Ака́фист Преподобному́ченику Моисе́ю (Ко́жину), иеромона́ху Солове́цкому, Оле́ницкому. Па́мять ме́сяца а́вгуста в 25-й день (7 сентября́ по н.ст.).
Конда́к 1
Преподобному́чениче Моисе́е, / от муже́й земли́ Полно́щныя / в ти́хое приста́нище Солове́цкия оби́тели прите́кл еси́, / поще́нием и слеза́ми, во хвале́нии и пе́снех / непреста́нно прилепля́яся Бо́гу. / Ты в годи́ну гоне́ний на Це́рковь Ру́сскую / ду́шу свою́ за Христа́ положи́л еси́, / боля́щь и гони́мь быва́я, / житие́ свое́ венце́м страда́ния увенча́л еси́. / Наста́ви лю́ди твоя́ пе́ти тя и Бо́га сла́вити и́стинно, / достохва́льный Моисе́е, / мы же, сла́вное твое́ житие́ воспомина́юще, велича́ем тя си́це: / Ра́дуйся, преподобному́чениче Моисе́е, // те́плый моли́твенниче о душа́х на́ших.
И́кос 1
Я́ко бегле́ц, из святы́я оби́тели Солове́цкия / в Помо́рскую страну́ изгна́н бысть, / преподобному́дре Моисе́е, / и, Христу́ после́дуя, нача́ подвиза́тися в це́ркви Иоа́нна, Предте́чи Христо́ва, / я́же в ве́си Оле́ницкия, / и та́мо благи́й и ве́рный бя́ше раб Госпо́день, подвиза́шеся да́же до сме́рти за ве́ру и за святи́лище. / Те́мже почита́ем па́мять твою́ всечестну́ю и, благогове́йне чту́ще вся лю́тая твоя́, // вопие́м ти си́це: Ра́дуйся, я́ко от ю́ности своея́ Бо́га се́рдцем возлюби́л еси́; Ра́дуйся, я́ко в ю́нем телеси́ кре́пость му́жескую яви́л еси́.
Ра́дуйся, оте́честву земно́му в чи́не во́инстем досто́йно послужи́вый; Ра́дуйся, последи́ же во́инству Христо́ву приобщи́тися зело́ возжеле́вый. Ра́дуйся, ко а́нгельскому чи́ну от ю́ности сопричтéнный;
Ра́дуйся, во и́мя проро́ка Моисе́я во и́ночестве наречéнный. Ра́дуйся, слáдость словéс Госпо́дних вы́ну в душе́ храни́вый; Ра́дуйся, и́гу благо́му Христо́ву вы́ю подклони́вый. Ра́дуйся, преподобному́чениче Моисе́е, // те́плый моли́твенниче о душа́х на́ших.
Конда́к 2
О́тче преподо́бне Моисе́е, / ты в тя́жкую годи́ну испыта́ний ве́ру Христо́ву поруга́ему обре́л еси́ / и себе́ сама́го, я́ко же́ртву живу́ю, Бо́гу прине́сл еси́. / Ны́не Госпо́дь показа́ тя, свети́льника Своего́, / сия́юща на све́щнице Це́ркве, / искуше́нием вра́жиим противоста́вшаго / и со́нма новому́чеников Це́ркве Ру́сския / украше́ние пресве́тлое я́вльшагося. / Сего́ ра́ди, я́ко победи́тель, / воспева́еши с безпло́тными си́лами / песнь побе́дную Христу́ Бо́гу: // Аллилу́иа.
И́кос 2
Во оби́тели Солове́цтей по́двигом и́ноческим до́бре подвиза́лся еси, / сла́вный Моисе́е, / и во Се́ргиево-Мукса́лмском скиту́, досто́йно зва́ния ходи́в, / плоды́ прине́сл еси́ Христо́ва смире́ния / и, я́ко дре́во благосенноли́ственное, / о́браз па́стыря до́браго яви́л еси́. / Научи́ и нас смиря́ти ду́ши на́ша / пред Отце́м Небе́сным и со бра́тиями на́шими // приноси́ти ти благохвале́ния сия́: Ра́дуйся, из мла́да добро́ту Влады́ки Христа́ возлюби́вый; Ра́дуйся, в правове́рии и благоче́стии ве́рно послужи́вый.
Ра́дуйся, во а́нгельский чин достохва́льно облече́нный; Ра́дуйся, к ли́ку преподо́бных досточе́стно причте́нный. Ра́дуйся, мудрова́ний ве́ка сего́, вознося́щихся на разум Божий, посрамле́ние; Ра́дуйся, от волко́в, в оде́жде о́вчей входя́щих, огражде́ние.
Ра́дуйся, во́ине Христов, лю́да помо́рскаго любо́вию прославля́емый; Ра́дуйся, подви́жниче, благода́тию Бо́жиею охраня́емый. Ра́дуйся, преподобному́чениче Моисе́е, // те́плый моли́твенниче о душа́х на́ших.
Конда́к 3
Земна́я отри́нув, Небе́сная себе́ уготовля́я, / я́ко страда́лец за и́стину, / му́жественно ра́ди бра́тии своея́ не оста́вил еси́ вины́ сла́ве оби́тели. / Да́же до кро́ве пострада́вый, / проти́ву го́рдых, гони́телей и досади́телей Це́ркве подвиза́яся, / Небе́сныя сла́дости вкуси́л еси́, / страстоте́рпче ди́вный, / сея́ сла́дости испроси́ и нам у Христа́, Спа́са на́шего, / ди́вному во Святы́х Свои́х воспева́ющих си́це: // Аллилу́иа.
И́кос 3
Промысло́м Бо́жиим и челове́ческим избра́нием / служи́тель ве́рен был еси́ оби́тели Солове́цкия / и помо́щник в ско́рбех преизря́дных, обре́тших бра́тию зело́. / Помози́ и нам, о́тче Моисе́е, / ве́рно чту́щим па́мять твою́, / в ве́ре и́стинней утверди́тися // и песновоспе́ти ти такова́я: Ра́дуйся, во страда́ниих твои́х плоть бе́дне смири́вый; Ра́дуйся, пло́д досто́йный терпе́ния и любве́ сотвори́вый.
Ра́дуйся, от нечести́вых уничиже́ние в честь себе́ вмени́вый; Ра́дуйся, оби́дящим вседу́шно прегреше́ния прости́вый. Ра́дуйся, па́стырю до́брый, от враго́в ста́до свое́ защища́ющий; Ра́дуйся, я́ко о́рля, под крило́ма чад свои́х покрыва́ющий. Ра́дуйся, моли́твенниче, тя́гу грехо́вную укроща́ющий; Ра́дуйся, страда́льче, кровьми́ муче́ний бесо́в устраша́ющий. Ра́дуйся, преподобному́чениче Моисе́е, // те́плый моли́твенниче о душа́х на́ших.
Конда́к 4
Во изгна́нии бы́вый, / ско́рбь непреста́нную и уны́ние / слеза́ми и воздыха́ньми растворя́л еси́, / до́блественный о́тче Моисе́е, / о оби́тели Солове́цтей матероле́пней, / от безбо́жных разоря́емей, / в не́йже ле́та мно́га подвиза́лся еси́ / и мно́гия по́двиги и труды́ поне́сл еси́. / Ны́не же, свяще́нныя ру́це твои́ у Престо́ла Бо́жия простира́я, / помина́й Ко́льскую зе́млю рожде́ния своего́ / и оби́тель Солове́цкую, ю́же возлюби́л еси́, / и моли́ о спасе́нии сла́вящих тя благоче́стно / и со умиле́нием серде́ц взыва́ющих: // Аллилу́иа.
И́кос 4
Пе́рвее до́брым по́двигом преподо́бническим / в житии́ твое́м земне́м Бо́гови угожда́я, / страда́нием му́ченически житие́ сконча́л еси́. / Те́мже венча́ тя Госпо́дь, и прия́т во сла́ву Свою́ за сугу́быя ско́рби и го́рести, наше́дшия на тя, / за беды́, изгна́ния и тесно́ты по Христе́ в ле́тех тех злоче́стия и нечистоты́. / Мы же, дивя́щеся сему́ достохва́льному твоему́ ве́ры испове́данию, // ублажа́ем тя си́це: Ра́дуйся, с терпе́нием мно́гим го́ресть изгна́ния вкуси́вый; Ра́дуйся, ве́ру соверше́нную в ско́рбех сугу́бых яви́вый.
Ра́дуйся, на по́двиг па́стырства, я́ко на крест, возше́дый; Ра́дуйся, ча́дам твои́м моли́твенниче и о́тче благосе́рдый. Ра́дуйся, би́сере дража́йший, Це́ркве Ру́сския украше́ние; Ра́дуйся, си́лам бесо́вскаго зла необори́мое устраше́ние. Ра́дуйся, Христо́ва ста́да па́стырю честны́й и ве́рный; Ра́дуйся, пра́вды и исти́ны носи́телю добропобе́дный. Ра́дуйся, преподобному́чениче Моисе́е, // те́плый моли́твенниче о душа́х на́ших.
Конда́к 5
Прииди́те, ве́рнии, / свяще́нное и честно́е преподо́бнаго Моисе́я торже́ство / пе́сньми днесь воспои́м, / восхва́лим ревни́теля
и защи́тителя оби́тели Солове́цкия / и Помо́рия се́вернаго ве́си Оле́ницкия: / сей во времена́ гоне́ний на Це́рковь Ру́сскую / со́нму новому́чеников сопричте́н бысть, / ны́не же, предстоя́ Престо́лу Госпо́дню, мо́лится за ны, / излива́я любо́вь Бо́жию в сердца́ на́ша, / да и мы Ца́рствию Христо́ву приобщи́мся, / со умиле́нием вопия́ ко Го́споду: // Аллилу́иа.
И́кос 5
Во изгна́нии поки́нул еси́ ото́к Солове́цкий, святы́й Моисе́е, / моли́тву непреста́нную слеза́ми растворя́я / о возлю́бленней оби́тели, от безбо́жных разоря́емей, / в не́йже мно́гия по́двиги и труды́ поне́сл еси́. / Во оте́чествии свое́м во дни Па́схи Христо́вой, / дерза́я о И́мени Го́спода Воскре́сшаго, / в хра́ме Иоа́нна Предте́чи от безбо́жных му́ку претерпе́л еси́. / Сего́ рáди песносло́вим твоя́ по́двиги страстоте́рпческия // и прино́сим ти хвале́ния сицевáя: Ра́дуйся, непра́ведный пригово́р с кро́тостью прия́вый;
Ра́дуйся, крила́ми богомы́слия се́ти вра́жия попра́вый.
Ра́дуйся, в ско́рби свое́й от любве́ Христо́вы не отлуче́нный;
Ра́дуйся, во страда́нии свое́м си́лой Бо́жиею укрепле́нный.
Ра́дуйся, ти́хостию свое́ю суро́вство безбо́жных обличи́вый;
Ра́дуйся, и́стинным веледу́шию и кро́тости нас научи́вый.
Ра́дуйся, похвалы́ и сла́вы Бо́жия ве́лий ревни́телю;
Ра́дуйся, па́ствы оте́чествия твоего́ Небе́сный храни́телю.
Ра́дуйся, преподобному́чениче Моисе́е, // те́плый моли́твенниче о душа́х на́ших.
Конда́к 6
Прииди́те, боголю́бцы, / ко Христу́ любо́вию у́тренююще, / ра́дости страда́льца преди́внаго Моисе́я прича́стницы бу́дем. / Ты, о́тче преподо́бне, / заступа́я оте́чествия своего́ вве́ренную ти
святы́ню, / тверд и непрекло́нен яви́лся еси́, / вся́чески утесня́емь и изгоня́емь от враг быв. / Госпо́дь же упова́ние тебе́ бысть, / прихо́да Оле́ницкаго после́дний нача́льниче и сла́вный страстоте́рпче. / Ты бо, на Еди́наго Христа́ от всего́ се́рдца упова́я, / воспева́л еси́ Ему́: // Аллилу́иа.
И́кос 6
Ра́дуйся, преподобному́чениче Моисе́е, / боле́зни и труды́ благоду́шно претерпе́вый, / и посреде́ мяте́жей мно́гих ве́ру кре́пкую до конца́ сохрани́вый, / и за Христа́ сла́вную кончи́ну прия́вый. / Оба́че ин суд Бо́жий, ин челове́ческий: / ско́рый и непра́вый тя на сме́рть осуди́, / Небе́сный же и Боже́ственный по́честьми побе́дными венча́. / Сего́ ра́ди, любо́вию к ти подвиза́еми, // велича́ем тя си́це:
Ра́дуйся, о́браз кре́пости ве́ры всем помо́рцам яви́вый;
Ра́дуйся, во вре́мя ско́рби крест свой терпели́вно носи́вый.
Ра́дуйся, богоху́льная умышления ору́жников дерзосе́рдых посрами́вый;
Ра́дуйся, во искуше́ниих ве́лиих му́жеству нас научи́вый.
Ра́дуйся, му́чениче, ри́зы своя́ в крови́ А́гнца убели́вый;
Ра́дуйся, те́лом уме́рый, ду́шу же свою́ не погуби́вый.
Ра́дуйся, а́нгельским чино́м сликовству́ющий в вы́шних;
Ра́дуйся, от челове́к похвалы́ прие́млющий в ни́жних.
Ра́дуйся, преподобному́чениче Моисе́е, // те́плый моли́твенниче о душа́х на́ших.
Конда́к 7
От пле́на еги́петскаго нече́стия челове́ки моисе́йски изве́л еси́, / к многопло́дию ду́ши сро́дных свои́х Помо́рския земли́ направля́я, / я́же суть на ме́сте том, нарица́емем Те́рский брег, / ли́ку же неисче́тному до́блественных му́чеников приобщи́лся еси́ /
и собо́ру Ко́льских новому́чеников основа́ние тве́рдо положи́л еси́. / Ны́не тому́ а́нгелы на Небесе́х ра́дуются, / с ни́миже и ты песнь побе́дную благода́рственно воспева́еши: // Аллилу́иа.
И́кос 7
Ни кня́зя ми́ра сего́, ни влады́к злосту́жных, претя́щих тебе́, / не убоя́лся еси́, о́тче преподо́бне, / ве́рою и упова́нием на Го́спода был еси́ кре́пок. / Утверди́ нас ра́ди любве́ Христо́вы / претерпе́ти вся му́ки и ско́рби / и да́же до сме́рти подвиза́тися о и́стине, / я́коже ты, о́тче преди́вне. / Оба́че же мы, наде́ждою на предста́тельство твое́ окрыля́емии, // с ве́рою прино́сим ти похвалы́ таковы́я: Ра́дуйся, дни́ страда́ния своего́ му́жественне испо́лнивый; Ра́дуйся, я́ко свети́льник, ду́шу свою́ еле́ем свя́тости напо́лнивый.
Ра́дуйся, мук лю́тых несе́нием тле́нная на нетле́нная премени́вый; Ра́дуйся, мно́гих бо от жесто́ких напа́стей и ско́рбей разреши́вый. Ра́дуйся, свече́ неугаси́мая, огне́м Ду́ха Свята́го возжже́нная; Ра́дуйся, лозо́ избра́нная, росо́ю благода́ти Бо́жия напое́нная. Ра́дуйся, все́м притека́ющим к тебе́ ско́рое вспоможе́ние подава́яй; Ра́дуйся, о́браз па́стыря до́браго яви́вый, ду́шу свою́ за о́вцы полага́яй. Ра́дуйся, преподобному́чениче Моисе́е, // те́плый моли́твенниче о душа́х на́ших.
Конда́к 8
Распе́ншемуся за ны Христу́ Бо́гу, / смерть попра́вшему и ад плени́вшему, / сораспина́лися есте́, страстоте́рпцы приснопа́мятнии, / му́чениче Моисе́е со ста́ростою и парамона́рем церко́вными, / суд непра́вый и ско́рбную темни́цу, / истерза́ния
мно́гая претерпе́вше да́же до сме́рти му́ченическия, / в невече́рнем же дни Ца́рствия Бо́жия / в Це́рковь Небе́сную свяще́нно внидо́сте / и ны́не Тро́ице предстоите́, / сия́юще отту́ду блиста́нии, / и восхваля́юще, и благословя́ще Го́спода пребога́тно: // Аллилу́иа.
И́кос 8
Оте́честву своему́ в годи́ну безве́рия был еси́ свети́льник, / Боже́ственных Та́ин Христо́вых раздая́тель / и душ людски́х врачева́тель яви́лся еси́, о́тче прехва́льне, / те́мже благода́ть Ду́ха Уте́шителя от юдо́ли сме́ртныя тя возведе́ / в вы́шняя Небе́сная селе́ния, / да твои́ми моли́твами спасе́мся, // славосло́вяще тя си́це: Ра́дуйся, моли́твою кре́пкою тяготы́ жития́ побежда́ти научи́вый; Ра́дуйся, засту́пниче, в гоне́ниих наде́жду и ве́ру укрепи́вый.
Ра́дуйся, боля́щих душе́ю и те́лом безме́здный цели́телю; Ра́дуйся, коле́блющимся в ве́ре о́браза до́браго пода́телю. Ра́дуйся, си́лою свы́ше на бра́нь проти́ву безбо́жных препоя́санный; Ра́дуйся, новому́чеником Це́ркви Ру́сския за му́ки ве́лия подпи́санный. Ра́дуйся, па́стырю до́брый, заблу́ждших приле́жный вразуми́телю; Ра́дуйся, звездо́ Полно́щная, ве́рным ко спасе́нию путеводи́телю. Ра́дуйся, преподобному́чениче Моисе́е, // те́плый моли́твенниче о душа́х на́ших.
Конда́к 9
Моисе́й, вели́цый во проро́цех иногда́, / жезло́м свои́м, я́ко кре́стным зна́мением, во́ды раздели́в, / проше́д со изра́ильтяны сквозе́ Чермно́е мо́ре / и земна́го обетова́ния дости́же, / ты же, преподобному́чениче Моисе́е, / крестоноше́нием страда́ний плоть
свою́ умертви́в, / земли́ обетова́ния дости́гл еси́, / в не́йже пра́вда живе́т. / Сего́ ра́ди лю́дие Солове́цтии и помо́рстии / просла́вльшаго тя Го́спода сла́вят, / с ни́миже и мы вопие́м: // Аллилу́иа.
И́кос 9
Егда́ безбо́жнии тща́хуся сокры́ти тя в темни́це, / ты, блаже́нный Моисе́е, я́ко луч Со́лнца Пра́вды яви́лся еси́, / посрамля́я ипа́ты, и воево́ды, / и мучи́тели, су́щия во власте́х, / и страда́ньми твои́ми мглу безбо́жия и злообы́чия / над Оте́чеством на́шим разсе́ял еси́. / Мо́лим тя, страда́льче святы́й: / моли́ся за ны ко Го́споду, / дабы по́прище жития́ на́шего нам досто́йно проити́ / и во́инами све́та неуко́рными яви́тися, // воспева́юще ти си́це: Ра́дуйся, моля́щимся к тебе́ ско́рую по́мощь подава́яй; Ра́дуйся, в гоне́ниих отча́янных и безнаде́жных ободря́яй.
Ра́дуйся, я́ко стяжа́л еси́ терпе́ние и на Бо́га наде́яние; Ра́дуйся, земе́ль полно́щных ве́рное от бед спасе́ние. Ра́дуйся, от раздирáния и разорéния па́ству свою́ защити́вый; Ра́дуйся, моли́твами свои́ми Ру́сскую Це́рковь храни́вый. Ра́дуйся, во́лны мятeжа́ церко́внаго си́лою ду́ха укроти́вый; Ра́дуйся, ра́дость Го́спода с чина́ми А́нгельскими вкуси́вый. Ра́дуйся, преподобному́чениче Моисе́е, // те́плый моли́твенниче о душа́х на́ших.
Конда́к 10
Ре́вностию по Бо́зе распала́емь / и жа́лостию о до́ме Госпо́дни снеда́емь, / святы́ни це́ркви Оле́ницкия от расхище́ния и поруга́ния нечести́вых сохраня́л еси́, / священному́чениче достохва́льне Моисе́е, / преще́ний же беззако́нныя вла́сти не устраши́лся еси́, / до конца́ страда́ния претерпе́в, / и ны́не сия́еши во сла́ве Госпо́дни. / Мы же Бо́га, Ди́внаго во святы́х Свои́х, / подаю́щаго нам приука́з безприкла́дный и ве́лие наде́яние, / благода́рственне прославля́ем си́це: // Аллилу́иа.
И́кос 10
Па́ству ве́рных свои́х хле́бом сло́ва Бо́жия насыща́я / и вино́м прему́дрости Богодухнове́нныя напая́я, / теплото́ю любве́ твоея́ да́ры сия́ раствори́л еси́, священному́чениче Моисе́е. / И ны́не с высоты́ Небе́сныя веща́еши ча́дом Це́ркве Ру́сския: / приступи́те ко Го́споду и просвети́теся, / и ли́ца ва́ша не постыдя́тся. / Мы же твою́ па́мять при́сно пе́сньми восхваля́ем ве́рно, // и вопие́м ти с любо́вию такова́я: Ра́дуйся, благода́ть пáстырскую от Солове́цких уго́дников приéмый; Ра́дуйся, по́двиг мучени́чества на рaмена́ своя́ подъéмый.
Ра́дуйся, глáсе, в пусты́ни безбо́жия о Го́споде вопия́й; Ра́дуйся, я́ко проро́к Моисе́й, сплеме́нников к Земли́ обетовáния преводя́й. Ра́дуйся, свети́льниче златы́й, во мрáце безбо́жия све́тло сия́яй; Ра́дуйся, кáменю ве́ры Христо́вы, в нéйже пáству свою́ утверждáяй. Ра́дуйся, кро́тце за истяза́ющих тя моли́вшийся; Ра́дуйся, ра́дости Небе́сныя в по́двизе причасти́вшийся. Ра́дуйся, преподобному́чениче Моисе́е, // те́плый моли́твенниче о душа́х на́ших.
Конда́к 11
Всего́ себе́ во́ли Госпо́дни предáв, / страда́ния Его́ рáди за чeсть почитáл еси́, / досточу́дне Моисе́е: / тем в темни́це заточéние, я́ко от десни́цы Бо́жия восприя́л еси́, / и узи́лище после́днее земнáго жития́ твоего́ во гра́де Ко́тласе обре́л еси́, / а́може приведé тя Христо́с, / жéртвы но́выя всещéдрыя твоея́ желáя. / Ты же благопоко́рне принéсл еси́ о́ную, / любо́вию воспевáя Го́сподеви: // Аллилу́иа.
И́кос 11
Све́том Христо́вым просвеща́емь, / мрак беззако́ния попра́л еси́, преподо́бне, / му́ченическими кровьми́ свяще́нную ри́зу очервлени́в, / вшел еси́ во Свята́я Святы́х досто́йно, Моисе́е прему́дре, / иде́же Свет неизре́ченный, иде́же глас пра́зднующих: // с ни́миже и мы велегла́сно возопии́м:
Ра́дуйся, я́ко во́лю Бо́га Вы́шняго всем се́рдцем взыска́л еси́;
Ра́дуйся, я́ко неблагомы́сленных наве́ты лука́выя претерпе́л еси́. Ра́дуйся, тве́рдей ве́ре нас при́сно научаю́щий; Ра́дуйся, ко стези́ спасе́ния непреста́нно наставля́ющий. Ра́дуйся, я́ко во испове́дании Христо́ве непоколеби́м пребы́л еси́; Ра́дуйся, я́ко вла́стей прельще́ньми непрекло́нен яви́лся еси́. Ра́дуйся, оби́тели Солове́цкия изве́стное укрепле́ние; Ра́дуйся, па́ствы земе́ль Се́верных кре́пкое защище́ние. Ра́дуйся, преподобному́чениче Моисе́е, // те́плый моли́твенниче о душа́х на́ших.
Конда́к 12
Зе́млю Ру́сскую, безбо́жными гоне́нии неща́дно жего́мую, / слеза́ми и кровьми́ твои́ми напои́л еси́, священному́чениче Моисе́е, / и испове́данием Трисо́лнечнаго Све́та / тму́ а́дову посрами́л еси́, / и муче́ния от сыно́в поги́бели восприя́л еси́. / Те́ло бо твое́ во вну́тренних моги́лы неизве́стныя пребыва́ет, / душа́ же твоя́ безпеча́льное жи́тельство насле́довала еси́. / Те́мже, о́тче преподо́бне, / стяжа́л еси́ благода́ть моли́тися о нас: // Аллилу́иа.
И́кос 12
Све́та нетва́рнаго зри́тель / и ра́дости Боже́ственныя прича́стник яви́лся еси, / новому́чениче Моисе́е, / те́мже мо́лим тя: /
не преста́ни моли́тися о нас / ку́пно со все́ми новому́ченики Це́ркви Ру́сския, / да поми́лует нас Госпо́дь, призирáя с высоты́ Небе́cныя / и приклоня́я к нaм вы́шнее милоcе́рдие. / Та́ко на твое́ заступлéние наде́ющеся / и на благопло́дную моли́тву твою́ уповáюще, // ублажа́ем тя сицевы́ми похвалы́: Ра́дуйся, преподо́бне, жи́знию мона́шескою усе́рдно подвиза́выйся; Ра́дуйся, подви́жниче, на ни́ве Христо́вой изря́дно потруди́выйся.
Ра́дуйся, пресла́вне Моисе́е, Помо́рия пресве́тлый свети́льниче; Ра́дуйся, в возраще́нии ве́ры и благоче́стия кре́пкий помо́щниче. Ра́дуйся, чту́щих па́мять твою́ пред Бо́гом помина́ющий; Ра́дуйся, о просла́вльших тя пред Го́сподом Христа́ умоля́ющий. Ра́дуйся, я́ко ны́не в Ца́рствии Бо́жии пребывáеши; Ра́дуйся, я́ко и нас благода́тным его́ све́том осиява́еши. Ра́дуйся, преподобному́чениче Моисе́е, // те́плый моли́твенниче о душа́х на́ших.
Конда́к 13
О, страда́льче многосве́тлый и служи́телю Христо́в Моисе́е, / И́мене Бо́жия досточу́дный испове́дниче, / Це́ркве Христо́вы украше́ние, / ото́ца Солове́цкаго и земли́ Ко́льския ра́дование! / Услы́ши нас неиску́сных ма́лое сие́ моле́ние / и испроси́ у Всеми́лоcтиваго Влады́ки, / Ему́же ны́не со дерзновéнием предстои́ши, / проба́вити ми́лость Свою́ на ны / и дарова́ти оставлéние мно́зим грехо́м нáшим. / Да твои́ми моли́твами сподо́бимся в Ца́рствии Небе́снем / в ра́дости блаже́нней воспева́ти А́нгельскую песнь: // Аллилу́иа, Аллилу́иа, Аллилу́иа.
(Э́тот Конда́к чита́ется три́жды, зате́м 1-й И́кос и 1-й Конда́к)
И́кос 1
Я́ко бегле́ц, из святы́я оби́тели Солове́цкия / в Помо́рскую страну́ изгна́н бысть, / преподобному́дре Моисе́е, / и, Христу́ после́дуя, нача́ подвиза́тися в це́ркви Иоа́нна, Предте́чи Христо́ва, / я́же в ве́си Оле́ницкия, / и та́мо благи́й и ве́рный бя́ше раб Госпо́день, подвиза́шеся да́же до сме́рти за ве́ру и за святи́лище. / Те́мже почита́ем па́мять твою́ всечестну́ю и, благогове́йне чту́ще вся лю́тая твоя́, // вопие́м ти си́це: Ра́дуйся, я́ко от ю́ности своея́ Бо́га се́рдцем возлюби́л еси́; Ра́дуйся, я́ко в ю́нем телеси́ кре́пость му́жескую яви́л еси́.
Ра́дуйся, оте́честву земно́му в чи́не во́инстем досто́йно послужи́вый; Ра́дуйся, последи́ же во́инству Христо́ву приобщи́тися зело́ возжеле́вый. Ра́дуйся, ко а́нгельскому чи́ну от ю́ности сопричтéнный; Ра́дуйся, во и́мя проро́ка Моисе́я во и́ночестве наречéнный. Ра́дуйся, слáдость словéс Госпо́дних вы́ну в душе́ храни́вый; Ра́дуйся, и́гу благо́му Христо́ву вы́ю подклони́вый. Ра́дуйся, преподобному́чениче Моисе́е, // те́плый моли́твенниче о душа́х на́ших.
Конда́к 1
Преподобному́чениче Моисе́е, / от муже́й земли́ Полно́щныя / в ти́хое приста́нище Солове́цкия оби́тели прите́кл еси́, / поще́нием и слеза́ми, во хвале́нии и пе́снех / непреста́нно прилепля́яся Бо́гу. / Ты в годи́ну гоне́ний на Це́рковь Ру́сскую / ду́шу свою́ за Христа́ положи́л еси́, / боля́щь и гони́мь быва́я, / житие́ свое́ венце́м страда́ния увенча́л еси́. / Наста́ви лю́ди твоя́ пе́ти тя и Бо́га сла́вити
и́стинно, / достохва́льный Моисе́е, / мы же, сла́вное твое́ житие́ воспомина́юще, велича́ем тя си́це: / Ра́дуйся, преподобному́чениче Моисе́е, // те́плый моли́твенниче о душа́х на́ших.
Моли́тва свято́му преподобному́ченику Моисе́ю (Ко́жину). О, избра́нниче и уго́дниче Христо́в, преподобному́чениче Моисе́е, Це́ркве Ру́сския украше́ние, оби́тели Солове́цкия и земли́ Ко́льския благо́е прозябе́ние и кра́сный пло́де, за род мона́шеский предста́телю и всем правосла́вным лю́дем наста́вниче! Ты во вре́мя гоне́ния безбо́жнаго от сокро́вищницы души́ твоея́ спаси́тельное испове́дание Правосла́вныя ве́ры изне́сл еси́ и лю́дем ве́рным па́стырь до́брый яви́лся еси́, ду́шу твою́ за Христа́ и Его́ о́вцы полага́я и лю́тыя во́лки дале́че отгоня́я. Ны́не у́бо при́зри
на нас, недосто́йных чад твои́х, умиле́нною душе́ю и сокруше́нным
се́рдцем тя призыва́ющих. Умоли́ Го́спода Бо́га, да прости́т согреше́ния на́ша и изба́вит от а́довых уз и ве́чнаго муче́ния. Утверди́ нас во святе́й Правосла́вней ве́ре, научи́ нас всегда́ твори́ти во́лю Бо́жию и храни́ти за́поведи церко́вныя. Моли́ся и ны́не ко Го́споду правосла́вныя христиа́ны от разделе́ний отстоя́ти, свяще́нники и мона́шествующия в по́двизе укрепи́ти и вся ве́рныя от наве́тов бесо́вских сохрани́ти. Моли́ся ко Христу́ Влады́це сию́ ве́ру оте́ческую, ю́же ты до сме́рти испове́дал еси́, непрело́жну и свя́ту нам соблюсти́, я́ко да моли́твами твои́ми соблюде́тся в ми́ре и благоче́стии Свята́я Русь и непреста́нно сла́вится в ней И́мя Пресвяты́я Тро́ицы, Отца́, и Сы́на, и Свята́го Ду́ха во ве́ки веко́в. Ами́нь.