МЕ́СЯЦА ДЕКАБРЯ́ В 16-Й ДЕНЬ (29 декабря́ по н. ст.)
Слу́жба Собо́ру святы́х отце́в, в земли́ Ко́льстей просия́вших
НА МА́ЛОЙ ВЕЧЕ́РНИ
На Го́споди, воззва́х: стихи́ры на 4. Глас 1:
Днесь ра́дуйся, душе́, и лику́йте, собо́ри празднолюбе́знии, / я́ко до Се́вера Кра́йняго и мо́ря Ледова́таго приидо́ша ча́да Госпо́дня. / Днесь во тме полу́нощней и́дольстей возсия́ благода́ть ве́ры, / мгла разгна́ся, свет облиста́, / тума́н разсе́яся и взы́де Со́лнце Пра́вды. / Днесь Це́рковь земли́ Ко́льския прино́сит Бо́гу плоды́: / се аз и де́ти, я́же ми даде́ Бог, // моли́твами отце́в Ко́льских, Христе́ Бо́же наш, поми́луй нас.
Прии́дите, лю́дие, воспои́м собо́р ангелоподо́бных, / восприя́вших ве́ры щит, / отри́нувших страсте́й тму, / окре́пших в неви́димых бране́х, / скита́ющихся в пусты́нях лопа́рских, / и в гора́х, и в про́пастех земны́х, / обрати́вших в бе́гство полки́ бесо́вския, / да́же до кро́ве пострада́вших / и му́ки многоразли́чныя от безбо́жных претерпе́вших, / вмени́вших поноше́ние Христо́во па́че сокро́вищ мирски́х, / с любо́вию припаде́м к ним, // тех моли́твами, Христе́ Бо́же, поми́луй и спаси́ ду́ши на́ша.
Взы́де к Бо́гу моли́тва А́нгела вели́кия Лапла́ндии, / и в преде́лах мра́чныя По́хъелы яви́ся во́инство Христо́во, / провозве́стницы благода́ти, учи́телие покая́ния, / глаша́таи жи́зни ве́чныя, / вси сии́ послу́шествовани бы́ша ве́рою ева́нгельскою, / и стрясе́ земля́ Ко́льская тму мракобеси́я, / и водрузи́ся на ней Крест Госпо́день: // Це́ркве красота́ и де́монов я́зва.
Сла́ва, глас 6:
Кто не удиви́тся любви́ ва́шей к Бо́гу, / о тро́ице равноапо́стольная, / Феодори́те блаже́нне, Три́фоне преподо́бне, Варлаа́ме всехва́льне / со ученики́ ва́шими ве́рными! / Вмени́ли бо есте́ звезду́ Поля́рную во звезду́ Вифлее́мскую / и ра́достно напра́вили есте́ стопы́ своя́ / при бре́зе Ледова́таго мо́ря в край се́верныя страны́. / Те́мже наро́ду ло́пскому до́брии па́стырие и лю́бящии отцы́ яви́лися есте́, / пусты́ню непрохо́дную благо́ю ве́стию огласи́вше, / вью́гу серде́чную люде́й сих усмири́ли есте́, / да воспое́т наро́д новопросвеще́нный: // сла́ва в вы́шних Бо́гу и на земли́ мир! И ны́не, Богоро́дичен, глас то́йже: Пра́ведно есть хвали́ти Тя, ми́ра Влады́чицу, / я́ко и ме́сту сему́ до́льнему/ дарова́ла еси́ Небе́с велеле́пие: / зде бо и хра́мы Ти созда́шася кра́снии, / и ико́ны Твоя́ чуде́с исполня́хуся. / Мы же, веселя́щеся, прославля́ем Тя, Ма́ти щедро́т, //
подаю́щую мир земли́ сей и ве́лию ми́лость.
На стихо́вне стихи́ры, глас 1. Подо́бен: Небе́сных чино́в:
Ки́ими похвала́ми восхва́лим преподо́бных отце́в Собо́р? / Ки́ими славосло́вии просла́вим светоно́сную па́мять их? / Па́мять святы́х земли́ на́шея яви́ся вели́кое торжество́. / Ны́не просла́вльшему вас Христу́ предстоя́ще, / моли́теся о нас приле́жно, // любо́вию соверша́ющих ле́тное ва́ше пра́зднество.
Стих: Восхва́лятся преподо́бнии во сла́ве / и возра́дуются на ло́жах свои́х.
Прииди́те, мона́шествующих мно́жество днесь, / Три́фона, благоче́стия подража́теля, пе́сньми и пе́ньми восхва́лим, глаго́люще: / ра́дуйся, пресла́вне Три́фоне, земли́ полно́щней пресве́тлый свети́льниче; / ра́дуйся, я́ко Тро́ице предстои́ши со а́нгелы, / Ю́же непреста́нно моли́ спасти́ всех отцелю́бцев, // досто́йно тя почита́ющих.
Стих: Свяще́нницы Твои́ облеку́тся в пра́вду, / и преподо́бнии Твои́ возра́дуются.
От младе́нства доброде́тели прилежа́в, / сосу́д Ду́ха Свята́го, преподо́бне Феодори́те, яви́лся еси́, / чистоту́ и целому́дрие соблю́л еси́, / прост и кро́ток, смире́н се́рдцем, ве́рен Бо́гу, / и́стинною прему́дростию просвеще́н, о́тче преблаже́нне, бы́л еси́, / се́рдце свое́ Христу́ вве́ривый, / по́честей земны́х не иска́вый, / всем помышле́нием к Бо́гу простира́выйся, // о́тче Феодори́те, моли́ Христа́ Бо́га о нас.
Сла́ва, глас 2:
Прииди́те, лю́бящии пресла́вныя по́двиги святы́х, / восхва́лим преподо́бнаго Варлаа́ма из Ке́рети, / той бо благобытие́ ми́ра сего́ превреди́л есть / и, живо́т свой ни во что́же вмени́в, крест тя́жкий взем, / Христу́ смире́нием и до́блестию после́довал е́сть. / Мы же прославля́ем Бо́га, ди́внаго во святы́х Свои́х, // подаю́щаго нам о́браз безприкла́дный и ве́лие наде́яние.
И ны́не, глас то́йже:
Спаси́ от бед рабы́ Твоя́, Богоро́дице, / я́ко вси по Бо́зе к Тебе́ прибега́ем, // я́ко неруши́мей стене́ и предста́тельству.
Тропари́ пи́саны на вели́цей вече́рни. Ектения́ ма́лая и отпу́ст.
НА ВЕЛИ́ЦЕЙ ВЕЧЕ́РНИ
Блаже́н муж: 1-й антифо́н.
На Го́споди, воззва́х: стихи́ры на 8, глас 8. Подо́бен: О, пресла́вного
чудесе́: О, пресла́внаго чудесе́, / ди́внии уго́дницы Бо́жии, / я́ко древа́ ма́сличная в безпло́дней пусты́ни земли́ Ко́льския прозя́бшии, / на́ми славосло́вятся днесь. / О, преподо́бнии му́жие, / му́ченицы и страстоте́рпцы земе́ль се́верных, / от родо́в на́ших прозя́бшии, / се́яния небе́снаго кла́сы духо́внии, / плод стори́цею Го́споду сотвори́вшии, // моли́теся за ны, при́сно ублажа́емии.
О, пресла́внаго чудесе́, / Ко́льския земли́ святы́х Собо́р / немо́лчными пе́сньми и непреста́нными славосло́вии восхваля́ется днесь, / и в моли́твах призыва́ются пусты́нницы и молча́льницы, / просвети́телие и испове́дницы, / благоче́стия и правосла́вия и́стиннаго ревни́телие, / таи́нницы Боже́ственнии. / О, чу́днии уго́дницы Христо́вы всехва́льнии, / Го́сподеви моли́теся // дарова́ти душа́м на́шим мир и ве́лию ми́лость.
О, пресла́внаго чудесе́, / зве́зды мы́сленныя в десни́це Бо́жией, / над земле́ю Ко́льскою возсия́вшия, / И́стины Христо́вой свети́льницы, / благода́тию ве́ры возжже́ннии, / све́том доброде́телей ва́ших озаря́ете вся, / и в моли́твах по́мощь подава́ете, / и на путь спасе́ния наставля́ете // светоно́сную ва́шу па́мять пра́зднующих.
О, пресла́внаго чудесе́, / исто́чницы вод, из са́да Еде́мскаго теку́щии / и благода́тно страну́ полно́щную небе́сною вла́гою ороша́ющии, / кла́дези чуде́с показа́сте нам, / при́сно моле́бно почита́ющим вас, / Ко́льстии ве́лиции уго́дницы Бо́жии, / не преста́ните и на бу́дущее вре́мя // ми́лости и чудеса́ излива́ти до ве́ка.
О, пресла́внаго чудесе́, / жи́телие Гра́да Небе́снаго, / по́двигом до́брым подвиза́вшиися, / тече́ние сконча́вшии, ве́ру соблю́дшии, / на́ми воспева́етеся днесь, / а́нгельскому ли́ку сопричто́стеся, / моли́твенницы земли́ Ко́льския яви́стеся: / се́го ра́ди, ны́нешнее прие́мше на́ше приноше́ние, // от вся́кия напа́сти изба́вите нас.
И́ны стихи́ры, глас то́йже: В черто́зех го́рних, сия́ющих ны́не, /с небе́сными ли́ки водвори́лися есте́, уго́дницы Ко́льстии, / ликовству́ете с му́дрыми де́вами совше́дшими, / и́бо прия́л есть Влады́ка Госпо́дь / смире́нныя рабы́ Своя́ во сла́ве / от вре́менных к ве́чной ра́дости, // Еди́н Благ и Человеколю́бец.
Свяще́ннейший Собор честны́х преподо́бных и богоно́сных отце́в Ко́льских велича́ем / и мно́жество преподобному́чеников, / ли́ки пострада́вших новому́чеников
кре́пко почита́ем, моля́щеся, / уго́дников Твои́х собо́ри многообра́зными доброде́тельми освети́шася, / зако́ну Твоему́ повину́ющеся, / и насле́дницы бы́ша оби́телей Твои́х Небе́сных, / Влады́ко Царю́: и́хже моли́твами // и нас та́можде всели́ши, Преми́лостиве.
Я́ко многосве́тлыя зве́зды доброде́телей све́тлостию озаря́ете ве́рных исполне́ния, / преподо́бнии отцы́ на́ши и вси Бо́жии уго́дницы земли́ Ко́льския. / Совоку́плься Собо́р святы́х Твои́х, Го́споди, ра́ди любве́, / и, тоя́ наслажда́ющеся, со А́нгелы лику́ет о Тебе́, Всеви́дче Го́споди всех: / его́же ликовствова́ния да и нас сподо́биши // моли́твами уго́дников Твои́х, Всеси́льне.
Сла́ва, глас 2:
Ки́ими славосло́вии просла́вим светоно́сную па́мять Ко́льских святы́х? / Челове́цы бо небе́снии и а́нгели земни́и яви́лися суть, / в земля́х полно́щных доброде́тельми просия́вше. / Воспое́м вку́пе с дре́вними отцы́ ли́ки новому́чеников и испове́дников Росси́йских, / до кро́ве Христа́ испове́давших во спасе́ние, / заточе́ния, изгна́ния, го́рькия рабо́ты и смерть ра́ди Бо́га сла́дце претерпе́вших, / и возопии́м к ним: те́пле моли́теся ко Го́споду / край наш се́верный в Правосла́вии утверди́ти / и спасти́ ду́ши на́ша, с ве́рою и упова́нием в моли́твах к вам прибега́ющих // и творя́щих свято́е ва́ше пра́зднество.
И ны́не, Богоро́дичен, глас то́йже:
Пре́йде сень зако́нная, / благода́ти прише́дши: / я́коже бо купина́ не сгора́ше опаля́ема, / та́ко Де́ва родила́ еси́ и Де́ва пребыла́ еси́; / вме́сто столпа́ о́гненнаго / пра́ведное возсия́ Со́лнце; / вме́сто Моисе́я – Христо́с, // спасе́ние душ на́ших.
Вход. Проки́мен дне и чте́ния три. При́тчей чте́ние: Па́мять пра́веднаго с похвала́ми, и благослове́ние Госпо́дне на главе́ его́. / Блаже́н челове́к, и́же обре́те прему́дрость, и сме́ртен, и́же уве́де ра́зум. / Лу́чше бо сию́ купова́ти, не́жели зла́та и сребра́ сокро́вища. / Честне́йшая же есть ка́мений многоце́нных, все же честно́е недосто́йно ея́ есть. / Долгота́ бо дней и ле́та живота́ в десни́це ея́, в шу́йце же ея́ бога́тство и сла́ва. / От уст ея́ исхо́дит пра́вда, зако́н же и ми́лость на язы́це но́сит. / Послу́шайте у́бо мене́, о ча́да, честна́я бо реку́, и блаже́н челове́к, и́же пути́ моя́ сохрани́т: исхо́ди бо мои́ – исхо́ди живота́, и уготовля́ется хоте́ние от Го́спода. / Сего́ ра́ди молю́ вас и предлага́ю мой глас сыново́м челове́ческим. / Я́ко аз, прему́дрость, устро́их сове́т, и ра́зум и смысл аз призва́х. / Мой сове́т и утвержде́ние, мой ра́зум, моя́ же кре́пость. / Аз мене́ лю́бящия люблю́, и́щущии же мене́ обря́щут благода́ть. / Разуме́йте у́бо, незло́бивии, кова́рство, ненака́зании же, прилага́йте сердца́. / Послу́шайте мене́ и па́ки, честна́я бо реку́, и отве́рзу от усте́н пра́вая, я́ко и́стине поучи́тся горта́нь мой, ме́рзки же пре́до мно́ю устны́ лжи́выя. / С пра́вдою вси глаго́лы уст мои́х, ничто́же в них стро́потно, ниже́
развраще́нно. / Вся пра́ва суть разумева́ющим и про́ста обрета́ющим ра́зум. / Науча́ю бо вас и́стине, да бу́дет о Го́споде наде́жда ва́ша, и испо́лнитеся Ду́ха. При́тчей чте́ние: Уста́ пра́веднаго ка́плют прему́дрость, язы́к же непра́веднаго поги́бнет. / Устне́ муже́й пра́ведных ка́плют благода́ти, уста́ же нечести́вых развраща́ются. / Ме́рила льсти́вая ме́рзость пред Го́сподем, вес же пра́ведный прия́тен Ему́. / Иде́же а́ще вни́дет досажде́ние, та́мо и безче́стие, уста́ же смире́нных поуча́ются прему́дрости. / Соверше́ние пра́вых наста́вит их, и поползнове́ние отрица́ющихся упасе́т их. / Не по́льзуют име́ния в день я́рости, пра́вда же изба́вит от сме́рти. / У́мер пра́ведный, оста́ви раска́яние, нару́чна же быва́ет и посмея́тельна нечести́вых па́губа. / Пра́вда непоро́чнаго исправля́ет пути́, в нече́стие же па́дает непра́вда. / Пра́вда муже́й пра́вых изба́вит их: безсове́тием же пленя́ются беззако́ннии. / Сконча́вшуся му́жу пра́ведну, не поги́бнет наде́жда, похвала́ же нечести́вых поги́бнет. / Пра́ведник от ло́ва убе́гнет, вме́сто же его́ предае́тся нечести́вый. / Во усте́х нечести́вых сеть гра́жданом, чу́вство же пра́ведных благопоспе́шное. / Во благи́х пра́ведных испра́вится град, и в поги́бели нечести́вых ра́дование. / Во благослове́нии пра́вых возвы́сится град, усты́ же нечести́вых раскопа́ется. / Руга́ется гра́жданом лише́нный ра́зума, муж же му́дрый безмо́лвие во́дит. Прему́дрости Соломо́новы чте́ние: Пра́ведных ду́ши в руце́ Бо́жией, и не прико́снется их му́ка. / Непщева́ни бы́ша во очесе́х безу́мных умре́ти, и вмени́ся озлобле́ние исхо́д их, и е́же от нас ше́ствие – сокруше́ние, они́ же суть в ми́ре. / И́бо пред лице́м челове́ческим а́ще и му́ку прии́мут, упова́ние их безсме́ртия испо́лнено. / И вма́ле нака́зани бы́вше, вели́кими благоде́тельствовани бу́дут, я́ко Бог искуси́ я и обре́те их досто́йны Себе́. / Я́ко зла́то в горни́ле, искуси́ их и, я́ко всепло́дие же́ртвенное, прия́т я. / И во вре́мя посеще́ния их возсия́ют и, я́ко и́скры по сте́блию, потеку́т. / Су́дят язы́ком и облада́ют людьми́, и воцари́тся Госпо́дь в них во ве́ки. / Наде́ющиися Нань разуме́ют и́стину, и ве́рнии в любви́ пребу́дут Ему́. / Я́ко благода́ть и ми́лость в преподо́бных Его́, и посеще́ние во избра́нных Его́.
На литии́ стихи́ра хра́ма и стихи́ры святы́х, глас 1:
На небесе́х просвеща́еми заря́ми трисо́лнечнаго сия́ния, / святи́и уго́дницы
Ко́льстии, / Бо́га нам ны́не благопреме́нна сотвори́те моли́твами ва́шими, // чи́стым се́рдцем вас призыва́ющим.
Сла́ва, глас 6:
Днесь лику́ет Вели́кая Лапла́ндия, / испо́лнь не́бо и земля́ полно́щная благода́тию Свята́го Ду́ха / ны́не в пра́зднование па́мяти Собо́ра богоно́сных оте́ц Ко́льских. / Те́мже вси, соше́дшеся, та́ко рцем: / ра́дуйтеся, благода́тнии сосу́ди Ду́ха Боже́ственнаго, / преподо́бнии отцы́ на́ши Три́фоне, Феодори́те, Варлаа́ме, /
Евфи́мие, А́ксие, Авксе́нтие и Тара́сие, / преподобному́ченицы Пе́ченжстии Ио́но, Ге́рмане и Гу́рие / и и́же с ни́ми сто шестьна́десять му́ченик Пе́ченжских, / та́кожде новому́ченицы Це́ркве Ру́сския Моисе́е и Фео́доре со и́неми мно́гими, / вас бо Христо́с, я́ко всепло́дие же́ртвенное, прия́т, / на небеса́ возведе́, иде́же со А́нгелы лику́ете ны́не, / помина́йте любо́вию ублажа́ющих вас на земли́ // и творя́щих свято́е ва́ше пра́зднество.
И ны́не, Богоро́дичен, глас то́йже:
Богоро́дице, Ты еси́ лоза́ и́стинная, / возрасти́вшая нам Плод живота́, / Тебе́ мо́лимся: моли́ся, Влады́чице, / со все́ми святы́ми земли́ Ко́льския // поми́ловати ду́ши на́ша.
На стихо́вне стихи́ры, глас 5:
Ра́дуйтеся, достосла́внии отцы́, ста́рцы пустыннолюби́вии, / поста́ми и моли́твами / бла́та, про́пасти и ка́мения Ко́льския облагоуха́вшии; / ра́дуйтеся, немо́лчными славосло́вии благода́тно пусты́ни лопа́рския возде́лавшии; / ра́дуйтеся, Ду́ха Свята́го честны́я оби́тели; / ра́дуйтеся, сла́во церко́вная и исправле́ние доброде́телей; / ра́дуйтеся, ны́не Христу́ Влады́це предстоя́щии; / моли́теся о на́с приле́жно, // любо́вию соверша́ющих све́тлое ва́ше торжество́.
Стих: Восхва́лятся преподо́бнии во сла́ве / и возра́дуются на ло́жах свои́х.
Ра́дуйтеся, преподо́бнии отцы́ Ко́льстии, / по́двига моли́твеннаго ревни́телие / и благогове́йнаго безмо́лвия сослужи́телие; / ра́дуйтеся, соверше́ннаго терпе́ния зерца́ла / и сосу́ди по́стнаго воздержа́ния; / ра́дуйтеся, единомы́сленнии Бо́жии священнотаи́нницы / и и́ноческаго жития́ украше́ние /; ра́дуйтеся, кра́я полно́щнаго похвало́ и сла́во; / те́мже, соше́дшеся благоче́стно, // светоза́рную ва́шу па́мять че́стно пра́зднуем.
Стих: Свяще́нницы Твои́ облеку́тся в пра́вду, // и преподо́бнии Твои́ возра́дуются.
Ра́дуйтеся, блаже́ннии отцы́ святи́и, / в лише́ниих на земли́ пожи́вшии; / ра́дуйтеся, гла́д и мра́з претерпе́вшии; / ра́дуйтеся, ско́рби и поноше́ния терпели́во поне́сшии; / ра́дуйтеся, я́ко зла́то есте́ искуше́нное от земли́, / очище́нное седмери́цею; / ра́дуйтеся, Влады́це предстоя́щии / и в небе́сных оби́телех ны́не веселя́щиися; / ра́дуйтеся, засту́пницы бо есте́ и предста́телие на́ши ве́рнии, // при́сно восхваля́ем вас любо́вию.
Сла́ва, глас 6:
Прииди́те, ве́рнии, / духо́вно возвесели́мся днесь, / я́ко в наро́читом дни пра́здника, / и, ликовству́юще, возопии́м: / преукраша́йся, Фиваи́до Се́верная, / красу́йтеся, пу́стыни и де́бри лапла́ндския, / возрасти́вшия свято́е и сла́вное отце́в всево́инство, / достохва́льным житие́м нас наставля́ющее / во след Христу́
невозвра́тно ше́ствовати. / Сего́ ра́ди в пе́снех духо́вных и пении́х // па́мять ва́шу све́тло пра́зднуем.
И ны́не, Богоро́дичен, глас то́йже:
О, Де́во, Ма́ти Блага́я, Всепе́тая, / ми́рови Покро́ве и Засту́пнице, / не оста́ви оби́тели и хра́мы земли́ Ко́льския Свои́м заступле́нием, / я́коже и во успе́нии ми́ра не оста́вила еси́, // но спаса́й вся, на Тя упова́ющия.
На благослове́нии хлебо́в: тропа́рь Собо́ра святы́х, два́жды. И Богоро́дице
Де́во, еди́ножды. Тропа́рь, глас 4: Све́тлый со́нме подви́жников земли́ Ко́льския, / Се́вера тму сия́нием ве́ры озари́вшии, / отцы́ святи́и, благоче́стием преукраше́ннии, / служи́телие Та́ин Бо́жиих благогове́йнии, / боголю́бивии и́ноцы и учи́телие покая́ния, / миря́не, чи́стым житие́м Созда́телю угоди́вшии, / язы́ка ло́пскаго богому́дрии просвети́телие и наста́вницы, / новому́ченицы и испове́дницы, за Христа́ ду́ши положи́вшии, / в го́рьких рабо́тах да́же до сме́рти Его испове́давшии, / моли́теся ко Го́споду // спасти́ся душа́м на́шим.
НА У́ТРЕНИ
На Бог Госпо́дь: тропа́рь Собо́ра святы́х (два́жды),
Сла́ва, и ны́не, Богоро́дичен, глас 4:
Е́же от ве́ка утае́нное / и А́нгелом несве́домое та́инство, / Тобо́ю, Богоро́дице, су́щим на земли́ яви́ся Бог, / в несли́тном соедине́нии воплоща́емь, / и Крест во́лею нас ра́ди восприи́м, / И́мже воскреси́в первозда́ннаго, // спасе́ от сме́рти ду́ши на́ша.
По 1-й стихоло́гии седа́лен, глас 2:
Я́ко стра́нницы и прише́льцы есте́ на краю́ земли́, отмета́ющеся плотски́х похоте́й, я́же вою́ют на ду́шу, / и го́рних оби́телей всем се́рдцем вожделе́юще, / суеты́ жития́ вре́меннаго отрекли́ся есте́, свети́льницы многосве́тлии, / чудесы́, я́ко второ́е со́лнце, возсия́ли есте́, / помина́йте всех нас, соверша́ющих свяще́нную па́мять ва́шу, / и моли́теся ко Го́споду спасти́ся нам, // ве́рою хва́лящим па́мять ва́шу.
Сла́ва, глас 3:
Показа́ша нам о́браз вы́шшаго равноа́нгельнаго жития́ уго́дницы твои́, Го́споди, / зело́ че́стни бы́ша дру́зи твои́, зело́ утверди́шася влады́чествия их на краю́ земли́ полно́щныя. / Те́мже небе́сными украси́вшеся венцы́, с ли́ки безпло́тных веселя́тся / и мо́лят Тя, Христе́ Бо́же, я́ко соверше́ннии сово́инственники прехва́льнии, // дарова́ти и на́м преспе́яние жития́, чту́щим любо́вию святу́ю па́мять
их. И ны́не, Богоро́дичен, глас то́йже: Пречи́стая и Преблагослове́нная Де́во, / Рождество́м Твои́м истле́вшее страстьми́ земноро́дных естество́ обнови́ся / и, свобо́ждся от сме́рти и а́довых уз, / приведе́ся к насле́дию жи́зни ве́чныя. // Те́мже Тя вси ро́ди досто́йно ублажа́ют.
По 2-й стихоло́гии седа́лен, глас 6:
Равноа́нгельное житие́ показа́ша нам отцы́ святи́и, / пла́мень бо огня́ Боже́ственного в се́рдце свое́м стяжа́вше, / в по́стничестех и бде́нных по́двизех преспева́юще, / по́чести вы́шняго гра́да, Небе́снаго Иерусали́ма, достиго́ша. / Да́руй и на́м, Го́споди, ревни́тельми бы́ти непоро́чнаго, пра́веднаго и богочести́ваго жи́тельства / и заступле́нием сих уго́дников Твои́х // неосужде́нно ста́ти стра́шному Твоему́ Суди́щу.
Сла́ва, глас то́йже:
На земли́ ходи́вше те́сною стезе́ю, / отверго́сте всех кра́сных ми́ра, отцы́
Ко́льстии, / вше́дше в поко́й преми́рный, тече́нием пра́вым достиго́сте широты́ Небе́сныя, / сла́вяще вы́ну Царя́ Сла́вы, Го́спода Вседержи́теля, / да и Той, призре́в
на смире́нное моле́ние на́ше, / очи́стит на́ша ду́ши и телеса́ от вся́кия скве́рны пло́ти
и ду́ха // и да́рует нам преспе́яние жития́ и ве́ры и ра́зума духо́внаго.
И ны́не, Богоро́дичен, глас то́йже:
Непостижи́мому и неизрече́нному, / ку́пно же сла́вному и ужа́сному та́инству вочелове́чения Бо́га Сло́ва дивя́щеся, / в преклоне́нии душ и серде́ц на́ших / пред Тобо́ю, Де́во Пречи́стая, ликовству́юще, взыва́ем: // ра́дуйся, Благода́тная, Госпо́дь с Тобо́ю.
Велича́ние:
Ублажа́ем вас, / вси святи́и земли́ Ко́льския, / и чтим святу́ю па́мять ва́шу, / вы бо мо́лите за на́с // Христа́ Бо́га на́шего.
Псало́м избра́нный: Терпя́, потерпе́х Го́спода, и внят ми, и услы́ша моли́тву мою́. / Поста́ви на ка́мени но́зе мои́ и испра́ви стопы́ моя́. / Се удали́хся, бе́гая, и водвори́хся в пусты́ни. / Уподо́бихся нея́сыти пусты́нней. / Бдех и бых, я́ко пти́ца, осо́бящаяся на зде. / Коле́на моя́ изнемого́ста от поста́, / и плоть моя́ измени́ся еле́я ра́ди. / Предзре́х Го́спода пре́до мно́ю вы́ну, я́ко одесну́ю мене́ есть, да не подви́жуся. / Вси язы́цы обыдо́ша мя, и И́менем Госпо́дним противля́хся им. / Благослове́н Госпо́дь, И́же не даде́ нас в лови́тву зубо́м их. / Храни́т Госпо́дь ду́ши преподо́бных Свои́х. / Восхва́лятся преподо́бнии во сла́ве и возра́дуются на ло́жах свои́х. / Честна́ пред Го́сподем смерть преподо́бных Его́. / По́йте Го́сподеви, преподо́бнии Его́, и
испове́дайте па́мять святы́ни Его́, во всех лю́дех чудеса́ Его́. Сла́ва, и ны́не: Аллилу́ия: (Три́жды).
По полиеле́и седа́лен, глас 7:
Блаже́ни есте́, достохва́льнии отцы́ Ко́льстии, / путе́м те́сным, боле́зненным и тру́дным ше́ствовасте, / и́мже до́бре ходя́щии о Христе́ и творя́щии безсме́ртный пло́д в широту́ ра́йскую вводи́ми быва́ют, / светоли́тием Христо́вым просвеща́емии; / сего́ ра́ди, у Престо́ла Вседержи́телева предстоя́ще, моли́теся, / да изба́вит нас Госпо́дь от всех ловя́щих ду́ши на́ша, // я́ко ко Го́споду о́чи на́ши, и На́ньже то́чию упова́ем.
Сла́ва, глас 1:
Преподо́бнии и богоно́снии отцы́ земли́ Ко́льския, / предстоя́щии за ны собо́рне Христу́ Бо́гу, / утвержде́ние всем ве́рным бу́дете, я́же к вам припа́дают, глаго́люще: / ра́дуйтеся, пло́тию на земли́, умо́м же на небеси́ пожи́вшии; / ра́дуйтеся, вре́менною сме́ртию на безконе́чную жизнь преше́дшии; / ра́дуйтеся, Пресвяты́я Тро́ицы честни́и служи́телие; / ра́дуйтеся, мона́хов му́дрии и кро́тции наста́вницы; / ра́дуйтеся, я́ко и на́с наста́вите к жи́зни нестаре́емей и присносу́щней те́плыми моли́твами ва́шими. И ны́не, Богоро́дичен, глас то́йже: Я́ко к неруши́мей стене́ и ти́хому приста́нищу, / к покро́ву Твоему́, Преблагослове́нная Богоро́дице, притека́юще, / вла́емии волна́ми жите́йских попече́ний, вопие́м: / Влады́чице, покры́й, соблюди́ и спаси́ на Тя упова́ющия / и улучи́ти весе́лия со все́ми святы́ми сподо́би. Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем / смерть преподо́бных Его́. Стих: Что возда́м Го́сподеви о всех, / я́же воздаде́ ми? Ева́нгелие от Матфе́я, зача́ло 43.
По 50-м псалме́ стихи́ра, глас 6:
Днесь благода́ть Свята́го Ду́ха нас собра́ / в пра́зднование па́мяти Собо́ра богоно́сных оте́ц Ко́льских, / те́мже вси́, соше́дшеся, та́ко рцем: / ра́дуйтеся, благода́тнии сосу́ди Ду́ха Боже́ственнаго, / преподо́бнии отцы́ на́ши Три́фоне, Феодо́рите, Варлаа́ме, / Евфи́мие, А́ксие, Авксе́нтие и Тара́сие, / преподобному́ченицы Пе́ченжстии Ио́но, Ге́рмане и Гу́рие / и и́же с ни́ми сто шестьна́десять му́ченик Пе́ченжских, / та́кожде новому́ченицы Це́ркве Ру́сския Моисе́е и Фео́доре со и́неми мно́гими, / ва́шим бо житие́м благоче́стным украси́ся Це́рковь Ру́сская, / ю́же Госпо́дь таковы́ми столпы́ утверди́, / да и нам пода́ст благода́ть Свою́ // моли́твами ва́шими благомо́щными.
Кано́н Богоро́дицы со ирмосо́м на 6 и святы́х на 8, глас 6:
Песнь 1
Ирмо́с:
Се́ченое, сече́тся / мо́ре Чермно́е, / волнопита́емая же изсуша́ется глубина́, / та́яжде ку́пно / безору́жным бы́вши проходи́ма / и всеору́жным гроб. / Песнь же Богокра́сная воспева́шеся: // сла́вно просла́вися Христо́с, Бог наш.
Запе́в: Вси святи́и земли́ Ко́льския, моли́те Бо́га о нас. Прииди́те, ве́рнии, согла́сно возвели́чим Собо́р святы́х, на конце́ кра́я полно́щнаго просия́вших, / от дре́вних родо́в и доны́не в земли́ на́шей полно́щной Бо́гу послужи́вших / и при́сно со А́нгелы Того́ воспева́ющих: / ди́вен во святы́х свои́х Христо́с Бог наш, сла́вно бо просла́вися. Све́том Невече́рним озаря́еми, отцы́ святи́и, / просвеще́нием И́стины зе́млю Ко́льскую удо́брили есте́ / и крови́ю му́ченическою напита́ли есте́, / сего́ ра́ди лю́дие возра́довашася зело́, / вельми́ вас почита́ют и восхваля́ют, глаго́люще: / ди́вен во святы́х свои́х Христо́с Бог наш, сла́вно бо просла́вися. И́же доброде́телей подви́жницы, я́ко и́стиннии во́ини Христа́ Бо́га, / от лопа́рских пу́стыней возсия́ли есте́, / оте́чество го́рнее па́че сла́вы ми́ра сего́ возлюби́вше / и жела́ния пло́тская отве́ргше, отцы́ богомудрии, / вся духо́вная стремле́ния своя́ во смире́ние Го́сподеви повину́ли есте́, при́сно пою́ще Ему́: / ди́вен во святы́х свои́х Христо́с Бог наш, сла́вно бо просла́вися. Сонм свети́льников све́тлых, на конце́ земли́ просия́вших, / на све́щнице церко́вней яви́ Госпо́дь, / ще́дро насе́явый свято́е и сла́вное отце́в мно́жество во язы́цех су́щих дале́че. / Я́ко и́стиннии во́ини Христа́ Бо́га, / во вся́ком чи́не и вся́ким по́двигом Тому́ угоди́вшии и иму́щии дерзнове́ние ко Святе́й Тро́ице, / не забу́дите помина́ти земно́е Оте́чество ва́ше и моли́тися о нас, при́сно пою́щих Го́споду: // ди́вен во святы́х свои́х Христо́с Бог наш, сла́вно бо просла́вися.
Я́ко а́нгели земни́и и челове́цы небе́снии, / огне́м Боже́ственным возсия́сте и оживотвори́сте пусты́ню, / пре́жде мра́чну и безпло́дну, / по́слежде, а́ки крин процве́тшую и мно́жество и́нок возрасти́вшую, / сия́нием Трисо́лнечнаго Божества́ ю озари́сте, / просвеща́юще ко спасе́нию и наставля́юще душ мно́жество, / благода́рно вопию́щих о по́двизех ва́ших Го́споду: / ди́вен во святы́х свои́х Христо́с Бог наш, сла́вно бо просла́вися. Богоро́дичен: Вы́шних сил Превы́сшая и пло́тию Безпло́тнаго Ро́ждшая, Пречи́стая Влады́чице, / Сы́на Твоего́ и Христа́ Бо́га на́шего / со все́ми святы́ми земли́ Ко́льския моли́ о спасе́нии душ на́ших.
Песнь 3
Ирмо́с:
Госпо́дь Сый всех и Зижди́тель Бог, / созда́нное, Безстра́стный, обнища́в, Себе́ соедини́, / и Па́сха, за я́же хотя́ше умре́ти, / Сам, Сый, Себе́
предпожре́: / яди́те, вопия́, Те́ло Мое́ // и ве́рою утверди́теся.
Весели́ся, земле́ Ко́льская, / в тебе́ бо плод ра́дости нам процвете́, / преподо́бный Феодори́т, благода́тию Бо́жией облагоуха́нный. / Его́же велича́юще, Христа́ Бо́га сла́вим, / преподо́бнаго же усе́рдно мо́лим: / моли́ спасти́ся душа́м на́шим. От младе́нства доброде́тели прилежа́в, / сосу́д Ду́ха Свята́го, преподо́бне Феодори́те, яви́лся еси́, / чистоту́ и целому́дрие соблю́л еси́, / прост и кро́ток, смире́н се́рдцем, ве́рен Бо́гу, / и́стинною прему́дростию просвеще́н, о́тче преблаже́нне, бы́л еси́, / се́рдце свое́ Христу́ вве́ривый, / по́честей земны́х не иска́вый, / всем помышле́нием к Бо́гу простира́выйся, // о́тче Феодори́те, моли́ Христа́ Бо́га о нас.
Чистоты́ усе́рдный храни́телю, / Боже́ственною любо́вию, о́тче, распаля́емь, / мирску́ю честь и бога́тство ни во что́же вмени́в, / небе́сное бога́тство и сла́ву ве́чную восприя́л еси́. / Реко́ша наро́ди ло́пстии: Феодори́т Ру́сский широко́ хо́дит; / та́ко не убоя́ся тяготы́, и долготы́ пу́тныя, и хла́да, / ниже́ уклони́ся та́мо нечести́вых челове́к сопротивле́ния, / но вся́ претерпе́л еси́ и всех Бо́гу приве́л еси́. Еще́ в телеси́ тле́ннем пребы́в, / безтеле́сными и невеще́ственными почте́н досто́инствы, / по возду́ху ше́ствия твори́л еси́. / И, я́ко апо́стол Па́вел, восхища́емь был еси́ во оби́тели небе́сныя, / иде́же виде́нии неизрече́нными Бог посети́ тя. / Неду́жных, притека́ющих к тебе́, благода́тию Ду́ха Свята́го цели́л еси́, / прокаже́нных очища́л еси́, / чу́вства покая́нная в лю́дех пробужда́л еси́ / и мно́гих на путь спасе́ния и ве́ры наста́вил еси́. Прему́дрости сокро́вище быв, преподо́бне Феодори́те, / сердца́ неве́рных люде́й уче́нием твои́м просвети́л еси́, благоче́стия семена́ насади́в. / Те́мже тя вси, я́ко учи́теля прему́дра, достодо́лжно ублажа́ем и мо́лим: / моли́ся Христу́, Ему́же от ю́ности порабо́тал еси́, / от наве́т вра́жиих изба́вити нас и спасти́ся душа́м на́шим. Богоро́дичен: Огнь Боже́ственный благода́тный, Влады́чице, сни́де на Тя, / и Си́ла Вы́шняго осени́ Тя; / и, я́ко Ма́терь Бо́жия и Хода́таица о ро́де христиа́нстем, мо́лишися о нас: / тем Тя вси велича́ем. Седа́лен, глас 2: Страны́ полно́щныя подви́жники благоче́стия, / земли́ се́верныя предста́тели те́плии яви́стеся, / отцы́ преблаже́ннии, Христа́ Бо́га моли́те о нас, / свяще́нный ваш Собо́р почита́ющих и любо́вию вопию́щих: / ра́дуйтеся, отцы́ преди́внии, // кра́я Ко́льскаго и всея́ Руси́ похвало́ и утвержде́ние. (Два́жды.)
Богоро́дичен, глас то́йже:
Вся упова́ния на́ша в Тебе́, Ма́ти Де́во, иму́ще, мо́лим Тя, / я́ко святы́х сла́ву и Влады́чицу милосе́рдную: / да́руй нам, преподо́бных Твои́х ра́ди, грехо́в исправле́ние / и и́ноческому житию́ споспе́шествуй при́сно, // подаю́щи благода́ть
Свою́ неоску́дну.
Песнь 4
Ирмо́с:
Прови́дев проро́к / та́йну Твою́ неизрече́нную, Христе́, провозгласи́: / положи́л еси́ тве́рдую любо́вь кре́пости, О́тче Ще́дрый, / Единоро́днаго бо Сы́на, Благи́й, // очище́ние в мир посла́л еси́.
Преподо́бне о́тче Три́фоне, / ми́ра красоту́ и сла́ву мирску́ю от люде́й отню́д возненави́дел еси́ / и на покая́ние изше́л еси́ в край се́верныя земли́, / в сокруше́нии серде́чнем слеза́ми зе́млю омака́я. / Мона́шеское житие́ па́че возлюби́в, а́нгелом собесе́дник бы́ти сподо́бился еси́, / чудесы́ возсия́, я́коже второ́е со́лнце, во грехо́внем мра́це глубоконо́щия. / Помина́й нас, о́тче всехва́льный, соверша́ющих свяще́нную па́мять твою́ и си́це глаго́лющих: / моли́ Христа́ Бо́га спасти́ся душа́м на́шим. В места́ да́льняя и безве́стная прише́л еси́, о́тче наш Три́фоне, / и неве́дущим Бог тобо́ю позна́ся. / Иде́же пре́лесть почита́ема бя́ше, / та́мо ны́не лю́дем, во тме неве́рия лежа́щим, ве́ра Христо́ва тобо́ю дарова́ся, / и оби́тель ве́лия процвете́. / Всех научи́л еси́ в Трие́х Ли́цех Еди́но Божество́ ве́ровати, / те́мже свяще́нную Твою́ па́мять достодо́лжно ублажа́ем. Пути́, вводя́щаго в жизнь, наста́вник и учи́тель был еси́ / и в после́дних конце́х се́верныя страны́ язы́ки просвети́л еси́, породи́в водо́ю и Ду́хом Святы́м, / Его́же благода́тию неду́жныя цели́л еси́, от грехо́в тя́жких очища́я, / и чу́вства покая́нная пробужда́л еси́, / и мно́гих на путь спасе́ния и ве́ры наста́вил еси́, о́тче наш Три́фоне. Богому́дре о́тче наш Три́фоне, / оби́тель во и́мя Живонача́льныя Тро́ицы осуществова́л еси́, / ю́же новопросвеще́нная страна́ Ко́льская по́слежде возрасти́, / та́мо мона́хов мно́жества песносло́вят и правове́рную ве́ру хва́лят, / покаря́ющеся уче́нием Христа́, / Его́же моли́ спасти́ся душа́м на́шим. Шестьна́десять лет апо́стольски труди́лся еси́, преподо́бне Три́фоне, / и доброде́тельми, я́ко луча́ми со́лнечными, / просвети́л еси́ неве́рных во стране́ дале́че, пу́сте и непрохо́дне, / иде́же не то́чию учи́тель и наказа́тель, но корми́тель и строи́тель был еси, / и всем бысть вся, да вся́ко не́кия спасе́ши. / Те́мже тя вси достодо́лжно ублажа́ем и мо́лимся: / моли́ся Христу́, Ему́же усе́рдно порабо́тал еси́, / изба́вити нас наве́т вра́жиих и спасти́ся душа́м на́шим. Богоро́дичен: Безневе́стная Де́во, / Яже Бо́га неизрече́нно заче́нши пло́тию, / Ма́ти Бо́га Вы́шняго, / Твои́х рабо́в моле́бную слу́жбу приими́, Всенепоро́чная, / и Бо́гу Благоутро́бному принеси́.
Песнь 5
Ирмо́с:
Сою́зом любве́ / связу́еми, апо́столи, / влады́чествующему все́ми себе́ Христу́ возло́жше, / кра́сны но́ги очища́ху, // благовеству́юще всем мир.
Прииди́те, лю́бящии пресла́вныя по́двиги святы́х земли́ Ко́льския, / восхва́лим преподо́бнаго Варлаа́ма из Ке́рети, / той бо благобытие́ ми́ра сего́ превреди́л есть / и, живо́т свой ни во что́же вмени́в, крест тя́жкий взем, / Христу́ смире́нием и до́блестию после́довал е́сть. / Мы же прославля́ем Бо́га, Ди́внаго во святы́х Свои́х, / подаю́щаго нам мир и ве́лию ми́лость. Страда́нием у́бо пе́рвее тя́жко искуси́вся, / в пусты́ни же посто́м тече́ние боже́ственное соверши́в, / на Небеса́ возше́л еси́ и ны́не Христу́ предстои́ши, Варлаа́ме, о́тче преподо́бне, / моля́ся те́пле за ны, пою́щия тя. Ду́ха Свята́го теплото́ю, му́дре, жела́ние се́рдца твоего́ согре́яв / и зи́му страсте́й умертви́в, / погрузи́л еси́ страсте́й воста́ние в пучи́не скорбе́й, / свяще́нный о́тче Варлаа́ме, / в ладии́ те́сней вози́мь по мо́рю полно́щному, / многоко́зненную си́лу де́монскую низложи́л еси́ / и в коне́ц не́мощны ты́я показа́л еси́, / Небе́сная же во́инства удиви́в терпе́нием свои́м, / я́ко по́стников подража́тель и преподо́бных сожи́тель, / с ни́миже моли́ся Го́сподеви поми́ловатися душа́м на́шим. Богоно́се преблаже́нне Варлаа́ме, / все плотско́е мудрова́ние ду́ху повину́л еси́, / поще́ния и изнуре́ния теле́снаго страда́ньми утверди́вся, / я́ко зла́то, в горни́ле искуше́но, сия́я, яви́лся еси́, / прия́телище был еси́ Ду́ха Пресвята́го. / Помина́й нас, чту́щих при́сно па́мять твою́ свяще́нную, / умоли́ Го́спода, да ми́лостив нам бу́дет, / во мно́жестве Своея́ бла́гости. О, тро́ице присноблаже́нная, / равноче́стнии ста́рцы, заматоре́вшии во днех свои́х, Феодори́те, Три́фоне и Варлаа́ме, / я́ко еди́но блаже́нство иму́щии от Бо́га, / пречу́дная и предо́брая версто́, / восхваля́ющих вы от всех лю́тых спаса́йте / те́плым предста́тельством ва́шим ко Го́споду. Богоро́дичен: Изравни́тися Соде́телю жела́ние ми вложи́ змий вселука́вый, / я́ко пле́нника, мя восхи́ти. / Тобо́ю же, Пречи́стая, призва́н бых, обожи́вся и́стинно, / Ты бо, о, Богома́ти, / И́же мене́ Обожи́вшаго родила́ еси́.
Песнь 6
Ирмо́с:
Бе́здна после́дняя грехо́в обы́де мя, / и, волне́ния не ктому́ терпя́, / я́ко Ио́на Влады́це, вопию́ Ти: // от тли мя возведи́.
Прииди́те, христолюби́вии лю́дие, / восхва́лим ревни́телей и защи́тителей до́блественных оби́тели Пе́ченжския, / Ио́ну скитонача́льника Успе́нския пу́стыни, / вку́пе же и сподви́жника его́ Ге́рмана, / ти́и бо ве́лию скорбь нача́тка зла́го разоре́ния оби́тели прия́ша / и кровь свою́ за Христа́ пролия́ша, / со́нму преподобному́чеников Пе́ченжских сопричте́ни бы́ша. / Ны́не же предстоя́т Престо́лу Госпо́дню // и мо́лятся о спасе́нии душ на́ших.
Мно́гия ско́рби и страда́ния на земли́ смире́нно претерпе́вше, / я́ко во мно́зем искуше́нии скорбе́й избы́ток ра́дости ва́шея, / и я́же во глубине́ нищета́ ва́ша
избы́точествова в бога́тство простоты́ ва́шея, / крест му́ченический богопоко́рно поне́сше, / ны́не на Небе́си ра́дости неизрече́нныя наслажда́етеся, / преподобному́ченицы Ио́но и Ге́рмане, / и в со́нме святы́х Го́спода воспева́ете. / Того́ моли́те и нам по́прище земно́е смиренно соверши́ти / и Ца́рствие Бо́жие насле́довати. Телеса́ ва́ша на растерза́ние преда́сте, блаже́ннии Ио́но и Ге́рмане, / ду́ху плоть покори́вше, / мече́м я́звенным и огне́м паля́щим смерть прия́ша. / Те́мже, венцы́ му́ченическия от Го́спода прие́мше, / ны́не Престо́лу Бо́жию во Ца́рствии Небе́снем предстои́те / и мо́литеся о душа́х на́ших. Пе́сньми Боже́ственными почита́етеся ны́не досто́йно, пастыренача́льниче игу́мене Гýрие, / священнои́ноче Пахо́мие, иеродиа́коне Ио́сифе, достосла́вне Амвро́сие / и про́чии и́ноцы, во оби́тели Пе́ченжстей подвиза́вшиися / и Христа́ ра́ди му́жественно пострада́вшии, / чрез муче́ния тя́жкая и о́гнь проидо́сте / и, я́ко ученицы́ ве́рнии преподо́бнаго Три́фона и дру́зи Христо́вы, / в поко́й Небе́снаго Ца́рствия внидо́сте. Прииди́те, мучениколю́бцы, / отце́в блаже́нных просла́вим, / Пе́ченжских моли́твенников, / доблему́дренно во оби́тели земно́й потруди́вшихся / и в селе́ниих небе́сных упоко́ившихся, / вои́стину до кро́ве подвиза́вшихся. / Мо́лим вы, преподо́бнии му́ченицы, / сугу́быя венцы́ стяжа́вшия, // испроси́те нам у Го́спода оставле́ние грехо́в и ве́лию ми́лость.
Богоро́дичен:
Ра́дости на́шея Хода́таица яви́лася еси́, Де́во, / и благода́ти принося́ще вене́ц любо́вию, / ра́дуйся, вопие́м Ти, Благослове́нная Чи́стая, похваля́юще. Конда́к, глас 3: Днесь лик святы́х, в земли́ Ко́льстей Бо́гу угоди́вших, / предстои́т в це́ркви и неви́димо за ны мо́лится Бо́гу, / прииди́те, христоимени́тии лю́дие, / па́мять их почти́м и возопии́м к ним: / ра́дуйтеся, отцы́ преблаже́ннии Три́фоне, Феодори́те и Варлаа́ме / со мно́гими на́шего кра́я небе́сными покрови́тели, / вы бо, я́ко зве́зды светоза́рныя, во мра́це се́вера возсия́ли есте́, / словесы́ и чудесы́ свои́ми вся просвети́вше, / и ны́не моли́теся Го́сподеви / ве́ру Правосла́вную зде незы́блему соблюсти́ // и дарова́ти нам ве́лию ми́лость.
И́кос:
Я́ко благоуха́ннии кри́ни, прозя́бшии Боже́ственным раче́нием, / яви́лися есте́, отцы́ всечестни́и, / в земли́ необетова́нней, непу́тней и жа́ждущей, / плод мног стори́цею прине́сше, / страну́ сию́ моли́твами и раде́ниями освяти́ли есте́ / и ду́ши мно́зи ко Христу́ привели́ есте́; / сего́ ра́ди ублажа́ем вас, при́сно пою́ще: / ра́дуйтеся, ма́слины плодови́тыя, от рая́ Госпо́дня процве́тшия; / ра́дуйтеся, све́том Христо́вым от восто́ка духо́внаго возсия́вшии; / ра́дуйтеся, земли́ Ко́льския
преди́внии чудотво́рцы и те́плии о нас пред Бо́гом моли́твенницы. / Ны́не моли́теся Го́сподеви ве́ру Правосла́вную зде незы́блему соблюсти́ // и дарова́ти нам ве́лию ми́лость.
Песнь 7
Ирмо́с:
О́троцы в Вавило́не / пе́щнаго пла́мене не убоя́шася, / но, посреде́ пла́мене вве́ржени, / ороша́еми, поя́ху: // благослове́н еси́, Го́споди, Бо́же оте́ц на́ших.
Тле́нная и земна́я наслажде́ния отри́нув, / пусты́нное житие́ возлюби́л еси́, сла́вный Евфи́мие, / оби́тели Нико́ло-Коре́льския украси́телю, церкве́й и скито́в мно́гих зижди́телю, / в богомы́слии и молча́нии пребыва́я, / благоче́стие ли́ку и́ноческому показа́л еси́ преди́вно, / богоно́се Евфи́мие, о́тче на́ш. Многосве́тлыми луча́ми блиста́ют дея́ния твоя́, преподо́бне о́тче Евфи́мие: / брега́ в после́дних конце́х се́верныя страны́ / церква́ми и скита́ми, я́ко древа́ми ма́сличными, украси́л еси́. / Долготу́ пу́тную и опа́сности мо́ря ни во что́же вменя́я, / пустынножи́тия рачи́тельство восхваля́я, доше́д да́же до Норве́жския земли́, / не убоя́лся еси́ врагов кре́пких и бранноиску́сных, / пусты́ни полно́щныя облиста́в све́том благоче́стия. По́стническое и равноа́нгельное житие́ прии́мше, / преподо́бнии отцы́ Акси́е, Авксе́нтие и Тара́сие, / в Помо́рие пусты́нное удали́лися есте́, а́ки в ти́хое приста́нище, / на на́волок Кашкара́нский всели́лися есте́ и мно́гая ле́та та́мо пожи́ли есте́ / и, непреста́нныя моли́твы, я́ко копие́ в рука́х, иму́ще, / кре́пко победи́ли есте́ бесо́вская ополче́ния, / благода́ть прии́мше цели́ти неду́ги душ и теле́с на́ших. / Тем зове́м вам: / ра́дуйтеся, преподо́бнии отцы́ Акси́е, Авксе́нтие и Тара́сие, / мона́хов удобре́ние. Тро́ице свята́я Кашкара́нская, / Солове́цкаго ото́ка о́трасле многопло́дная, / в пра́виле и́ночестем возсия́вшая све́тло, / преподо́бнии отцы́ Акси́е, Авксе́нтие и Тара́сие, / помина́йте, любо́вию хваля́щия вас. В мо́ре Ледова́том успе́ние обре́л еси́, Безымя́нне, / в телеси́ нетле́ние стяжа́л еси́, преподо́бне, / неве́домый ми́ру и́ноче земли́ Те́рския, но Бо́гови ве́домый и чудеса́ми явле́нный. / В лови́тве ры́бней помо́щниче ско́рый и цели́телю усе́рдный в не́мощех и боле́знех, / преподо́бне Безымя́нне и́ноче, моли́ Христа́ Бо́га спасти́ся душа́м на́шим. Богоро́дичен: Яви́лася еси́ Де́ва и Ма́ти, па́че естества́, Богороди́тельнице, / Сло́во заче́ншая О́тчее, воплоще́нно Сие́ ро́ждши, / И́мже ны́не спаса́еми, Тя, Богоро́дице, велича́ем.
Песнь 8
Ирмо́с:
За зако́ны оте́ческия / блаже́ннии в Вавило́не ю́ноши, предбе́дствующе, / царю́ющаго оплева́ша повеле́ние безу́мное / и, совоку́плени, и́мже не свари́шася огне́м, / Держа́вствующему досто́йную воспева́ху песнь: / Го́спода по́йте, дела́, // и превозноси́те во вся ве́ки.
Святи́и новому́ченицы и испове́дницы Ко́льстии, / светоле́пнии архиере́и и свяще́нницы, / и́ноцы, и́нокини и миря́не, / ве́рнии Го́сподеви му́жие, жены́ и ча́да, /
на се́вере жесто́кими гони́тели со́браннии и в ка́торжных рабо́тах уму́ченнии, / за
Христа́ кро́вь пролия́вшии, / отцы́, бра́тие и се́стры на́ши, / за Го́спода смерть прия́вшии, / испроси́те у Человеколю́бца Бо́га грехо́в проще́ние вопию́щим: / Го́спода по́йте, дела́, и превозноси́те Его́ во ве́ки. Земля́ се́верная при́сно ва́ми хва́лится и весели́тся, / святи́и новому́ченицы и испове́дницы Ко́льстии, ве́домии и неявле́ннии, / в годи́ну лю́тых искуше́ний Христа́ не отверго́стеся, но до сме́рти Его́ испове́дасте. / Того́ приле́жно моли́те пода́ти ве́лию ми́лость вас чту́щим / и Бо́гови вопию́щим: Го́спода по́йте, дела́, и превозноси́те Его́ во ве́ки. Святы́х Та́ин Христо́вых ве́рный служи́телю, / покая́ния пропове́дниче и кра́я Ко́льскаго печа́льниче, / уподо́бился еси́ проро́ку Моисе́ю, / ду́шу свою́ за погиба́ющую па́ству положи́л еси́, / у́зы темни́чныя и сме́рть за Христа́ претерпе́л еси́, / спаса́й нас моли́твами твои́ми, о́тче Моисе́е, вопию́щих: / Го́спода по́йте, дела́, и превозноси́те Его́ во ве́ки. Преподобному́чениче Фео́доре, / злострада́ния от безбо́жных и го́рькия рабо́ты претерпе́л еси́, / Це́ркви послуша́ние да́же до сме́рти яви́л еси́, / сего́ ра́ди венце́м му́ченическим венча́ тя Христо́с Бо́г, / Его́же моли́, богодарова́нный засту́пниче земли́ Ко́льския, / да очи́стимся от вся́кия скве́рны покая́нием / и просла́вим Христа́ Соде́теля во вся́ ве́ки. О, пресла́внаго чудесе́! / Узре́ Госпо́дь го́рдая времена́, / и се́, сконча́на су́ть, и беззако́ния его́ испо́лнишася, / и возсия́ша с весе́лием новому́ченицы в земли́ полно́щной, / и мрак пре́лести неве́рия отгна́ша, / и ко́зни бесо́вския, я́ко исчеза́ет дым, изчезо́ша, / и возрасте́ пра́вда, и посра́млено бы́сть нече́стие. / Ра́дуются ве́рнии и пра́здник новоявле́нным уго́дником составля́ют, / вопию́ще Христу́ Бо́гу: / Го́спода по́йте, дела́, и превозноси́те Его́ во ве́ки. Богоро́дичен: Зря́щи поруга́ние земли́ Ко́льския, / скорбя́ше Пречи́стая Ма́ти и всеси́льную по́мощь стра́ждущим лю́дем простира́ше, / Сы́на же Своего́ усе́рдно моля́ше, взыва́ющи: / да благослови́т Го́спода земля́ се́верная, свободи́вшися от и́га безбо́жнаго, / и превозно́сит Его́ во ве́ки.
Песнь 9
Ирмо́с:
Стра́нствия Влады́чня / и Безсме́ртныя Трапе́зы на Го́рнем ме́сте / высо́кими умы́, / ве́рнии, прииди́те, наслади́мся, / возше́дша Сло́ва, / от Сло́ва научи́вшеся, // Его́же велича́ем.
Процвели́ есте́ в по́стнических юдо́лех, достохва́льнии отцы́ на́ши, / я́ко цве́ти многоцве́тнии и я́ко кри́ни се́льнии, / облагоуха́ли есте́ ду́ши ве́рных доброде́тельми свои́ми и чудесы́, / в и́стинней ве́ре наставля́юще. / О, всеблаже́ннии, преподо́бным сожи́телие и по́стников похвало́, / о нас моли́теся ко Го́споду поми́ловатися душа́м на́шим. Пе́сньми велича́ем вас, преподо́бнии, / вся хоте́ния Госпо́дни испо́лнившии, / мно́гия ско́рби в ми́ре претерпе́вшии, / в моли́тве Бо́гу собесе́довавшии, / житие́м свои́м диа́вола попра́вшии, / на Небеса́ со сла́вою возведе́ннии, / с ли́ки а́нгельскими в ве́чныя оби́тели Отца́ Небе́снаго вселе́ннии, / спаса́йте нас от грехо́в моли́твами ва́шими, / да утверди́мся в ве́ре Правосла́вней. Отцы́ преди́внии и всечестни́и, / земли́ Ко́льския моли́твенницы и покрови́тели, / по́двигом до́брым подвиза́стеся, / тече́ние жи́зни до́льней сконча́сте, ве́ру свя́то соблюдо́сте; / ны́не, ра́дующеся и веселя́щеся в пресла́вных селе́ниях Отца́ Небе́снаго, / по́чести обетова́нныя прия́сте, / не отри́ните у́бо и на́ших моли́тв, / любо́вию вас ублажа́ющих. Прииди́те, бра́тие, с похвала́ми воспои́м полк уго́дников Христо́вых, / вмени́вших звезду́ Поля́рную во звезду́ Вифлее́мскую, / мра́за и тмы на конце́ кра́я полно́щнаго не убоя́вшихся / и разжже́нною ре́вностию ко́зни вра́жия попали́вших. / Во́инство до́блественнейшее, свяще́ннейший Собо́ре, / возсия́ли есте́ пресла́вно, лучеза́рныя зари́, / и всели́лися есте́ в незаходи́мый свет Ца́рствия Христо́ва. Днесь с на́ми собо́р по́стников и моли́твенников весели́тся, / преподо́бных и молча́льников сосло́вие ликовству́ет, / му́чеников и страстоте́рпцев ли́к ра́дуется и Бо́га сла́вит, / и Це́рковь Христо́ва и́ми украша́ется. / Те́мже, бра́тие ве́рнии, любо́вию просла́вим вся святы́я земли́ на́шея, / я́ко сы́ны и дще́ри Отца́ Небе́снаго, / ко Оте́честву ве́чному нас возводя́щия. Богоро́дичен: Ю́ница Нескве́рная, Юнца́ Боже́ственного Ро́ждшая, / приими́ моли́тву рабо́в Твои́х; / да восхваля́ем Тя, я́ко Храни́тельницу земли́ на́шея / и Засту́пницу всего́ ро́да христиа́нскаго. Свети́лен, глас 4: Све́том па́че со́лнца на Небеси́ боже́cтвенно блиста́юще / просвети́лися есте́, вси святи́и земли́ Ко́льския, / и, Боже́ственным сия́нием трисия́нным ум сво́й просве́щше, / Еди́наго пропове́дасте Честны́я Тро́ицы Христа́ Го́спода, / честни́и ста́рцы богому́дрии, / и Тем зе́млю полно́щную озари́сте, / дея́ньми сла́вными
насади́сте ве́ру Правосла́вную; // сего́ ра́ди вас ублажа́ем. (Дважды.)
Сла́ва и ны́не, глас то́йже:
Днесь всеми́рная ра́дость ве́лия возсия́: / дарова́ся цельбоно́сная, Влады́чице, ико́на Твоя́ Ти́хвинская-Му́рманская. / Вси святи́и земли́ Ко́льския ру́ки к ней простира́ют, моля́щеся, / и с ни́ми стра́на полно́щная, ра́дуяся, торжеству́ет. / Те́мже мы духо́вно пра́зднуем и те́пле вопие́м Ти: / не лиши́ нас Твоея́ ми́лости, // но пребу́ди с на́ми вове́к, Всеблага́я.
На хвали́тех стихи́ры на 4, глас 8:
Равночи́слении Тро́ицы Несозда́нныя су́ще, / преподо́бнии отцы́ на́ши Феодори́те, Три́фоне и Варлаа́ме, / с ли́ки А́нгелов и ины́ми чи́ны уго́дников земли́ Ко́льския, / ра́дующеся, предстои́те Престо́лу Божества́, му́дрии. / Сего́ ра́ди исто́чник исцеле́ний ве́рным подае́те / и Боже́ственное просвеще́ние пребыва́лищу на́шему. / О, уго́дницы Христо́вы достосла́внии, // о нас при́сно моли́теся ко Го́споду.
Избра́ннии от Бо́га святи́и сро́дницы на́ши, / в ми́ре пожи́вшии, оба́че не от ми́ра су́щии, / вы есте́ соль земли́ на́шея, / ва́ми бо гра́ди и ве́си на́ша освяща́ются, / пути́ стро́потныя исправля́ются, / заблу́ждшии к покая́нию обраща́ются, / и вси́ прославля́ют ди́внаго во святы́х Свои́х Иису́са Всеси́льна, // Спа́са ду́ш на́ших.
Отцы́ Собо́ра Ко́льскаго, / воспе́вшии в земли́ се́верней Соде́теля Отца́ Бо́га, / житие́м свои́м превозне́сшии Всесвята́го Ду́ха, жизнь Подава́ющаго, / Христа́ Влады́ки благове́стие язы́ку ло́пскому пропове́давшии / и во И́мя Святы́я Тро́ицы крести́вшии, / моли́теся за ны, отцы́ достохва́льнии, // по́йте Триеди́наго Бо́га и превозноси́те Его́ во ве́ки.
Сла́ва, глас то́йже:
Ублажа́ем вас, преподобнии отцы́ земли́ на́шея Ко́льския, / вы бо, поучи́вшеся день и нощь в зако́не Госпо́дни, / сподо́бистеся дре́ва живо́тнаго снасажде́ни бы́ти, / и плод трудо́в и страда́ний ва́ших венцы́ процвете́. / Ны́не в сия́нии сла́вы Христо́вой живе́те, веселя́щеся, / сего́ ра́ди достохва́льную па́мять ва́шу соверша́ем, // в моли́твах по́мощь ва́шу призыва́юще.
И ны́не, Богоро́дичен, глас то́йже:
Влады́чице, приими́ моли́твы раб Твои́х // и изба́ви нас от вся́кия ну́жды и печа́ли.
Славосло́вие вели́кое, ектении́ и отпу́ст.
НА ЛИТУРГИ́И:
Проки́мен, глас 7:
Восхва́лятся преподо́бнии во сла́ве / и возра́дуются на ло́жах свои́х. Стих: Свяще́нницы Твои́ облеку́тся в пра́вду, / и преподо́бнии Твои́ возра́дуются. Апо́стол к Гала́том, зача́ло 213. Аллилу́ия, глас 4: Воззва́ша пра́веднии, и Госпо́дь услы́ша их, / и от всех скорбе́й их изба́ви их. Стих: Мно́ги ско́рби пра́ведным, / и от всех их изба́вит я Госпо́дь. Ева́нгелие от Луки́, зача́ло 24. Прича́стен: Ра́дуйтеся пра́веднии о Го́споде, пра́вым подоба́ет похвала́.