возлюби́вый. / Ны́не же, вшед в Ца́рствие Небе́сное, / престо́лу Бо́га Жива́го предстои́ши, // хвалу́ Ему́ с ли́ки новому́ченик Росси́йских возсыла́я. (Два́жды.)
Оте́честву земно́му в чи́не во́йстем усе́рдно послужи́в / и кре́пок во бране́х быв, достохва́льный Фео́доре, / оба́че па́ки во́инству Христо́ву приобщи́тися / и еди́ному Бо́гу порабо́тати зело́ возжеле́л еси́, / и прише́д во оте́чествие свое́, // па́ки во оби́тель возврати́ся. (Два́жды.)
В бра́тстве и́ночестем усе́рдно подвиза́вся, Фео́доре всехва́льне, / восходи́л еси́ от си́лы в си́лу, / украше́ние и́ноков яви́лся еси́, преподобному́чениче, / до́бре сих к Небеси́ наставля́я. / Те́мже ны́не, во тме грехо́вней су́щия, ны просвети́ / и, я́ко дерзнове́ние име́яй ко Го́споду, Спа́су на́шему, // Того́ моли́ спасти́ся душа́м на́шим. (Два́жды.)
Столп непоколеби́мый ве́ры Христо́вы / и и́стинный ревни́тель жития́ мни́шеского был еси́, преподобному́чениче, / бо́дренно стоя́ за святу́ю Правосла́вную ве́ру. / Ра́зум наш просвети́ / и нас, ве́рно чту́щих па́мять твою́, в ве́ре утверди́ // ко спасе́нию душ на́ших. (Два́жды.)
Сла́ва, глас 8:
Заве́ты сострада́льцев Христо́вых восприе́мь, / ду́шу свою́ за ве́ру оте́ческую положи́л еси́, свя́те Фео́доре, / ве́рный ору́жник Христо́ва во́инства. / В же́ртву Бо́гу себе́ сама́го принося́, / в се́рдце твое́м храни́л еси́ о́браз Христа́, А́гнца непоро́чна, / и ны́не воссия́л еси́ во Ца́рствии Небе́снем, / иде́же любо́вию упокоева́ет Госпо́дь // всех ве́рных же́ртвенной любви́ Его́.
И ны́не, Богоро́дичен, глас то́йже:
Царь Небе́сный за человеколю́бие на земли́ яви́ся, / и с челове́ки поживе́, / от Де́вы бо Чи́стыя плоть прие́мый / и из Нея́ проше́дый с восприя́тием. / Еди́н есть Сын, сугу́б естество́м, / но не Ипоста́сию. / Те́мже соверше́нна Того́ Бо́га / и соверше́нна Челове́ка вои́стину пропове́дающе, / испове́дуем Христа́ Бо́га на́шего: / Его́же моли́, Ма́ти Безневе́стная, // поми́ловатися душа́м на́шим.
Вход. Проки́мен дне и чте́ния три. Проро́чества Иса́иина чте́ние: Та́ко глаго́лет Госпо́дь: вси язы́цы собра́шася вку́пе, и соберу́тся кня́зи от них. / Кто возвести́т сия́ в них? / Или́ я́же от нача́ла, кто слы́шана сотвори́т вам? / Да приведу́т свиде́тели своя́, и оправдя́тся, и да услы́шат, и да реку́т и́стину. / Бу́дите Ми свиде́тели, и Аз Свиде́тель, глаго́лет Госпо́дь Бог, и о́трок, его́же избра́х: / да позна́ете, и ве́руете Ми, и разуме́ете, я́ко Аз есмь: / пре́жде Мене́ не бысть ин Бог, и по Мне не бу́дет. / Аз есмь Бог, и несть ра́зве Мене́ спаса́яй. / Аз возвести́х и спасо́х, уничижи́х, и не бе в вас чужди́й. / Вы Мне свиде́тели, и Аз Госпо́дь Бог, и еще́ от нача́ла Аз есмь, и несть от рук Мои́х избавля́яй: сотворю́, и кто отврати́т то? / Си́це глаго́лет Госпо́дь Бог, избавля́яй вас Святы́й Изра́илев. Прему́дрости Соломо́новы чте́ние: Пра́ведных ду́ши в руце́ Бо́жией, и не прико́снется их му́ка / Непщева́ни бы́ша во очесе́х безу́мных умре́ти, и вмени́ся озлобле́ние исхо́д их, и е́же от нас ше́ствие – сокруше́ние, они́ же суть в ми́ре. / И́бо пред лице́м челове́ческим а́ще и му́ку прии́мут, упова́ние их безсме́ртия испо́лнено. / И вма́ле нака́зани бы́вше, вели́кими благоде́тельствовани
бу́дут, я́ко Бог искуси́ я и обре́те их досто́йны Себе́. / Я́ко зла́то в горни́ле, искуси́ их и, я́ко всепло́дие же́ртвенное, прия́т я. / И во вре́мя посеще́ния их возсия́ют и, я́ко и́скры по сте́блию, потеку́т. / Су́дят язы́ком и облада́ют людьми́, и воцари́тся Госпо́дь в них во ве́ки. / Наде́ющиися Нань разуме́ют и́стину, и ве́рнии в любви́ пребу́дут Ему́. / Я́ко благода́ть и ми́лость в преподо́бных Его́, и посеще́ние во избра́нных Его́. Прему́дрости Соломо́новы чте́ние: Пра́ведницы во ве́ки живу́т, и в Го́споде мзда их, и попече́ние их у Вы́шняго. / Сего́ ра́ди прии́мут Ца́рствие благоле́пия и вене́ц добро́ты от руки́ Госпо́дни, зане́ десни́цею покры́ет я и мы́шцею защити́т их. / Прии́мет всеору́жие рве́ние свое́ и вооружи́т тварь в месть враго́м. / Облече́тся в броня́ пра́вды и возложи́т шлем – суд нелицеме́рен. / Прии́мет щит непобеди́мый – преподо́бие, поостри́т же напра́сный гнев во ору́жие, спобо́рет же с ним мир на безу́мныя. / По́йдут праволу́чныя стре́лы мо́лниины и, я́ко от благокру́гла лу́ка облако́в, на наме́рение полетя́т. / И от каменоме́тныя я́рости испо́лнь паду́т гра́ды, вознегоду́ет
на них вода́ морска́я, ре́ки же потопя́т я на́гло. / Сопроти́в ста́нет им дух
си́лы и, я́ко ви́хор, разве́ет их, и опустоши́т всю зе́млю беззако́ние, и злоде́йство преврати́т престо́лы си́льных. / Слы́шите у́бо, ца́рие, и разуме́йте, навы́кните, судии́ конце́в земли́. / Внуши́те, держа́щии мно́жества и гордя́щиися о наро́дех язы́ков, я́ко дана́ есть от Го́спода держа́ва вам и си́ла от Вы́шняго.
На лити́и стихи́ра хра́ма и свята́го, глас 1:
Во оби́тели Пече́нжстей по́двигом и́ноческим до́бре подвиза́вся, / пресла́вный Фео́доре, / и досто́йно зва́нию ходи́в, / плоды́ прине́сл еси́ Христо́ва смире́ния, / я́ко дре́во благосенноли́ственное, / и нас научи́ смиря́ти ду́ши на́ша пред Отце́м Небе́сным / в ско́рбех и разли́чных обстоя́ниих, / да обря́щем ве́чную побе́ду с тобо́ю, // Христо́вым страда́льцем.
Глас 2: Прииди́те, ве́рнии, / па́мять преподобному́ченика Фео́дора почти́м, / ли́ку же неисче́тному до́блественных му́чеников приобщи́ся / и собо́ру Ко́льских новому́чеников основа́ние тве́рдо положи́. / Моли́твенно притеце́м к страстоте́рпцу за ве́ру Правосла́вную святу́ю, / печа́льнику
земли́ на́шея се́верныя, / и сле́зно тому́ возопие́м: / наста́ви нас ве́рою пра́вою восхваля́ти Го́спода // ко спасе́нию душ на́ших.
Сла́ва, глас 2:
Ревну́я о ве́ре Правосла́вней, / возскорбе́л еси́ печа́лию ве́лиею, / я́ко ве́ра сия́ от неправове́рных попира́ется, / и гоне́ния мно́гия претерпе́л еси́ за ню, / и кро́вию муче́ний зе́млю Ко́льскую освяти́л еси́. / Те́мже и мы, ча́да твоя́, любо́вию вопие́м ти: / сла́ва Да́вшему ти кре́пость, / сла́ва Венча́вшему тя, // сла́ва Просла́вльшему тя с новому́ченики Росси́йскими.
И ны́не, Богоро́дичен, глас то́йже:
Защище́ние и покро́в еси́ христиа́ном, / Влады́чице Богоро́дице, / осени́ и нас, лю́те стра́ждущих, покро́вом Твои́м, // да непреста́нно славосло́вим милосе́рдие Твое́.
На стихо́вне стихи́ры, глас 4:
Ра́дуйся, преподобному́чениче Фео́доре, / сосу́де Бо́жий избра́нный, / ны́не, боле́зни в муче́ниих и ско́рби в смире́нии потерпе́в, /
по заве́ту Христо́ву ве́чный живо́т обре́л еси́. / Та́ко и мы возглаго́лем: /
возлюби́те Го́спода и обря́щете сла́ву ве́чную / и поко́й со избра́нными, // его́же да улучи́м моли́твами уго́дника Бо́жия Фео́дора.
Стих: Честна́ пред Го́сподем / смерть преподо́бных Его́.
Ра́дуйся, мона́хов похвало́, / да возвели́чиши люде́й правосла́вных достохва́льным житие́м твои́м / и сла́вным стоя́нием в ве́ре Христо́вой. / Ты, сле́зы и по́ты оби́льно пролива́я, / ду́шу твою́ от страсте́й очи́стил еси́, / та́же му́ченическими кровьми́ себе́ сама́го в же́ртву Го́споду прине́сл еси́. / Те́мже и ны́не моли́твами твои́ми / испроси́ у Светода́теля Христа́ / ми́ра и утвержде́ния Це́ркви на́шея, // и просвеще́ния душа́м на́шим.
Стих: Блаже́н муж, боя́йся Го́спода, / в за́поведех Его́ восхо́щет зело́.
Блажи́м тя, преподобному́чениче Фео́доре, / ты, я́ко муж богобоя́зливый, / упова́нием на Бо́га себе́ ополчи́в, / возста́л еси́ проти́ву враго́в ве́ры Правосла́вныя, / не устраши́вся ни темни́цы, ни уз, ни муче́ний, ни сме́рти, / но, вся сия́ претерпе́в, вене́ц побе́дный от Бо́га
восприя́л еси́. / Сего́ ра́ди мо́лим тя: моли́ Христа́ Бо́га // огради́ти Це́рковь на́шу от наве́тов вра́жиих.
Сла́ва, глас 4:
О́тче Фео́доре, / пострада́в и досажде́н быв за испове́дание ве́ры, / ра́дость пресве́тлую и пречестну́ю сла́ву насле́довал еси́ / и Вы́шняго гра́да свята́го, / Иерусали́ма но́ва, сходя́ща от Бо́га, / сонасле́дник яви́лся еси́, страсте́й победи́телю, / да ви́дяще, ка́ко лю́бит Госпо́дь ве́рных свои́х, // и мы Ца́рствию Христо́ву приобщи́мся.
И ны́не, Богоро́дичен, глас то́йже:
При́зри на моле́ния Твои́х раб, Всенепоро́чная, / утоля́ющи лю́тая на ны воста́ния, / вся́кия ско́рби нас изменя́ющи, / Тя бо, Едину, тве́рдое и изве́стное утвержде́ние и́мамы, / и Твое́ предста́тельство стяжа́хом. / Да не постыди́мся, Влады́чице, Тя призыва́ющии, / потщи́ся на умоле́ние Тебе́ ве́рно вопию́щих: / ра́дуйся, Влады́чице, / всех по́моще, ра́досте и покро́ве, // и спасе́ние душ на́ших.
На благослове́нии хлебо́в тропа́рь преподобному́ченику два́жды
и Богоро́дице Де́во: еди́ножды. Тропа́рь, глас 5: Злострада́ния и го́рькия рабо́ты / от безбо́жных и скве́рных, проде́рзостию и си́лою напы́щенных, / претерпе́л еси́, му́чениче Фео́доре, / Це́ркви послуша́ние да́же до сме́рти яви́л еси́, / сего́ ра́ди венце́м добро́ты и диади́мой Ца́рствия венча́ тя Христо́с Бог, / Его́же моли́, богодарова́нный засту́пниче земли́ Ко́льския, // да очи́стимся от вся́кия скве́рны покая́нием.
НА У́ТРЕНИ
На Бог Госпо́дь: тропа́рь свята́го (два́жды),
Сла́ва, и ны́не, Богоро́дичен:
Ра́дуйся, две́ре Госпо́дня непроходи́мая:
По 1-й стихоло́гии седа́лен, глас 6:
Житие́м твои́м земны́м А́нгелом безпло́тным уподо́бился еси́, преподобному́чениче Фео́доре, / врага́ бо прего́рдаго смири́в,
крестоноше́ние Бо́гови уго́дно соверши́л еси́. / Те́мже днесь, почита́юще па́мять твою́, мо́лимся: / моли́ спасти́ся душа́м на́шим. (Два́жды.) Сла́ва, и ны́не, Богоро́дичен: Бо́га Сло́ва породила́ еси́, / заче́нши во чре́ве безсе́менно, Неискусобра́чная Де́во, / Того́ моли́ о душа́х на́ших.
По 2-й стихоло́гии седа́лен, глас 6:
Грозд духо́вный на олта́рь Боже́ственный себе́ прине́сл еси́, преподобному́чениче Фео́доре, / и свети́льник в ме́сте мра́чне яви́лся еси́ тве́рдым стоя́нием за ве́ру Правосла́вную / и безстра́стным испове́данием ея́. / Те́мже па́мять твою́ при́сно пе́сньми восхваля́ем ве́рно. (Два́жды) Сла́ва, и ны́не, Богоро́дичен: Ка́ко не диви́мся богому́жному Рождеству́ Твоему́, Пречестна́я? / Ужа́сно бо чу́до зача́тия, и несказа́нен о́браз Рождества́ в Тебе́ показа́ся. / Рожде́ннаго Тобо́ю моли́ прости́ти прегреше́ния на́ша. Велича́ние: Велича́ем тя, / преподобному́чениче Фео́доре, / и чтим по́двиги и страда́ния твоя́, // я́же за Христа́ претерпе́л еси́.
Псало́м избра́нный: Весть Госпо́дь путь пра́ведных и путь нечести́вых поги́бнет. / Рабо́тайте Го́сподеви со стра́хом и ра́дуйтеся Ему́ с тре́петом. / Ты же, Го́споди, Засту́пник мой еси́, Сла́ва моя́ и вознося́й главу́ мою́. / Поми́луй мя, Го́споди, я́ко не́мощен есмь, исцели́ мя, Го́споди, я́ко смято́шася ко́сти моя́. / Отступи́те от мене́ вси де́лающии беззако́ние, я́ко услы́ша Госпо́дь глас пла́ча моего́. / Го́споди, Бо́же мой, на Тя упова́х, спаси́ мя от всех гоня́щих мя и изба́ви мя. / По́мощь моя́ от Бо́га, спаса́ющаго пра́выя се́рдцем. / Да упова́ют на Тя зна́ющии и́мя Твое́, я́ко не оста́вил еси́ взыска́ющих Тя, Го́споди. / Ты, Го́споди, сохрани́ши ны и соблюде́ши ны от ро́да сего́ и во век. / Возда́ст ми Госпо́дь по пра́вде мое́й и по чистоте́ руку́ мое́ю возда́ст ми. / С преподо́бным преподо́бен бу́деши и с му́жем непови́нным непови́нен бу́деши. / Зако́н Госпо́день непоро́чен, обраща́яй ду́ши, свиде́тельство Госпо́дне ве́рно, умудря́ющее младе́нцы.
По полиеле́и седа́лен, глас 4.
Подо́бен: Яви́лся еси́: У́зы и ско́рби кро́тко претерпе́л еси́, / да́же до сме́рти с Го́сподем пребы́в, / получи́в соверше́нное спасе́ние, / оты́де от жития́ привре́меннаго с весе́лием и восклица́нием, / во хвале́ниих и всеблагогла́сных пе́ниих // благодаря́ Бо́га отце́в и Спа́са на́шего Иису́са Христа́. (Два́жды.)
Сла́ва, и ны́не, Богоро́дичен:
Наде́ждо непосты́дная наде́ющихся на Тя, / Еди́на Ро́ждшая па́че естества́ пло́тию Христа́ Бо́га на́шего, / Того́ со святы́ми преподобному́ченики моли́ пода́ти вселе́нней очище́ние прегреше́ний / и всем нам пре́жде конца́ жития́ исправле́ние. Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем / смерть преподо́бных Его́. Стих: Что возда́м Го́сподеви о всех, я́же воздаде́ ми? Ева́нгелие от Ма́рка, зача́ло 37.
По 50-м псалме́ стихи́ра, глас 6:
Возлю́блен быв Бо́гом от чре́ва ма́терня, / ве́рен был еси́ да́же до сме́рти, / лесть безбо́жнаго су́етства разоря́я, / му́жески подвиза́вся проти́ву враго́в Це́ркви Правосла́вныя, / вражду́ющих ста́ду Бо́жиему, / тех злохи́трости, и неи́стовства, и ко́зни низложи́л еси́ / и вене́ц по́чести прия́л еси́. / Спаса́й нас, я́ко предста́тель наш, Фео́доре, // преподо́бне страда́льче.
Кано́н Богоро́дице со ирмо́сом на 6, и свята́го на 8, глас 8.
Песнь 1
Ирмо́с:
Во́ду проше́д, я́ко су́шу, / и еги́петскаго зла избежа́в, / изра́ильтянин вопия́ше: // Изба́вителю и Бо́гу на́шему пои́м.
Запе́в: Святы́й преподобному́чениче Фео́доре, // моли́ Бо́га о нас.
Заве́ты сострада́льцев Христо́вых восприе́мь, / я́коже дре́вле Моисе́й, воево́дствуя иуде́йскому язы́ку, / та́ко и ты, свя́те Фео́доре, ополчи́лся еси́ за лю́ди правосла́вныя и чти́лище Бо́жие. / Ны́не, вшед в Ца́рство Небе́сное, Престо́лу Бо́га Жива́го предстои́ши, / хвалу́ Ему́ с ли́ки за ве́ру страда́льцев возсыла́я.
Ве́рный ору́жник Христо́ва во́инства яви́лся еси́, / ве́ка сего́ безбо́жнаго клевре́ты обличи́л еси́ и уст их лжу / и ны́не просия́л еси́ во Ца́рствии Небе́снем, / иде́же любо́вию упокоева́ет Госпо́дь ве́рных же́ртвенной любви́ Его́. Я́ко испове́дник и я́ко страда́лец за ве́ру Христо́ву украше́нный, / причасти́лся еси́ неотъе́млемыя, о́тче Фео́доре, ра́дости, / на си́лу кре́стную упова́ние свое́ несумне́нно возложи́в, / те́мже во оби́тели Небе́сныя всели́лся еси́. Богоро́дичен: От ви́димых и неви́димых враго́в изба́ви мя, Ро́ждшая всех Влады́ку, / и бу́рю страсте́й мои́х ути́ши, да пою́ Бо́гу моему́: / сла́вно бо просла́вися.
Песнь 3
Ирмо́с:
Небе́снаго кру́га Верхотво́рче, Го́споди, / и Це́ркве Зижди́телю, / Ты мене́ утверди́ в любви́ Твое́й, / жела́ний кра́ю, ве́рных утвержде́ние, // Еди́не Челове́колюбче.
Ни врага́ ро́да челове́ческаго, ни влады́к богоху́льных, / ни ору́жников дерзосе́рдых, претя́щих ти, не убоя́вся, преподобному́чениче Фео́доре, / ве́рою и упова́нием на Го́спода был еси́ кре́пок, о́браз бо даде́ и́скренним свои́м, / да, я́коже сотвори́ та́ко, бу́дем и мы́ твори́ти в терпе́нии скорбе́й / и стяжа́нии смире́ния Христо́ва. Пою́ще, сла́вит бра́тия Пече́нжская твоя́ по́двиги по́стныя, / житие́ смире́нное и незло́бивое, преподо́бне о́тче, / и, твое́ страда́ние му́ченическое воспомина́юще, / про́сит невозноси́тельно твоего́ моли́твеннаго предста́тельства / за оби́тель свята́го Три́фона и за всю зе́млю Ко́льскую. Сокруши́л еси́ терпе́нием всю си́лу вра́жию, / мужеуби́йц и ху́льников зле́йших, влады́к, погу́бльших се́рдце, / су́щих дале́че от пра́вды и претя́щих ти, не убоя́лся еси, / преподо́бному́чениче Фео́доре добропобе́дный, / и, муче́ния путь до́блестно проше́д, дости́гл еси́ в несконча́емый поко́й Небе́сный, / иде́же со А́нгелы лику́еши во све́те всех Творца́.
Богоро́дичен:
Недоуме́ют вси язы́цы, ка́ко Небе́снаго кру́га Верхотво́рец, / в творе́ниих невмести́мый, в ложесна́ Твоя́ воплоща́емь, Всенепоро́чная, всели́ся, / на спасе́ние нас, ве́рно воспева́ющих Тя. Седа́лен, глас 6: Му́ки му́жественно во узи́лищи претерпе́в, / подвиза́вся да́же до боле́зни сме́ртныя, / пото́ков беззако́ний не ужасе́ся: зане́ учине́н бысть в жизнь ве́чную. / Те́мже у́бо научи́ нас в терпе́нии стяжа́ти ду́ши на́ша, / почита́ющих ве́рою пречестну́ю па́мять твою́, преподо́бне Фео́доре. (Два́жды.) Сла́ва, и ны́не, Богоро́дичен: Преукраше́нная Боже́ственною сла́вою, / Херуви́мов и Серафи́мов превы́шши еси́, Пренепоро́чная, / те́мже Тя по до́лгу вси ро́ди ублажа́ют.
Песнь 4
Ирмо́с:
Ты моя́ кре́пость, Го́споди, / Ты моя́ и си́ла, / Ты мой Бог, Ты мое́ ра́дование, / не оста́вль не́дра О́тча / и на́шу нищету́ посети́в. / Тем с проро́ком Авваку́мом зову́ Ти: // си́ле Твое́й сла́ва, Человеколю́бче.
Рачи́тель Госпо́день и кре́пок в ве́ре от ю́ности своея́ был еси́, / ору́жие бо кре́стное на ра́мена взе́м, / совлече́ся одея́ния сме́ртнаго и облече́ся в безсме́ртное, / и дарова́ ти Госпо́дь вене́ц живота́. / Се́го ра́ди земли́ Ко́льския на небеси́ надзира́тель / и помо́щник ме́сту сему́ яви́лся еси́ пресве́тел, / Бо́гу поя́ песнь побе́дную. Егда́ прии́де во оби́тель Пече́нжскую гоне́ние от безбо́жных, / столп непоколеби́м яви́лся еси́, добропобе́дный Фео́доре; / со отце́м свои́м духо́вным, преподобному́чеником Паи́сием, / пра́вды ра́ди стра́ха безбо́жных не убо́яся, ниже́ смути́ся, / и всех святы́х земли́ Ко́льския, я́ко бли́жних сро́дник, в по́мощь призыва́л еси́, / с ни́миже ку́пно ны́не прославля́ешися. Изгна́ние и разлуче́ние с бра́тиею свое́ю / му́жественне претерпе́л еси́, преподобному́чениче Фео́доре, / жесто́кия терпя́ на те́ле боле́зни, уязвля́емь от руки́ си́льных и же́стоких мучи́телей, / но ничто́же возмо́же разлучи́ти тя от любве́ Бо́жия.
Богоро́дичен:
Песносло́вим Тя, Влады́чице, Ра́дость всему́ ми́ру Ро́ждшая, / Того́, я́ко Бла́га, моли́, Всенепоро́чная, презре́ти беззако́ния досто́йно Ему́ вопию́щих: / си́ле Твое́й сла́ва, Человеколю́бче.
Песнь 5
Ирмо́с:
У́тренююще, вопие́м Ти: / Го́споди, спаси́ ны, / Ты бо еси́ Бог наш, // ра́зве Тебе́, ино́го не ве́мы.
Вседержи́теля глас услы́шав, смире́нный Фео́доре, мирска́я вся отри́нул еси́ / и ко реце́ Пече́нзе стопы́ своя́ от ве́си Ча́ваньжския напра́вил еси́, / иде́же, во оби́тели святе́й всели́вся, трудолю́бно подвиза́лся еси́ / и в послуша́ние Бо́гу всеце́ло себе́ вдал еси́. / Рясофо́рный мних бысть служе́бником преподо́бнаго Паи́сия игу́мена, / и сей бе ти друг ве́рен и кров кре́пок. Испове́да пред А́нгелы и челове́ки И́мя Госпо́дне, / поруга́ние и бие́ние претерпе́ от безбо́жных, / вене́ц добро́ты восприя́в, сла́вне Фео́доре: / те́ло бо твое́ во вну́тренних моги́лы безве́стныя, / душа́ же высоте́ хвале́ния угото́вася / и та́ко пред Го́сподем духо́в со А́нгелы вознесе́на бысть. Блаже́нно житие́ твое́ на земли́, сла́вный о́тче, и кончи́на безсме́ртна, / сего́ ра́ди насле́дие нескве́рно и неувяда́емо на Небесе́х стяжа́л еси́, преподо́бне. / Го́споди, моли́твами уго́дника Твоего́ Фео́дора, посети́ щедро́тами Це́рковь Твою́, / ю́же стяжа́л еси́ честно́ю Твое́ю Кро́вию. Богоро́дичен: Я́ко одушевле́нный Черто́г, восприя́вший Царя́ ца́рствующих, / и я́ко Престо́л Влады́чень, Мари́ю Пренепоро́чную в пе́снех возвели́чим.
Песнь 6
Ирмо́с:
Моли́тву пролию́ ко Го́споду / и Тому́ возвещу́ печа́ли моя́, / я́ко зол душа́ моя́ испо́лнися / и живо́т мой а́ду прибли́жися, / и молю́ся, я́ко Ио́на: // от тли, Бо́же, возведи́ мя.
Укрепле́н быв ра́зумом Боже́ственным, / облича́л еси́ отмета́ющихся и́стинныя ве́ры Христо́вы, я́ко пребезу́мных, / скве́рных проде́рзостию и си́лою о кня́зе бесо́встем напыще́нных. / Те́мже Небе́сныя две́ри тебе́ отверзо́шася, блаже́нне, / воспева́ющу Христа́ во вся ве́ки.
Угобжа́ет тя Госпо́дь от ту́ка до́му Своего́, / и пото́ком сла́дости Своея́ напая́ет, / и пресве́тлыя ра́дости испо́лняет, блаже́нный Фео́доре, / призва́ подъя́ти за Христа́ муче́ние и предста́ти Тро́ице Святе́й Ду́хом очище́нных. / Та́ко бли́жния своя́, седя́щия во тьме и се́ни сме́ртней, / лестьми́ безбо́жия помраче́нныя, просвети́л еси́ / и моли́твами твои́ми не попусти́л еси́ а́ду прибли́зитися. А́ще и го́рькими рабо́ты уби́ша врази́ те́ло твое́, преподобному́чениче Фео́доре, / оба́че души́ твоея́ тма не косну́ся. / Те́мже яви́лся еси́ столп огнегоря́щ Це́ркве Христо́вы и хода́тай ве́рен о нас, / тя вы́ну пред Бо́гом прославля́ющих. Богоро́дичен: Ма́ти Всепе́тая, / ми́ру всему́ Искупле́ние от кля́твы зако́нныя роди́вшая, / ны́не на́ша моле́ния прие́млющи, моли́ спасти́ся всем нам. Конда́к, глас 8: Крест свой взе́м, Христу́ после́довал еси́, / мона́шеское житие́ и во́льное страда́ние па́че сладо́сти ми́ра сего́ возлюби́л еси́. / Ве́ру Христо́ву, проти́ву греха́ подвиза́вся, да́же до кро́ви испове́дал еси́, / сего́ ра́ди изба́ви нас от бед и вся́каго зла, о́тче Фео́доре, // и утоли́ на́ша печа́ли моли́твами твои́ми.
И́кос:
В темни́цах градо́в Му́рмана в се́ни сме́ртней томи́лся еси́, / го́рькия рабо́ты в заточе́нии земли́ Ко́ми претерпе́л еси́ / и по́слежде, ча́шу страда́ний му́жественне испи́в, / венце́м неувяда́емым украси́лся еси́ во Ца́рствии Небе́снем, богоблаже́нный Фео́доре. / Да и мы бу́дем гото́ви к воздая́нием Ца́рствия, / и свет бо ве́чный возсия́ет нам во ве́ки моли́твами твои́ми.
Песнь 7
Ирмо́с:
От Иуде́и доше́дше, о́троцы / в Вавило́не иногда́ / ве́рою Тро́ическою пла́мень пе́щный попра́ша, пою́ще: // отце́в Бо́же, благослове́н еси́ Мона́шескаго жития́ о́браз ты яви́ и му́чеников красоту́ просла́ви житие́м твои́м, о́тче Фео́доре, / ны́не же, му́ки и я́звы потерпе́в, по заве́ту Христо́ву живо́т ве́чный обре́л еси. / Те́мже и Христо́с сокро́вищем
безсме́ртия на Небеси́ обогати́ тя, / да, чту́ще пресве́тлую па́мять твою́, во́лею зове́м ти: / сподо́би и нас ра́дости наслади́тися / в Воскресе́ние живота́ ве́чнаго, в сре́тение Госпо́дне. Ра́нами и боле́зньми вели́кими помрачи́ся добро́та телесе́ твоего́, / оба́че све́тлость душе́вная презе́льне возсия́ / благода́тию Свята́го Ду́ха, преподо́бне страда́льче. / Те́мже моли́ся Христу́ Бо́гу, / дабы ве́рным ча́дом Це́ркве Правосла́вныя сподо́битися жи́зни будуща́го ве́ка, / иде́же присе́щает свет Лица́ Бо́жия. Страда́нием во́льным вся грехи́ и отступле́ния, преподобному́чениче Фео́доре, / я́ко пле́велы, исто́ргл еси́ и огне́м соже́гл еси́, / по сем же изы́де се́яти семена́ до́брая слез твои́х, / те́мже ра́достию ны́не пожина́еши ве́чныя жи́зни кла́сы во Ца́рствии Бо́жии. Богоро́дичен: Я́коже бо купина́, ю́же ви́де Моисе́й, не сгара́ше опаля́ема, / та́ко Де́ва неопа́льно пребыла́ еси́, Пра́вды Со́лнце во чре́ве заче́ншая. / Того́ моли́ спасти́ся душа́м на́шим.
Песнь 8
Ирмо́с:
Царя́ Небе́снаго, / Его́же пою́т во́и А́нгельстии, // хвали́те и превозноси́те во вся ве́ки.
Неусы́пна тя и́мамы моли́твенника, / я́ко одержа́ша ны боле́зни сме́ртныя и пото́цы беззако́ния смято́ша ны. / Ты же, о́тче добропобе́дный, во́лны страсте́й утиша́еши, / печа́ли утоля́еши и лю́тых вся́ческих нас избавля́еши, вопию́щих: / благослови́те, вся дела́ Госпо́дня, Го́спода. Мудрова́ния врага́ прего́рдаго от высоты́ се́рдца своего́ в себе́ уби́в, / уму́ Боже́ственному приобщи́лся еси́ во стра́се Госпо́дни, / се́рдцем соверше́нным, и житие́м твои́м чи́стым, и ума́ све́тлостию / зовы́й непреста́нно: / благослови́те, вся дела́ Госпо́дня, Го́спода. Изря́днаго уго́дника Христо́ва пе́сньми благохва́льными почти́м, / я́ко и́го злоключе́ний и страда́ний за Христа́ восприя́л еси́. / От Него́ же во Ца́рствии Бо́жием, / я́ко до́блий во́ин, в поди́р сла́вы облече́н был еси́, / Изба́вителю Бо́гу вопия́: / благослови́те, вся дела́ Госпо́дня, Го́спода.
Богоро́дичен:
Ра́дуйся, Благода́тная, Госпо́дь с Тобо́ю, веща́ Ти Арха́нгел Гаврии́л: / из Тебе́ бо произы́де Отроча́ Предве́чно, / за милосе́рдие неизрече́нное превозноси́мый / отце́в Бог Благослове́нный.
Песнь 9
Ирмо́с:
Устраши́ся всяк слух / неизрече́нна Бо́жия снизхожде́ния, / я́ко Вы́шний во́лею сни́де да́же и до пло́ти, / от деви́ческаго чре́ва быв Челове́к. // Те́мже Пречи́стую Богоро́дицу, ве́рнии, велича́ем.
Боле́зни же и кровь твоя́, о́тче преподо́бне, / непоро́чным се́менем ве́ры яви́шася, / напита́нным оби́льно еле́ем скорбе́й и печа́лей / и напое́нным слеза́ми в ме́ру воздыха́нии твои́х. / Ны́не же славосло́вия приими́ от нас, чад твои́х, / плоды́ се́ятвы твоея́ благословя́щих, му́чениче прехва́льне. Сочи́слился еси́ му́ченическим лико́м оби́тели Пече́нжския, о́тче Фео́доре, / сострада́вшим ти во вся дни и за Христо́м на Голго́фу возше́дшим. / При́сно велича́ем их, и́же кре́пко за и́мя Госпо́дне вооружа́шася, / с ни́ми же и тя ве́рно ублажа́ем. / Да и мы моли́твами твои́ми очище́ны, / очесы́ духо́вными у́зрим черто́г Небе́сный в день Стра́шнаго Суда́ Госпо́дня. Помяни́, свя́тче Бо́жий, нас и всех ве́рою и любо́вию к тебе́ притека́ющих, / и умоли́ Всеми́лостиваго Бо́га исцели́ти ны от вся́кия боле́зни душе́вныя и теле́сныя, / огради́ти от вра́г ви́димых и неви́димых, / я́ко да твои́ми те́плыми моли́твами низпо́слет нам Христо́с благода́ть пронарече́ннаго Ду́ха Уте́шителя / и в час наш сме́ртный да не лиши́т нас Ца́рствия Сла́вы Своея́. Богоро́дичен: Стра́нное и пресла́вное чу́до ви́дим о Тебе́, Богоизбра́нная Влады́чице, / я́ко ми́ра Вседержи́тель, Себе́ ума́лив, плоть от Тебе́ прие́млет / и, пита́я Пло́тию Свое́ю пречи́стою, / к животу́ ве́чному приво́дит лю́ди Своя́. Свети́лен. Подо́бен: Жены́, услы́шите: Посто́м пе́рвее до́бре искуси́вся, тече́ние боже́ственное во и́ночестве соверши́, / второ́е же, злопостражда́в, я́ко добр во́ин Иису́сов, на Небеса́ горе́ взы́де. / Ны́не Христу́ предстои́ши, Фео́доре, о́тче преподо́бне, / за нас моли́ся, те́пле пою́щих тя. (Два́жды.)
Сла́ва, и ны́не, Богоро́дичен:
Ра́дость неизрече́нную ро́ждши, Го́спода, / ра́дости нас Небе́сныя прича́стники сотвори́, / всех Тебе́ почита́ющих, Пречи́стая, благода́ть и́стинну, / от души́ вопию́щих Ти: / не забу́ди Твоя́ рабы́, Благослове́нная Мари́е.
На хвали́тех стихи́ры на 4, глас 6:
Пра́ведных ду́ши в руце́ Бо́жией, / и не прико́снется их му́ка. / Вма́ле нака́зан бе печа́лию и досажде́ниями теле́сными, му́чениче Фео́доре, / вели́кими же облагоде́тельствован был еси́, / я́ко Бог испыта́л тя и обре́те тя досто́йна Себе́. / Я́ко зла́то, в пещи́ смире́ния искуси́ тя / и, я́ко всепло́дие же́ртвенное, прия́т тя, // о́тче достохва́льне. (Два́жды.)
Блаже́н ты, му́чениче Госпо́день Фео́доре, / и́же не соде́ла в руку́ свое́ю беззако́ния, / ниже́ помы́сли на Го́спода лука́вая: / дарова́ бо тебе́ ве́ры благода́ть избра́нну / и жре́бий во хра́ме Госпо́дни уго́днейший. / Я́ко десни́цею покры́л есть тя и мы́шцею Свое́ю защити́л тя. / Сего́ ра́ди прия́л еси́ Ца́рствие благоле́пия / и вене́ц добро́ты от руки́ Госпо́дни. / Та́ко вси ве́рнии в любви́ пребу́дут Ему́, / я́ко благода́ть и ми́лость в преподо́бных Его́ // и посеще́ние во избра́нных Его́.
Сконча́вся вма́ле, испо́лни ле́та до́лга своего́, святы́й Фео́доре, / уго́дна бо бе Го́сподеви душа́ твоя́, / сего́ ра́ди потща́ся от среды́ лука́вствия: / я́ко благода́ть и ми́лость в преподо́бных Его́ / и посеще́ние во избра́нных Его́, / и́бо вмени́ся, сла́вный му́чениче, в сыне́х Бо́жиих, // и во святы́х жре́бий твой есть.
Сла́ва, глас 6:
Се́рдце твое́ кро́тко / и мудрова́ние смире́нно яви́ся, преподо́бне, / и́мже погуби́л еси́ возноше́ния вся врага́, / возвыша́емь боже́ственными доброде́тельми, / о́тче Фео́доре, му́чеников основа́ние, адама́нте тве́рдый. / Ны́не в селе́ниих Небе́сных водвори́лся еси́, / воспева́я со А́нгелы Го́сподеви песнь хвале́бную, / и́бо пра́ведницы во ве́ки живу́т, // и во Го́споде мзда их, и попече́ние их у Вы́шняго.
И ны́не, Богоро́дичен, глас то́йже:
Богоро́дице, Ты еси́ лоза́ и́стинная, / возрасти́вшая нам Плод Живота́, / Тебе́ мо́лимся: моли́ся, Влады́чице, / со святы́ми новому́ченики земли́ Ко́льския // поми́ловати ду́ши на́ша.
Славосло́вие вели́кое, ектении́ и отпу́ст.
НА ЛИТУРГИ́И:
Блаже́нны от кано́на, пе́снь 3-я и 6-я. Проки́мен, глас 7: Восхва́лятся преподо́бнии во сла́ве / и возра́дуются на ло́жах свои́х. Стих: Воспо́йте Го́сподеви песнь но́ву, / хвале́ние Его́ в Це́ркви преподо́бных. Апо́стол к Тимофе́ю, зача́ло 291. Аллилу́ия, глас 6: Блаже́н муж, боя́йся Го́спода, / в за́поведех Его́ восхо́щет зело́. Стих: Си́льно на земли́ бу́дет се́мя его́. Ева́нгелие от Матфе́я, зача́ло 36. Прича́стен: В па́мять ве́чную бу́дет пра́ведник: Моли́тва свято́му преподобному́ченику Фео́дору Пече́нжскому О, вели́кий уго́дниче Христо́в, святы́й преподобному́чениче Фео́доре! К тебе́ мы, гре́шнии и смире́ннии, я́ко к те́плому на́шему засту́пнику и ско́рому помо́щнику, моли́твенно прибега́ем и из глубины́ се́рдца взыва́ем: при́зри на ны ско́ро и умоли́ Человеколю́бца Бо́га, да не осу́дит нас, гре́шных, по беззако́нием на́шим, но да сотвори́т с на́ми по вели́цей Свое́й ми́лости. Огради́ нас свои́м заступле́нием от облежа́щаго ны суему́дрия и неправове́рия, и упаси́ заблу́ждшия о́вцы ста́да Христо́ва, и во дворы́ Госпо́дни сия́ всели́. Огради́ нас от собла́знов, ересе́й и раско́лов и наста́ви тве́рдо в ве́ре Правосла́вней подвиза́тися. Потщи́ся, ско́рый о нас предста́телю, благоприя́тным твои́м хода́тайством умоли́ти Го́спода, да низпо́слет нам ти́хое и богоуго́дное житие́, уврачу́ет Свое́ю благода́тию на́ша боле́зни, душе́вныя и теле́сныя, согре́ет на́ша сердца́ любо́вию друг ко дру́гу и сотвори́т ны братолю́бны и единомы́сленны. Испроси́ та́кожде у Го́спода и всего́ потре́бнаго для жития́ на́шего теле́снаго: земли́ плодоро́дие, благорастворе́ние возду́хов и ми́рное устрое́ние. Страну́ на́шу, ве́си и гра́ды охрани́ моли́твами твои́ми от огня́, пото́па, тру́са, вра́жескаго наше́ствия и вну́тренних нестрое́ний. Утверди́ в нас па́мять сме́ртную, да и мы, во и́стиннем покая́нии и чи́стем
све́дении со́вести на́шея предста́вше ко Го́споду, сподо́бимся десна́го стоя́ния и со все́ми святы́ми воспое́м сла́ву Отцу́, и Сы́ну, и Свято́му Ду́ху во ве́ки веко́в. Ами́нь.