МЕ́СЯЦА А́ВГУСТА В 25-Й ДЕНЬ (7 СЕНТЯБРЯ́ ПО Н. СТ.)
Преподобному́ченика Моисе́я (Ко́жина), иеромона́ха Солове́цкаго, Оле́ницкаго
НА МА́ЛОЙ ВЕЧЕ́РНИ
На Го́споди, воззва́х: стихи́ры на 4. Глас 6:
Преподобному́чениче Моисе́е, / в ти́хое приста́нище Солове́цкия оби́тели прите́кл еси́, / поще́нием и слеза́ми, моли́твами и пе́сньми / непреста́нно прилепля́яся Бо́гу, / ты в годи́ну гоне́ний на Це́рковь Ру́сскую / ду́шу свою́ за Христа́ положи́л еси́, / житие́ свое́ венце́м страда́ния увенча́в. / Наста́ви лю́ди твоя́ пе́ти тя и Бо́га сла́вити и́стинно, // достохва́льный Моисе́е.
Я́ко бегле́ц, из святы́я оби́тели Солове́цкия / в Помо́рскую страну́ изгна́н бысть, преподобному́чениче Моисе́е, / Христу́ после́дова, нача́ подвиза́тися в це́ркви Иоа́нна, Предте́чи Христо́ва, / я́же в ве́си Оле́ницкия, / и та́мо благи́й и ве́рный бя́ше раб Госпо́день. // Те́мже почита́ем па́мять твою́ всечестну́ю.
Ра́дуйся, преподобному́чениче Моисе́е, / боле́зни и труды́ благоду́шно претерпе́вый, / и посреде́ мяте́жей мно́гих ве́ру Христо́ву, / благода́ть и любы́ до конца́ сохрани́вый, / и за Христа́ сла́вную кончи́ну прия́вый. / Оба́че ин суд Бо́жий, ин челове́ческий: / ско́рый и непра́вый тя
на сме́рть осуди́, // Небе́сный же и Боже́ственный по́честьми побе́дными
венча́. О́тче преподо́бне Моисе́е, / в тя́жкую годи́ну испыта́ний ве́ру Христо́ву поруга́ему обре́л еси́ / и себе́ сама́го, я́ко же́ртву живу́ю, Бо́гу прине́сл еси́. / Ны́не Госпо́дь показа́ тя, свети́льника Своего́, / сия́юща на све́щнице Це́ркве, / искуше́нием вра́жиим противоста́вша, / и со́нма новому́чеников Це́ркве Ру́сския / украше́ние пресве́тлое я́вльшагося. / Тем венча́ тя Человеколю́бец Госпо́дь за сугу́быя ско́рби и го́рести, / наше́дшия тя в ле́тех сих нече́стия, // и прия́т тя во сла́ву Бо́жию.
Сла́ва, глас то́йже:
Восхва́лим днесь пе́сньми страда́льца оби́тели Солове́цкия / и земли́ на́шея Ко́льския / преподобному́ченика Моисе́я. / Сей в це́ркви Рождества́ Иоа́нна Предте́чи / служи́тель неле́ностный яви́лся есть, / тве́рдо Христа́
испове́дуя / и напа́сти вра́жия нивочто́же вменя́я, / низложи́ бо безси́льныя де́монския де́рзости / и су́етную я́рость безу́мия безбо́жных / и обре́те дерзнове́ние благо́е ко Го́споду, / ны́не же мо́лится со все́ми за Христа́ спострада́вшими // о спасе́нии душ на́ших.
И ны́не, Богоро́дичен, глас то́йже:
Ра́дуйся, Звездо́ светоза́рная, / Све́т, пре́жде де́нницы от Отца́ возсия́вший, / неизрече́нно ро́ждшая, / Того́ сия́нием озари́ ду́ши на́ша, // спя́щия во тьме и се́ни сме́ртней.
На стихо́вне стихи́ры, глас 4:
Про́мыслом Бо́жиим и челове́ческим избра́нием / служи́тель ве́рен бя́ше оби́тели Солове́цкия / и помо́щник в ско́рбех преизря́дных, обре́тших бра́тию зело́. / Помози́ и нам, о́тче Моисее, / ве́рно чту́щим па́мять твою́, // в ве́ре и́стинней утверди́тися.
Стих: Честна́ пред Го́сподем / смерть преподо́бных Его́.
Земна́я отри́нув, Небе́сная себе́ уготовля́я, / я́ко страда́лец за и́стину, / му́жественно ра́ди бра́тии своея́ не оста́вил еси́ вины́ сла́ве оби́тели. / Да́же до кро́ве пострада́вый, / проти́ву ху́лников, гони́телей и досади́телей Це́ркве подвиза́яся, / Небе́сныя сла́дости вкуси́л еси́, / страстоте́рпче ди́вный, / сея́ сла́дости испроси́ и нам у Христа́, Спа́са на́шего, // я́ко моли́твенник о душа́х на́ших.
Стих: Блаже́н муж, боя́йся Го́спода, / в за́поведех Его́ восхо́щет зело́.
Во изгна́нии бы́вый, / ско́рбь непреста́нную и уны́ние растворя́л еси́ / слеза́ми и воздыха́ньми о оби́тели Солове́цтей матероле́пней, / от безбо́жных разоря́емей, / до́блественный о́тче Моисе́е, / в не́йже ле́та мно́га подвиза́вся, / мно́гия по́двиги и труды́ поне́сл еси́. / Ны́не же, свяще́нныя ру́це твои́ у Престо́ла Святы́я Тро́ицы простира́я, / помина́й Ко́льскую зе́млю рожде́ния своего́ / и оби́тель Солове́цкую, ю́же возлюби́л еси́, // и моли́ о спасе́нии сла́вящих тя благоче́стно.
Сла́ва, глас то́йже:
Пе́рвее до́брым по́двигом твои́м преподо́бническим / в житии́ земне́м Бо́гови угожда́я, / страда́нием му́ченически житие́ твое́ сконча́л
еси́. / Те́мже венча́ тя Госпо́дь за сугу́быя ско́рби и го́рести, / наше́дшия
на тя в ле́тех сих нече́стия, // и прия́т тя во сла́ву Свою́.
И ны́не, Богоро́дичен, глас то́йже:
К покро́ву Твоему́ прибега́ем, / Де́во Богоро́дице, / и мо́лим Тя: ско́ро на по́мощь нам, / ве́рно чту́щим Тя, предвари́ / и от враг ви́димых и неви́димых изба́ви, // Ты бо еси́ заступле́ние на́ше.
Тропа́рь пи́сан на вели́цей вече́рни. Ектения́ ма́лая и отпу́ст.
НА ВЕЛИ́ЦЕЙ ВЕЧЕ́РНИ
Блаже́н муж: 1-й антифо́н.
На Го́споди, воззва́х: стихи́ры на 8, глас 5:
Прииди́те, ве́рнии, / свяще́нное и честно́е преподо́бнаго Моисе́я торже́ство пе́сньми днесь воспои́м, / восхва́лим ревни́теля и защи́тителя оби́тели Солове́цкия / и Помо́рия се́вернаго ве́си Оле́ницкия: / во времена́ гоне́ний на Це́рковь Ру́сскую / со́нму новому́чеников сопричте́н бысть, / ны́не же, предстоя́ Престо́лу Госпо́дню, мо́лится, // да и мы Ца́рствию Христо́ву приобщи́мся. (Три́жды.)
Прииди́те, боголю́бцы, / ко Христу́ любо́вию у́тренююще, / ра́дости страда́льца преди́внаго Моисе́я прича́стницы бу́дем. / Ты, о́тче преподо́бне, / заступа́я оте́чествия своего́ вве́ренную ти святы́ню, / тверд и непрекло́нен яви́лся еси́, / вся́чески утесня́емь и изгоня́емь от враг быв. / Госпо́дь же упова́ние тебе́ бысть, / прихо́да Оле́ницкаго после́дний нача́льниче // и сла́вный страстоте́рпче. (Три́жды.)
Прииди́те, христолюби́вии лю́дие, / восхва́лим ратобо́рца и защи́тителя до́блественнаго святы́нь оте́ческих, / и́же во́инству Царя́ Небе́снаго сопричте́н бы́сть, / земно́е во́инство отве́рже, реки́й: / я́ко несть на́ша брань проти́ву кро́ви и пло́ти, / но к миродержи́телем тмы́ ве́ка сего́, / к духово́м зло́бы поднебе́сным. / Блаже́н еси́, живо́т свой положи́вый / за ве́ру Правосла́вную и за и́скренния своя́, // всехва́льный преподобному́чениче Оле́ницкий. (Два́жды.)
Сла́ва, глас 8:
Во изгна́нии поки́нул еси́ ото́к Солове́цкий, святы́й Моисе́е, / моли́тву непреста́нную слеза́ми растворя́я / о возлю́бленней оби́тели, от безбо́жных разоря́емей, / в не́йже мно́гия по́двиги и труды́ поне́сл еси́. / Во оте́чествии свое́м во дни Па́схи Христо́вой / дерза́я о И́мени Го́спода Воскре́сшаго, / от безбо́жных му́ку претерпе́л еси́. / Ны́не же, Престо́лу Бо́жию предстоя́, / прославля́еши Отца́, и Сы́на, и Свята́го Ду́ха, // Тро́ицу Единосу́щную и Неразде́льную.
И ны́не, Богоро́дичен:
Царь Небе́сный / за человеколю́бие на земли́ яви́ся, / и с челове́ки поживе́, / от Де́вы бо Чи́стыя плоть прие́мый / и из Нея́ проше́дый с восприя́тием. / Еди́н есть Сын, сугу́б естество́м, / но не Ипоста́сию. / Те́мже соверше́нна Того́ Бо́га / и соверше́нна Челове́ка вои́стину пропове́дающе, / испове́дуем Христа́ Бо́га на́шего: / Его́же моли́, Ма́ти Безневе́стная, // поми́ловатися душа́м на́шим.
Та́же вход. Проки́мен дне. Чте́ния три. Проро́чества Иса́иина чте́ние: Та́ко глаго́лет Госпо́дь: вси язы́цы собра́шася вку́пе, и соберу́тся кня́зи от них. / Кто возвести́т сия́ в них? / Или́ я́же от нача́ла, кто слы́шана сотвори́т вам? / Да приведу́т свиде́тели своя́, и оправдя́тся, и да услы́шат, и да реку́т и́стину. / Бу́дите Ми свиде́тели, и Аз Свиде́тель, глаго́лет Госпо́дь Бог, и О́трок, Его́же избра́х. / Да позна́ете, и ве́руете Ми, и разуме́ете, я́ко Аз есмь, пре́жде Мене́ не бысть ин Бог, и по Мне не бу́дет. / Аз есмь Бог, и несть ра́зве Мене́ спаса́яй. Аз возвести́х и спасо́х; уничижи́х, и не бе в вас чужди́й. / Вы Мне свиде́тели, и Аз Госпо́дь Бог, и еще́ от нача́ла Аз есмь, и несть от рук Мои́х избавля́яй. Сотворю́, и кто отврати́т то? / Си́це глаго́лет Госпо́дь Бог, избавля́яй вас, Святы́й Изра́илев. Прему́дрости Соломо́новы чте́ние: Пра́ведных ду́ши в руце́ Бо́жией, и не прико́снется их му́ка. / Непщева́ни бы́ша во очесе́х безу́мных умре́ти, и вмени́ся озлобле́ние исхо́д их, и е́же от нас ше́ствие – сокруше́ние, они́ же суть в ми́ре. / И́бо
пред лице́м челове́ческим а́ще и му́ку прии́мут, упова́ние их безсме́ртия испо́лнено. / И вма́ле нака́зани бы́вше, вели́кими благоде́тельствовани бу́дут, я́ко Бог искуси́ я и обре́те их досто́йны Себе́. / Я́ко зла́то в горни́ле, искуси́ их и, я́ко всепло́дие же́ртвенное, прия́т я. / И во вре́мя посеще́ния их возсия́ют и, я́ко и́скры по сте́блию, потеку́т. / Су́дят язы́ком и облада́ют людьми́, и воцари́тся Госпо́дь в них во ве́ки. / Наде́ющиися Нань разуме́ют и́стину, и ве́рнии в любви́ пребу́дут Ему́. / Я́ко благода́ть и ми́лость в преподо́бных Его́, и посеще́ние во избра́нных Его́. Прему́дрости Соломо́новы чте́ние: Пра́ведницы во ве́ки живу́т, и в Го́споде мзда их, и попече́ние их у Вы́шняго. / Сего́ ра́ди прии́мут Ца́рствие благоле́пия и вене́ц добро́ты от руки́ Госпо́дни, зане́ десни́цею покры́ет я и мы́шцею защити́т их. / Прии́мет всеору́жие рве́ние свое́ и вооружи́т тварь в месть враго́м. / Облече́тся в броня́ пра́вды и возложи́т шлем – суд нелицеме́рен. / Прии́мет щит непобеди́мый – преподо́бие, / поостри́т же напра́сный гнев во ору́жие, спобо́рет же с ним мир на безу́мныя. / По́йдут праволу́чныя стре́лы мо́лниины и, я́ко от благокру́гла лу́ка облако́в, на наме́рение полетя́т. / И от каменоме́тныя я́рости испо́лнь паду́т гра́ды, вознегоду́ет
на них вода́ морска́я, ре́ки же потопя́т я на́гло. / Сопроти́в ста́нет им дух
си́лы и, я́ко ви́хор, разве́ет их, и опустоши́т всю зе́млю беззако́ние, и злоде́йство преврати́т престо́лы си́льных. / Слы́шите у́бо, ца́рие, и разуме́йте, навы́кните, судии́ конце́в земли́. / Внуши́те, держа́щии мно́жества и гордя́щиися о наро́дех язы́ков, я́ко дана́ есть от Го́спода держа́ва вам и си́ла от Вы́шняго.
На лити́и стихи́ра хра́ма и свята́го, глас 1:
Во оби́тели Солове́цтей по́двигом и́ноческим до́бре подвиза́лся еси, / сла́вный Моисе́е, / и во Се́ргиево-Мукса́лмском скиту́, досто́йно зва́ния ходи́в, / плоды́ прине́сл еси́ Христо́ва смире́ния, / я́ко дре́во благосенноли́ственное. / И нас научи́ смиря́ти ду́ши на́ша / пред Отце́м Небе́сным и бра́тиями на́шими, // да обря́щем ве́чную побе́ду с тобо́ю.
Сла́ва, глас 4:
От пле́на еги́петскаго нече́стия челове́ки моисе́йски изба́вил еси́, / к многопло́дию ду́ши сро́дных свои́х Помо́рския земли́ направля́я, / я́же суть на ме́сте том, нарица́емем Те́рский брег, / ли́ку же неисче́тному
до́блественных му́чеников приобщи́лся еси́ / и собо́ру Ко́льских новому́чеников основа́ние тве́рдо положи́л еси́. / Ны́не тому́ а́нгелы на Небесе́х ра́дуются, / с ни́ми же и ты песнь побе́дную воспева́еши. / Да ви́дяще, ка́ко лю́бит Госпо́дь ве́рных свои́х, // и мы Ца́рствию Христо́ву приобщи́мся.
И ны́не, Богоро́дичен:
При́зри на моле́ние Твои́х раб, Всенепоро́чная, / утоля́ющи лю́тая на ны воста́ния, / вся́кия ско́рби нас изменя́ющи. / Тя бо, Еди́ну, тве́рдое и изве́стное утвержде́ние и́мамы, / и Твое́ предста́тельство стяжа́хом. / Потщи́ся на умоле́ние Тебе́ ве́рно вопию́щих: / ра́дуйся, Влады́чице, / всех по́моще, ра́досте и покро́ве, // и спасе́ние душ на́ших.
На стихо́вне стихи́ры, глас 1.
Подо́бен: Небе́сных чино́в: Ни кня́зя ми́ра сего́, ни влады́к злосту́жных, / претя́щих тебе́, не убоя́лся еси́, о́тче преподо́бне, / ве́рою и упова́нием на Го́спода был еси́ кре́пок. / Утверди́ нас ра́ди любве́ Христо́вой терпе́ти вся му́ки и ско́рби / и да́же до сме́рти подвиза́тися о и́стине, // я́коже ты, о́тче преди́вне.
Стих: Проидо́хом сквозе́ огнь и во́ду, / и изве́л еси́ ны в поко́й.
Оте́честву своему́ в годи́ну безве́рия был еси́ свети́льник, / Боже́ственных Та́ин Христо́вых раздая́тель / и душ людски́х врачева́тель яви́лся еси́, о́тче прехва́льне, / те́мже благода́ть Ду́ха Уте́шителя от юдо́ли сме́ртныя тя возведе́ // в вы́шняя Небе́сная селе́ния.
Стих: Свет возсия́ пра́веднику, / и пра́вым се́рдцем весе́лие.
Е́же по о́бразу соблю́д невреди́мо, / во е́же по подо́бию, я́ко мо́щно, возше́л еси́, / му́жески бо естество́ пону́див, саможе́ртвенный служи́телю Моисе́е, / сопроти́вился еси́ терпели́во, / не устраши́лся еси мучи́тельскаго преще́ния и я́рости богобо́рцев, / ве́рою нетще́тною во Христа́ окриля́емь, / и ри́зы своя́ убели́л еси́ то́ками крове́й свои́х, / на брак А́гнца Боже́ственнаго возше́л еси́, // преподо́бный страда́льче и но́вый му́чениче Христо́в.
Сла́ва, глас 6:
Распе́ншемуся за ны Христу́ Бо́гу, / смерть попра́вшему и ад плени́вшему, / сораспина́лися есте́, страстоте́рпцы приснопа́мятнии, / му́чениче Моисе́е со ста́ростой и парамона́рем церко́вными, / суд непра́вый и ско́рбную темни́цу, / страда́ния мно́гая претерпе́вше да́же до сме́рти му́ченическия, / в невече́рнем же дни Ца́рствия Бо́жия / в Це́рковь Небе́сную свяще́нно внидо́сте / и ны́не Тро́ице предстоите́, // сия́юще отту́ду блиста́нии, истека́ющими пребога́тно.
И ны́не, Богоро́дичен:
Творе́ц и Изба́витель мой, Пречи́стая, / Христо́с Госпо́дь из Твои́х ложе́сн проше́д, / в мя оболки́йся, / пе́рвыя кля́твы Ада́ма свободи́. / Те́мже Ти, Всечи́стая, / я́ко Бо́жии Ма́тери же и Де́ве, / вои́стину вопие́м немо́лчно: / ра́дуйся а́нгельски, ра́дуйся, Влады́чице, / предста́тельство, и покро́ве, // и спасе́ние душ на́ших.
На благослове́нии хлебо́в тропа́рь преподобному́ченику два́жды
и Богоро́дице Де́во: еди́ножды. Тропа́рь, глас 1: Святы́х Та́ин Христо́вых ве́рный служи́телю, / покая́ния пропове́дниче и кра́я Ко́льскаго печа́льниче, / преподобному́чениче Моисе́е, // моли́ Ми́лостивого Бо́га спасти́ся душа́м на́шим.
НА У́ТРЕНИ
На Бог Госпо́дь: тропа́рь преподобному́ченику два́жды.
Сла́ва, и ны́не:
Богоро́дичен: Гаврии́лу веща́вшу:
По 1-й стихоло́гии седа́лен, глас 2:
Сове́ту нечести́вых неприча́стен бы́в, / страда́ния за Христа́, я́ко благода́тный да́р, прия́л еси́ / и предбу́дущая веща́ти сподо́бился еси́, до́блественниче Моисе́е, / вмени́в сия́ в ра́дость себе́ и во спасе́ние. / Ве́рен был еси́ Бо́гу да́же до сме́рти, / и даде́ ти Госпо́дь мзду́ досто́йну, вене́ц живота́, / и новому́чеником Це́ркве Ру́сския нарече́ тя. (Два́жды.)
Сла́ва, и ны́не, Богоро́дичен, глас то́йже:
Предста́тельство неусы́пное и́мамы Тя, Пресвята́я Влады́чице, / мольба́м и пла́чем земны́м ско́рое услы́шание, / боле́знем и ско́рбем те́плое сострада́ние, / ру́це, просте́ртыя в по́мощь обремене́нным грехми́ и беда́ми, / глас, непреста́нно моля́щий милосе́рдие Бо́жие за род челове́ческий.
По 2-й стихоло́гии седа́лен, глас 3:
Мужа́йся, Христо́ва Це́рковь, и держа́вствуй над всу́е борю́щими: / Христо́вы бо дру́зи, и предстоя́щии, и отстоя́щии, / я́коже до́блии крепкоду́шнии, о тебе́ пеку́тся, / при́сно жи́ви обрета́ются во Ца́рствии Небе́снем, / и́хже о́бщий пра́здник ны́не соверша́ем све́тло. (Два́жды.) Сла́ва, и ны́не, Богоро́дичен, глас то́йже: Возжада́ душа́ моя́ Тебе́, Спа́се мой, / я́ко живота́ исто́чник и́маши вои́стину, / Свет ми́ру Невече́рний Богоро́дицею возсия́вый. / Тоя́ всеси́льными мольба́ми / Небе́сных благ сокро́вище отве́рзи ми, Влады́ко Многоми́лостиве. Велича́ние: Велича́ем тя, / преподобному́чениче Моисе́е, / и чтим по́двиги и страда́ния твоя́, / я́же за Христа́ // претерпе́л еси́.
Псало́м избра́нный: Весть Госпо́дь путь пра́ведных, и путь нечести́вых поги́бнет. / Рабо́тайте Го́сподеви со стра́хом и ра́дуйтеся Ему́ с тре́петом. / Ты же, Го́споди, Засту́пник мой еси́, Сла́ва моя́, и вознося́й главу́ мою́. / Поми́луй мя, Го́споди, я́ко не́мощен есмь, исцели́ мя, Го́споди, я́ко смято́шася ко́сти моя́. / Отступи́те от мене́ вси де́лающии беззако́ние, я́ко услы́ша Госпо́дь глас пла́ча моего́. / Го́споди, Бо́же мой, на Тя упова́х, спаси́ мя от всех гоня́щих мя и изба́ви мя. / По́мощь моя́ от Бо́га, спаса́ющаго пра́выя се́рдцем. / Да упова́ют на Тя зна́ющии и́мя Твое́, я́ко не оста́вил еси́ взыска́ющих Тя, Го́споди. / Ты, Го́споди, сохрани́ши ны и соблюде́ши ны от ро́да сего́ и во век. / Возда́ст ми Госпо́дь по пра́вде мое́й и по чистоте́ руку́ мое́ю возда́ст ми. / С преподо́бным преподо́бен бу́деши и с му́жем непови́нным непови́нен бу́деши. / Зако́н Госпо́день непоро́чен, обраща́яй ду́ши, свиде́тельство Госпо́дне ве́рно, умудря́ющее младе́нцы.
По полиеле́и седа́лен, глас 8:
А́нгелом собесе́дник на земли́ бысть, достохва́льный Моисе́е, / мы́сленныма очи́ма зря Небе́сная, / егда́ на по́двиг тя́жкий за ве́ру тя призва́ Госпо́дь, / ты же, па́че укрепля́яся ду́хом, ниже́ восхоте́л еси́ отри́нути ча́шу сию́ / или́ пути́ свяще́нническаго уклони́тися, / но вся претерпе́л еси́, зане́же от Го́спода вся сия́ бы́ша. / Ны́не же, в Небе́сных оби́телех жи́тельствуя, / моли́ся за ны, страда́ния твоя́ чту́щия, / да ве́рни повеле́нием Госпо́дним пребыва́ем, / друг дру́га лю́бяще и мир в себе́ иму́ще. (Два́жды.) Сла́ва, и ны́не, Богоро́дичен, глас то́йже: Небе́сная Цари́це, Госпоже́ Блага́я, / любве́ боже́ственныя сосу́де преиспо́лненный, / Твои́м всеми́лостивным заступле́нием сея́ животворя́щия любве́ сосу́ды че́стны спаса́емых нас сотвори́, / да ве́рни повеле́нием Госпо́дним пребыва́ем, / друг дру́га лю́бяще и мир в себе́ иму́ще. Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем / смерть преподо́бных Его́. Стих: Что возда́м Го́сподеви о всех, / я́же воздаде́ ми? Вся́кое дыха́ние: Ева́нгелие от Ма́рка, зача́ло 37.
По 50-м псалме́ стихи́ра, глас 6:
Где твое́, сме́рте, жа́ло? / Где твоя́, а́де, побе́да? / Всу́е и́щете ве́рных Госпо́дних пожре́ти, / не и́мате же вла́сти ни еди́ныя, / победи́л бо есть вы Спа́с душ на́ших Христо́с Бо́г, / дарова́в живо́т ве́чный всем земноро́дным, / ве́рным Ца́рство Свое́ запове́да, / того́ насле́дник Моисе́й житие́м пра́ведным и кончи́ною му́ченическою яви́ся. / Ны́не, па́мять преподобному́ченика воспева́юще, / нача́ло ве́чнаго жития́ его́ в Бо́зе пра́зднуем // и к по́мощи его́ моли́твенней взыва́ем.
Кано́н Богоро́дице со ирмосо́м на 6, и свято́му на 8, глас 6.
Песнь 1
Ирмо́с:
Волно́ю морско́ю / Скры́вшаго дре́вле / гони́теля мучи́теля, / под земле́ю скры́ша спасе́нных о́троцы; / но мы, я́ко отрокови́цы, // Го́сподеви пои́м, сла́вно бо просла́вися.
Запе́в: Святы́й преподобному́чениче Моисе́е, // моли́ Бо́га о нас.
Сподо́би, Го́споди, пе́сньми просла́вити по достоя́нию Твоего́ уго́дника, / И́мя Твое́ просла́вльшаго, / доброхра́браго Моисе́я преподобному́ченика, до́блестнаго во́ина Твоего́, / прего́рдаго велиа́ра попра́вшаго и Це́рковь Христо́ву кровьми́ свои́ми украси́вшаго. / Мы же, соше́дшеся в ле́тный пра́здник досточу́дныя па́мяти его́, / восхва́лим пе́сньми и испове́даньми досто́йно. Ве́ре Христо́ве и любви́ Боже́ственней измла́да прилежа́л еси́, / боле́зни и труды́ благоду́шно претерпева́я, / посреде́ мяте́жей мно́гих до конца́ сия́ сохрани́л еси́ / и за Христа́ сла́вную кончи́ну прия́л еси́. / Оба́че ин суд Божи́й, ин челове́ческий: / ско́рый и непра́вый тя на смерть осуди́, / Небе́сный же Боже́ственный по́честьми побе́дными тя венча́. Тя, о́тче преподо́бне Моисе́е, / в тя́жкую годи́ну испыта́ний Госпо́дь показа́, я́ко свети́льника Своего́, / сия́юща на све́щнице свя́те, Це́ркве, / искуше́нием вра́жиим противоста́вша, / просвеща́ющаго ду́ши ве́рных све́том страда́ний за Христа́ / и со́нма новому́чеников Це́ркве Ру́сския украше́ние пресве́тлое я́вльшагося. Богоро́дичен: Путь ко спасе́нию откры́ла еси́ нам, Богоро́дице, / жития́ непоро́чнаго о́браз чисте́йший явля́ющи. / Те́мже, на Тя взира́юще и Тебе́ моля́щеся, / из глубины́ серде́чныя взыва́ем: / я́звы грехо́в и стру́пы страсте́й на́ших исцели́ слеза́ми покая́ния.
Песнь 3
Ирмо́с:
Тебе́, на вода́х / пове́сившаго всю зе́млю неодержи́мо, / тварь, ви́девши на ло́бнем ви́сима, / у́жасом мно́гим содрага́шеся, // несть свят, ра́зве Тебе́, Го́споди, взыва́ющи.
Оте́честву земно́му в чи́не во́инстем на плу́тве досто́йно послужи́в, богоревни́ве Моисе́е, / во́инству Христо́ву приобщи́тися и еди́ному Бо́гу порабо́тати зело́ возжела́л еси́ / и, во оби́тель ото́ка Солове́цкаго всели́вся, / досто́йно в чи́не и́ночестем и са́не иере́йстем Го́сподеви послужи́л еси́. В бра́тстве и́ночестем усе́рдно подвиза́вся, Моисе́е всехва́льне, / восходи́л еси́ от си́лы в си́лу / и, к мона́шескому чи́ну и са́ну свяще́нному сопричте́н быв, / служе́ние свое́ попремно́гу соверша́л еси́ / под
заступле́нием Зоси́мы, Савва́тия и Ге́рмана, первонача́льников оби́тели, / к ни́мже умиле́нною душе́ю и сокруше́нным се́рдцем моли́твы простира́л еси́. Моисе́й, вели́цый во проро́цех иногда́, жезло́м свои́м, я́ко кре́стным зна́мением, во́ды раздели́в, / проше́д со изра́ильтяны сквозе́ Чермно́е мо́ре и земна́го обетова́ния дости́же, / ты же, преподобному́чениче Моисе́е, крестоноше́нием плоть свою́ умертви́в, / земли́ обетова́ния дости́гл еси́, в не́йже пра́вда живе́т. Богоро́дичен: Обре́тши благода́ть у Сы́на Твоего́ заступа́ти немощны́й род челове́ческий, Богоро́дице, / неусы́пно назира́еши лю́ди христиа́нския, / и́ноком наипа́че покрови́тельствуеши, / я́ко а́нгельскому чи́ну подража́телем. / Сама́ бо вы́шши всех А́нгел и Арха́нгел жи́тельство нам яви́ла еси́. Седа́лен, глас 5: Егда́ безбо́жнии тща́хуся сокры́ти тя в темни́це, / ты, блаже́нный Моисе́е, я́ко луч Со́лнца Пра́вды яви́лся еси́, / посрамля́я ипа́ты, и воево́ды, и мучи́тели, су́щия во власте́х, / и страда́ньми твои́ми мглу безбо́жия и злообы́чия над Оте́чеством на́шим разсе́ял еси́. / Мо́лим тя, страда́льче святы́й: / моли́ся за ны ко Го́споду, / по́прище жития́ на́шего нам досто́йно проити́, / ве́чныя поги́бели изба́витися и во́инами све́та яви́тися. (Два́жды.) Сла́ва, и ны́не, Богоро́дичен: Засту́пницу Тя и́мамы пред Бо́гом, Пречи́стая Де́во, / не пре́зри раб Твои́х, на предста́тельство Твое́ наде́ющихся, / моле́ние на́ше приими́ и по́мощь с Небесе́ низпосли́, / да спасе́ние душ на́ших обря́щем.
Песнь 4
Ирмо́с:
На Кресте́ Твое́ Боже́ственное истоща́ние / прови́дя, Авваку́м, ужа́сся, вопия́ше: / Ты си́льных пресе́кл еси́ держа́ву, Бла́же, // приобща́яся су́щим во а́де, я́ко Всеси́лен.
Повеле́нию Госпо́дню повину́яся, / крест настоя́тельства во оте́чествии свое́м со смире́нием прия́л еси́, Моисе́е достохва́льне. / Егда́ же си́ла вра́жия безу́мно на прихо́д Це́ркви твоея́ воста́, / страда́ния,
предугото́ванная тебе́, безро́потне восприя́л еси́ / и сораспя́тися Христу́ после́довал еси́. Ни врага́ ро́да челове́ческаго, ни влады́к богоху́льных, / ни ору́жников дерзосе́рдых, претя́щих тебе́, не убоя́лся еси́, священному́чениче Моисе́е, / ве́рою и упова́нием на Го́спода был еси́ кре́пок, / призыва́я чад свои́х к терпе́нию скорбе́й и стяжа́нию смире́ния Христо́ва. Правосла́вныя Це́ркве свети́льниче, свяще́нный Моисе́е, / па́че укрепля́яся ду́хом, стра́ха челове́ческаго ника́ко устраши́ся, / ниже́ восхоте́ отри́нути ча́шу страда́ний / и, кровьми́ му́ченическими неугаси́мо светя́й, / вся претерпе́л еси́, я́же от Го́спода, / ныне же, у Престо́ла Бо́жия предстоя́, моли́ся о чту́щих тя. Богоро́дичен: Мо́лим Тя, Богоро́дице Де́во, вра́жиими злоде́йствы обурева́емии: / сете́й злоухищре́нных свободи́, / мучи́тельства страсте́й нас изба́ви, / мир Бо́жий в ду́ши на́ша водвори́, терпе́нием Христо́вым снабдева́ющи.
Песнь 5
Ирмо́с:
Богоявле́ния Твоего́, Христе́, / к нам ми́лостивно бы́вшаго, / Иса́ия, Свет ви́дев Невече́рний, / из но́щи у́треневав, взыва́ше: / воскре́снут ме́ртвии, и воста́нут су́щии во гробе́х, // и вси земноро́днии возра́дуются.
Обе́ты мни́шеския изве́стно исполня́я, Моисе́е прехва́льне, / печа́льным был еси́ уте́шитель и малоду́шным ободри́тель, / па́стырь слове́сному ста́ду Христо́ву яви́лся еси́, / те́мже и, стезе́ю страстоте́рпческою вку́пе ше́ствовав, / му́ченичества красото́ю с па́ствою твое́ю украси́лся еси́, о́тче свяще́ннейший, / та́ко и ны́не не забу́ди нас, тя прославля́ющих. Все упова́ние твое́ на Го́спода возложи́л еси́, / и Той утвержде́ние тебе́ бысть, / пострада́ти за Христа́ сподо́бился еси́, / уничиже́ние от беззако́нных и изгна́ние во юдо́ль муче́ний, / труды́ поднево́льныя, и поноше́ния, и клевету́, / вся до кро́ве претерпе́л еси́, преподо́бне. В це́ркви Рождества́ Иоа́нна Предте́чи служи́тель неле́ностный яви́лся еси́, о́тче Моисе́е, / тве́рдо Христа́ испове́дуя и напа́сти вра́жия
нивочто́же вменя́я, / низложи́л бо еси́ безси́льныя де́монския де́рзости и су́етную я́рость безу́мия безбо́жных, / обре́л же еси́ дерзнове́ние благо́е ко Го́споду, / и ны́не моли́ со все́ми за Христа́ спострада́вшими о спасе́нии душ на́ших. Богоро́дичен: Над земле́ю Ру́сскою Покро́в держа́вный распросте́рши, / не оста́вила еси́ нас от злодея́ний льсти́ваго поги́бнути, Засту́пнице Всеми́лостивая. / Помози́ нам и ны́не ве́ру и́стинную без стра́ха испове́дати / и Правосла́вия побо́рником бы́ти.
Песнь 6
Ирмо́с:
Ят бысть, / но не удержа́н в пе́рсех ки́товых Ио́на: / Твой бо о́браз нося́, / Страда́вшаго и погребе́нию Да́вшагося, / я́ко от черто́га, от зве́ря изы́де. / Приглаша́ше же кустоди́и: / храня́щии су́етная и ло́жная, // ми́лость сию́ оста́вили есте́.
Егда́ мрак безбо́жия пости́же зе́млю Ру́сскую и Солове́цкую оби́тель в темни́цу обрати́, / тогда́ многоско́рбное се́рдце твое́ испо́лнися боле́зней и скорбе́й, / я́же и до конца́ му́жественне поне́сл еси́, Христо́в страстоте́рпче, / Про́мысл Бо́жий благи́й во всем разумева́я. Христа́ Подвигополо́жника пред мы́сленным взо́ром всегда́ име́я, о́тче Моисе́е, / Тому́ не обину́яся после́довал еси́ / и крест свой мужедо́блественно поне́сл еси́, / все упова́ние на Бо́га всеце́ло возложи́в, / со смире́нием и кро́тостию пра́ведное Его́ попуще́ние восприя́в. / Не оста́ви у́бо нас, священному́чениче, па́мять твою́ све́тло почита́ющих. О́браз смире́ния Христо́ва и любве́ Его́ / житие́м твои́м показа́л еси́, страстоте́рпче, сле́зно взыва́я: / тщи́теся, дру́зи, дости́гнути соверше́нства, я́же любы́ есть. / Ве́рность Христу́ Влады́це и зва́нию вы́шнему досто́йно сохрани́л еси́, / соприча́стник Ко́льским и Солове́цким новому́чеником яви́лся еси́ / и Це́рковь Ру́сскую по́двиги свои́ми све́тло украси́л еси́, богому́дре. Богоро́дичен: Влады́чице ми́ра, Ма́ти Всепе́тая, / приими́ серде́чную моли́тву раб Твои́х, во умиле́нии Ти приноси́мую, / и не лиши́ нас ми́лостиваго Твоего́ заступле́ния, / но, я́ко Блага́я, спаси́ ду́ши на́ша.
Конда́к, глас 2:
Уподо́бился еси́ проро́ку Моисе́ю, / ду́шу свою́ за погиба́ющую па́ству положи́л еси́, / у́зы темни́чныя и смерть за Христа́ претерпе́л еси́, / спаса́й нас моли́твами твои́ми, о́тче Моисе́е, // па́стырю наш преблаже́нный.
И́кос:
Преподо́бным отце́м старобы́тным поревнова́в / и испове́дником ве́ры, за Христа́ страда́ния с ра́достию прие́мшим, после́довав, / нело́жно Бо́гу потруди́лся еси́ во святе́й оби́тели Солове́цтей, / си́лою же вра́жиею во времена́ безбо́жная от нея́ удале́н быв, / неосла́бне в моли́тве и тве́рдем упова́нии дни жития́ своего́ провожда́л еси́, / до́ндеже во оби́тели гóрния ко Влады́це своемý пресели́лся еси́. / Сегó рáди прилéжно чтим и ублажáем тя, / преподобномýчениче Моисе́е, па́стырю наш преблаже́нный.
Песнь 7
Ирмо́с:
Неизрече́нное чу́до: / в пе́щи Изба́вивый преподо́бныя о́троки из пла́мене, / во Гро́бе мертв бездыха́нен полага́ется / во спасе́ние нас пою́щих: // Изба́вителю Бо́же, благослове́н еси́.
Во оте́чествии свое́м на Помо́рии во изгна́нии пребыва́л еси́, / рыда́я о беззако́ниих вели́ких наро́да ру́сскаго, / сля́чен и боля́й душе́ю, се́тующею о вели́честве зла, быва́я, / печа́луяся и моли́твами подвиза́яся день и нощь Бо́гу, / в Тро́ице Единосу́щному и Неразде́льному, воздыха́ния своя́ принося́: / Изба́вителю Бо́же, благослове́н еси́. Ме́сто благи́х му́жеств, я́же сотвори́, / на бре́ге се́вернем в ве́си Оле́нице избра́л еси́, досточу́дный Моисе́е, / иде́же богоревни́во в це́ркви Рождества́ Иоа́нна Предте́чи мно́го потруди́лся еси́ / и житие́ земно́е му́ченически сконча́л еси́. / Ны́не А́нгелы на небесе́х и челове́цы на земли́ ра́дуются, / да ви́дяще, ка́ко лю́бит Госпо́дь ве́рных свои́х, победоно́сно взыва́ют: / Изба́вителю Бо́же, благослове́н еси́. Те́рния бо не́нависти и волчцы́ безве́рия произведе́ нам Ру́сская земля́ / и пле́велами лжи засе́яна бысть от врага́. / Ты же, благове́рный па́стырю Моисе́е, / земны́я юдо́ли го́рести во мно́жестве позна́в, / благ неизрече́нных ны́не наслажда́ешися, Христо́в страстоте́рпче, / ве́рен бо
Госпо́дь, обеща́вый Ца́рствие Небе́сное лю́бящим Его́ и вопию́щим: / Изба́вителю Бо́же, благослове́н еси́. Богоро́дичен: Заве́та ве́чнаго Богоизбра́нная Таи́ннице / и Ца́рства Христо́ва Всеми́лостивая Врата́рнице! / Го́спода и Влады́ку веко́в умоли́ о нас немощны́х, озлобле́нием вра́жиим му́чимых, / Ты бо, Благосе́рдая Ма́ти, Помо́щница те́плая / и Хода́таица живота́ ве́чнаго христиа́ном при́сно явля́ешися.
Песнь 8
Ирмо́с:
Ужасни́ся, боя́йся, Не́бо, / и да подви́жатся основа́ния земли́: / се бо в мертвеце́х вменя́ется в Вы́шних Живы́й / и во Гроб мал странноприе́млется. / Его́же, о́троцы, благослови́те, свяще́нницы, воспо́йте, // лю́дие, превозноси́те во вся ве́ки.
Четыредеся́тницу святу́ю по́стнически соверши́в, / Па́сху Госпо́дню с наро́дом Бо́жиим воспева́л еси́, ду́хом пламене́я, / да соблюде́т Госпо́дь благоче́стия до́брыя зла́ки, / да не пода́влени бу́дут от те́рния, ниже́ смеся́тся с пле́велами, / но да постоя́т и умно́жатся ве́рная ча́да Христо́ва, / пою́ще и превознося́ще Го́спода во вся ве́ки. Па́мять твою́ ле́тную пра́зднующе, / святы́й новому́чениче Моисе́е, ра́дуемся и ликовству́ем, / днесь бо Па́сха твоя́ соверша́ется, / от земли́ в селе́ния Небе́сная восхо́дом невозбра́нным вни́де, / му́жественне вся претерпе́в, / Христа́ Воскре́сшаго поя́ и превознося́ во вся ве́ки. Тро́ичен: Триипоста́сный Бо́же, / Сло́вом сотвори́вый вся́ческая и Ду́хом к животу́ призва́вый земна́я и небе́сная! / Ты челове́ческое естество́ в подо́бие Свое́ созда́л еси́, / оскверне́нное же грехо́м Кро́вию Христа́ Твоего́ па́ки возста́вил еси́, / Его́же, о́троцы, благослови́те, свяще́нницы, воспо́йте, / лю́дие, превозноси́те во вся ве́ки. Богоро́дичен: Послужи́вши Та́йне Бо́жией, челове́ческому разуме́нию непостижи́мей, / сподо́би нас благода́ти Сы́на Твоего́, Пренепоро́чная, / не́мощь на́шу укрепи́, / житие́ уны́лое ми́лостию Твое́ю обогати́ / и ску́дную моли́тву на́шу Ду́ха Свята́го животво́рными дыха́нии раствори́.
Песнь 9
Ирмо́с:
Не рыда́й Мене́, Ма́ти, / зря́щи во Гро́бе, / Его́же во чре́ве без се́мене зачала́ еси́ Сы́на: / воста́ну бо и просла́влюся, / и вознесу́ со сла́вою непреста́нно, я́ко Бог, / ве́рою и любо́вию Тя велича́ющия. Ча́шу страда́ний му́жественне испи́в, / испове́дником и страстоте́рпцем Христо́вым приобщи́лся еси́, Моисе́е пресла́вный. / Страда́льческия ра́ди кончи́ны твоея́ при́сно Го́споду предстои́ши в Го́рнем Ца́рстве Его́ / и мо́лишися дерзнове́нно о всех лю́дех, наипа́че же о прославля́ющих тя, / и ве́рою и любо́вию тя велича́ющих, и ны́не по́двигу твоему́ подража́ющих, / к ним же сподо́бит прибли́зити Госпо́дь и нас, недосто́йных. Лик проро́ческий с Моисе́ем и Ааро́ном весе́лием днесь весели́тся, / я́ко коне́ц проро́чествия их на нас испо́лнися; / днесь сия́ет Крест Христо́в над земле́ю Правосла́вною, / и́мже сонм новому́чеников Це́ркви Ру́сския восхо́дит горе́ от земли́ на Не́бо и мо́лится ко Го́споду, / да посети́т виногра́д сей, / да укрепи́т ны в гряду́щих искуше́ниих и вре́менех ско́рбных, / во е́же сподо́бити нас гре́шных по́двиг по си́лам восприя́ти / и в не́мощи на́шей вели́чие сла́вы Бо́жия свиде́тельствовати. Христо́ву бо испи́л еси́ Ча́шу, пресла́вне, / венце́м неувяда́емым украси́лся еси́ во Ца́рствии Небе́снем, богоблаже́нный Моисе́е. / Те́мже моли́ о земле́ Ко́льстей и оби́тели Солове́цтей, / мир и любо́вь Госпо́дня во ве́ки зде да пребу́дут, / и нас помина́й, ве́рою и любо́вию тя велича́ющих. Богоро́дичен: Ца́рства Бо́жия би́сер драгоце́нен да возсия́ет в душа́х на́ших Твои́ми мольба́ми, Пречи́стая Де́во, / Нача́льника жи́зни ве́чныя Ма́ти. / Помози́ нам, Блага́я, / да терпе́нием ду́ши стяжа́вше, воскресе́ния све́тлую ра́дость невозвра́тно Тобо́ю обря́щем. Свети́лен, глас 3: Све́том Христо́вым просвеща́емь, / мрак беззако́ния попра́л еси́, преподо́бне, / му́ченическими кровьми́ свяще́нную ри́зу очервлени́в, / вшел еси́ во Свята́я Святы́х досто́йно, Моисе́е прему́дре, / иде́же Свет неизре́ченный, иде́же глас пра́зднующих. / С ни́ми же и мы велегла́сно
возопии́м: / о́тче Моисе́е, святы́х прича́стник яви́выйся, / ми́ру просвеще́ние испроси́ / и душа́м на́шим ве́лию ми́лость. (Два́жды.) Сла́ва, и ны́не, Богоро́дичен: Свет Живота́ ве́чнаго возсия́ нам Тобо́ю, Благода́тная Мари́е, / пло́тию бо родила́ еси́ Жизнода́вца Бо́га, / смерть Попра́вшаго, мир Собо́ю Обнови́вшаго / и всем ве́рным Воскресе́ние Да́рующаго.
На хвали́тех стихи́ры на 4, глас 7:
Ре́вностию по Бо́зе распала́емь / и жа́лостию о до́ме Госпо́дни снеда́емь, / святы́ни це́ркви Оле́ницкия от расхище́ния и поруга́ния нечести́вых сохраня́л еси́, / преще́ний же беззако́нныя вла́сти не устраши́лся еси́, / до конца́ страда́ния претерпе́в, / спасе́ние души́ обре́л еси́, / священному́чениче достохва́льне Моисе́е, // и ны́не сия́еши во сла́ве Госпо́дни. (Два́жды.)
Зе́млю Ру́сскую, безбо́жными гоне́нии неща́дно жего́мую, / слеза́ми и кровьми́ твои́ми напои́л еси́, священному́чениче Моисе́е, / и испове́данием Трисо́лнечнаго Све́та тму́ а́дову посрами́л еси́, / муче́ния от сыно́в поги́бели восприя́л еси́, / те́ло бо твое́ во вну́тренних моги́лы неизве́стной пребыва́ет, / душа́ же твоя́ безпеча́льное жи́тельство насле́довала еси́. / Те́мже стяжа́л еси́ благода́ть моли́тися о нас, // о́тче преподо́бне.
Па́ству ве́рных свои́х хле́бом сло́ва Бо́жия насыща́я / и вино́м прему́дрости Богодухнове́нныя напая́я, / теплото́ю любве́ твоея́ да́ры сия́ раствори́л еси́, священному́чениче Моисе́е. / И ны́не высо́ким пропове́данием веща́еши ча́дом Це́ркве Ру́сския: / приступи́те ко Го́споду и просвети́теся, // и ли́ца ва́ша не постыдя́тся.
Сла́ва, глас 1:
Сохрани́, Го́споди, оте́чествие на́ше моли́твами всехва́льнаго Моисе́я / и всех новому́чеников, / и́бо бо́льши сия́ любве́ никто́же и́мать, / да кто ду́шу свою́ положи́т за дру́ги своя́. / Кровь твою́, преподобному́чениче Христо́в, излия́л еси́ за род челове́ческий / и кро́вию безви́нною багряни́цу Це́ркве Правосла́вныя украси́л еси́, // поя́ и превознося́ Го́спода во вся ве́ки.
И ны́не, Богоро́дичен, глас то́йже:
Огнь Божества́ во утро́бе неопа́льне вмести́вши, / Киво́т благода́ти свяще́ннейший яви́лася еси́, Де́во Пречи́стая, / те́мже пла́менем Ду́ха Боже́ственнаго возжига́еши сердца́ ве́рных / и ве́чнующему вра́жию пла́мени сих неприкоснове́нных твори́ши. / Возсия́й, Богома́ти, и в нас, любве́ Бо́жия немерца́ющий све́те, / от борю́щих враг огражда́ющи, // и огнеды́шащия про́пасти а́довы изба́ви ду́ши на́ша.
Славосло́вие вели́кое и отпу́ст.
НА ЛИТУРГИ́И
Блаже́нны от кано́на, пе́сни 3-я и 6-я. Проки́мен, глас 7: Восхва́лятся преподо́бнии во сла́ве / и возра́дуются на ло́жах свои́х. Стих: Воспо́йте Го́сподеви песнь но́ву, / хвале́ние Его́ в це́ркви преподо́бных. Апо́стол к Тимофе́ю, зача́ло 291. Аллилу́ия, глас 6: Блаже́н муж, боя́йся Го́спода, / в за́поведех Его́ восхо́щет зело́. Стих: Си́льно на земли́ бу́дет се́мя его́. Ева́нгелие от Матфе́я, зача́ло 36. Прича́стен: В па́мять ве́чную: