МЕ́СЯЦА А́ВГУСТА В 17-Й ДЕНЬ (30 АВГУСТА ПО Н. СТ.)
Преподо́бнаго и Богоно́снаго отца́ на́шего Феодори́та Ко́льскаго, просвети́теля лопаре́й
НА МА́ЛОЙ ВЕЧЕ́РНИ
На Го́споди, воззва́х: стихи́ры на 4. Глас 4:
От ю́ности Христу́ любо́вию прилепи́лся еси́, / Боже́ственными смы́слы живо́т свой исполня́я. / Егда́ же Боже́ственное раче́ние прии́де на тя, Феодори́те сла́вный, / тогда́, апо́столом подо́бяся, просве́щник вели́кия Лапла́ндии яви́лся еси́, / и неве́дущим лю́дем в да́льних страна́х полно́щных Бо́г тобо́ю позна́н бы́сть. / Те́мже тя́, я́ко учи́теля и наста́вника благоче́стия, // попремно́гу вси ве́рнии ублажа́ем.
Свяще́ннаго Писа́ния от мла́денства научи́вся, богоно́се Феодори́те, / и прему́дрость от вы́шняго Про́мысла прие́м, / писа́ния но́вая ко Христо́ву позна́нию изложи́л еси́, / дре́вле во тме́ неве́рия лежа́щия ны́не к све́ту богоразу́мия воздви́гл еси́ / и все́х научи́л еси́ веровати в Тро́ицу Единосу́щную, во Еди́ном Божестве́ почита́емую. / Ю́же моли́ о на́с, Феодори́те пречу́дне, // спасти́ и просвети́ти ду́ши на́ша.
Безпло́тных ликостоя́нию уподо́бился еси́, Феодори́те Богоно́се, / небе́сный челове́че и земны́й а́нгеле, / кроме́ ми́ра су́етнаго пусты́ни соде́лал еси́ на Ко́ле и Ни́ве-реце́, / иде́же оби́тели соста́вил еси́, о́тче преподо́бне, мона́хов удобре́ние. / Те́мже тя вси, я́ко духо́внаго отца́ и ревни́теля апо́столом, ублажа́ем и мо́лимся тебе́: // моли́ спасти́ся все́м, свяще́нную твою́ па́мять почита́ющим.
Сла́ва, глас 8:
Весели́ся, земле́ Ко́льская, / в тебе́ же пло́д ра́дости на́м процвете́, / преподо́бный Феодори́т, благода́тию Бо́жией облагоуха́нный. / Его́же велича́юще, Христа́ Бо́га сла́вим, / преподо́бного же усе́рдно мо́лим: // моли́ спасти́ся душа́м на́шим.
И ны́не, пра́здника, глас 5:
Воспо́йте, лю́дие, / Ма́тери Бо́га на́шего, воспо́йте: / днесь бо всесве́тлую ду́шу Свою́ в пречи́стыя дла́ни / Иже из Нея́ Вопло́щшагося без се́мене предае́т, / Его́же и мо́лит непреста́нно // дарова́ти вселе́нней мир и ве́лию ми́лость.
Проки́мен дне.
На стихо́вне стихи́ры, глас 2:
Чистоты́ усе́рдный храни́телю, / Боже́ственною любо́вию, о́тче, распала́емь, / мирску́ю честь и бога́тство нивочто́же вмени́в, / небе́сное бога́тство и сла́ву ве́чную восприя́л еси́. / Реко́ша наро́ди ло́пстии: Феодори́т Ру́сский широко́ хо́дит; / та́ко не убоя́ся тяготы́, и долготы́ пу́тныя, и сту́дени, / ниже́ уклони́ся та́мо нечести́вых челове́к сопротивле́ния, // но вся́ претерпел еси́ и всех Бо́гу приве́л еси́.
Стих: Честна́ пред Го́сподем / смерть преподо́бных Его́.
Се́мя Слова Бо́жия в сердца́х наро́дов се́верных посе́ял еси́, / Феодори́те пусты́нниче, / и, Христу́ подо́бяся, взыска́ти заблу́ждших прише́л еси́, / и́хже обре́т, хода́тай ве́рный яви́вся о ста́де свое́м пред Бо́гом. // Того́ моли́ умири́ти ми́р и спасти́ ду́ши на́ша.
Стих: Блаже́н муж, боя́йся Го́спода, / в за́поведех Его́ восхо́щет зело́.
Све́том Трисо́лнечным Святы́я Тро́ицы озари́вся, преподо́бне, / неви́димых вра́г шата́ния и ко́зни низложи́в, / от Христа́ Бо́га сугу́б вене́ц прия́л еси́, / ра́дость и сла́ву ве́чную насле́довал еси́, / ея́же нам сподо́битися моли́твами твои́ми // моли́ Ми́лостиваго Бо́га, преблаже́нне о́тче наш Феодори́те.
Сла́ва, глас 8:
Зри́, христиани́не време́н ны́нешних, / вои́стину сие́ удивле́нию досто́йно: / ки́и хра́брии обрета́лися суть ста́рцы / в правосла́вней христиа́нстей стране́: / во правове́рных догма́тех воспита́ннии, / Ко́льския земли́ просвети́тели, / егда́ престаре́ются и изнемо́гут те́лом, / кольми́
па́че хра́брство ре́вностию по благоче́стию полага́ют // и острозри́тельнейшии и прия́тнейшии к Бо́гу быва́ют.
И ны́не, пра́здника, глас то́йже:
Деви́честии ли́цы / дне́сь та́йно одру́ Девы и Ма́тере о́крест предстоя́т, / и ду́ши пра́ведных, обступи́вше, Цари́цу сла́вят. / О́ви у́бо я́ко дар де́вство вме́сто ми́ра прино́сят, / о́ви же невеще́ственное пе́ние с доброде́телию прино́сят: / подоба́ет бо Ма́тери Бо́жии, я́ко Цари́це, / ца́рскими доброде́тельми светлосия́ющими дориноси́тися. / C ни́миже и мы, житие́ чи́стое совне́сше, / изы́дем к погребе́нию су́щия Ма́тере Бо́га на́шего, / пе́ньми и пе́сньми духо́вными // cогла́сно Ю ублажа́юще.
Тропа́рь пи́сан на вели́цей вече́рни. Сла́ва и ны́не: пра́здника. Ектения́ ма́лая и отпу́ст.
НА ВЕЛИ́ЦЕЙ ВЕЧЕ́РНИ
Блаже́н муж: 1-й антифо́н.
На Го́споди, воззва́х: стихи́ры на 8.
Стихи́ры пра́здника, глас 4: Я́же Жизнь, Богоро́дице, заче́ншая, / умира́еши зако́ном естества́ / и прехо́диши от земли́ к Небе́сным / ма́нием Вопло́щшагося от Пречи́стых и Боже́ственных крове́й Твои́х. / Те́мже от коне́ц Тебе́ вси предста́ша, / богогла́снии апо́столи Тя погребсти́, / пе́сненно Тебе́ веща́юще: / Одушевле́нный Престо́ле всех Царя́ / и честны́я Святы́ни Ковче́же, // ра́дуйся, Еди́на, ро́ждшая Спа́са душ на́ших.
Све́та чисте́йшаго прия́телища, / свети́льницы, разо́ршии нощь многобо́жную, / Спа́совы апо́столи, / о́блак Боже́ственный, / из него́же незаходи́мый Свет возсия́, / егда́ ду́хом преста́влену Тя от мирски́х уве́деша, Благослове́нная, / к преми́рней ра́дости о́блаком преидо́ша, / исхо́дными пе́сньми Тя проводи́вше / ко гро́бу живоно́сному, // Богоро́дице, упова́ние на́ше.
Да пра́зднует тварь моле́бно: / всех Цари́ца к Ца́рству мы́сленному пре́йде, / сца́рствовати Ца́рствующему все́ю тва́рию. / Ея́же ра́ди разруши́ся а́дово ца́рство, / и мы от земли́ вознесо́хомся, / и со А́нгелы жи́ти сподо́бихомся. / Ея́же успе́нием собра́ся мы́сленное естество́ все, // патриа́рси, проро́цы и с му́ченики апо́столы.
И́ны стихи́ры преподо́бнаго, глас 4: Земли́ Росто́вския прозябе́ние, / блага́я по́росль роди́телей благоче́стных, / Феодори́те преподо́бне, / равноапо́стольным служе́нием в земли́ Ко́льстей просия́л еси́, / лопь язы́ческую све́том Христо́вым просвети́л еси́, // подо́бяся просвети́телю зыря́н Стефа́ну.
Бо́гом избра́нный, / от ю́ности подвиза́лся еси́ в Росто́встем затво́ре, / в единона́десять лет во оби́тель Солове́цкую прише́л еси́, / преподо́бному Досифе́ю послу́шником кни́жным вда́лся еси́, / книг Досифе́ева да́нья преписа́л еси́ мно́жество, // смире́нно имену́я себе́ пе́рвым во гре́шниках дьяци́шкой Фео́дором.
И́ноческому житию́ прилежа́л еси́, преподо́бне, / душе́ю к Бо́гу припа́дая / и служи́ти Ему́ всем се́рдцем жела́я, / и́ноческий по́стриг в Солове́цтей оби́тели прия́л еси́, // тринадесятоле́тним о́троком пребыва́я.
Сла́ва, глас 6:
Муже́ски бо естество́ пону́див, / от страсте́й по́стнически изба́вился еси́, / и, плоть порабо́тив ду́ху, / пра́вило доброде́тели показа́лся еси́, / мно́гим мона́шествующим учи́тель и наста́вник яви́лся еси́, / и, предстоя́ Престо́лу Бо́жию, / моли́ся, преподо́бне о́тче наш Феодори́те, // о ны́не в мона́шестве подвиза́ющихся.
И ны́не, пра́здника, глас 2:
Я́же небе́с вы́шшая су́щи, / и Херуви́м сла́внейшая, / и всея́ тва́ри честне́йшая, / Я́же премно́гия ра́ди чистоты́ / Присносу́щнаго Существа́ прия́телище бы́вши, / в Сыно́вне ру́це днесь всесвяту́ю предае́т ду́шу, / и с Не́ю исполня́ются вся́ческия ра́дости, // и нам да́рует ве́лию ми́лость.
Вход. Проки́мен дня. Чте́ния три.
Прему́дрости Соломо́новы чте́ние: Пра́ведных ду́ши в руце́ Бо́жией, и не прико́снется и́х му́ка. / Непщева́ни бы́ша во о́чию безу́мных умре́ти, и вмени́ся озлобле́ние исхо́д и́х, / и е́же от на́с ше́ствие – сокруше́ние, они́ же су́ть в ми́ре. / И́бо пред лице́м челове́ческим а́ще и му́ку прии́мут, упова́ние и́х безсме́ртия испо́лнено. / И вма́ле нака́зани бы́вше, вели́кими благоде́тельствовани бу́дут, я́ко Бог искуси́ я и обре́те и́х досто́йны Себе́. / Я́ко зла́то в горни́ле, искуси́ и́х и, я́ко всепло́дие же́ртвенное, прия́т я. / И во вре́мя посеще́ния их возсия́ют и, я́ко и́скры по сте́блию, потеку́т. / Су́дят язы́ком и облада́ют людьми́, и воцари́тся в них Госпо́дь во ве́ки. / Наде́ющиися Нань разуме́ют и́стину, и ве́рнии в любви́ пребу́дут Ему́. / Я́ко благода́ть и ми́лость в преподо́бных Его́, и посеще́ние во избра́нных Его́. Прему́дрости Соломо́новы чте́ние: Пра́ведницы во ве́ки живу́т, и в Го́споде мзда их, и попече́ние их у Вы́шняго. / Сего́ ра́ди прии́мут Ца́рствие благоле́пия и вене́ц добро́ты от руки́ Госпо́дни, / зане́ десни́цею покры́ет их и мы́шцею защи́тит их. / Прии́мет всеору́жие рве́ние Свое́ и вооружи́т тварь в месть враго́м. / Облече́тся в броня́ пра́вды и возложи́т шлем – суд нелицеме́рен. Прии́мет щит непобеди́мый – преподо́бие, / поостри́т же напра́сный гнев во ору́жие, спобо́рет же с ним мир на безу́мныя. / По́йдут праволу́чныя стре́лы мо́лниины и, я́ко от благокру́гла лу́ка облако́в, на наме́рение полетя́т. / И от каменоме́тныя я́рости испо́лнь паду́т гра́ды, / вознегоду́ет
на них вода́ морска́я, ре́ки же потопя́т я на́гло. / Сопроти́в ста́нет им дух
си́лы и, я́ко ви́хор, разве́ет их, / и опустоши́т всю зе́млю беззако́ние, и злоде́йство преврати́т престо́лы си́льных. / Слы́шите у́бо, ца́рие, и разуме́йте, навы́кните, судии́ конце́в земли́. / Внуши́те, содержа́щии мно́жества и гордя́щиися о наро́дех язы́ков, / я́ко дана́ есть от Го́спода держа́ва вам и си́ла от Вы́шняго. Прему́дрости Соломо́новы чте́ние: Пра́ведник же а́ще пости́гнет сконча́тися, в поко́и бу́дет. / Ста́рость бо честна́ не многоле́тна, ниже́ в числе́ лет исчита́ется. / Седи́на же есть му́дрость челове́ком, и во́зраст ста́рости – житие́ нескве́рно. / Благоуго́ден Бо́гови быв, возлю́блен бысть, и живы́й посреде́ гре́шник преста́влен
бысть: / восхище́н бысть, да не зло́ба измени́т ра́зум его́, или́ лесть прельсти́т ду́шу его́. / Раче́ние бо зло́бы помрача́ет до́брая, и паре́ние по́хоти пременя́ет ум незло́бив. / Сконча́вся вма́ле, испо́лни ле́та до́лга, уго́дна бо бе Го́сподеви душа́ его́, сего́ ра́ди потща́ся от среды́ лука́вствия. / Лю́дие же ви́девше и не разуме́вше, ниже́ поло́жше в помышле́нии таково́е, / я́ко благода́ть и ми́лость в преподо́бных Его́ и посеще́ние во избра́нных Его́.
На литии́ стихи́ра хра́ма и свята́го, глас 1:
Благослове́нием ста́рца Зоси́мы / на созерца́ние во оби́тели се́верныя отше́л еси́. / Преподо́бному Алекса́ндру Сви́рскому испе́рва яви́лся еси́, / той же ре́кл еси́ прозорли́во: / се́й е́сть сы́н Авраа́мль, Феодори́т диа́кон. / И чи́стый чи́стому, непоро́чный непоро́чному // целова́нием возда́л еси́.
Зело́ возлюби́л еси́, преподо́бне о́тче Алекса́ндре, / подви́жника млада́го Феодори́та, / во оби́тели Живонача́льныя Тро́ицы подвиза́ющагося, / сослужа́щаго диа́коном бра́тии и преподо́бному, / поуча́ющагося пустынножи́тельству и прему́дрости Бо́жией, / устроя́ющаго оби́тели в ме́стех пусты́нных, / сим устро́ена бысть оби́тель Святы́я Тро́ицы при Ко́ле-реце́ // на краю́ земли́ Се́верныя.
Сла́ва, глас 5:
От младе́нства доброде́тели прилежа́в, / сосу́д Ду́ха Свята́го, преподо́бне Феодори́те, яви́лся еси́, / чистоту́ и целому́дрие соблю́л еси́, / про́ст и кро́ток, се́рдцем смире́н, ве́рен Бо́гу, / о́тче преблаже́нне, бы́л еси́, / и́стинною прему́дростию просвеще́нный, се́рдце свое́ Христу́ вве́рил еси́, / по́честей земны́х не иска́вый, всем помышле́нием к Бо́гу простира́выйся, // о́тче Феодори́те, моли́ Христа́ Бо́га о нас.
И ны́не, пра́здника, глас 3:
Све́тлое жили́ще доброде́телей соверши́ мя, Препе́тая, / отжени́ о́блак страсте́й и Вы́шняго Прича́стия сподо́би / и Све́та Невече́рняго Твои́ми моли́твами. / На ми́лость Тво́ю упова́ю и та́ко воспою́: / я́коже во Успе́нии Твое́м ми́ра не оста́вила еси́, / бу́ди нам Путеводи́тельница / во Ца́рствие Сы́на Твоего́ и Бо́га на́шего. / Живу́ща на земли́, огради́ мя и
изба́ви от искуше́ний, / исходя́ща же от земли́ к жи́зни ве́чней, // защити́ мя, Матероде́во, благоутро́бием Твои́м.
На стихо́вне стихи́ры, глас 5:
Крест Христо́в взем от ю́ности твоея́, / Бо́гу послужи́л еси́. / Чистоту́, смире́ние, нестяжа́ние и терпе́ние / труда́ми свои́ми обре́л еси́, / послуша́ние мона́шеское соблю́л еси́. / Те́мже и мы, почита́я тя, мо́лим: / преподо́бне о́тче Феодори́те, // помози́ и на́м в сих доброде́телях преуспе́ти.
Стих: Честна́ пред Го́сподем / смерть преподо́бных Его́.
Душе́ю и те́лом де́вственный, / посто́м, покло́ны, стоя́нием на моли́тве, / бде́нием неуста́нным плоть умертви́л еси́. / В по́двизех дневны́х и нощны́х тече́ние соверши́л еси́ / и наро́д лопа́рский в ве́ре наста́вил еси́. / Ны́не све́ту вели́кому, я́ко вене́чник святы́й, предстои́ши: / помина́й изря́дное твое́ достоя́ние, / е́же мно́гими труды́, о́тче, стяжа́л еси́, // да вси тя ублажа́ем.
Стих: Блаже́н муж, боя́йся Го́спода, / в за́поведех Его́ восхо́щет зело́.
Еще́ в телеси́ тле́ннем пребы́в, / безтеле́сными и невеще́ственными почте́н досто́инствы, / по возду́ху ше́ствия твори́л еси́. / И, я́ко апо́стол Па́вел, / восхища́емь бы́л еси́ во оби́тели небе́сныя, / иде́же виде́нии неизрече́нными Бо́г посети́ тя́. / Благода́тию Ду́ха Свята́го неду́жных, притека́ющих к тебе́, цели́л еси́, / прокаже́нных очища́л еси́, / чу́вства покая́нная в лю́дех пробужда́л еси́ // и мно́гих на путь спасе́ния и ве́ры наста́вил еси́.
Сла́ва, глас 2:
Прему́дрости сокро́вище быв, преподо́бне Феодори́те, / сердца́ неве́рных люде́й уче́нием твои́м просвети́л еси́, / благоче́стия семена́ насади́в. / Те́мже тя вси́, я́ко учи́теля прему́дра, / достодо́лжно ублажа́ем и мо́лимся: / моли́ся Христу́, Ему́же от ю́ности порабо́тал еси́, / от наве́т вра́жиих изба́вити на́с // и спасти́ся душа́м на́шим.
И ны́не, пра́здника, глас то́йже:
Всенепоро́чная Неве́ста / и Ма́ти благоволе́ния Отча, / Я́же Бо́гу пронарече́нная, / во Свое́ Ему́ жили́ще / несли́тнаго соедине́ния / днесь пречи́стую ду́шу Творцу́ и Бо́гу предае́т, / Юже Безпло́тных си́лы боголе́пно подъе́млют, / и к Животу́ преставля́ется су́щая Ма́ти Живота́, / Свеща́ непристу́пнаго Све́та, // спасе́ние ве́рных и упова́ние душ на́ших.
На благослове́нии хлебо́в тропа́рь свято́му (два́жды), глас 4:
От ю́ности, прему́дре, приле́жно подвиза́лся еси́, / пусты́нный жи́телю и в телеси́ А́нгеле, / исцеля́еши неду́жныя и ду́ши ве́рою просвеща́еши, / апо́столом соприча́стниче, Сло́во Бо́жие возвести́л еси́, / всея́ Лапла́ндии просвети́телю, / оби́телей и хра́мов Бо́жиих зижди́телю, / Феодори́те, о́тче всеблаже́нне, / моли́ Христа́ Бо́га // спасти́ся душа́м на́шим.
И пра́здника, глас 1: В рождестве́ де́вство сохрани́ла еси́, / во успе́нии ми́ра не оста́вила еси́, Богоро́дице, / преста́вилася еси́ к животу́, Ма́ти су́щи Живота́, // и моли́твами Твои́ми избавля́еши от сме́рти ду́ши на́ша.
НА У́ТРЕНИ
На Бог Госпо́дь: тропа́рь пра́здника. (Два́жды).
Сла́ва – преподо́бному. И ны́не – пра́здника.
По 1-й стихоло́гии седа́лен, глас 3:
Зе́млю оста́вил еси́ и небе́сных оби́телей жи́телем сподо́бился еси́ бы́ти, / чистото́ю жития́ своего́, любо́вию к Бо́гу и бли́жнему просия́л еси́, / ны́не же у Престо́ла Бо́жия среди́ ли́ков апо́столов, преподо́бных и му́чеников мо́лишися за ны, недосто́йныя. / Не оста́ви нас, преподо́бне о́тче Феодори́те, / моли́ Го́спода дарова́ти нам, гре́шным, ве́лию ми́лость // ко спасе́нию душ на́ших. (Два́жды).
Сла́ва, и ны́не: пра́здника, глас то́йже: В Небе́сная мы́сленная Твоя́ душа́, в Рай чи́стое Твое́ те́ло преста́вися, / от тли, Пренепоро́чная, в ме́сто све́тло, / сего́ ра́ди возда́ст
беззако́нным Госпо́дь, / ле́сть бо соде́лаша честно́му Твое́му те́лу. // Те́мже со апо́столы вопие́м: ра́дуйся, Благода́тная.
По 2-й стихоло́гии седа́лен, глас 5:
Свяще́нному Писа́нию от мла́денства научи́вся, богоно́се Феодори́те, / в да́льняя места́ прише́л еси́, / и неве́дущим Бо́г тобо́ю позна́ся. / Иде́же пре́лесть почита́ема бя́ше, / та́мо же ны́не лю́дям, во тме неве́рия лежа́щим, / ве́ра Христо́ва тобо́ю дарова́ся, преподо́бне, / и, я́ко со́лнце, в сердца́ неве́рных возсия́. / Всех научи́л еси́ в Трие́х Ли́цех Еди́но Божество́ ве́ровати, // те́мже свяще́нную Твою́ па́мять достодо́лжно ублажа́ем. (Два́жды).
Сла́ва, и ны́не, пра́здника, глас 4:
В ру́це нас ра́ди Вочелове́чшагося из Тебе́ преда́вши ду́шу, / я́ко Зижди́телю Твоему́ и Бо́гу, / к жи́зни нетле́нней преста́вилася еси́. / Те́мже Тя че́стно ублажа́ем, еди́ну чи́стую и нескве́рную, / и, Богоро́дицу вси и́стинно испове́дающе, взыва́ем: // Христа́ моли́, к Нему́же преста́вилася еси́, спасти́ ду́ши на́ша.
По полиеле́е велича́ние:
Ублажа́ем тя, / преподо́бне о́тче наш Феодори́те, / и чти́м равноапо́стольныя труды́ твоя́, / и́миже в земли́ Ко́льстей труди́лся еси́ // во благове́стии Христо́ве.
Псало́м избра́нный: Преподо́бнии Твои́ сла́ву Ца́рствия Твоего́ реку́т и си́лу Твою́ возглаго́лют. / Се удали́хся бе́гая и водвори́хся в пусты́ни. / Услы́ши ны, Бо́же, Спаси́телю наш, упова́ние всех конце́в земли́. / Се́вер и мо́ре Ты созда́л еси́. / Воцари́ся Бог над язы́ки. / Возвести́те во язы́цех сла́ву Его́, во всех лю́дех чудеса́ Его́. / Ви́дех неразумева́ющия и иста́ях. / Провеща́ет язы́к мой словеса́ Твоя́. / Стра́ху Госпо́дню научу́ вас. / Научу́ беззако́нныя путе́м Твои́м. / Госпо́дь не оста́вит преподо́бных Свои́х, вове́к сохраня́тся. / По́йте Го́сподеви, преподо́бнии Его, и испове́дайте па́мять святы́ни Его́. / Храни́т Госпо́дь ду́ши преподо́бных Свои́х. / Сла́ва сия́ бу́дет всем преподо́бным Его́.
Сла́ва и ны́не:
Аллилу́ия: (Три́жды).
По полиеле́е седа́лен, глас 4:
До́лгий путь земна́го ше́ствия, / преподо́бне Феодори́те, Бо́гом да́нный, проше́д, / испове́дник ве́ры Христо́вой яви́лся еси́, / гоне́ние за пра́вду ве́ры претерпе́л еси́, / с ли́ки преподо́бных сочета́лся еси́, / те́мже, поклоня́яся, моли́м тя, преподо́бне о́тче: // моли́ Христа́ Бо́га спасти́ся душа́м на́шим. (Два́жды).
Сла́ва и ны́не, пра́здника:
Твое́ пра́зднуем Успе́ние, Пречи́стая, / в не́же прии́де из Тебе́ воплоти́выйся Христо́с Бог наш со сла́вою неизрече́нною прия́ти Тво́й дух. / Тем а́ще и преста́вилася еси́, / но нас, Богоро́дице, моли́твами Твои́ми не преста́й посеща́ти, пою́щих Тя. Степе́нна, 1-й антифо́н, 4 гла́са. Проки́мен, глас 4: Честна́ пред Го́сподем / смерть преподо́бных Его. Стих: Что возда́м Го́сподеви о всех, / я́же воздаде́ ми? Вся́кое дыха́ние: Ева́нгелие от Матфе́я, зача́ло 43.
По 50-м псалме́ стихи́ра, глас 6:
Прему́дрости твое́й и сло́ву разу́мному / вси́ и́дольстии служи́тели удиви́шася, / и свою́ су́етную ве́ру я́ко безбо́жну оплева́ша, / и тобо́ю пропове́даемому Христу́ от души́ вероваша: / Его́же моли́, прему́дре Феодори́те, / спасти́ся всем, свяще́нное твое́ торжество́ соверша́ющим // и ве́рою чту́щим всечестну́ю па́мять твою́.
Кано́н пра́здника вторы́й, глас 4, со ирмосом на 8: Отве́рзу уста́ моя́: И свята́го на 4, глас 4:
Песнь 1
Ирмо́с:
Предели́в пучи́ну чермну́ю Бог, / фарао́на погрузи́вый в ней, / прове́д Моисе́я немо́кренно в пусты́ню / и одожди́в ма́нну в снедь лю́дем Изра́илевым, // я́ко си́лен.
Запе́в: Преподо́бне о́тче Феодори́те, // моли́ Бо́га о на́с.
Солове́цких ото́ков постри́женник честны́й, / возлю́бленник Бо́жия Ма́тере бы́вый, / ревни́тель по́двигов дре́вних, подви́жник но́вый, / моли́тву, я́ко копие́ и щит, прие́мый, / стра́шен де́моном и тме́ язы́честей яви́выйся, / Феодори́те преподо́бне, моли́ Христа́ Бо́га спасти́ ду́ши на́ша. Воспои́м, вси лю́дие, преподо́бнаго Феодори́та, / мно́гими моли́твами ми́лость Бо́жию обре́тшаго / пропове́дати лопаре́м ди́ким сло́во Ева́нгельское, / мно́гих су́щих в идолослуже́нии в ве́ру Правосла́вную крести́ти / и к Бо́гу приводи́ти, / в земли́ сей мно́зи це́ркви поста́вити и освяти́ти. / Сла́ву Христу́ Бо́гу на́шему воздади́м: / сла́вно бо просла́вися. Я́ко в день Сла́внаго Вознесе́ния Своего́ / запове́да Госпо́дь Иису́с Христо́с ученико́м свои́м и апо́столом / нести́ Сло́во Бо́жие да́же до кра́я земли́, / та́ко, преподо́бне Феодори́те, прие́м словеса́ сия́, / я́ко равноапо́стольный, Благове́стия служе́ние поне́сл еси́ к ло́пи ди́кой / и край земли́ просвети́л еси́. / Сего́ ра́ди тя вси, я́ко единоревни́теля апо́столом, / пе́сньми почита́ем. Богоро́дичен: Неду́гующую безбо́жием тварь всю, / Бо́га ро́ждши Исцели́теля, Де́во, исцели́ла еси́ пресла́вно. / Те́мже, благодаря́ще, взыва́ем Ти: / несть пречи́сты па́че Тебе́, Влады́чице. Катава́сия пра́здника.
Песнь 3
Ирмо́с:
Утверди́ся се́рдце мое́ в Го́споде, / даю́щем моли́тву моля́щемуся, / я́ко лук си́льных изнемо́же, // и немощству́ющии препоя́сашася си́лою.
Измла́да Христа́ возлюби́л еси́, пресла́вне, / и, Того́ соблюда́я Боже́ственныя за́поведи, / к Тому́ прите́кл еси́ весь цел, / Феодори́те всече́стне, / ны́не же со А́нгелы мо́лишися приле́жно, душе́ю и те́лом де́вственный. / Те́мже, днесь всесвяту́ю твою́ па́мять пра́зднующе, / освяща́емся вси любо́вию, чту́щии тя. От ю́ности прилежа́л еси́ прему́дрости, преподо́бне Феодори́те, / и де́тельное худо́жество дости́гл еси́ богосло́вия, / и, я́ко апо́стол, зе́млю Ко́льскую, и́дольским мра́ком отягче́нную, / просвети́л еси́ све́том
Ева́нгельским. Меч обою́ду остр язы́к тво́й на и́дольских служи́телей бы́сть, / пресека́я те́х уче́ния; / те́мже тя свяще́нными пе́сньми прославля́ем. Воста́ните, ве́ры Правосла́вныя испове́дницы, / гряде́м, хвалы́ пою́ще, труды́ духо́вныя святы́х земли́ полу́нощныя прославля́юще, / и пе́рвого в подви́жницех, и́стиннаго их учи́теля почита́емаго, / преподо́бнаго Феодори́та, просвети́теля Ко́льскаго, просла́вим, / непреста́нно моля́щагося о спасе́нии душ на́ших. Богоро́дичен: Припа́даем к Тебе́, Ми́лостивая, / к покая́нию воздви́гни ны, / изба́ви от чре́ва мра́чныя бе́здны / и от врат а́довых огради́ ны. / Ве́дуще милосе́рдие Твое́, ве́мы, / а́ще Госпо́дь услы́шит Тя, / да ны поми́лует. Конда́к пра́здника, глас 2: В моли́твах Неусыпа́ющую Богоро́дицу / и в предста́тельствах непрело́жное упова́ние / гроб и умерщвле́ние не удержа́ста: / я́коже бо Живота́ Ма́терь / к животу́ преста́ви // во утро́бу Всели́выйся присноде́вственную.
Икос:
Огради́ моя́ помышле́ния, Христе́ мо́й, / и́бо Сте́ну ми́ра воспе́ти дерза́ю, Чи́стую Ма́терь Твою́, / на столпе́ глаго́л укрепи́ мя и в тя́жких мы́слех заступи́ мя, / Ты бо взыва́ющим и прося́щим ве́рою мо́ления исполня́еши. / Ты мне у́бо да́руй язы́к прино́сен и по́мысл непосты́ден: / вся́кое бо дая́ние сия́ния от Тебе́ низпосыла́ется, Светопода́телю, / во утро́бу всели́выйся присноде́вственную. Седа́лен свята́го, глас 2: Нищету́ теле́сную позна́вый, / духо́вным бога́тством обогати́лся еси́, / ума́ пречу́днаго и бо́дреннаго учи́телю, / и, в ду́хе и и́стине возраста́я, / от Христо́вых ове́ц словесы́ свои́ми пре́лесть и́дольскую отгна́л еси́. / Невре́дно духо́вная своя́ ча́да вы́ну сохра́няеши, / восхваля́ем тя, Феодори́те блаже́нне, глаго́люще: / моли́ Христа́ Бо́га спасти́ся душа́м на́шим. (Дважды)
Сла́ва, и ны́не, Богоро́дичен пра́здника, глас 1:
Всечестны́й ли́к прему́дрых апо́стол собра́ся чу́дно / погребсти́ сла́вно те́ло Твое́ пречи́стое, Богоро́дице Всепе́тая, / c ни́миже воспе́ша и А́нгел мно́жество, / преста́вление Твое́ че́стно хва́ляще, е́же ве́рою пра́зднуем.
Песнь 4
Ирмо́с:
Небеса́ доброде́тель Твоя́ покры́ла есть, / и земля́ испо́лнися сла́вы Твоея́, Христе́. / Те́мже ве́рно вопие́м: // сла́ва си́ле Твое́й, Го́споди.
От ю́ности Христа́ все́ю душе́ю возлюби́вый, / да́ры Ду́ха Свята́го изде́тска восприя́л еси́. / Тринадесятоле́тним о́троком во оби́тели Солове́цтей мона́шеский по́стриг прия́л еси́: / небе́сным а́нгелом во смире́нии и терпе́нии на земли́ пожи́вый, / во плоти́ безпло́тным уподо́бился еси́ / и четы́редесяти лет на апо́стольскую стезю́ возше́л еси́. / Ра́дуйся, земле́ Ко́льская, / Бо́жиим благоволе́нием ди́внаго окорми́теля обре́тшая. Со преподо́бным отце́м Три́фоном / подвиза́лся еси́ вку́пе в прегорча́йшей пусты́ни, Бо́гом храни́мь, / умуча́я и покоря́я плоть свою́ в порабоще́ние и послуша́ние ду́ху, / пита́яся от жесто́ких зе́лий и коре́ний. / Напи́лся еси́ сла́дости пусты́нныя, / поне́же пусты́ня е́сть поко́я и ума́ почива́ние, / презе́льная роди́тельница и воспита́тельница, клевре́т и тишина́ мы́сли, / боже́ственнаго зре́ния плодови́тый ко́рень, и́стинная содруже́бница с Бо́гом. / Пребы́в та́мо со о́ным предрече́нным ста́рцем / два́десят лет во святе́м и непоро́чнем жи́тельстве, / по ступе́ням доброде́телей возше́л еси́, всехва́льне. Во о́ной прегорча́йшей пусты́ни, / на у́стии вели́кия Ко́лы-реки́ ста́рец преди́вный созида́ет монасты́рь / и в нем поставля́ет це́рковь во и́мя Пребезнача́льныя Тро́ицы. / Собира́ет среду́ мни́шескую и пра́вило им свяще́нное уставля́ет, / запове́дая обще́ и отню́дь нестяжа́тельно жи́тельствовати/ и свои́ми рука́ми пи́щу добыва́ти, я́ко рече́ вели́кий апо́стол: / я́ко а́ще кто не хо́щет де́лати, ниже́ да яст. Богоро́дичен: А́нгелов и Арха́нгелов превы́сшая, / честне́йшая Херуви́м и сла́внейшая Серафи́м, / я́ко Купина́ неопа́льно Бо́га
прия́вшая, / ро́ждшая ми́ру Спаси́теля, млеко́м Свои́м Младе́нца пита́вшая, / матероде́вственною чистото́ю свет осиява́еши, / ми́лости неоску́дныя нам источа́еши. / Тебе́ кла́няемся, Тебе́ благодари́м, / из глубины́ души́ та́ко воспева́ем: / ра́дуйся, Благода́тное Не́бо, / из Тебе́ возсия́ Со́лнце пра́вды – Христо́с Бог наш.
Песнь 5
Ирмо́с:
Мрак разреши́ греха́ моего́, / внегда́ возсия́ти Ти у́тро све́тлое за́поведей Твои́х, // Го́споди, Непристу́пный Све́те.
Феодори́т Ру́сский широко́ хо́дит – / та́ко почита́ше наро́д ло́пский прему́драго просвети́теля своего́. / Ты же, це́ркви созида́я и освяща́я / во у́стии Ни́вы-реки́ и вели́кия реки́ Ко́лы, / мно́гих лопля́н крести́л еси́ во святу́ю ве́ру Правосла́вную, / Пресвяту́ю Тро́ицу возславля́я. / Та́ко и мы возопии́м: / Тро́ице Свята́я, сла́ва Тебе́. Я́ко хра́брый во́ин Христо́в, / вся́каго мирска́го пристра́стия кроме́, о́тче, бы́в, / проти́ву нача́л власте́й те́мных, мироде́ржцев ве́ка сего́, возста́л еси́. / Духо́вный оте́ц и наказа́тель бы́сть преподо́бному Варлаа́му, / прише́дшему к тебе́, известву́я о уби́йстве и прося́ проще́ния, / слеза́ми зе́млю омака́я о соде́янных в я́рости и невоздержа́нии. / Ты дае́ши ему́ и́го ле́гкое: / е́же ме́ртваго носи́ти во гро́бе, до́ндеже изгние́т те́ло уме́ршия супру́жницы, / самому́ же в посте́ и моли́тве пребыва́ти / и таково́ воздержа́ние име́ти, / я́ко и ры́бе то́чию еди́ною на Па́сху причаща́тися. Мно́гими грехми́ обремене́нныя, / приведи́ ны, Феодори́те, к покая́нию, / я́ко иску́сен еси́ цели́ти согни́вшия неисце́льныя ра́ны, / си́речь презла́я дела́ в челове́цех, и́же многоле́тная обыкнове́ния, / от мла́дости утверди́вшаяся в душа́х людски́х. / Научи́ ны, о́тче преблаже́нне, / очища́ти и просвеща́ти сердца́ на́ша / и ко Го́споду прилепля́тися мно́гим покая́нием. Богоро́дичен: От ве́ры те́плыя вопию́ Ти, Богоро́дице, / недосто́йными усты́ и скве́рным се́рдцем: / спаси́ мя, погруже́ннаго грехми́, / уще́дри умерщвле́ннаго отча́янием, / да зову́ Ти спаса́емь: / ра́дуйся, Де́во, христиа́н Похвало́!
Песнь 6
Ирмо́с:
Приидо́х во глубины́ морски́я, / и потопи́ла мя есть бу́ря мно́гих грехо́в, // но, я́ко Бог, из глубины́ возведи́ живо́т мой, Многоми́лостиве.
По́двигом до́брым в пусты́нях Фиваи́ды Се́верныя подвиза́лся еси́, / писмена́ лопа́рская созда́в, / во еже свяще́нницы лопа́рским язы́ком служа́ху, / канона́рси по лопа́рским кни́гам канона́рша, / певцы́ же вся́ко пе́ние лопа́рски возглаша́ху. / Бы́сть язы́к твой, преподо́бне, трость кни́жника скоропи́сца. / Бо́жие вели́чие на язы́це ло́пском я́сно изъясни́в, / в позна́ние Христо́во приве́л еси́ лопля́ны мно́гия. / Те́мже духо́вная ча́да твоя́ / к мона́шескому житию́ приве́л еси́ из наро́да не́когда ва́рварского. / Я́ко тобо́ю изба́вльшеся от и́долов, / благода́рно тебе́ зове́м: / ра́дуйся, Феодори́те, учи́телю прему́дрый. Самозва́нен неи́щущим тебе́, преподо́бне, обре́лся еси́, / лю́ди, от и́дольския ле́сти свободи́в, / ко Христо́ве ве́ре приве́л еси́ и ло́пския но́йды посрами́л еси́, / те́мже и пе́рвый учи́тель Лапла́ндии бы́л еси́. / Сего́ ра́ди духо́вная твоя́ ча́да, я́ко тобо́ю изба́вльшеся от и́дол, / благода́рная тебе́ возопие́м: / ра́дуйся, Феодори́те, учи́телю прему́дрый. Боже́ственною си́лою свы́ше оде́ян, преподо́бне, / яре́м Христо́в взя́л еси́, / и люде́й олядене́вшая дре́вле неве́рием сердца́ возде́лал еси́, / Боже́ственное се́мя в них все́яв, / и ева́нгельски духо́вне породи́л еси́, / приводя́ ду́ши заблу́ждших ко Христу́ Влады́це. Богоро́дичен: Ма́ти Бо́жия Пречи́стая, / сле́зы о нас, гре́шных, пролива́еши о на́шем спасе́нии, / Сы́на Твоего́ про́сиши, / да прости́т на́ша прегреше́ния, и поми́лует, / и в Ца́рство Небе́сное две́ри отве́рзет. Конда́к свята́го, глас 5: Оби́тели Солове́цкия о́трасле многопло́дная, / мона́хов наста́вниче, покая́ния пропове́дниче, / царя́ земна́го да́ры Небе́снаго ра́ди Ца́рствия отве́ргл еси́, / красото́ю душе́вною в земли́ Се́верней просия́л еси́, / ра́дуйся, богому́дре о́тче Феодори́те, // земли́ Ко́льския засту́пниче те́плый.
Икос:
А́нгел о́бразом в затво́ре Росто́встем, / богосло́вия рачи́телю, измла́да мно́зи язы́ки наро́дов позна́л еси́, / вня́в гла́су Бо́жию, глаго́лющу: / пойди́ по земли́ необита́нней и непрохо́дней, / по земли́ безво́дней и непло́дней, / святи́телю Стефа́ну Пе́рмскому подо́бяся, / к просвеще́нию земли́ Ко́льстей гото́вяся. / Те́мже благода́рственно вопие́м ти: / ра́дуйся, гра́да Росто́ва благо́е прозябе́ние; / ра́дуйся, благочести́вых роди́телей чи́стое порожде́ние; / ра́дуйся, земли́ Ру́сския духо́вное украше́ние; / ра́дуйся, му́дрый стра́нниче, иски́й Оте́чества Го́рняго; / ра́дуйся, я́ко да́ры Ду́ха Свята́го изде́тска восприя́л еси́; / ра́дуйся, я́ко от ю́ности своея́ Еди́наго Христа́ все́ю душе́ю возлюби́л еси́; / ра́дуйся, о́тче, отце́в Ко́льских красото́; // ра́дуйся, преподо́бне о́тче Феодори́те, земли́ Ко́льския засту́пниче те́плый.
Песнь 7
Ирмо́с:
О́бразу злато́му не поклони́вшеся, / о́троцы авраа́мстии искуша́хуся, / я́ко зла́то в горни́ле, в пещи́ о́гненней, / я́ко в черто́зе све́тлем, ликова́ху, пою́ще: // благослове́н еси́, Бо́же оте́ц на́ших.
Укроще́нием пло́ти, посто́м и моли́твою противля́яся си́лам бесо́вским, страша́щимся све́та Христо́ва, / зе́млю Се́верную полу́нощную, клевре́тами зла́ и тмы́ порабоще́нную, / сло́вом Ева́нгельским просвети́л еси́, / на путь покая́ния от нече́стия и многоле́тнаго дре́вняго неве́рия / в ве́ру Христо́ву язы́цы, су́щия в идолослуже́нии, наста́вил еси́, Феодори́те преди́вне, / и, я́ко зла́то в горни́ле, искуше́н быв, воспева́л еси́: / благослове́н еси́, Бо́же оте́ц на́ших. Мно́ги ско́рби пра́веднику, и от всех их избавля́ше тя Госпо́дь: / бие́ние, оклевета́ние, / изгна́ние от восстаю́щих на тя новосо́бранных мни́хов, со диа́волом сложи́вшихся, / во смире́нии прия́л еси́, ста́рче преди́вный. / Моли́ся о на́с, о́тче преподо́бне, / да на́ша ско́рби Госпо́дь в ра́дость претвори́т, те́мже Ему́ возопии́м: / благослове́н еси́, Бо́же оте́ц на́ших. Я́ко со́лнце чи́стое, житие́ твое́ возсия́, преподо́бне, / тму́ идолобе́сия от люде́й словесы́ твои́ми, я́ко пра́щею, отгна́л еси́, / волше́бная
буесло́вия, я́ко прему́др, посрами́л еси́ / и зва́ти все́х научи́л еси́: / благослове́н еси́, Бо́же оте́ц на́ших. Богоро́дичен: Вмести́лище Бо́жие, и пала́та красна́, и боже́ственный престо́л, / на не́мже се́де, угото́ва все́м седе́ние небе́сное, яви́лася еси́, Пречи́стая Де́во. / Сего́ ра́ди взыва́ем: / Благослове́нная, Яже Бо́га пло́тию ро́ждшая.
Песнь 8
Ирмо́с:
Изба́вителю все́х Всеси́льне, / посреде́ пла́мене благоче́ствовавшия, / снизше́д, ороси́л еси́ / и научи́л еси́ пе́ти: // вся дела́ благослови́те, по́йте Го́спода.
Я́ко мужа иску́снаго и му́драго, призва́ тя вели́кий царь Иоа́нн / и повеле́ посо́льствовати в Царьгра́д ко Патриа́рху, / да́бы исхода́таити благослове́ния о коронова́нии, / яковы́м чи́ном це́сари ри́мстии, су́щии христиа́нстии, от патриа́рхов венча́еми бы́ша. / Ты́ же, повеле́ния царе́ва послу́шав, уже́ в ста́рости масти́тей и в немощне́м телеси́ / пои́де с ра́достию на таково́е посо́льство. / И хожда́ше вя́щше ле́та еди́наго, мно́гия на пути́ бе́ды и труды́ подъя́в, / и принесе́ со благослове́нием собо́рным посла́ние от Патриа́рха / ко ца́рскаго са́на возведе́нию Вели́кому кня́зю Росси́йскому. / Мы же, дивя́щеся послуша́нию твоему́, Бо́гови воспева́ем: благослови́те, вся́ дела́ Госпо́дня, Го́спода. Егда́ восхоте́ царь Иоа́нн почти́ти тя, о́тче, да́ры бога́тыми да вла́стию духо́вною, / тогда́ да́ры царя́ земна́го Небе́снаго ра́ди Ца́рствия отве́ргл еси́, я́коже рече́: / а́з вла́стию и сре́бреники, та́кожде и драгоце́нными оде́ждами / не обыко́х наслажда́тися, ни украша́тися, / да́руй их все́м, я́же про́сят от тебе́; / но то́чию сего́ прошу́, / да с поко́ем и со безмо́лвием в ке́ллии до изше́ствия моего́ пребу́ду. / Те́мже, внима́я словесе́м твои́м прему́дрым, / от усе́рдия на́шего си́це вопие́м: / благослови́те, вся́ дела́ Госпо́дня, Го́спода. Вои́стину сие́ удивле́ния досто́йно: / ка́ко в толи́цей ста́рости масти́тей в ке́ллии с поко́ем пребы́ти не восхоте́л еси́, старче предивный, / таковы́я неудобоприя́тныя и жесто́кия пути́ па́ки претерпе́л еси́, / ле́том пла́ваяй по мо́рю, / зимо́ю же на скороше́ственных еле́нех ходя́й по
непрохо́дным пусты́ням, / усе́рдно посеща́л еси́ ча́да своя́ духо́вная, / я́ко мни́хи, тако́жде и лопля́ны, / науче́нныя и креще́нныя тобо́ю в ве́ру Правосла́вную. / Мы же, дивя́щеся благи́м твои́м по́двигом, / почти́м их се́рдцем и усты́, / да благоприя́тно чудоде́ющего в тебе́ Бо́га воспое́м: / благослови́те, вся́ дела́ Госпо́дня, Го́спода. Богоро́дичен: Ра́дость всему́ ми́ру родила́ еси́, Де́во Неиску́собрачная, / Невмести́маго вмести́вшая, / блаже́нно чре́во Твое́, Бо́га носи́вшее. / И ны́не, иму́щая дерзнове́ние ко Го́споду, / присномоля́щая Сы́на Твоего́, умилосе́рдися на лю́ди гре́шныя и безпомо́щныя / и не оста́ви нас, Боже́ственный Покро́ве душа́м на́шим.
Песнь 9
Ирмо́с:
Велича́ем вси человеколю́бие Твое́, Христе́, Спа́се наш, / Сла́во раб Твои́х и Ве́нче ве́рных, // возвели́чивый па́мять Ро́ждшия Тя.
О, па́стырю преди́вный, / якову́ю ти́хость и кро́тость мно́гую име́л еси́, / и якова́я наказа́ния прему́драя и в гоне́ниих преди́вная, / и наисладча́йшая бесе́дования, и по́льзовательная апостолоподо́бная веща́ния / дарова́л еси́ сыново́м твои́м духо́вным, / попече́ние име́я о спасе́нии душ множа́йших чад твои́х во вся дни земны́я / и до пра́ведныя твоея́ кончи́ны во оби́тели Солове́цтей. О, Феодори́те преблаже́нный, / ка́ко не удиви́тися нам доброде́тельным дело́м твои́м преди́вным! / Что возглаго́лем о том, якова́я име́л еси́ дарова́ния от Бо́га, / си́речь да́ры Ду́ха Свята́го: / си́лы исцеле́ния, дар проро́чествия, дар му́дрости / гре́шники уловля́ти от презлы́х дел диа́вольских, / и наставля́ти на путь покая́ния, / и приводи́ти от нече́стия и многоле́тнаго дре́вняго неве́рия / в ве́ру Христо́ву язы́ки неве́рныя. / О, па́стырю преди́вный, похва́льная воспису́ем ти, / творя́щии па́мять твою! Воста́ни с на́ми, правосла́вный собо́ре вселе́нский, / почти́м и просла́вим по́двиги апо́стольския преподо́бнаго отца́ на́шего Феодори́та, / се́мя пра́вды ева́нгельския во язы́цех земе́ль се́верных посе́явшаго / и вся́ сия́ ко Христу́ приве́дшаго.
Богоро́дичен:
Я́ко Крин Небе́сный среди́ те́рниев грехо́в челове́ческих, / процвела́ еси́, Богоотрокови́це, на земли́, / Бо́гом Отце́м избра́нная и Ду́хом Святы́м осене́нная, / Сы́на Бо́жия, Спаси́теля ми́ру, ро́ждшая / и венце́м Небе́сным Тро́ицею Святе́й увенча́нная. / До Рождества́, в Рождестве́ и по Рождестве́ Присноде́вою велича́емая, / Ты благоуха́еши вся́кою чистото́ю, / из Тебе́ бо произы́де Госпо́дь Иису́с Христо́с. / Тебе́, Чи́стую, сла́вим и уми́льно та́ко воспои́м: / ра́дуйся, Боже́ственный Покро́ве душа́м на́шим. Свети́лен. Труды́ тя́жкими и по́двиги мно́гими / с терпе́нием и смире́нием наве́ты вра́жия, и клеветы́ от лжеглаго́льников, / и гне́вы ца́рския напра́сныя претерпе́л еси́ / и труд апо́стольский твори́ти до сме́рти не преста́л еси́. / Я́ко не можа́ше свеща́ таи́тися под спу́дом, но то́кмо на све́щнице, / та́ко и труды́ твоя́, о́тче наш Феодори́те, / не можа́ху бы́ти сокры́ты от лю́бящих тя́ / и све́тло возсия́ли суть в се́верных конце́х Ру́сския земли́. Сла́ва, и ны́не, пра́здника: Апо́столи, от коне́ц совоку́пльшеся зде, / в Гефсимани́йстей ве́си погреби́те те́ло Мое́, / и Ты, Сы́не и Бо́же Мой, приими́ дух Мой.
На хвали́тех стихи́ры на 6.
Стихи́ры пра́здника, глас 6: Глаго́лом Боже́ственного Гаврии́ла после́дующе, / ра́дуйся, Тебе́ зове́м, Чи́стая. / Ты у́бо Пресвята́я и Ма́ти Госпо́дня, / к Сему́ преста́вльшися, // помина́й о воспева́ющих Тя.
Неизме́рная Прему́дрость Бо́жия / храм Себе́ па́че ума́, Богоро́дице, созда́ / из Тебе́ Ду́хом Святы́м / и ны́не Тя к невеще́ственным селе́нием // преста́ви, Всепе́тая.
Раб, ны́не прихожду́ к Тебе́, Ма́тери всех Бо́га, / от вся́ких изба́витися напа́стей моля́ся, / но, о, Богороди́тельнице, / ца́рствующи с Сы́ном Твои́м, // христиа́нский род сохраня́й.
И́ны стихи́ры преподо́бнаго, глас 8: От ю́ности жа́ждал еси́ по́стническаго жития́, / ору́жием и́ноческим: покая́нием, смире́нием, / послуша́нием во́ле Бо́жией, ца́рству тмы́ проти́вился еси́, / пра́вило ве́ры и о́браз кро́тости духо́вныя яви́лся еси́, / ве́тхаго челове́ка совле́клся еси́ / и, стяжа́в благода́ть Ду́ха Свята́го, / в но́ваго челове́ка обле́клся еси́, // в пра́ведности и и́стине Бо́жией утвержда́яся.
В земли́ Ру́сстей возсия́вый, / на правосла́вных догма́тех воспита́нный, / престаре́в и изнемо́гнув те́лом, о́тче Феодори́те, / хра́брство ре́вностию ко благоче́стию полага́л еси́ / и та́ко жи́знию свое́ю Го́споду угоди́л еси́. / Мы же, помина́я тя, преподо́бне, // хва́ляще и благодаря́ще, Бо́гу воспои́м: аллилу́ия.
Ре́вностию по Бо́зе распала́емь, / попече́ние име́я о спасе́нии душ чад свои́х духо́вных, / и в неве́рных се́я про́поведь ева́нгельскую, / и умножа́я благоче́стие, / вруче́нный тебе́ от Христа́ Бо́га тала́нт во язы́це о́ном глубо́ких и гру́бых ва́рваров преумно́жил еси́, / не щадя́ ни ста́рости, ни немощна́го те́ла, // сокруше́ннаго мно́гими ле́ты и вели́кими труды́.
Сла́ва, глас 7:
Еда́ не́мощно есть от Бо́га вся́кое сло́во? / Умиле́нною душе́ю поклони́мся Христу́, пла́чуще и стеня́ще к Нему́, / и даст Госпо́дь Всемогу́щий исполне́ние вся́каго проше́ния, / его́же про́сим от Него́, / и обря́щет прося́щий благода́ть Бо́жию пред очи́ма Его́. / Те́мже и мы умиле́нною душе́ю воспои́м ко Го́споду, / кла́няемся, и славосло́вим Всеще́драго Бо́га, / и благодари́м Да́вшаго нам се́вернаго апо́стола сла́внаго, // блаже́ннаго Феодори́та, земли́ Ко́льския просвети́теля.
И ны́не, пра́здника, глас 3:
Прииди́те, вси концы́ земни́и, / честно́е преставле́ние Богома́тере восхва́лим, / в ру́це бо Сы́на ду́шу непоро́чную положи́. / Те́мже святы́м Успе́нием Ея́ мир оживотвори́ся, / во псалме́х, и пе́ниих, и пе́снех духо́вных // со Безпло́тными и апосто́лы пра́зднует све́тло.
Славосло́вие вели́кое и отпу́ст.
На часа́х: тропа́рь пра́здника, Сла́ва: преподо́бнаго Феодори́та.
Кондаки́ пра́здника и преподо́бнаго чита́ются попереме́нно.
НА ЛИТУРГИ́И
Блаже́нны от кано́на пра́здника, песнь 3-я – 4 и преподо́бнаго, песнь 6-я – 4. По вхо́де: тропа́рь пра́здника, тропа́рь преподо́бнаго. Сла́ва: конда́к преподо́бнаго; И ны́не: конда́к пра́здника. Проки́мен пра́здника и преподо́бнаго, глас 7: Честна́ пред Го́сподем / смерть преподо́бных Его́. Апо́стол к Гала́там, зача́ло 213. Аллилу́ия пра́здника и преподо́бнаго: Блаже́н муж, боя́йся Го́спода, / в за́поведех Его́ восхо́щет зело́. Ева́нгелие от Луки́, зача́ло 24. Прича́стен пра́здника и преподо́бнаго: В па́мять ве́чную.