Ака́фист преподо́бному Три́фону, Пече́нжскому чудотво́рцу. Па́мять 15 /28 декабря́.
Конда́к 1
Избра́вшу тя Пастыренача́льнику Христу́ во апо́стола страны́ се́верныя, / а́бие отри́нул еси, досточу́дне Три́фоне, / ми́ра сего кра́сная, / претерпе́л же вся́ко озлобле́ние, / благовести́л еси́ седя́щим во тме и се́ни сме́ртней Бо́га я́вльшагося пло́тию: / те́мже со апо́столы сра́дуется дух твой в небе́сных оби́телех. / Име́я у́бо дерзнове́ние ко Христу́ Бо́гу на́шему, / от вся́ких бед изба́ви нас зову́щих: / Ра́дуйся, Три́фоне, // страны́ се́верныя просвети́телю, Пече́нжский чудотво́рче.
И́кос 1
А́нгелы Своя́ страна́м и язы́ком предста́тели дарова́вый Бог, / егда́ прии́де време́н исполне́ние, / моле́ния ра́ди а́нгела земли́ Ко́льския, я́же близ океа́на хла́дна, / и наро́да ло́пска предста́теля, / призва́ тя́ во благове́стие, всехва́льный Три́фоне, / я́ко да спасе́ни бу́дут лю́дие ти́и. // Помина́юще у́бо сия́, вопие́м ти́: Ра́дуйся, свяще́ннаго ко́рене благо́е прозябе́ние; Ра́дуйся, оби́тели Пече́нжския свято́е прославле́ние.
Ра́дуйся, от те́мных страсте́й невозвра́тно удали́выйся; Ра́дуйся, про́мыслом Бо́жиим к реце́ Пе́ченге пресели́выйся. Ра́дуйся, оби́тели Тро́ицы Свято́й зижди́телю неусыпа́емый; Ра́дуйся, Сло́ва Бо́жия исто́чниче неиссяка́емый. Ра́дуйся, сла́дость жите́йскую нивочто́же вмени́вый; Ра́дуйся, и́дольский мрак в после́дних земли́ упраздни́вый. Ра́дуйся, Три́фоне, // страны́ се́верныя просвети́телю, Пече́нжский чудотво́рче.
Конда́к 2
Кре́ст Христо́в взе́м, на покая́ние изше́л еси от ю́ности твоея́, / я́ко разбо́йник, испове́даяся и слезя́: / помяни́ мя, Го́споди, во Ца́рствии Твое́м. / Бо́гу послужи́л еси́, послуша́ние мона́шеское соблю́л еси́, / чистоту́, смире́ние, нестяжа́ние и терпе́ние тя́жкими труды́ свои́ми обре́л еси́. / Те́мже и мы, почита́я тя, мо́лим: / преподо́бне о́тче Три́фоне, помози́ нам в сих доброде́телех преуспе́ти / и Христу воспевати: // Аллилу́иа.
И́кос 2
Не хотя́ Госпо́дь искорени́ти тще́тнаго и су́етнаго, / наказу́я наказа́ тя Госпо́дь, сме́рти же не предаде́ тя. / А́нгелов подо́бника и бесо́в противобо́рца прови́дя тя всея́ тва́ри Зижди́тель, / на покая́ние огласи́ тя, я́ко втора́го Па́вла, / и человеколю́бно к Себе́ призва́. / Правосла́вным смы́слом ю́ношская возжеле́ния возненави́дев, о́тче наш Три́фоне, / клевре́ты и во́и своя́ оста́вил еси́. / Мы же, ви́дяще чу́дное Бо́жие смотре́ние о призва́нии твое́м, // вопие́м ти си́це: Ра́дуйся, гра́да Торжка́ свяще́нное и благо́е прозябе́ние; Ра́дуйся, от ю́ности плотски́х стра́стей жесто́кое умерщвле́ние.
Ра́дуйся, тесне́йшую бо воздержа́ния стезею́ ше́ствовавый; Ра́дуйся, чад лопа́рских любому́дренно воспита́вый. Ра́дуйся, пусты́нным житие́м в до́брем изволе́нии утверди́выйся; Ра́дуйся, отсека́ти свою́ во́лю грехо́вную научи́выйся. Ра́дуйся, вся кра́сная ми́ра сего́ нивочто́же вмени́вый; Ра́дуйся, житие́м жесто́ким плоть свою́ кре́пко смири́вый. Ра́дуйся, Три́фоне, // страны́ се́верныя просвети́телю, Пече́нжский чудотво́рче.
Конда́к 3
Бу́ри океа́на хла́дна не убоя́вся, / любо́вию Христо́вою согрева́емь, / в пусты́ню ди́вию всели́лся еси́. / Посто́м, покло́ны, стоя́нием на моли́тве, / бде́нием неуста́нным плоть свою́ умертви́л еси́, / в по́двизех дневны́х и нощны́х тече́ние соверши́л еси́ / и
наро́д лопа́рский в ве́ре наста́вил еси́, / хла́д и мра́к ду́ш их разгоня́я, / во е́же чи́стым се́рдцем и усты́ воспева́ти Бо́гу: // Аллилу́иа.
И́кос 3
Я́ко и́стинный во́ин Христа́ Бо́га, / на стра́сти и ко́зни бесо́вския вельми́ подвиза́лся еси́, / поще́ньми стро́гими и сле́зными из глубины́ воздыха́ньми. / Ны́не Све́ту Вели́кому, я́ко вене́чник святы́й, предстои́ши, / помина́й изря́дное твое́ достоя́ние, / е́же мно́гими труды́, о́тче, стяжа́л еси́. / Да и мы, помина́юще у́бо сия́, // восклица́ем ти: Ра́дуйся, я́ко благода́ть Бо́жия излия́ся на тя́ бога́тно; Ра́дуйся, истреби́вый мглу́ страсте́й невозвра́тно.
Ра́дуйся, возгоре́выйся и́стовым раче́нием к го́рнему; Ра́дуйся, я́ко ве́твь твоя́ изы́де от Лозы́ Иесее́ва ко́реня. Ра́дуйся, же́стость пусты́ни лопа́рския зело́ возлюби́вый; Ра́дуйся, во язы́це ва́рваров тщету́ и́долов обличи́вый. Ра́дуйся, Феодори́та Ко́льскаго усе́рдный сорабо́тниче; Ра́дуйся, Стефа́на и Евфи́мия досто́йный прие́мниче. Ра́дуйся, Три́фоне, // страны́ се́верныя просвети́телю, Пече́нжский чудотво́рче.
Конда́к 4
В ме́сто от ме́ста преходя́, / бе́гая мирски́я сла́вы от челове́к, / небе́сныя сла́вы рачи́тель бы́в, о́тче преподо́бне Три́фоне, / в пусты́ни безчи́сленно прия́л еси́ от бесо́в вся́кая пусты́нная страхова́ния / в препя́тие спасе́нию твоему́. / Оба́че ле́стных мечта́ний и тя́жких страсте́й мрак разгна́в, / све́том доброде́телей возсия́л еси́, / во е́же чи́стым се́рдцем и усты́ воспева́ти: // Аллилу́иа.
И́кос 4
Слы́шаще и́долов посрамле́ние от тебе́, / злочести́вии люди́й си́х учи́телие, но́йды нарица́еми, / зло́бу ве́лию воздвиго́ша на тя́, преподо́бне, / по лани́тома бию́ще, по ка́менем влача́ще и и́ны па́кости де́юще. / Мы́ же, зря́ще тя́, со смире́нием такова́я прие́млюща, / уми́льно вопие́м ти: Ра́дуйся, в са́мый кра́й земли́ се́верныя стопы́ своя́ устреми́вый;
Ра́дуйся, ко́зни лука́ваго си́лою Бо́жиею победи́вый. Ра́дуйся, я́ко сло́во твое́ я́звит сердца́, пре́лестию окамене́нная; Ра́дуйся, я́ко Па́вел от иуде́й, зауше́ния прие́мый уничиже́нная. Ра́дуйся, я́ко мре́жами твои́ми мно́жество ги́бнущих ду́ш уловля́ется; Ра́дуйся, я́ко лица́ твоего́ све́тлостию сло́во Бо́жие утвержда́ется. Ра́дуйся, а́нгела предста́теля страны́ се́верныя себе́ яви́вый; Ра́дуйся, пусты́нниче, мирску́ю сла́ву нивочто́же вмени́вый. Ра́дуйся, Три́фоне, // страны́ се́верныя просвети́телю, Пече́нжский чудотво́рче.
Конда́к 5
Боготе́чней звезде́ уподо́бився, / всю́ страну́ се́верную обте́кл еси́, досточу́дне Три́фоне. / Я́ко бо денни́ца, со́лнцу преходя́щая, / от язы́ка ло́пска приве́л еси́ ко Христу́ ча́д мно́жество, / и́же со умиле́нием се́рдца прии́мше креще́ние, / возопи́ша о тебе́ Бо́гу: // Аллилу́иа.
И́кос 5
Виде́ние бе ди́вное, / егда́ от мра́чна неве́дения язы́цы ва́рварстии, / тобо́ю приведе́ннии, Христо́ви сочета́шася: / земля́ бо Полно́щная и не́беса Ра́йская ликова́ша, / во струя́х Пече́нги и Па́зреки, а́ки Иорда́на и Днепра́, / зря́ща мно́жество креща́емых и Христа́ сла́вящих. // Сего́ ра́ди вопие́м ти́: Ра́дуйся, гла́се вопию́щаго, к наро́ду ло́пскому зва́нный; Ра́дуйся, Крести́теля Христо́ва собесе́дниче избра́нный.
Ра́дуйся, я́ко тма́ зло́бы полно́щной от тебе́ разори́ся; Ра́дуйся, я́ко трапе́за бесо́вская нивочто́же вмени́ся. Ра́дуйся, мно́га ча́да водо́ю и Ду́хом роди́вый; Ра́дуйся, во Христо́ве позна́нии до ве́ка их утверди́вый. Ра́дуйся, хра́мы святы́я в земли́ Пече́нжстей сотвори́вый; Ра́дуйся, равноапо́стольное служе́ние в земли́ Ко́льстей нам яви́вый.
Ра́дуйся, Три́фоне, // страны́ се́верныя просвети́телю, Пече́нжский чудотво́рче.
Конда́к 6
Доброде́телей труды́ и по́ты, Три́фоне, / поко́й со все́ми святы́ми прия́л еси́, / и́хже возвесели́л еси́ свои́м житие́м, / прии́м о́браз а́нгельский, ве́лию оби́тель Святы́я Тро́ицы на Пече́нзе созда́л еси́ / и мона́хов мно́жество собра́л еси́, / поя́ Христо́ви: // Аллилу́иа.
И́кос 6
Отоше́л еси́, о́тче святы́й, во стра́ны Вели́каго Но́ва гра́да / и та́мо пребы́л еси́ нищ и проси́тель, / от гра́да во град, от ве́си в ве́сь стра́нствуя / и испроша́я ми́лостыни, я́же на пропита́ние бра́тий посыла́л еси́, / я́ко ко́кош, собира́я семена́ для птенце́в свои́х и пита́я вся́ це́лыя о́смь ле́т. / Та́ко возсия́ во мра́це полно́щнем оби́тель от тебе́ созда́нная. // Те́мже ра́дующеся вопие́м ти́: Ра́дуйся, куку́лем, я́ко венце́м незло́бия, главу́ увязи́вый; Ра́дуйся, вери́гами тя́жкими чре́сла своя́ препоя́савый.
Ра́дуйся, я́ко Моисе́ову терпе́нию в пусты́ни подража́л еси́; Ра́дуйся, я́ко оскуде́ние монасты́рское подая́нием исполня́л еси́. Ра́дуйся, ка́меню, на не́мже оби́тель Пече́нжская созда́ся; Ра́дуйся, я́ко от тебе́ кня́зь ми́ра возстена́ и во́инство его́ попра́ся. Ра́дуйся, я́ко в жили́щих тмы Све́т Невече́рний славосло́вится; Ра́дуйся, я́ко песнь вели́кая в вы́шних трегу́бо песносло́вится. Ра́дуйся, Три́фоне, // страны́ се́верныя просвети́телю, Пече́нжский чудотво́рче.
Конда́к 7
Глаго́лом си́ла Боже́ственная после́дующая познава́шеся / от ца́ря Иоа́нна чу́вственне, / он же возлюби́л е́сть нада́льну оби́тель земли́ Пече́нжския, / наипа́че же тебе́, преподо́бне, / и, воздарова́в гра́мотою несуди́мою, / и бога́тно колокола́ми, и церко́вною у́тварию, / отпусти́л есть вели́кий Ца́рь с ми́лостивым призре́нием. /
Ты же, дивя́ся таково́му попече́нию Бо́жию об оби́тели твое́й, / воспева́л еси́ Богу: // Аллилу́иа.
И́кос 7
Благочести́вому царю́ Фео́дору я́влься, о́тче преподо́бне, / от сме́ртельнаго зла́го умышле́ния сви́тцких не́мец / спа́сл еси́ сего́ руки́ прикоснове́нием, / о́ному же тя спаси́теля сея́ напа́сти получи́ша, / и́мя твое́ уве́дети хотя́, / ты же и сие́ возвести́л еси́. / Сего́ ра́ди чудоде́ющему Бо́гу / во святы́х Свои́х сла́ву воссыла́ем // и тя́, о́тче, ублажа́ем: Ра́дуйся, я́ко Вели́кий ца́рь прише́ствию твоему́ зело́ удиви́ся; Ра́дуйся, я́ко явле́нием Бо́жиего смотре́ния то́й возвесели́ся.
Ра́дуйся, си́льным ми́ра сего́ чудоде́йственне явле́нный; Ра́дуйся, смире́ния ра́ди от сих зело́ вознесе́нный. Ра́дуйся, Гро́зным царе́м досто́йне почте́нный; Ра́дуйся, сы́ном царе́вым любе́зно одаре́нный. Ра́дуйся, я́ко госуда́ревой ми́лостынею оби́тель твоя́ снабде́ся; Ра́дуйся, я́ко благоче́стием царе́й держа́ва Росси́йская превознесе́ся. Ра́дуйся, Три́фоне, // страны́ се́верныя просвети́телю, Пече́нжский чудотво́рче.
Конда́к 8
Во гра́де Ко́ле купи́, о́тче наш Три́фоне, / же́рновы ручны́я нема́лыя и тя́жкия / и на ра́мех свои́х во оби́тель нести́ изво́лил еси́. / Ученицы́ же моли́ша тя, да не труди́шися изли́ше. / Ты же рече́ им: / у́не на вы́и свое́й обе́сивый осе́льский ка́мень носи́ти, / не́жели бра́тию пра́зднством соблажня́ти. / И путе́м бла́тным и гори́стым со бре́менем тя́жким идя́ше, / в посте́ вели́цем пребыва́я, ни ма́ло яды́й, воспева́я Бо́гови, / подаю́щему ти́ си́лы таковы́я: // Аллилу́иа.
И́кос 8
Еди́ножды прише́д в ке́ллию твою́, о́тче святы́й, / медве́дь ди́вий и зело́ вели́к, / и нача́т угото́ванное те́сто просфо́рное я́сти. / Ты́ же И́менем Иису́са Христа́ повеле́л еси́ зве́рю: ста́нь се́мо кро́ток. / И ста́ зве́рь пред нога́ма твои́ма недви́жим. / Взе́м ве́лие дре́во, бия́ше зве́ря, / и, наказа́в, завеща́ близ оби́тели впре́дь не
па́костити, / и отосла́ того́ в пусты́ню. / Мы́ же дивя́щеся си́ле Бо́жией, / де́йствующей в тебе́ благомо́щно, // вопие́м ти: Ра́дуйся, благода́ти испо́лненный, отону́дуже повину́ся тебе́ зве́рь ди́вий; Ра́дуйся, храни́телем непреста́ннаго воздержа́ния бы́вый.
Ра́дуйся, я́ко зве́рие лю́тии тя́ царя́ себе́ смире́нно позна́ша; Ра́дуйся, я́ко Пече́нжская бра́тия тя иску́сна предводи́теля прия́ша. Ра́дуйся, бо́дрствованию духо́вному мно́ги и́ноки научи́вый; Ра́дуйся, уста́вы оте́ческия во оби́тели кре́пко водвори́вый. Ра́дуйся, богомы́слия и молча́ния изря́дный храни́телю; Ра́дуйся, ко стяжа́нию благ небе́сных му́дрый руководи́телю. Ра́дуйся, Три́фоне, // страны́ се́верныя просвети́телю, Пече́нжский чудотво́рче.
Конда́к 9
Пе́ние всеумиле́нное прино́сим ти́, досточу́дне Три́фоне! / Зижди́теля оби́тели на мирсте́м конце́ полу́нощи / и кре́пкаго наста́вника мона́хов тя почита́ем, / твое́ю бо стезе́ю вои́стину мно́зи пра́во ходи́ти позна́ша. / Блаже́н еси́, уго́дниче Христо́в и а́нгелов собесе́дниче, / преподо́бных соприча́стниче и пра́ведным единонра́вный, / с ни́миже моли́ся Го́сподеви, / поя́ пе́снь немо́лчную: // Аллилу́иа.
И́кос 9
Вои́стину сна́ твои́ма очи́ма не дал еси, / богоблаже́нне о́тче наш Три́фоне, / ниже́ пло́ти твоея́ упокое́ния, / Бо́жиею си́лою укрепля́емь, / связу́я мно́гая враго́в ополче́ния, / над страстьми́ воцари́лся еси́. / Те́мже попече́ние о па́стве твое́й прия́л еси́ / и оби́тель чу́дную во и́мя Святы́я Тро́ицы созда́л еси́, / Ю́же моли́, преподо́бне, дарова́ти ве́лию ми́лость // уми́льно ти́ вопию́щим: Ра́дуйся, о́бразе пустынножи́телей и о́бщаго жития́ устрои́телю; Ра́дуйся, и́ноческих уста́вов и обе́тов стро́гий блюсти́телю.
Ра́дуйся, лени́вых подви́гнувый твои́м нра́вам после́довати; Ра́дуйся, ревни́вых призва́вый Благода́ть Госпо́дню изве́дати.
Ра́дуйся, я́ко ученики́ твои́, Ио́на и Ге́рман, вы́ну почита́ются; Ра́дуйся, я́ко игу́мен Гу́рий с бра́тией даро́в Ду́ха сподобля́ются. Ра́дуйся, Святы́я Тро́ицы оби́тели усе́рдный зижди́телю; Ра́дуйся, преблаги́й и му́дрый бра́тства Пече́нжскаго учи́телю. Ра́дуйся, Три́фоне, // страны́ се́верныя просвети́телю, Пече́нжский чудотво́рче.
Конда́к 10
Оби́тель во и́мя Живонача́льныя Тро́ицы устро́ил еси́, / богому́дре о́тче наш Три́фоне, / а́ще бо и по́слежде ле́ты тя новопросвеще́нная страна́ Ко́льская возрасти́, / но дре́вних че́сти сподо́бился еси́, / дарова́ния чуде́с досто́йно прие́м. / Во оби́тели твое́й мона́хов мно́жества песносло́вят и правове́рную ве́ру хва́лят, / покаря́ющеся уче́нием Христо́вым, / Его́же моли́ спасти́ся душа́м на́шим / и со святы́ми пе́ти: // Аллилу́иа.
И́кос 10
Я́ко в небе́сных черто́зех / доброде́тели дом предугото́вал еси́ себе́, Три́фоне, / и весе́лие, и ра́дость, и сла́ву ве́чную восприя́л еси́, прему́дре, / и ны́не вои́стину я́сно зри́ши Святу́ю Тро́ицу / и то́ки чуде́с источа́еши. / Сему́ Бо́жию о тебе́ благоволе́нию дивя́щеся, // воспева́ем ти си́це: Ра́дуйся, Пресвяты́я Тро́ицы изря́дный почита́телю; Ра́дуйся, оби́тели твоея́ при́сный пред Бо́гом предста́телю.
Ра́дуйся, в отхо́дную пу́стынь Успе́нскую с моли́твою всели́выйся; Ра́дуйся, богомы́слием и молча́нием на врага́ вооружи́выйся. Ра́дуйся, вели́ким отца́м Солове́цким в ре́вности ра́вный; Ра́дуйся, от потопле́ния морска́го спаса́телю сла́вный. Ра́дуйся, благопотре́бне в Полно́щной земли́ возсия́вый; Ра́дуйся, Ду́хом Святы́м чуде́с благода́ть источа́вый. Ра́дуйся, Три́фоне, // страны́ се́верныя просвети́телю, Пече́нжский чудотво́рче.
Конда́к 11
По мно́гих свои́х пусты́нных труде́х, о́тче преподо́бне, / в
ста́рости масти́те впаде́ в боле́знь и изнемо́же зело́. / Преше́дшей же бра́тии со игу́меном Гу́рием рече́: / не скорбите́, бра́тия моя́, и в до́брый пу́ть тече́ния моего́ не пресеца́йте, / и не люби́те ми́ра, ни я́же в ми́ре, / все́ упова́ние свое́ возложи́те на Бо́га. / Мы же, внима́я прему́дрым словесе́м твои́м, / вопие́м Бо́гу: // Аллилу́иа.
И́кос 11
Егда́ же прия́л еси́ коне́чне, о́тче наш Три́фоне, / Пречи́стое Те́ло и Святу́ю Кро́вь Христо́вы, / зело́ изнемо́же, и прослези́ся, рече́: / на оби́тель сию́ святу́ю бу́дет тя́жкое искуше́ние, / и от острия́ меча́ уму́чатся мно́зи; / но не ослабева́йте, бра́тия моя́, упова́нием
на Бо́га: / не оста́вит бо жезла́ гре́шных на жре́бии Свое́м и па́ки
обнови́т оби́тель. / И просвети́ся лице́ твое́, / и предаде́ святу́ю ду́шу свою́, Святе́й Тро́ице те́плый служи́телю и Пречи́стей Богома́тери благода́рен. / Мы́ же, взира́я на блаже́нную кончи́ну твою́, // вопие́м ти́ си́це: Ра́дуйся, в ста́рости масти́те ко Христу́ пресели́выйся; Ра́дуйся, до конца́ жития́ во оби́тели потруди́выйся.
Ра́дуйся, я́ко тобо́ю ча́да лопа́рская вла́сти идо́льския изба́вилися; Ра́дуйся, я́ко бра́тия твоя́ Христу́ чи́стыми предуста́вилися. Ра́дуйся, беду́ гряду́щую и день лют в Бо́зе я́сно созерца́яй; Ра́дуйся, оби́тели твое́я разоре́ние в Ду́се предприя́вый. Ра́дуйся, и по отше́ствии свое́м оби́тель, я́ко роди́тельник, соблюда́яй; Ра́дуйся, в невече́рнем дни́ Ца́рствия Бо́жия при́сно почива́яй. Ра́дуйся, Три́фоне, // страны́ се́верныя просвети́телю, Пече́нжский чудотво́рче.
Конда́к 12
Возсия́ дне́сь пресве́тлая и всепра́зднственная па́мять твоя́, пресла́вне Три́фоне, / созыва́ющи многочи́сленное по́стников сосло́вие, и преподо́бных ликостоя́ния, / и мона́хов ве́лие бра́тство, /
ко́их стра́сти душетле́нныя успи́л еси́, блаже́нне, / бо́дренными бде́нии, моли́твами непреста́нными и кре́пцим поще́нием, / и сих ра́ди в черто́г Небе́сный ча́да своя́ всели́л еси́, богому́дре Три́фоне, / с ни́ми вку́пе поя́ Бо́гу: // Аллилу́иа.
И́кос 12
Па́мять твою́ творя́щим свяще́нную, о́тче Три́фоне, / не преста́й со все́ми святы́ми земли́ Ко́льския / моли́ти Христа́ Изба́вителя дарова́ти согреше́нием оставле́ния / и Небе́сное Ца́рство восприя́ти, / иде́же глас пра́зднующих весели́т вся, / и восхваля́ющих тя, версто́ предо́брая, / от всех лю́тых спаса́й, // си́це взыва́ющих ти: Ра́дуйся, Пресвяты́я Тро́ицы ве́рный служи́телю; Ра́дуйся, на небесе́х о на́с те́плый предста́телю.
Ра́дуйся, моле́ниями твои́ми де́монов тму́ разогна́вый; Ра́дуйся, стра́сти душетле́нныя всеконе́чно попра́вый. Ра́дуйся, во́ине добропобе́дный, Христо́во прославле́ние; Ра́дуйся, оби́тели Пече́нжския сла́во и удобре́ние. Ра́дуйся, мона́шескаго жития́ в после́дних земли́ первонача́льниче; Ра́дуйся, Це́ркви на́шея похвало́ и те́плый пред Бо́гом печа́льниче. Ра́дуйся, Три́фоне, // страны́ се́верныя просвети́телю, Пече́нжский чудотво́рче.
Конда́к 13
О, преподо́бне и досточу́дне о́тче на́ш Три́фоне! / Живонача́льней предстоя́ Тро́ице / в непристу́пнем све́те и ра́дости неизглаго́ланней, / приими́ сие́ от умиле́ннаго ти́ се́рдца возноси́мое хвале́ние / и не преста́й моля́ся о на́с, / да пожи́вше благоче́стне, по успе́нии на́шем сре́тени от тебе́ обря́щемся на небесе́х / и воспое́м Бо́гови со а́нгельскими ли́ки: // Аллилу́иа. (Э́тот конда́к чита́ется три́жды, зате́м и́кос 1-й и конда́к 1-й)
И́кос 1
А́нгелы Своя́ страна́м и язы́ком предста́тели дарова́вый Бог, / егда́ прии́де време́н исполне́ние, / моле́ния ра́ди а́нгела земли́ Ко́льския, я́же близ океа́на хла́дна, / и наро́да ло́пска предста́теля, / призва́ тя́ во благове́стие, всехва́льный Три́фоне, / я́ко да спасе́ни бу́дут лю́дие ти́и. // Помина́юще у́бо сия́, вопие́м ти́: Ра́дуйся, свяще́ннаго ко́рене благо́е прозябе́ние; Ра́дуйся, оби́тели Пече́нжския свято́е прославле́ние.
Ра́дуйся, от те́мных страсте́й невозвра́тно удали́выйся; Ра́дуйся, про́мыслом Бо́жиим к реце́ Пе́ченге пресели́выйся. Ра́дуйся, оби́тели Тро́ицы Свято́й зижди́телю неусыпа́емый; Ра́дуйся, Сло́ва Бо́жия исто́чниче неиссяка́емый. Ра́дуйся, сла́дость жите́йскую нивочто́же вмени́вый; Ра́дуйся, и́дольский мрак в после́дних земли́ упраздни́вый. Ра́дуйся, Три́фоне, // страны́ се́верныя просвети́телю, Пече́нжский чудотво́рче.
Конда́к 1
Избра́вшу тя Пастыренача́льнику Христу́ во апо́стола страны́ се́верныя, / а́бие отри́нул еси, досточу́дне Три́фоне, / ми́ра сего кра́сная, / претерпе́л же вся́ко озлобле́ние, / благовести́л еси́ седя́щим во тме и се́ни сме́ртней Бо́га я́вльшагося пло́тию: / те́мже со апо́столы сра́дуется дух твой в небе́сных оби́телех. / Име́я у́бо дерзнове́ние ко Христу́ Бо́гу на́шему, / от вся́ких бед изба́ви нас зову́щих: / Ра́дуйся, Три́фоне, // страны́ се́верныя просвети́телю, Пече́нжский чудотво́рче.
Молитва преподобному Трифону, Печенжскому чудотворцу О, Всесвяты́я Тро́ицы сла́вный уго́дниче, о, блаже́ннейший и равноапо́стольный па́стырю, преподо́бне о́тче наш Три́фоне! Не забу́ди па́ствы твоея́ и помина́й во святы́х твои́х и богоприя́тных моли́твах ста́до твое́, е́же са́м прише́ствием твои́м собра́л и упа́сл еси́. Ве́мы бо, уго́дниче Бо́жий, ка́ко правосла́вным смы́слом ю́ношская возжеле́ния возненави́дев, клевре́ты и во́и своя́ оста́вил еси́. А́нгелов подо́бника и бесо́в противобо́рца прови́де тя всея́ тва́ри Зижди́тель, на покая́ние огласи́ тя, я́ко втораго Павла, и человеколю́бно к Себе́ призва́, приве́д тя вскра́й Се́верныя страны́, где просвети́л еси́ ты святы́м креще́нием неве́дущий Творца́ лопа́рский ро́д, за е́же во утвержде́ние христиа́нския ве́ры мно́га изгна́ния и злоключе́ния подъя́л еси́. И, близ реки́ Пече́нги в пусты́ню всели́вся, бра́тию из мно́гих гра́дов и ве́сей собра́в, ве́лию оби́тель Святы́я Тро́ицы воздви́гл еси́, и при отше́ствии к небе́сным селе́нием о посеще́нии твоея́ оби́тели проро́чествия да́р от Бо́га восприя́л еси́. По сконча́нии твое́м мно́га чудеса́ и цельбы́ с ве́рою прося́щим тя на мо́ри и на су́ши сотвори́л еси́ и до дне́ сего́ твори́ши. Те́мже мо́лим тя, достохва́льне о́тче, не забу́ди присеща́ти чад твои́х, приходя́щия к тебе́ с ве́рою. Я́ко име́яй дерзнове́ние к Безсме́ртному Царю́ Христу́ всех Бо́гу, не премолчи́ за ны и не пре́зри нас, ве́рою и любо́вию чту́щих тя и с любо́вию помина́ющих святу́ю па́мять твою́. А́ще бо ты те́лом и преста́вился еси́ от нас, и мо́щи твоя́ незри́мы нам суть, но и по сме́рти, живы́й ду́хом, вы́ну чудоде́йствуеши. Моли́твами твои́ми сохраня́й нас от стра́ха нощна́го и стрелы́ летя́щия во дни́, от пре́лести бесо́вския и от вся́ких враг ви́димых и неви́димых. О, па́стырю наш до́брый! Поне́же вы́ну в Тро́ице сла́вимому Бо́гу при Престо́ле Его́ непостижи́маго вели́чествия неотсту́пно в моли́твах предстои́ши, того́ ра́ди усе́рдно к тебе́ прибега́ем и мо́лимтися: испроси́ нам вре́мя к покая́нию, да в час исхо́да души́ пре́йдем от земны́х к небе́сным, мыта́рств же возду́шных и ве́чныя
му́ки изба́вимся и Ве́чному Ца́рствию Христо́ву со все́ми от ве́ка Бо́гу угоди́вшими насле́дницы бу́дем. О, преблаже́нне и преподо́бне о́тче наш Три́фоне! Не пре́зри и ны́не нас, притека́ющих к тебе́, я́ко да моли́твами твои́ми и по́мощию спаса́еми, сла́ву и благодаре́ние, хвалу́ и поклоне́ние за вся в Тро́ице Еди́ному Бо́гу, всех Созда́телю возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в. Ами́нь.