Ака́фист Собо́ру святы́х отце́в, в земли́ Ко́льстей просия́вших. Па́мять 16 / 29 декабря́
Конда́к 1
Дне́сь ра́дуйся, душе́, и лику́йте, собо́ри празднолю́бнии, / я́ко до Се́вера Кра́йняго и мо́ря Ледова́таго приидо́ша ча́да Госпо́дня. / Дне́сь в полу́нощней и́дольстей тме́ возсия́ благода́ть ве́ры, / мгла́ разгна́ся, облиста́ свет, / тума́н разсе́яся и взы́де Со́лнце Пра́вды. / Днесь Це́рковь земли́ Ко́льския прино́сит Бо́гу плоды́: / се а́з и де́ти, я́же ми даде́ Бо́г; / от вся́ких на́с бе́д и напа́стей свобожда́йте, святи́и, благоприя́тными ва́шими моли́твами, / да со умиле́нием взыва́ем си́це: / Ра́дуйтеся, вси́ святи́и земли́ Ко́льския, // Це́ркве Христо́вы похвало́ и украше́ние.
И́кос 1
Прии́дите, лю́дие, воспои́м собо́р ангелоподо́бных, / восприя́вших ве́ры щи́т, / отри́нувших страсте́й тму́, / я́же бы́ша кре́пции в неви́димых бране́х, / скита́ющихся в пусты́нях лопа́рских, / и в гора́х, и в про́пастех земны́х, / обрати́вших в бе́гство полки́ бесо́в, / да́же до кро́ви пострада́вших / и му́ки многоразли́чныя от безбо́жных претерпе́вших. / Мы́ же, ве́рою серде́чною от души́ подвиза́еми / и благогове́ния ду́хом исполня́еми, / помина́ем сла́вныя по́двиги ва́ша // и гла́сы хвале́бными зове́м такова́я: Ра́дуйтеся, на зов Госпо́день ра́достно прите́кшии; Ра́дуйтеся, всем жела́нием Христу́ после́довавшии.
Ра́дуйтеся, Святы́м Ду́хом ра́зум соверше́нный стяжа́вшии; Ра́дуйтеся, и́дольскую лесть от земли́ полу́нощней изгна́вшии. Ра́дуйтеся, оби́телей и церкве́й зижди́телие неусыпа́емии; Ра́дуйтеся, благове́стницы Христо́вы, на Небесе́х прославля́емии. Ра́дуйтеся, открове́ниями незрече́нными просвеще́ннии; Ра́дуйтеся, си́лою апо́столов земли́ се́верныя одаре́ннии.
Ра́дуйтеся, вси́ святи́и земли́ Ко́льския, // Це́ркве Христо́вы похвало́ и украше́ние.
Конда́к 2
А́нгела земна́го и небе́снаго челове́ка, / оби́телей и церкве́й зижди́теля неусыпа́емаго, / преподо́бнаго отца́ на́шего Феодори́та почти́м, / се́мя пра́вды ева́нгельския во язы́цех земе́ль се́верных посе́явшаго / и вся сия́ ко Христу́ приве́дшаго, / и просла́вим апо́стольския по́двиги его́. / А́нгельское твое́ во пло́ти житие́ прови́дев, преподо́бне, / всея тва́ри Созда́тель от изде́тска предо́брой ю́ности твоея́ до седи́н ста́рости / угото́ва тя в сосу́д целому́дрен и че́стен, / те́мже си́це вопие́м Го́споду: // Алиллу́ия.
И́кос 2
Возсия́ла есть ва́ми, достоблаже́ннии отцы́, / во стране́ Ко́льстей сла́ва И́стиннаго Бо́га, в Тро́ице покланя́емаго: / е́юже просла́вишася примо́рския зе́мли и морсти́и ото́цы, / и Це́рковь правосла́вная, хвалу́ воздаю́щи / сему́ досточти́мому собо́ру преподо́бных оте́ц, // по достоя́нию пое́т вам: Ра́дуйтеся, бла́гое и́го Христо́во люботру́дно пoне́сшии; Ра́дуйтеся, да́ры Ду́ха Свята́го все́м се́рдцем восприе́мшии.
Ра́дуйтеся, я́ко трезве́нием ду́х свой во о́гнь разже́гли есте́; Ра́дуйтеся, я́ко вся́ кра́сная ми́ра сего́ нивочто́же вмени́ли есте́. Ра́дуйтеся, кре́пкое хране́ние усто́м свои́м полага́вшии; Ра́дуйтеся, во е́же не́кия спасти́, всем вся бы́вшии. Ра́дуйтеся, правосла́вной свя́тости предо́брая версто́; Ра́дуйтеся, после́дних земли́ се́верныя сла́вная красото́. Ра́дуйтеся, вси́ святи́и земли́ Ко́льския, // Це́ркве Христо́вы похвало́ и украше́ние.
Конда́к 3
Избра́вшу тя Пастыренача́льнику Христу́ во апо́стола страны́ се́верныя, / а́бие отри́нул еси́, досточу́дне Три́фоне, ми́ра сего́
кра́сная, / претерпе́л же еси́ вся́ко озлобле́ние, / благовести́л еси́ седя́щим во тме и се́ни сме́ртней Бо́га, пло́тию я́вльшагося, / и оби́тель ве́лию Святы́я Тро́ицы на Пече́нзе воздви́гл еси́, и мона́хов мно́жество собра́л еси́, / те́мже со апо́столы сра́дуется дух твой, / воспева́я ко Христу́ Бо́гу: // Аллилу́ия.
И́кос 3
Взы́де к Бо́гу моли́тва вели́кия Лапла́ндии А́нгела, / и в преде́лех мра́чныя По́хъёлы яви́ся во́инство Христо́во, / провозве́стницы благода́ти, учи́телие покая́ния, / глаша́таи жи́зни ве́чныя. / Вси́ сии́ послу́шествовани бы́ша ве́рою ева́нгельскою, / и стрясе́ земля́ Ко́льская тму́ мракобеси́я. / Мы же, ви́дяще чу́дное Бо́жие смотре́ние о сре́тении сем, // вопие́м вам си́це: Ра́дуйтеся, стра́ннии, взыску́ющии Оте́чества Го́рняго; Ра́дуйтеся, кре́пции, гна́вшии стра́сти тлетво́рныя.
Ра́дуйтеся, ми́ра избе́гшии, на брега́ морски́я прише́дшии; Ра́дуйтеся, по́двигом ва́шим мно́гих ко Христу́ приве́дшии. Ра́дуйтеся, Святы́я Тро́ицы благода́тная селе́ния; Ра́дуйтеся, я́ко на́м неразу́мным возвеща́ете Тоя́ веле́ния. Ра́дуйтеся, заве́тов Христо́вых ве́рнии храни́телие; Ра́дуйтеся, Ева́нгельских смы́слов и́стиннии люби́телие. Ра́дуйтеся, вси́ святи́и земли́ Ко́льския, // Це́ркве Христо́вы похвало́ и украше́ние.
Конда́к 4
Избра́нный чудотво́рче и уго́дниче Христо́в, Варлаа́ме, / ве́рный учени́че преподо́бнаго Феодори́та и дру́же преподо́бнаго Три́фона, / неду́гов душе́вных и теле́сных ско́рый цели́телю, / в мо́ри путие́ твои́, и стези́ твоя́ в вода́х мно́гих, / я́же слеза́ми моли́твы омы́л еси́ и о́браз покая́ния нам дарова́л еси́. / Приими́ от нас с любо́вию приноси́мое тебе́ хвале́бное пе́ние, / помози́ и нам, о́тче преподо́бный, та́кожде пока́ятися, / да благода́тию Ду́ха очи́ститися, / и да пое́м тобо́ю благоде́ющему на́м Бо́гу: // Аллилу́ия.
И́кос 4
Кто не удиви́тся любви́ ва́шей к Бо́гу, / о, тро́ице равноапо́стольная, / Феодори́те блаже́нне, Три́фоне преподо́бне, Варлаа́ме всехва́льне, / со ученики́ ва́шими ве́рными! / Ка́ко вмени́ли есте́ звезду́ Поля́рную во звезду́ Вифлее́мскую / и ра́достно напра́вили есте́ стопы́ своя́ при бре́зе Ледова́таго мо́ря / в кра́й се́верныя страны́. / Те́мже наро́ду ло́пскому до́брии па́стырие и лю́бящии отцы́ яви́лися есте́, / пусты́ню непрохо́дную благо́ю ве́стию огласи́вше, // да воспое́т вам наро́д новопросвеще́нный сицева́я: Ра́дуйтеся, и́го Христо́во на себе́ восприе́мшии; Ра́дуйтеся, плоть свою́ ду́хови покори́вшии.
Ра́дуйтеся, на краю́ земли́, я́ко апо́столы, послужи́вшии; Ра́дуйтеся, во труде́х духо́вных в пусты́нях подвиза́вшиися. Ра́дуйтеся, ду́хов зло́бы лапла́ндския не устраши́вшиися; Ра́дуйтеся, свою́ во́лю грехо́вную отсека́ти научи́вшиися. Ра́дуйтеся, открове́нием по́мыслов свои́х укрепи́вшиися; Ра́дуйтеся, благода́тию Ду́ха Свята́го умудри́вшиися. Ра́дуйтеся, вси́ святи́и земли́ Ко́льския, // Це́ркве Христо́вы похвало́ и украше́ние.
Конда́к 5
Прииди́те вси́, ве́рное ста́до Христо́во, духо́вно соше́дшеся, / дне́сь восхва́лим благочести́ваго вку́пе и мона́шескаго ко́рене святу́ю о́трасль, / ди́внаго ста́рца Ио́ну с до́блим сомоли́твенником Ге́рманом, / Христа́ до сме́рти возлюби́вшия / и Сего́ ра́ди вра́жее непра́ведное заколе́ние и о́гнь язвя́щий претерпе́вшия, / благоуха́нием испо́лнивше небе́сная / и серде́чное о́ко к Бо́гу впери́вше, / воспе́ли Ему́ есте́: // Аллилу́иа.
И́кос 5
Ки́ими похвала́ми восхва́лим преподо́бных отце́в Собо́р? / Ки́ими славословле́нии просла́вим светоно́сную па́мять их? / Ве́лие торжество́ земли́ на́шея святы́х па́мять яви́ся. / Ны́не, просла́вльшему
ва́с Христу́ предстоя́ще, / моли́теся о нас приле́жно. / Мы́ же, суето́ю помраче́ннии и во гресе́х все́ житие́ ижди́вшии, / дивя́щеся по́двигам ва́шим пусты́нным, // вопие́м с благодаре́нием серде́чным: Ра́дуйтеся, отше́льницы и молча́льницы преди́внии; Ра́дуйтеся, моли́твенницы о земли́ Росси́йстей усе́рднии.
Ра́дуйтеся, свещи́ неугаси́мыя, в пусты́ни ди́вей пламене́вшия; Ра́дуйтеся, вся ми́ра сего́ кра́сная Бо́га ра́ди презре́вшии. Ра́дуйтеся, за Христа́ страда́ния претерпе́вшии; Ра́дуйтеся, любве́ ра́ди Бо́жия сла́вную сме́рть прие́мшии. Ра́дуйтеся, земни́и а́нгели и челове́цы небе́снии; Ра́дуйтеся, Христо́ви избра́нницы ве́рнии и благоче́стнии. Ра́дуйтеся, вси́ святи́и земли́ Ко́льския, // Це́ркве Христо́вы похвало́ и украше́ние.
Конда́к 6
Боготе́чныя зве́зды, / путеводя́щия к Со́лнцу Пра́вды, Христу́ Бо́гу, яви́лися есте́, / пастыренача́льниче игу́мене Гýрие, / священнои́ноче Пахо́мие, / иеродиа́коне Ио́сифе, / достосла́вне Амвро́сие / и про́чии сто шестьна́десять и́ноков и бельце́в, / во оби́тели Пече́нжстей подвиза́вшиися / и Христа́ ра́ди му́жественно пострада́вшии, / чрез муче́ния тя́жкая и огнь бо проидо́сте / и, я́ко ученицы́ ве́рнии преподо́бнаго Три́фона и дру́зи Христо́вы, / жи́зней свои́х не пощади́сте за Го́спода своего́, / но, же́стоко бие́ны и огне́м опаля́емы бы́вше, / взыва́ли есте́ к Нему́ велегла́сно: // Аллилу́иа
И́кос 6
Я́ко многосве́тлыя зве́зды, / доброде́телей све́тлостию озаря́ете ве́рных исполне́ния, / преподо́бнии отцы́ на́ши и вси Бо́жии уго́дницы земли́ Ко́льския. / Совоку́плься Собо́р святы́х Твои́х, Го́споди, ра́ди любве́, / и, тоя́ наслажда́ющеся, со А́нгелы лику́ет о Тебе́, Всеви́дче Го́споди все́х: / его́же ликовствова́ния да и нас сподо́биши / моли́твами уго́дников Твои́х, Всеси́льне, // и на́шими провеща́нии сицевы́ми: Ра́дуйтеся, измла́да Иису́са Христа́ возлюби́вшии; Ра́дуйтеся, гла́са Па́стыря До́браго возжеле́вшии.
Ра́дуйтеся, и́дольския ле́сти усе́рднии истреби́телие; Ра́дуйтеся, диа́вольских ко́зней дерзнове́ннии обличи́телие. Ра́дуйтеся, му́жество и кре́пость в страда́ниих тя́жких яви́вшии; Ра́дуйтеся, тве́рдым испове́данием ве́ру запечатле́вшии. Ра́дуйтеся, оби́телем Христо́вым похвало́ и утвержде́ние; Ра́дуйтеся, Це́ркве Ру́сския сла́во и похвале́ние. Ра́дуйтеся, вси́ святи́и земли́ Ко́льския, // Це́ркве Христо́вы похвало́ и украше́ние.
Конда́к 7
Тле́нная и земна́я наслажде́ния отри́нув, / пусты́нное житие́ возлюби́л еси́, сла́вный Евфи́мие, / брега́ в после́дних конце́х се́верныя страны́ / церква́ми и скита́ми, я́ко древа́ми ма́сличными, украси́л еси́. / Долготу́ пу́тную и опа́сности мо́ря нивочто́же вменя́я, / доше́д да́же до Норве́жския земли́, / пустынножи́тия рачи́тельство восхваля́я, / на высоту́ доброде́телей восшел еси́, / Бо́гу хвале́бную песнь поя: // Аллилу́ия.
И́кос 7
Кра́я полно́щнаго подви́жницы благоче́стия, / за гра́ды и ве́си на конце́х земли́ предста́тели те́плии яви́стеся, / отцы́ преблаже́ннии. / Христа́ Бо́га моли́те о нас, / свяще́нный ва́ш Собо́р почита́ющих и любо́вию вопию́щих: / ра́дуйтеся, земли́ Ко́льския и всея́ Руси́ похвало́ и утвержде́ние. / Мы́ же, взира́юще на дела́ ва́ша сла́вная, // вопие́м вам си́це: Ра́дуйтеся, мно́гих чуде́с творе́ния от Го́спода прие́мшии; Ра́дуйтеся, духо́вных ча́д мно́жество во Христе́ породи́вшии.
Ра́дуйтеся, и́стин богове́дения ве́рнии рачи́телие; Ра́дуйтеся, Пресвяты́я Тро́ицы те́плии служи́телие. Ра́дуйтеся, пе́стуны иску́снии и попечи́тели ре́вностнии; Ра́дуйтеся, сокруши́вшии де́монов немощны́я де́рзости. Ра́дуйтеся, незаходи́мая сия́ния и спо́лохи мы́сленнии; Ра́дуйтеся, ко́зней бесо́вских победи́телие вы́спреннии.
Ра́дуйтеся, вси́ святи́и земли́ Ко́льския, // Це́ркве Христо́вы похвало́ и украше́ние.
Конда́к 8
По́стническое и равноа́нгельное житие́ прии́мше, / преподо́бнии отцы́ Акси́е, Авксе́нтие и Тара́сие, / в Помо́рие пусты́нное удали́лися есте́, а́ки в ти́хое приста́нище, / на на́волок Кашкара́нский всели́лися есте́, и мно́гая ле́та та́мо пожи́ли есте́, / и, непреста́нныя моли́твы, я́ко копие́, в рука́х иму́ще, / кре́пко победи́ли есте́ бесо́вская ополче́ния, / благода́ть прии́мше цели́ти неду́ги душ и теле́с на́ших. / Мы же прославла́вльшему вас Бо́гу всера́достно взыва́ем: // Аллилу́ия.
И́кос 8
Отцы́ преди́внии и всечестни́и, / земли́ Ко́льския моли́твенницы и покрови́телие, / по́двигом до́брым подвиза́стеся, / тече́ние жи́зни до́льней сконча́сте, / ве́ру свя́то соблюдо́сте; / ны́не, ра́дующеся и веселя́щеся в пресла́вных селе́ниих Отца́ Небе́снаго, / по́чести обетова́нныя прия́сте, / не отри́ните у́бо и на́ших моли́тв, / я́ко, да ублажа́юще любо́вию / прославля́ем вы си́це: Ра́дуйтеся, и́стины Христо́вой тве́рдии ревни́телие; Ра́дуйтеся, вражды́ и нестрое́ний всегро́знии обличи́телие. Ра́дуйтеся, крест свой терпели́вно нести́ уча́щии; Ра́дуйтеся, во е́же не́кия спасти́, всем вся бы́вшии. Ра́дуйтеся, благо́е и́го Христо́во смире́нно пoне́сшии; Ра́дуйтеся, в терпе́нии ва́шем ду́ши ва́ша стяжа́вшии. Ра́дуйтеся, ре́вности о Христе́ Иису́се испо́лненнии; Ра́дуйтеся, того́ ра́ди в Ца́рствие Бо́жие вни́ти удосто́еннии. Ра́дуйтеся, вси́ святи́и земли́ Ко́льския, // Це́ркве Христо́вы похвало́ и украше́ние.
Конда́к 9
О, пресла́внаго чудесе́! / Узре́ Госпо́дь го́рдая времена́, / и се́, сконча́на су́ть, и беззако́ния его́ испо́лнишася, / и возсия́ша с весе́лием новому́ченицы в после́дних земли́, / и пре́лести неве́рия
мрак отгна́ша, / и ко́зни бесо́вския, я́ко исчеза́ет дым, да изчезо́ша, / и возрасте́ пра́вда, и посра́млено бы́сть нече́стие. / Ра́дуются ве́рнии и пра́здник новоявле́нным уго́дником составля́ют, / вопию́ще Христу́ Бо́гу: // Аллилу́ия.
И́кос 9
Святи́и новому́ченицы и испове́дницы Ко́льстии, / светоле́пнии архиере́и и свяще́нницы, / и́ноцы, и́нокини и миря́не, / ве́рнии Го́сподеви му́жие, жены́ и ча́да, / на Се́вере жесто́кими гони́тели собра́ннии / и в ка́торжных рабо́тах уму́ченнии, / за Христа́ кро́вь пролия́вшии, / отцы́, бра́тие и се́стры на́ша, / за Го́спода смерть прия́вшии, / испроси́те у Человеколю́бца Бо́га грехо́в проще́ние // вопию́щим си́це: Ра́дуйтеся, Крест Госпо́день дерзнове́нно подъе́мшии; Ра́дуйтеся, го́рнюю сла́дость еще́ на земли́ вкуси́вшии.
Ра́дуйтеся, враго́в Це́ркве Христо́вы обличи́телие; Ра́дуйтеся, нечести́вых вити́й безбо́жных посрами́телие. Ра́дуйтеся, ве́рнии, зло́бных гони́телей не убоя́вшиися; Ра́дуйтеся, кре́пции, у́зы темни́чныя и смерть претерпе́вшии. Ра́дуйтеся, я́ко муче́ния лю́тая нивочто́же вмени́ли есте́; Ра́дуйтеся, я́ко в страда́ниих ваши́х Бо́га просла́вили есте́. Ра́дуйтеся, вси́ святи́и земли́ Ко́льския, // Це́ркве Христо́вы похвало́ и украше́ние.
Конда́к 10
Святы́х Та́ин Христо́вых ве́рный служи́телю, / покая́ния пропове́дниче и кра́я Ко́льскаго печа́льниче, / уподо́бился еси́ проро́ку Моисе́ю, / ду́шу свою́ за погиба́ющую па́ству положи́л еси́, / у́зы темни́чныя и сме́рть за Христа́ претерпе́л еси́, / спаса́й нас моли́твами твои́ми, о́тче Моисе́е, вопию́щих: / Го́спода по́йте, дела́, и превозноси́те Его́ во ве́ки. // Аллилу́ия.
И́кос 10
Дне́сь с на́ми собо́р по́стников и моли́твенников весели́тся, / преподо́бных и молча́льников сосло́вие ликовству́ет, / му́чеников и страстоте́рпцев ли́к ра́дуется и Бо́га сла́вит, / и Це́рковь Христо́ва и́ми украша́ется. / Те́мже, бра́тие ве́рнии, / любо́вию просла́вим вся святы́я земли́ на́шея, / я́ко сы́ны и дще́ри Отца́ Небе́снаго, / ко Оте́честву ве́чному на́с возводя́щия, и песнь воспои́м благода́рственно: // Аллилу́иа.
Ра́дуйтеся, мно́ги му́ки и ско́рби до кро́ве прия́вшии; Ра́дуйтеся, поко́й врéменный прáвды Бо́жия рáди презре́вшии. Ра́дуйтеся, не́мощи сме́ртных теле́с нивочто́же вмени́вшии; Ра́дуйтеся, неве́рных уче́нии свои́ми удиви́вшии. Ра́дуйтеся, любве́ ра́ди Госпо́дни муче́ния претерпе́вшии; Ра́дуйтеся, о́вцы Христо́вы во еди́но ста́до совокупи́вшии. Ра́дуйтеся, олядене́вшая сердца́ их моли́твой согре́вшии; Ра́дуйтеся, свети́льницы, дарова́нии духо́вными горе́вшии. Ра́дуйтеся, вси́ святи́и земли́ Ко́льския, // Це́ркве Христо́вы похвало́ и украше́ние.
Конда́к 11
В мо́ре Ледова́том успе́ние обре́л еси́, Безымя́нне, / в телеси́ нетле́ние стяжа́л еси́, преподо́бне, / неве́домый ми́ру и́ноче земли́ Те́рския, / но Бо́гови ве́домый и чудеса́ми явле́нный. / В лови́тве ры́бней помо́щниче ско́рый / и цели́телю усе́рдный в не́мощех и боле́знех, / преподо́бне Безымя́нне и́ноче, / моли́ Христа́ Бо́га спасти́ся на́м, / со смире́нием Благода́телю Бо́гу песнь воспе́вающим: // Аллилу́иа.
И́кос 11. Отцы́ преди́внии и всечестни́и, / земли́ Ко́льския моли́твенницы и покрови́телие, / по́двигом до́брым подвиза́стеся, / тече́ние жи́зни до́льней сконча́сте, / ве́ру свя́то соблюдо́сте; / ны́не, ра́дующеся и веселя́щеся в пресла́вных селе́ниих Отца́ Небе́снаго, / по́чести
обетова́нныя прия́сте, / не отри́ните у́бо и на́ших моли́тв, / я́ко, да любоче́стно ублажа́юще, // любо́вию прославля́ем вы си́це: Ра́дуйтеся, о́бразы нищеты́ духо́вныя благови́днии; Ра́дуйтеся, избра́ннии вои́тели Христо́ви досточу́днии.
Ра́дуйтеся, вся ми́ра сего́ кра́сная Бо́га ра́ди презре́вшии; Ра́дуйтеся, уста́ на похвале́ние Го́спода употреби́вшии. Ра́дуйтеся, богомы́слия и молча́ния ве́рнии ревни́телие; Ра́дуйтеся, безбо́жия и нече́стия бо́дростнии обличи́телие. Ра́дуйтеся, нас, су́щих в ско́рбех, наде́ждою осиява́ющии; Ра́дуйтеся, вме́сто вре́менных ве́чная нам предлага́ющии. Ра́дуйтеся, вси́ святи́и земли́ Ко́льския, // Це́ркве Христо́вы похвало́ и украше́ние.
Конда́к 12
О, пресла́внаго чудесе́, / ди́внии уго́дницы Бо́жии, / я́ко древа́ ма́сличная, в безпло́дней пусты́ни земли́ Ко́льския процве́тшии, / на́ми славосло́вятся дне́сь. / О, преподо́бнии му́жие, / му́ченицы и страстоте́рпцы земе́ль се́верных, / от родо́в на́ших прозя́бшии, / се́яния небе́снаго кла́сы духо́внии, / пло́д стори́цею Го́споду сотвори́вшии, / почти́м вы се́рдцем и усты́, / да благоприя́тно чудоде́ющему в вас Бо́гу вопие́м: // Аллилу́ия.
И́кос 12
Воста́ни с на́ми, правосла́вный собо́ре вселе́нский, / просла́вим Благоде́теля всех Бо́га, / воздви́гшаго сла́вный Собо́р подви́жников Ко́льских, / по́двиги равноапо́стольныя в се́верных преде́лех Святы́я Руси́ сотво́ршия, / пра́вду Бо́жию неве́дущим наро́дам возвести́вшия / и по́двиг крестоноше́ния зде поне́сшия. / Хва́лим вас, досточу́днии, и ублажа́ем достопа́мятная жития́ ва́ша, // воспева́юще песнь благодаре́ния: Ра́дуйтеся, сосу́ди избра́ннии, доброде́тельми украше́ннии; Ра́дуйтеся, си́льнии, немощны́я собра́вшии и расточе́ннии.
Ра́дуйтеся, му́жества и терпе́ния му́дрии наста́вницы;
Ра́дуйтеся, после́дних земли́ сла́внии избра́нницы. Ра́дуйтеся, неду́гов на́ших ми́лостивии цели́тельницы. Ра́дуйтеся, бо́дрии, Правосла́вныя ве́ры побо́рницы; Ра́дуйтеся, ва́ми бо мрак губи́тельный от нас удаля́ется; Ра́дуйтеся, ва́ми бо Дух Госпо́день на нас излива́ется. Ра́дуйтеся, вси́ святи́и земли́ Ко́льския, // Це́ркве Христо́вы похвало́ и украше́ние.
Конда́к 13
О, Всеблаже́ннии и вся́ких похвале́ний превы́шнии, / преподо́бнии отцы́ на́ши Ко́льстии, / приими́те ма́лое сие́ на́ше вам приноше́ние, / умоли́те Подвигополо́жника и Соверши́теля Иису́са, / да сохрани́т край наш се́верный, / и вся́кий град, и страну́ христиа́нскую от вся́кия напа́сти и обстоя́ния, / да излие́т на ны пото́цы ми́лости Своея́ / и сподо́бит Небе́снаго Ца́рствия Своего́, / иде́же с вами и со все́м со́нмом святы́х Земли́ Росси́йския / воспое́м Бо́гови хвале́бную песнь: // Аллилу́иа. (Сей конда́к чте́тся три́жды, зате́м 1-й и́кос и 1-й конда́к)
И́кос 1
Прии́дите, лю́дие, воспои́м собо́р ангелоподо́бных, / восприя́вших ве́ры щи́т, / отри́нувших страсте́й тму́, / я́же бы́ша кре́пции в неви́димых бране́х, / скита́ющихся в пусты́нях лопа́рских, / и в гора́х, и в про́пастех земны́х, / обрати́вших в бе́гство полки́ бесо́в, / да́же до кро́ви пострада́вших / и му́ки многоразли́чныя от безбо́жных претерпе́вших. / Мы́ же, ве́рою серде́чною от души́ подвиза́еми / и благогове́ния ду́хом исполня́еми, / помина́ем сла́вныя по́двиги ва́ша // и гла́сы хвале́бными зове́м такова́я: Ра́дуйтеся, на зов Госпо́день ра́достно прите́кшии; Ра́дуйтеся, всем жела́нием Христу́ после́довавшии.
Ра́дуйтеся, Святы́м Ду́хом ра́зум соверше́нный стяжа́вшии; Ра́дуйтеся, и́дольскую лесть от земли́ полу́нощней изгна́вшии. Ра́дуйтеся, оби́телей и церкве́й зижди́телие неусыпа́емии; Ра́дуйтеся, благове́стницы Христо́вы, на Небе́сех прославля́емии. Ра́дуйтеся, открове́ниями незрече́нными просвеще́ннии;
Ра́дуйтеся, си́лою апо́столов земли́ се́верныя одаре́ннии. Ра́дуйтеся, вси́ святи́и земли́ Ко́льския, // Це́ркве Христо́вы похвало́ и украше́ние.
Конда́к 1
Дне́сь ра́дуйся, душе́, и лику́йте, собо́ри празднолю́бнии, / я́ко до Се́вера Кра́йняго и мо́ря Ледова́таго приидо́ша ча́да Госпо́дня. / Дне́сь в полу́нощней и́дольстей тме́ возсия́ благода́ть ве́ры, / мгла́ разгна́ся, облиста́ свет, / тума́н разсе́яся и взы́де Со́лнце Пра́вды. / Днесь Це́рковь земли́ Ко́льския прино́сит Бо́гу плоды́: / се а́з и де́ти, я́же ми даде́ Бо́г; / от вся́ких на́с бе́д и напа́стей свобожда́йте, святи́и, благоприя́тными ва́шими моли́твами, / да со умиле́нием взыва́ем си́це: / Ра́дуйтеся, вси́ святи́и земли́ Ко́льския, // Це́ркве Христо́вы похвало́ и украше́ние.
Молитва Собору Кольских святых О, боже́ственный по́лче, Небе́снии во́ини Христа́ Бо́га, преподо́бнии и богоно́снии отцы́ Земли́ Ко́льския! Вы, сло́во ева́нгельское сердцы́ благи́ми восприи́мше, моли́твами, и слеза́ми, и мно́гими злострада́нии усе́рдно Христо́ви сораспя́лися есте́ и пе́рвее ра́лом Ева́нгельских уче́ний ду́ши своя́ плодоно́сны яви́ли есте́, по́слежде и непло́дную пусты́ню лопа́рскую, я́ко благоцвету́щий рай, соде́лали есте́, на трапе́зу духо́вную всех созыва́юще. О, светоза́рнии отцы Земли Ко́льския, Це́ркве Христо́вы свети́льницы! Вы же́ртвы благоприя́тныя Бо́гу яви́лися есте́, преобрази́вшеся у́мным де́ланием, узре́ли есте́ бу́дущей жи́зни сла́ву. Боже́ственным огне́м ду́ши своя́ возжего́сте, Нетва́рнаго Све́та причасти́лися есте, и облиста́ли есте́ Зе́мли Полно́щныя Све́том Невече́рним, и в Сио́н Го́рний востекли́ есте́. Преподо́бнии отцы́ Ко́льстии, и́ноцы и миря́не, му́ченицы и новому́ченицы Це́ркве Ру́сския, вы, плоды́ доброде́телей на земли́ прине́сше, в Небе́сных черто́зех ны́не благоуха́ете, я́ко ра́йстии цве́ти, и лице́м к лицу́ зри́те Пресвяту́ю Тро́ицу, Ю́же дерзнове́нно мо́лите спасти́ся душа́м на́шим.
И ны́не, в день всесвяты́я па́мяти ва́шея, мо́лим вас приле́жно, святи́и уго́дницы Христо́вы, на́ши те́плии предста́телие пред Престо́лом Бо́жиим и хода́таи усе́рднии, да испро́сите нам, гре́шным и недосто́йным рабо́м, вели́кия и бога́тыя ми́лости Госпо́дни, да прии́дем вси в позна́ние и́стины, принося́ще плоды́ досто́йныя покая́ния, и́миже обря́щем благода́ть Всесвята́го Ду́ха. О, до́брии наста́вницы на́ши и моли́твенницы ко Го́споду! Исхода́тайствуйте нам, на земли́ су́щим, душ спасе́ние, земны́х плодо́в изоби́лие, времена́ ми́рна, дни бла́ги, Кра́ю Ко́льскому процвете́ние. Да и мы, недосто́йнии, направля́еми ва́шими моли́твами, поне́ на коне́ц на́шего многомяте́жнаго жития́, возлю́бим ве́чное па́че вре́меннаго, и в свой единонадеся́тый час порабо́таем с усе́рдием Небе́сному Домовлады́це Христу́, и с серде́чным благодаре́нием пролие́мся слеза́ми неизрече́нныя ра́дости, восхваля́юще вели́кое и достопокланя́емое И́мя Отца́, и Сы́на, и Свята́го Ду́ха ны́не, и при́сно, и во ве́ки веко́в. Ами́нь.