Акафист Преподобному Феодориту, просветителю Кольскому.
Конда́к 1
Избра́нный уго́дниче, Феодори́те преблаже́нный, / ка́ко не удиви́тися нам доброде́тельным дело́м твои́м преди́вным? / Что возглаго́лем о том, якова́я име́л еси́ дарова́ния от Бо́га, / си́речь да́ры Ду́ха Свята́го: / си́лы исцеле́ния, дар проро́чествия, дар му́дрости, / уме́ние гре́шники уловля́ти от презлы́х дел диа́вольских / и наставля́ти на путь покая́ния, / дар приводи́ти от нече́стия и многоле́тнаго дре́вняго неве́рия / в ве́ру Христо́ву язы́ки неве́рныя? / О, па́стырю преди́вный, / я́ко име́яй таково́е бога́тное дерзнове́ние ко Го́споду, / от вся́ких нас бед свободи́, / с похвале́нием зову́щих ти: Ра́дуйся, преподо́бне Феодори́те, // равноапо́стольное служе́ние в земли́ Ко́льстей нам яви́вый.
И�кос 1 А́нгела земна́го и небе́снаго челове́ка, / преподо́бнаго отца́ на́шего Феодори́та почти́м, / се́мя пра́вды ева́нгельския во язы́цех земе́ль се́верных посе́явшаго / и вся сия́ ко Христу́ приве́дшаго, / и просла́вим апо́стольския по́двиги его́. / А́нгельское твое́ во плоти́ житие́ прови́дев, / всея́ тва́ри Созда́тель от ю́ности твоея́ угото́ва тя в сосу́д че́стен, // те́мже научи́ вопи́ти тебе́ си́це: Ра́дуйся, благочести́ваго ко́рене о́трасле взраще́нная; Ра́дуйся, в науче́нии кни́жнем па́че све́рстных просвеще́нный.
Ра́дуйся, в ю́ности ра́зум соверше́нный яви́вый; Ра́дуйся, и́дольскую лесть в земли́ се́верней упраздни́вый. Ра́дуйся, оби́телей и церкве́й зижди́телю неусыпа́емый; Ра́дуйся, благове́стник Христо́ва уче́ния неиссяка́емый. Ра́дуйся, о́тче преподо́бне, благода́тию Христо́вою осене́нный; Ра́дуйся, ста́рче блаже́нне, да́ром прозре́ния свы́ше одаре́нный.
Ра́дуйся, преподо́бне Феодори́те, // равноапо́стольное служе́ние в земли́ Ко́льстей нам яви́вый.
Конда́к 2
О, му́же святы́й Феодори́те, / рождество́ твое от ме́ста Росто́ва сла́внаго, / отону́дуже и святы́й Се́ргий игу́мен провозрасте́. / От рожде́ния своего́ был еси́ чист и непоро́чен, / я́сным умо́м и благоче́стием одаре́н / и от ю́ных лет Бо́гом на по́двиг ве́лий избра́н. / Изде́тска во оби́тели свята́го Григо́рия Богосло́ва воспита́нный, / та́мо Бо́жиим смотре́нием на путь светонаста́вника язы́чников ди́вих изряди́лся еси́. / Мы же, зря́ще пути́ Бо́жия неисповеди́мыя, тебе́ уготова́нныя, / си́це вопие́м: // Алиллу́ия.
И�кос 2 Ра́зум свы́ше обре́л еси́, / в затво́ре Росто́встем мно́зим язы́ком навы́к, / богосло́вию возжеле́л еси́ поуча́тися, и мно́жество гре́ческих писа́ний духо́вных изуве́дал еси́, / и та́мо взалка́л еси́ поити́ в зе́млю необетова́нную, не пу́тную, в зе́млю жа́ждущую, / подо́бяся сла́вному Стефа́ну, Вели́кия Перми́ просве́щнику. / Мы же, дивя́щеся жела́нию послу́шника ю́ностнаго и толи́ко небомы́сленнаго, // та́ко воспои́м: Ра́дуйся, гра́да Росто́ва благо́е прозябе́ние; Ра́дуйся, изде́тска воста́вый на Христо́во служе́ние.
Ра́дуйся, любве́ ра́ди Го́спода до́м оте́ческий оста́вивый; Ра́дуйся, чистото́ю де́тищною исто́чники страсте́й уста́вивый. Ра́дуйся, от ю́ности твоея́ Еди́наго Христа́ возлюби́вый; Ра́дуйся, се́рдце твое́ зерца́лом богомы́слия утвержди́вый. Ра́дуйся, целому́дрия венце́м от ю́ности увяза́нный; Ра́дуйся, я́ко и́де путе́м, Стефа́ном Пе́рмским указа́нным. Ра́дуйся, преподо́бне Феодори́те, // равноапо́стольное служе́ние в земли́ Ко́льстей нам яви́вый.
Конда́к 3
В третиенадеся́тое ле́то во́зраста твоего́ от до́му роди́телей свои́х изше́л еси́, блаже́нне, / удали́лся еси́ в монасты́рь, и́же есть во ото́це Солове́цтем мо́ря Севернаго. / И та́мо пребы́в ле́то еди́но, / в четвертоенадеся́тое же ле́то возра́сту своего́ прия́л еси́ мни́шеский
о́браз / и нарече́н был еси́ Феодори́том. / Вда́лся еси́ во свято́е послуша́ние еди́ному пресви́теру Зоси́ме, / свя́ту, прему́дру и многоле́тну су́щу. / Та́мо же навы́че вся́цей духо́вней прему́дрости / и взы́де ко преподо́бию по степе́нем доброде́телей. / Мы́ же, дивя́щеся таково́му о тебе́ Бо́жию промышле́нию, / со умиле́нием вопие́м ти́: // Алиллу́ия.
И�кос 3 Хиротони́сан был еси́ от архиепи́скопа Но́ва гра́да сла́внаго Мака́рия во диа́коны, / изы́де на созерца́ние ко явле́нному и вели́кому му́жу, чудотво́рцу су́щу, Алекса́ндру Сви́рскому. / Он же прия́л еси́ тя со прови́дением вне монастыря́, / усре́сти тя изшед, рече́: сын Авра́мль прии́де к нам, Феодори́т диа́кон. / Я́ко чи́ст у чи́стаго и непоро́чный у непоро́чнаго, / зело́ возлюби́ тя преподо́бный, доко́ле пожи́л еси́ в монастыре́ о́ном. / Мы же, ви́дяще чу́дное Бо́жие смотре́ние о сре́тении сем, // вопие́м ти си́це: Ра́дуйся, с жа́ждею к по́двигом и́ноческим себе́ устреми́вый; Ра́дуйся, любве́ ра́ди боже́ственныя житие́ пусты́нное возлюби́вый.
Ра́дуйся, богому́дре, соверше́ннаго послуша́ния испо́лненный; Ра́дуйся, я́ко ре́вность твоя́ по Бо́зе, я́ко пла́мень о́гненный. Ра́дуйся, преподо́бнаго Алекса́ндра спо́стниче и собесе́дниче; Ра́дуйся, Сви́рскаго моли́твенника любе́зный сослуже́бниче. Ра́дуйся, дру́жбу и споборе́ние с Мака́рием Ри́млянином сохрани́вый; Ра́дуйся, от уст Алекса́ндровых прему́дрость духо́вную уясни́вый. Ра́дуйся, преподо́бне Феодори́те, // равноапо́стольное служе́ние в земли́ Ко́льстей нам яви́вый.
Конда́к 4
Устреми́лся еси́, о́тче всехва́льный, / изве́дати ре́вностно и́ны вели́кия монастыри́, та́мо су́щия, / и оби́тели ма́лыя и пу́стыни, / ища́ хра́брых во́инов Христо́вых, / я́же вою́ют сопроти́в нача́л власте́й те́мных, мироде́ржцев ве́ка сего́. / И обше́д и́ны вси благооби́тельныя концы́, / обре́л еси́ духо́вных мни́хов и святы́х
муже́й мно́гих. / И та́мо сподвиза́лся еси́ с ни́ми, поревнова́в их жесто́кому и свято́му жи́тельству, / умуча́я и покоря́я плоть свою́ в порабоще́ние и в послуша́ние ду́ху. / Помози́ и нам, о́тче преподо́бный, / та́ко благода́тию Ду́ха очи́ститися, / да пое́м тобо́ю благоде́ющему на́м Бо́гу: // Алиллу́ия.
И�кос 4 Сре́тил еси́, о́тче, в ме́стех неудобопрохо́дных ины́х нема́ло мни́хов пусты́нников, / муже́й освяще́нных и престаре́вшихся уже́ во днех. / И та́мо с ни́ми в Фиваи́де Се́верней, во труде́х духо́вных подвиза́яся, / розже́глся еси́ жела́нием пусты́ннаго безмо́лвнаго жи́тельства, / поне́же пусты́ня поко́я и ума́ почива́ние, / презе́льная роди́тельница и воспита́тельница, / клевре́т и тишина́ мысли и боже́ственнаго зре́ния плодови́тый ко́рень, / и́стиная содруже́бница с Бо́гом сопряже́ния духо́внаго. / Сему́ Бо́жию о тебе́ благоволе́нию дивя́щеся, // воспева́ем ти́ си́це: Ра́дуйся, трудо́в ра́ди духо́вных в пусты́нях посели́выйся; Ра́дуйся, отсека́ти свою́ во́лю грехо́вную научи́выйся.
Ра́дуйся, любо́вь к путынножи́тельству со отцы́ раздели́вый; Ра́дуйся, открове́нием по́мыслов ду́шу свою́ укрепи́вый. Ра́дуйся, пло́ть свою ду́хови всеобра́зно покори́вый; Ра́дуйся, ду́хом ра́зума язы́к лопа́рский новоле́пный сотвори́вый. Ра́дуйся, стра́нниче ма́лый, иски́й Оте́чества Го́рняго; Ра́дуйся, возше́дый на высоту́ соверше́нства духо́внаго. Ра́дуйся, преподо́бне Феодори́те, // равноапо́стольное служе́ние в земли́ Ко́льстей нам яви́вый.
Конда́к 5
Последи́ отше́л еси́, о́тче до́блественный, / в са́мый край земли́ се́верныя, в далеча́йшую пусты́ню, / в язы́к глубо́ких ва́рваров, лопаре́й ди́ких, / плывя́ вели́кою Ко́лою-реко́ю, / я́же впада́ет в мо́ре Си́верское. / И та́мо изше́л е́си из кораблеца́ и возше́л еси́ на го́ры высо́кия, / я́же Свято́е Писа́ние нарица́ет ре́брами се́веровыми, / и всели́лся еси́ в тех лесе́х, / в вели́цых пу́стынях о́ных непроходи́мых. / И, та́мо воздви́гнув не́кое жили́ще, / себе́ самаго́
предста́вил еси́ селе́нием Бо́гу Вы́шнему, / при́сно поя́ Ему́ моли́твы в по́двизех и поще́нии: // Алиллу́ия.
И�кос 5 Пропове́дует пусты́ня Лопа́рская по́двиги и труды́ твоя́, / богоно́сне уго́дниче Христо́в: / де́бри бо, леса́ и горы ея́ моли́твою облагоуха́л еси́, / проро́ком Бо́жиим и пусты́нником дре́вним подража́я. / Яви́лся еси́ пусты́ни Ко́льския прозябе́ние многопло́дное, / дара́ми Ду́ха Свята́го осия́нное. / Мы́ же, суето́ю помраче́ннии и во гресе́х все́ житие́ ижди́вшии, / дивя́щеся по́двигу твоему́ пусты́нному, // си́це вопие́м: Ра́дуйся, отше́льниче и молча́льниче преди́вный; Ра́дуйся, исто́чниче богому́дрия неизжди́вный.
Ра́дуйся, земли́ да́льния моли́твенниче усе́рдный; Ра́дуйся, пусты́ни Ко́льския прозябе́ние благосе́рдное. Ра́дуйся, цве́те ра́йский, на ка́мени ре́бер се́веровых прозябы́й; Ра́дуйся, я́ко за́поведи Бо́жией не преступи́ и судьбы́ Его́ не забы́. Ра́дуйся, благогла́сниче, до коне́ц земли́ сло́во Бо́жие воспе́вый; Ра́дуйся, боготе́чное свети́ло, вси́ концы́ пусты́ни я́ве облиста́вый. Ра́дуйся, преподо́бне о́тче Феодори́те, // равноапо́стольное служе́ние в земли́ Ко́льстей нам яви́вый.
Конда́к 6
Обре́л есть Феодори́т сла́вный та́мо еди́наго ста́рцапусты́нника / и́менем Митрофа́на, си́речь во и́ночестве Три́фона. / И пребыва́ша вку́пе в прегорча́йшей пусты́ни, Бо́гом храни́мии, / пита́ющеся от жесто́ких зе́лий и коре́ния, / я́же та́мо преизво́дит пусты́ня о́ная. / И подвиза́ся та́мо со о́ным предрече́нным ста́рцем, / а́ки два́десят лет во святе́м и непоро́чнем жи́тельстве. / Та́ко ми́лостию Бо́жию просвети́тели Ко́льстии и чудотво́рцы, / я́ко свети́льницы в земли́ се́верней, возже́ни бы́ша. / Мы же, тому́ врадостне́тивше, / Бо́гу си́це вопие́м: // Алиллу́ия.
И�кос 6 Просвети́ся святы́м креще́нием той язы́к ло́пский / труда́ми ва́шими, отцы́ пресла́внии. / Рекли́ бо есте́ о язы́це сем, я́ко лю́дии тии зело́ про́сты, и кро́тцы, / и отню́дь вся́каго лука́вства неиску́сны, / та́кожде ко спасе́нному пути́ тща́ливы и рачительны зело́, / я́ко последи́ мно́жества от них мни́шеское житие́ возлюби́ша / за благода́тию Христа́ на́шего и за Того́ свяще́ными уче́нии, / поне́же науче́ни бы́ша Писа́нию и моли́тве, / яже приве́де им от язы́ка слове́нска в язы́к лопа́рский Феодори́т преподо́бный. // Мы же апо́стольство ва́ше честву́ем провеща́нии сицевы́ми: Ра́дуйтеся, таи́нницы Бо́жии, в пусты́ни не утаи́вшиися; Ра́дуйтеся, свети́льницы Христо́вы, во мра́це полно́щном просвети́вшиися.
Ра́дуйтеся, неве́рных уче́нии свои́ми удиви́вшии; Ра́дуйтеся, о́вцы Христо́вы во еди́но ста́до совокупи́вшии. Ра́дуйтеся, и́дольския ле́сти усе́рднии истреби́телие. Ра́дуйтеся, диа́вольских ко́зней благодерзнове́ннии обличителие; Ра́дуйтеся, умы́, демоностра́шием плене́нныя, боже́ственным све́том озари́вшии; Ра́дуйтеся, равноапо́столи сла́внии, язы́ки се́верныя в ве́ру улови́вшии. Ра́дуйтеся, преподо́бнии отцы́ Ко́льстии, // равноапо́стольное служе́ние в земли́ се́верней нам показа́вшии.
Конда́к 7
Я́ко хра́брый во́ин Христо́в, / вся́каго мирска́го пристра́стия кроме́, о́тче Феодори́те, бы́л еси́, / проти́ву нача́л власте́й те́мных, мироде́ржцев ве́ка сего́ воста́л еси́. / Духо́вным отце́м и наказа́телем бе преподо́бному Варлаа́му, / прише́дшему к тебе́, известву́я о уби́йстве и прося́ проще́ния, / слеза́ми зе́млю омака́я о соде́янных в я́рости и невоздержа́нии. / Ты же дал еси́ ему́ и́го ле́гкое: / е́же ме́ртваго носи́ти во гро́бе, до́ндеже изгние́т те́ло уме́ршия супру́жницы, / самому́ же в посте́ и моли́тве пребыва́ти, / и таково́ воздержа́ние име́ти, / я́ко и ры́бе то́чию еди́ною на Па́сху
причаща́тися. / Мы же, дивя́щеся повеле́нию Ду́ха в епитимии́ такове́й / и смире́нному послуша́нию Варлаа́мову, / Подвигополо́жнику, ско́рби на́ша в ра́дость Претворя́ющему, / си́це вопие́м: // Алиллу́ия.
И�кос 7 За благода́тию Христо́вою распространи́ся в том язы́це про́поведь ева́нгельская, / и явле́нни быша тобо́ю, о́тче чудоде́тельный, / во глубо́ких ва́рварех чудеса́ и знаме́ния, / я́ко глаго́лет боже́ственый Па́вел: / знаме́ние, рече́, не ве́рующим, но безве́рников ра́ди. / Тогда́ науче́ннии от тебе́ и оглаше́ннии лопля́не / еди́наго дня крести́шася, я́ко две ты́сящи и со же́нами и детьми́. / Си́це сей блаже́ный и апо́столом подо́бный муж / испра́вил есть труды́ свои́ми. / Мы́ же, взира́юще на дела́ сия и дивя́щеся, // си́це вопие́м ти́: Ра́дуйся, Тро́ицу Боже́ственную пра́во сла́вити научи́вый; Ра́дуйся, олядене́вшая сердца́ чад свои́х согре́вый.
Ра́дуйся, я́ко возмо́гл еси́ нойд лопа́рских мудрова́ния препре́ти; Ра́дуйся, кро́ткий посреде́ чад, я́коже дои́лица, гре́ющий своя́ де́ти. Ра́дуйся, мно́гих чуде́с творе́ния от Го́спода яви́вый; Ра́дуйся, духо́вных ча́д твои́х креще́нием породи́вый. Ра́дуйся, честно́е носи́ло Святы́я Тро́ицы и похвале́ние; Ра́дуйся, чистото́ю и святы́нею А́нгелом уподобле́ние. Ра́дуйся, преподобне о́тче Феодори́те, // равноапо́стольное служе́ние в земли́ Ко́льстей нам яви́вый.
Конда́к 8
Не терпи́т дре́вний супоста́т челове́ческаго ро́да, / очи́ма зави́стныма зря́ благоче́стие, / труда́ми твои́ми, о́тче Феодори́те, возраста́емо, / и разседа́яся не́навистию. / Подуща́ет на тя новособра́нных монастыря́ мни́хов, / шепча́ неви́димо во у́ши и глаго́ля им во се́рдце: / тя́жек вам путь сей и неподъе́млем, / и никто́же возмо́жет от челове́ков претерпе́ти уста́вом, / вам от игу́мена преда́нным; / ка́ко мо́жете без име́ний жи́ти, / свои́ма
рука́ма хлеба́ добыва́юще? / Ты же, о́тче святы́й, / моля́ся об обраще́нии заблужда́ющих, / молчали́вою кро́тостию и игу́менской тве́рдостию / сих вразумля́л еси́, воспева́я Бо́гу: // Алиллу́ия.
И�кос 8 Поне́же ину́ю за́поведь, о́тче преподо́бный, / пре́дал еси́ им, уста́в Солове́цких Зоси́мы и Савва́тия: / ктому́ не то́кмо жены́, / ниже́ скота́ еди́наго отню́д же́нскаго по́лу не име́ти та́мо. / Сего́ ра́ди сложи́вшеся со диа́волом, мни́си о́нии вознеи́стовишася: / има́ют тя, ста́рца свята́го, и бию́т неща́дно, / и от стра́ны тоя́ изгоня́ют, а́ки врага́ не́коего. / Ты же по́йде от тех пу́стынь понево́ле, / и быва́еши поставля́емь от святи́теля Мака́рия игу́меном / во монастыре́ Ко́куевом, на у́стие реки́ Ни́вы, над мо́рем на на́волоце. / Мы́ же, зря́ще твое́ кре́пкое благоду́шие и зижди́теля терпе́ние, // благоче́стно тя почита́ем и со удивле́нием вопие́м ти си́це: Ра́дуйся, му́жу скорбе́й, сора́дуяйся со святы́м Па́влом во страда́нии; Ра́дуйся, со смире́нием таковы́я беды́ претерпе́вый во изгна́нии.
Ра́дуйся, я́ко па́стырь милосе́рдный, развраще́нных ча́д не отри́нувый; Ра́дуйся, я́ко оте́ц миролюби́вый, вы́ну я ко Христу́ зовы́й. Ра́дуйся, науча́яй крест свой невозноси́тельно и терпели́вно нести́; Ра́дуйся, я́коже са́м себе́ восхоте́х и́скренняго своего́ спасти́. Ра́дуйся, адама́нте, козньми́ вра́жиими несокруши́мый; Ра́дуйся, вяза́вый князе́й вра́жиих запреще́нием нереши́мым. Ра́дуйся, преподо́бне о́тче Феодори́те, // равноапо́стольное служе́ние в земли́ Ко́льстей нам яви́вый.
Конда́к 9
Царь же вели́кий Иоа́нн Васи́льевич / а́бие призыва́ет тя, о́тче, / и поставля́ет архимандри́том Евфи́миева монастыря, / и́же есть близ вели́каго ме́ста Су́здаля. / Поне́же и там обре́л ты зело́ необузда́нных мни́хов / и своево́льно, не по уста́вом и святы́м
пра́вилом живу́щих, / и́хже обуздава́еши и востяза́еши стра́хом Бо́жиим, / наказу́я по Васи́лиеву уста́ву жи́тельствовати, / и облича́еши за сребролю́бие и пия́нство. / Мы же, ве́дуще тя, я́ко му́жа не то́кмо в ра́зуме и прему́дрости мно́зей, / но и от рожде́ния своего́ чи́ста и непоро́чна, / ктому́ же и тре́звость во вся дни живота́ своего́ храня́ща, взыва́ем ти: / не забу́ди на́с в непоро́чных моли́твах твои́х, / в ра́дости Бо́гу пою́щих: // Алиллу́ия.
И�кос 9 Ви́дяще тя, мно́зи та́мо живу́щии мни́си, / наро́читии и доброжи́тельнии му́жи, / вседу́шне обра́довани ти бы́ша, я́ко му́жу испе́рва во преподо́бии и святы́ни су́щу. / И о сем па́че лука́вии мни́си за́вистию разседа́еми бы́ша, / ви́девше тя от благолюби́вых и святы́х и́ноков вельми́ почита́ема. / Ты же зван был еси́, о́тче превозвы́шенный, / ко двору́ ца́рскому, я́ко зна́нный богосло́в и ве́дущий гре́ческий язы́к, / посо́льства ра́ди от Патриа́рха Константинопо́льскаго. / Мы же, просвеща́еми све́том доброде́телей твои́х, // со умиле́нием песносло́вим си́це: Ра́дуйся, христиа́нскаго благоче́стия и́стинный храни́телю; Ра́дуйся, Златоу́стаго Святи́теля му́жеству ревни́телю.
Ра́дуйся, гла́се небе́сныя и́стины, злонра́вных и бу́их умудря́яй; Ра́дуйся, гро́ме благоти́шный, соблазня́ющих устраша́яй. Ра́дуйся, враго́в Це́ркве Христо́вы зазо́рчивый обличи́телю; Ра́дуйся, нечести́вых вити́й немо́лчный посрами́телю. Ра́дуйся, зна́нный богосло́ве бесе́дования превы́спреннаго; Ра́дуйся, чу́ден песносло́вец жития́ а́нгельскаго, и́стоваго. Ра́дуйся, преподо́бне о́тче Феодори́те, // равноапо́стольное служе́ние в земли́ Ко́льстей нам яви́вый.
Конда́к 10
Пи́шеши, преподо́бне о́тче Феодори́те, / еписто́лию на Пе́ченгу ко и́скреннему дру́гу своему́ Три́фону, / да́бы ста́рца сего́ пред ца́рским лице́м поста́вити / и об оби́тели его́ хода́тайствовати. / И отто́ле вели́кий Царь возлюби́л есть страны́ Пе́ченжския, / а па́че преподо́бнаго Три́фона, / и пожа́ловав его́ и одари́в оби́тель
кампа́ны и церко́вною у́тварию бога́тно, / отпусти́л есть с ми́лостивым призре́нием. / Потщи́мся же и мы / всеме́рно подража́ти братолю́бию и щедро́ству твоему́, Феодори́те, / да благоприя́тно Бо́гу возопие́м: // Алиллу́ия.
И�кос 10 Па́ки призыва́ет тя царь, я́ко му́жа иску́сна и му́дра, / повелева́яй посо́льствовати к Патриа́рху Константинопо́льскому / и проси́ти благослове́ния о коронова́нии, / и о таково́м благослове́нии и о велича́нии, / яковы́м чи́ном христиа́нстии Це́сари Ри́мстии / от Па́пы и Па́триархов венча́еми бы́ша. / Ты же, повеле́ния царе́ва послу́шав, / уже́ в масти́тей ста́рости и в не́мощнем те́леси́ был еси́, / оба́че пои́де с ра́достию на таково́е посо́льство. / Мы же, дивя́щеся послуша́нию твоему́, // воспева́ем ти си́це: Ра́дуйся, при глави́зне Ца́рския вла́сти стоя́вый; Ра́дуйся, кре́посте держа́вы на́шея ко́рень созида́вый.
Ра́дуйся, Гро́знаго царя́ хода́таю ве́рный; Ра́дуйся, небрегу́щий боле́зни и ста́рости тле́нной. Ра́дуйся, христиа́нскаго благоче́стия и́стинный ревни́телю. Ра́дуйся, осо́бенный Росси́йской держа́вы храни́телю. Ра́дуйся, не́мощи телесе́ нивочто́же вмени́вый; Ра́дуйся, небе́сною сла́вою ду́шу твою́ возвесели́вый. Ра́дуйся, преподо́бне отче Феодори́те, // равноапо́стольное служе́ние в земли́ Ко́льстей нам яви́вый.
Конда́к 11
Ходи́л еси́ вя́щше ле́та еди́наго, о́тче наш преподо́бне, / и на пути́ мно́зи беды́ и труды́ подъя́л еси́, / та́мо же о́гненным неду́гом в Константи́не гра́де а́ки два ме́сяца объя́т был еси́, / но и о́то всех сих благода́тию Бо́жиею изба́влен был еси́, / возврати́вся здрав, принесе́ со благослове́нием собо́рным посла́ние от Патриа́рха / ко ца́рскаго са́на возведе́нию Вели́кому кня́зю Росси́йскому. / Та́ко веще́ственно тобо́ю бы́сть помышле́ние ве́лие: / Москва́ – Тре́тий Рим есть, / да и мы́ вси́, досто́йно почита́юще страдáльчества твоя́, / благода́рственно вопие́м Го́споду: // Алиллу́ия.
И�кос 11. Иера́рси гре́честии во ди́вости глаго́лаша, / я́ко свято́му му́жу о́ному, Феодори́ту Ко́льскому, / сам Патриа́рх удиви́ся, послу́шав рече́ния и бесе́дования его́ прему́драго, / та́кожде и узре́в жи́тельства его́ благоподража́тельнаго и священноле́пнаго. / Егда́ восхоте́ царь Иоа́нн почти́ти тя, о́тче, да́ры бога́тыми да вла́стию духо́вною, / тогда́ да́ры царя́ земна́го Небе́снаго ра́ди Ца́рствия отве́ргл еси́, рече́: / аз я́ко вла́стию, так и сре́бреники не обыко́х наслажда́тися, / но то́чию сего́ прошу́, / да с поко́ем и со безмо́лвием в ке́ллии до изше́ствия моего́ пребу́ду. / Те́мже внима́я словесе́м твои́м прему́дрым, // от усе́рдия на́шего вопие́м ти си́це: Ра́дуйся, о́браз нищеты́ духо́вныя ди́вно воспе́вый; Ра́дуйся, ми́ра сего́ кра́сная Бо́га ра́ди презревый.
Ра́дуйся, свеще́ неугаси́мая, в пусты́ни ди́вей пламене́ющая; Ра́дуйся, забра́ло зла́тое, нас от бед и напа́стей защища́ющее. Ра́дуйся, достосла́вный в отце́х Правосла́вия храни́телю; Ра́дуйся, достойнопе́тый в певце́х правотолю́бия ревни́телю. Ра́дуйся, ратобо́рец неусыпа́емый на стра́сти грехо́вныя; Ра́дуйся, свети́льниче сия́яй, горя́й дарова́нии духо́вными. Ра́дуйся, преподобне отче Феодори́те, // равноапо́стольное служе́ние в земли́ Ко́льстей нам яви́вый.
Конда́к 12
Вои́стину сие́ удивле́ния досто́йно: / ка́ко в толи́цей ста́рости масти́тей / в ке́ллии с поко́ем пребы́ти не восхоте́л еси́, старче преди́вный, / таковы́я неудобоприя́тныя и жесто́кия пути́ па́ки претерпе́л еси́, / ле́том пла́ваяй по мо́рю, / зимо́ю же на скороше́ственных еле́нех путеходя́й по непрохо́дным пусты́ням, / усе́рдно посеща́л еси́ ча́да своя духо́вная, / я́ко мни́хи, тако́жде и лопля́ны, / науче́нныя и креще́нныя тобо́ю в ве́ру Правосла́вную. / Мы же, дивя́щеся благи́м твои́м по́двигом, / почти́м их се́рдцем и усты́, / да благоприя́тно чудоде́ющему в тебе́ Бо́гу вопие́м: // Алиллу́ия.
И�кос 12 Воста́ни с на́ми, правосла́вный собо́ре вселе́нский, / просла́вим Благоде́теля всех Бо́га, / воздви́гшаго в земли́ Росси́йстей преподо́бнаго отца́ на́шего Феодори́та, / по́двиги равноапо́стольныя в се́верных преде́лех Святы́я Руси́ поне́сшаго / и пра́вду Бо́жию неве́дущим лопля́ном возвести́вшаго. / Мы же хва́лим тя вси, великопропове́дателя Лапла́ндскаго, / ублажа́ем достопа́мятное житие́ твое́, // воспева́юще песнь благодаре́ния: Ра́дуйся, челове́че Бо́жий, доброде́тельми Ева́нгельскими украше́нный; Ра́дуйся, преподо́бным отца́м Стефа́ну и Евфи́мию уподобле́нный.
Ра́дуйся, побежде́ние враго́в ви́димых и неви́димых яви́вый; Ра́дуйся, свои́м приме́ром нам путь ко спасе́нию откры́вый. Ра́дуйся, во Ца́рствии Небе́снем со Христо́м пребыва́яй; Ра́дуйся, нас во мра́зех грехо́в су́щих неоску́дно согре́ваяй. Ра́дуйся, исто́чниче боговеща́нный, живоно́сный и пречи́стый; Ра́дуйся, стено́ и покро́ве земли́ се́верней и все́й держа́ве Росси́йстей. Ра́дуйся, преподобне отче Феодори́те, // равноапо́стольное служе́ние в земли́ Ко́льстей нам яви́вый.
Конда́к 13
О, вели́кий просвети́телю земли́ Кольския, / равноапо́стольный и богому́дрый преподо́бне о́тче наш Феодори́те, / ско́рый засту́пниче все́м на́м во вся́ких беда́х и ско́рбех! / Ма́лое сие́ на́ше приноше́ние прие́м, / умоли́ Подвигополо́жника и Соверши́теля Иису́са, / да сохрани́т край наш се́верный, / и вся́кий град, и страну́ христиа́нскую от вся́кия напа́сти и обстоя́ния, / да излие́т на ны пото́цы ми́лости Своея́, / да просвети́т ны луча́ми свя́тости, / и да изба́вит ны возду́шных мыта́рств и ве́чныя му́ки, / и сподо́бит Небе́снаго Ца́рствия Своего́, / иде́же с тобо́ю и со́нмом святы́х Земли́ Росси́йския / воспое́м Бо́гови хвале́бную песнь: // Алиллу́ия, Алиллу́ия, Алиллу́ия. (Сей конда́к чте́тся три́жды, зате́м 1-й и́кос и 1-й конда́к)
И�кос 1 А́нгела земна́го и небе́снаго челове́ка, / преподо́бнаго отца́ на́шего Феодори́та почти́м, / се́мя пра́вды ева́нгельския во язы́цех земе́ль се́верных посе́явшаго / и вся сия́ ко Христу́ приве́дшаго, / и просла́вим апо́стольския по́двиги его́. / А́нгельское твое́ во плоти́ житие́ прови́дев, / всея́ тва́ри Созда́тель от ю́ности твоея́ угото́ва тя в сосу́д че́стен, // те́мже научи́ вопи́ти тебе́ си́це: Ра́дуйся, благочести́ваго ко́рене о́трасле взраще́нная; Ра́дуйся, в науче́нии кни́жнем па́че све́рстных просвеще́нный.
Ра́дуйся, в ю́ности ра́зум соверше́нный яви́вый; Ра́дуйся, и́дольскую лесть в земли́ се́верней упраздни́вый. Ра́дуйся, оби́телей и церкве́й зижди́телю неусыпа́емый; Ра́дуйся, благове́стник Христо́ва уче́ния неиссяка́емый. Ра́дуйся, о́тче преподо́бне, благода́тию Христо́вою осене́нный; Ра́дуйся, ста́рче блаже́нне, да́ром прозре́ния свы́ше одаре́нный. Ра́дуйся, преподо́бне Феодори́те, // равноапо́стольное служе́ние в земли́ Ко́льстей нам яви́вый.
Конда́к 1
Избра́нный уго́дниче, Феодори́те преблаже́нный, / ка́ко не удиви́тися нам доброде́тельным дело́м твои́м преди́вным? / Что возглаго́лем о том, якова́я име́л еси́ дарова́ния от Бо́га, / си́речь да́ры Ду́ха Свята́го: / си́лы исцеле́ния, дар проро́чествия, дар му́дрости, / уме́ние гре́шники уловля́ти от презлы́х дел диа́вольских / и наставля́ти на путь покая́ния, / дар приводи́ти от нече́стия и многоле́тнаго дре́вняго неве́рия / в ве́ру Христо́ву язы́ки неве́рныя? / О, па́стырю преди́вный, / я́ко име́яй таково́е бога́тное дерзнове́ние ко Го́споду, / от вся́ких нас бед свободи́, / с похвале́нием зову́щих ти: Ра́дуйся, преподо́бне Феодори́те, // равноапо́стольное служе́ние в земли́ Ко́льстей нам яви́вый.
Молитва преподобному Феодориту просветителю Кольскому О, преподо́бне и богоно́сне о́тче наш Феодори́те, Ду́ха Свята́го сосу́де избра́нный, Христоподража́тельный в Небе́сный Сио́н наста́вниче и руководи́телю всем, благоче́стно жи́ти хотя́щим, о́бразе благонра́вия, благоиску́сный ко́рмчий корабля́ мы́сленнаго, чрез мо́ре ми́ра сего́ к Небе́сному приста́нищу пла́вающаго, во па́стырех Христо́вых ди́вный первоподви́жниче, уве́нчанный Боже́ственною благода́тию, Вели́кия Лапла́ндии равноапо́столе, па́стырю наш до́брый и учи́телю прему́дрый, монастыре́й и церкве́й Божиих зижди́телю неутружде́нный, свети́льниче Ру́сскаго Се́вера, вели́кий чудотво́рче и неусыпа́емый моли́твенниче! К тебе́ во умиле́нии душ и сокруше́нии се́рдец благонаде́жно притека́ем и вопие́м, прося́ще смире́нно по́мощи твоея́ и те́плаго ко Христу Бо́гу предста́тельства. Да твои́ми богоприя́тными моли́твами испро́сиши нам от Него́ человеколю́бную ми́лость и оставле́ние мно́гих на́ших согреше́ний. Посети́ ны обильно́ю и свято́ю свое́ю любо́вию, е́юже сла́вно преуспе́л еси́ еще́ во дни твоя́ земны́я и до пра́ведныя твое́й кончи́ны во оби́тели Солове́цтей, вразумля́я нас в за́поведех Христо́вых, о ни́хже до́бре поревнова́л еси́ до после́дняго часа́ твоея́ многотру́дныя равноапо́стольныя жи́зни. Испроси́ нам, немощству́ющим душе́ю и бе́дствующим в ско́рбех, благоприя́тное и спаси́тельное вре́мя на покая́ние, и́стинное исправле́ние и обновле́ние на́шего жития́, в не́мже мы, гре́шнии, осуети́хомся умо́м и се́рдцем, преда́хом себе́ непотре́бным и лю́тым страсте́м, поро́ком и беззако́нием, и́мже несть числа́. Приими́ у́бо, соблюди́ и покры́й нас кро́вом твоея́ мно́гия ми́лости, низпосли́ нам благослове́ние от Го́спода, да понесе́м благо́е и́го Христо́во в долготерпе́нии до конца́ дний на́ших, ча́юще бу́дущаго живота́ и Ца́рствия, иде́же несть печа́ль, ни воздыха́ние, но жизнь и ра́дость безконе́чная, изоби́льно проистека́емая от Еди́наго Всесвята́го и Блаже́ннаго Исто́чника
безсме́ртия в Тро́ице поклоня́емаго Бо́га, Отца́, и Сы́на, и Свята́го Ду́ха, ны́не, и при́сно, и во ве́ки веко́в. Ами́нь.
Велича́ние:
Ублажа́ем тя, / преподо́бне о́тче наш Феодори́те, / и чте́м равноапо́стольныя труды́ твоя, / и́миже в земли́ Ко́льстей труди́лся еси́ // во благове́стии Христо́ве.