МЕ́СЯЦА ДЕКАБРЯ́ В 15-Й ДЕНЬ (28 ДЕКАБРЯ ПО Н. СТ.)
Преподо́бнаго и Богоно́снаго отца́ на́шего Три́фона Пече́нжского, просвети́теля лопаре́й
НА МА́ЛОЙ ВЕЧЕ́РНИ
На Го́споди, воззва́х: стихи́ры на 4. Глас 5:
Преподо́бне о́тче Три́фоне, / прише́д в край Лапла́ндския земли́, / ду́шу свою́ очи́стив и те́ло стягну́в воздержа́нием, / ова́ко Свята́го Ду́ха оби́тель яви́л еси́, / и́же соде́я тя вели́каго свети́льника, / просвети́вшаго во мра́це су́щия язы́цы полно́щныя, / и наста́вника мона́хов мно́жества, / сего́ ра́ди ны́не соше́дшеся, // велему́дренно тя ублажа́ем. (Два́жды).
Зижди́теля оби́тели на мирсте́м конце́ полу́нощи / и кре́пкаго наста́вника мона́хов тя почита́ем, о́тче наш Три́фоне, / твое́ю бо стезе́ю вои́стину мно́зи пра́во ходи́ти позна́ша. / Блаже́н еси́, Христу́ уго́дниче и а́нгелов собесе́дниче, / преподо́бных соприча́стниче и пра́ведных единонра́вный, / с ни́миже моли́ся Го́сподеви // поми́ловатися душа́м на́шим.
Яви́лся еси́, богоблаже́нне, преподо́бне о́тче наш Три́фоне, / вои́стину сна твои́ма очи́ма не дал еси́, / ниже́ пло́ти твоея́ упокое́ния. / Бо́жиею си́лою укрепля́емь, / связу́я мно́гая враго́в ополче́ния, / над страстьми́ воцари́лся еси́; / те́мже попече́ние о па́стве твое́й прия́л еси́ / и оби́тель чу́дную во и́мя Святы́я Тро́ицы созда́л еси́, / Ю́же моли́, преподо́бне, // дарова́ти мир ми́ру и душа́м на́шим ве́лию ми́лость.
Сла́ва, глас 6:
Прииди́те, мона́шествующих мно́жество, днесь, / Три́фона, благоче́стия и братолю́бия подража́теля, / пе́сньми и пе́ньми восхва́лим, глаго́люще: / ра́дуйся, пресла́вне Три́фоне, земли́ полно́щныя пресве́тлый свети́льниче; / ра́дуйся, я́ко Тро́ице предстои́ши со а́нгелы, / Ю́же непреста́нно моли́ спасти́ всех отчелю́бцев, // преизли́ха тя́ почита́ющих.
И ны́не, Богоро́дичен, глас 6:
Богоро́дице, Ты еси́ лоза́ и́стинная, / возрасти́вшая нам Плод живота́, / Тебе́ мо́лимся: моли́ся, Влады́чице, со святы́ми апо́столы // поми́ловати ду́ши на́ша.
Проки́мен дне.
На стихо́вне стихи́ры, глас 6.
И́же дре́вле олядене́вшая неве́рных люде́й сердца́ / словесы́ твои́ми, блаже́нне Три́фоне, возде́лал еси́, / се́мя ве́ры в них насади́в, преподо́бне, / пусты́ню непло́дную я́ко град соде́лав, / в ней мно́жества мона́хов собра́л еси́ / сла́вити Многопе́тую Тро́ицу, // Ю́же моли́ спасти́ся душа́м на́шим.
Стих: Честна́ пред Го́сподем / смерть преподо́бных Его́.
Богому́дре о́тче наш Три́фоне, / оби́тель во и́мя Живонача́льныя Тро́ицы осуществова́л еси́, / а́ще бо и по́слежде тя новопросвеще́нная страна́ Ко́льская возрасти́, / та́мо мона́хов мно́жества песносло́вят и правове́рную ве́ру хва́лят, / покаря́ющеся уче́нием Христо́вым, // Его́же моли́ спасти́ся душа́м на́шим.
Стих: Блаже́н муж боя́йся Го́спода, / в за́поведех Его́ восхо́щет зело́.
Егда́ же прии́де преподо́бный оте́ц наш Три́фон в зе́млю полно́щную, / тогда́ на Твою́ по́мощь, Богоро́дице, упова́ние свое́ возложи́. / Мы же, его́ любви́ к Тебе́ подража́юще, / немо́лчными Тя пе́нии ублажа́ем / и, покланя́ющеся, зове́м: / О, Пресвята́я, // прииди́ и сохрани́ достоя́ние Твое́ от вся́каго зла.
Я́ко в небе́сных черто́зех, / доброде́тели дом предугото́вал еси́ себе́, Три́фоне, / и весе́лие, и ра́дость, и сла́ву ве́чную восприя́л еси́, прему́дре, / и ны́не вои́стину я́сно зри́ши Святу́ю Тро́ицу, // Е́йже моли́ся, дарова́ти нам ве́лию ми́лость.
Сла́ва, глас 8:
Ми́ра красоту́ и сла́ву мирску́ю от люде́й отню́д возненави́дел еси́, / преподо́бне о́тче Три́фоне, / и на покая́ние изше́л еси́ в край Се́верныя земли́, / в сокруше́нии серде́чнем слеза́ми зе́млю омака́я. / Мона́шеского
жития́ па́че возлюби́в, / а́нгелом собесе́дник бы́ти сподо́бился еси́, / чудесы́, я́коже второ́е со́лнце, во грехо́внем мра́це глубоконо́щия возсия́. / Помина́й нас, о́тче всехва́льный, / соверша́ющих свяще́нную па́мять твою́ и си́це глаго́лющих: // моли́ Христа́ Бо́га спасти́ся душа́м на́шим.
И ны́не, Богоро́дичен:
Влады́чице, приими́ моли́твы раб Твои́х / и изба́ви нас // от вся́кия ну́жды и печа́ли.
Тропа́рь, глас 4:
От мяте́жа мирска́го в пусты́ню удали́лся еси́, / к немерца́ющему Све́ту притека́я, / и слез твои́х тече́ньми, о́тче Три́фоне, / пусты́ни се́верныя возде́лал еси́, / поще́ньми и из глубины́ воздыха́ньми / чуде́с благода́ть от Бо́га прие́м, / мона́хов Пече́нжских роди́телю и лопля́н апо́столе, / моли́ Христа́ Бо́га // спасти́ся душа́м на́шим.
Ектения́ ма́лая и отпу́ст.
НА ВЕЛИ́ЦЕЙ ВЕЧЕ́РНИ
Блаже́н муж: 1-й антифо́н.
На Го́споди, воззва́х: стихи́ры на 8, глас 5:
Преподо́бне о́тче Три́фоне, / теле́сныя стра́сти зе́льным покая́нием, / посто́м безща́дным, сле́зными моли́твами успи́л еси́, / по́том же воздержа́ния, желе́зными вери́гами окова́нием / угаси́л еси́ у́глие страсте́й. / Сего́ ра́ди чудеса́ твоя́ сла́вит страна́ Ко́льская, // честну́ю Твою́ па́мять све́тло пра́зднующи.
От бра́тии своея́ стро́потныя не отступи́л еси́, о́тче Три́фоне, / до́ндеже в благоу́мие и покая́ние всех не приведе́. / Внегда́ же наста́ час испыта́ния, / чи́сты их Христо́ви предста́ви, / си́це честну́ю кончи́ну от Го́спода прия́ша. / Те́мже победи́ша ве́рою страх, / кровь за Христа́ проли́ти сподо́бишася // и венце́м му́ченическим увязо́шася.
Зва́нию Го́спода твоего́ после́довал еси́, / мир отве́ргл еси́ и на стра́сти па́губныя по́стнически противоополчи́лся еси́: / му́жески все естество́ пону́див, / потща́лся еси́ ху́ждшее покори́ти лу́чшему / и плоть
порабо́тити ду́хови. / Проси́, о́тче святы́й, я́ко предстоя́ престо́лу Христа́, всех Царя́, / прегреше́ний на́ших очище́ние // и Ца́рствия Небе́снаго насле́дниками бы́ти.
Сла́ва, глас 6:
Му́жески бо естество́ пону́див, / от страсте́й тя́жких и вожделе́ний грехо́вных любосмире́нно изба́вился еси́ / и, плоть порабо́тив ду́ху, / пра́вило доброде́тели показа́лся еси́, / мно́гим мона́шествующим учи́тель и наста́вник яви́лся еси́./ Ны́не же, Престо́лу Бо́жию предстоя́, / моли́ся, преподо́бне о́тче наш Три́фоне, // о в мона́шестве подвиза́ющихся.
И ны́не, Богоро́дичен:
Кто Тебе́ не ублажи́т, Пресвята́я Де́во? / Кто ли не воспое́т Твоего́ Пречи́стаго Рождества́? / Безле́тно бо от Отца́ возсия́вый Сын Единоро́дный, / То́йже от Тебе́, Чи́стыя, про́йде, / неизрече́нно вопло́щься, / естество́м Бог Сый, / и естество́м быв Челове́к нас ра́ди, / не во двою́ лицу́ разделя́емый, / но во двою́ естеству́ / несли́тно познава́емый. / Того́ моли́, Чи́стая Всеблаже́нная, // поми́ловатися душа́м на́шим.
Вход. Проки́мен дне. Чте́ния три. При́тчей чте́ние: Па́мять пра́веднаго с похвала́ми, и благослове́ние Госпо́дне на главе́ его́. / Блаже́н челове́к, и́же обре́те прему́дрость, и сме́ртен, и́же уве́де ра́зум. / Лу́чше бо сию́ купова́ти, не́жели зла́та и сребра́ сокро́вища. / Честне́йшая же есть ка́мений многоце́нных, все же честно́е недосто́йно ея́ есть. / Долгота́ бо дней и ле́та живота́ в десни́це ея́, в шу́йце же ея́ бога́тство и сла́ва. / От уст ея́ исхо́дит пра́вда, зако́н же и ми́лость на язы́це но́сит. / Послу́шайте у́бо мене́, о ча́да, честна́я бо реку́, и блаже́н челове́к, и́же пути́ моя́ сохрани́т: исхо́ди бо мои́ – исхо́ди живота́, и уготовля́ется хоте́ние от Го́спода. / Сего́ ра́ди молю́ вас и предлага́ю мой глас сыново́м челове́ческим. / Я́ко аз, прему́дрость, устро́их сове́т, и ра́зум и смысл аз призва́х. / Мой сове́т и утвержде́ние, мой ра́зум, моя́ же кре́пость. / Аз мене́ лю́бящия люблю́, и́щущии же мене́
обря́щут благода́ть. / Разуме́йте у́бо, незло́бивии, кова́рство, ненака́зании же, прилага́йте сердца́. / Послу́шайте мене́ и па́ки, честна́я бо реку́, и отве́рзу от усте́н пра́вая, я́ко и́стине поучи́тся горта́нь мой, ме́рзки же пре́до мно́ю устны́ лжи́выя. / С пра́вдою вси глаго́лы уст мои́х, ничто́же в них стро́потно, ниже́ развраще́нно. / Вся пра́ва суть разумева́ющим и про́ста обрета́ющим ра́зум. / Науча́ю бо вас и́стине, да бу́дет о Го́споде наде́жда ва́ша, и испо́лнитеся Ду́ха. При́тчей чте́ние: Уста́ пра́веднаго ка́плют прему́дрость, язы́к же непра́веднаго поги́бнет. / Устне́ муже́й пра́ведных ка́плют благода́ти, уста́ же нечести́вых развраща́ются. / Ме́рила льсти́вая ме́рзость пред Го́сподем, вес же пра́ведный прия́тен Ему́. / Иде́же а́ще вни́дет досажде́ние, та́мо и безче́стие, уста́ же смире́нных поуча́ются прему́дрости. / Соверше́ние пра́вых наста́вит и́х, и поползнове́ние отрица́ющихся упасе́т их. / Не по́льзуют име́ния в день я́рости, пра́вда же изба́вит от сме́рти. / У́мер пра́ведный, оста́ви раска́яние, нару́чна же быва́ет и посмея́тельна нечести́вых па́губа. / Пра́вда непоро́чнаго исправля́ет пути́, в нече́стие же па́дает непра́вда. / Пра́вда муже́й пра́вых изба́вит их: безсове́тием же пленя́ются беззако́ннии. / Сконча́вшуся му́жу пра́ведну, не поги́бнет наде́жда, похвала́ же нечести́вых поги́бнет. / Пра́ведник от ло́ва убе́гнет, вме́сто же его́ предае́тся нечести́вый. / Во усте́х нечести́вых сеть гра́жданом, чу́вство же пра́ведных благопоспе́шное. / Во благи́х пра́ведных испра́вится град, и в поги́бели нечести́вых ра́дование. / Во благослове́нии пра́вых возвы́сится град, усты́ же нечести́вых раскопа́ется. / Руга́ется гра́жданом лише́нный ра́зума, муж же му́дрый безмо́лвие во́дит. Прему́дрости Соломо́новы чте́ние: Пра́ведных ду́ши в руце́ Бо́жией, и не прико́снется их му́ка. / Непщева́ни бы́ша во очесе́х безу́мных умре́ти, и вмени́ся озлобле́ние исхо́д их, и е́же от нас ше́ствие – сокруше́ние, они́ же суть в ми́ре. / И́бо пред лице́м челове́ческим, а́ще и му́ку прии́мут, упова́ние их безсме́ртия испо́лнено. / И вма́ле нака́зани бы́вше, вели́кими благоде́тельствовани бу́дут, я́ко Бог искуси́ я и обре́те их досто́йны Себе́. / Я́ко зла́то в горни́ле
искуси́ их, и я́ко всепло́дие же́ртвенное прия́т я. / И во вре́мя посеще́ния их возсия́ют, и я́ко и́скры по сте́блию потеку́т. / Су́дят язы́ком и облада́ют людьми́, и воцари́тся Госпо́дь в них во ве́ки. / Наде́ющиися нань разуме́ют и́стину, и ве́рнии в любви́ пребу́дут Ему́. / Я́ко благода́ть и ми́лость в преподо́бных Его́, и посеще́ние во избра́нных Его́.
На литии́ стихи́ра хра́ма и стихи́ры свята́го, глас 6:
А́нгелы своя́ стра́нам и язы́ком предста́тели ве́рныя дарова́вый Бог, / егда́ прии́де време́н исполне́ние, / моле́ния ра́ди а́нгела страны́, я́же близ океа́на хла́дна, / и наро́да ло́пска предста́теля, / призва́ тя во благове́стие, всехва́льне Три́фоне, / я́ко да спасе́ни бу́дут лю́дие ти́и, / да возопию́т во умиле́нии серде́ц: // благослове́н Бог оте́ц на́ших.
Бу́ри океа́на хла́дна не убоя́вся, / любо́вию Христо́вою согрева́емь, / во страну́ се́верную пресели́лся еси́, досточу́дне Три́фоне, / предложи́л еси́ та́мо наро́ду ло́пску огнь любве́ Бо́жия, / хлад и мрак души́ разгоня́ющь, / во е́же чи́стым се́рдцем и усты́ воспева́ти: // благослове́н Бог оте́ц на́ших.
Виде́ние бе ди́вное, / егда́ от мра́чна неве́дения язы́цы ва́рварстии, / тобо́ю приведе́ннии, Христо́ви сочета́шася: / земля́ бо и не́бо ликова́ша, / во струя́х Пече́нги и Па́зреки, а́ки Иорда́на и Днепра́, // зря́ще мно́жество креща́емых и Христа́ сла́вящих.
Сла́ва, глас 5:
Боготе́чней звезде́ уподо́бився, / всю страну́ се́верную обте́кл еси́, досточу́дне Три́фоне, / я́ко бо денни́ца, со́лнцу преходя́щая. / От язы́ка ло́пска приве́л еси́ ко Христу́ чад мно́жество, / и́же в ра́дости серде́чней прия́ша креще́ние / и со умиле́нием возопи́ша: // благослове́н Бог оте́ц на́ших.
И ны́не, Богоро́дичен, глас то́йже:
Храм и дверь еси́, / пала́та и престо́л Царе́в, / Де́во Всечестна́я, / Е́юже Изба́витель мой, Христо́с Госпо́дь, / во тьме́ спя́щим яви́ся, / Со́лнце Сый пра́вды, просвети́ти хотя́, / я́же созда́ по о́бразу Своему́ руко́ю Свое́ю. / Те́мже, Всепе́тая, / я́ко ма́терне дерзнове́ние к Нему́ стяжа́вшая, // непреста́нно моли́ спасти́ся душа́м на́шим.
На стихо́вне стихи́ры, глас 1.
Подо́бен: Небе́сных чино́в: Кре́ст Христо́в взе́мше, на покая́ние изше́л еси́ от ю́ности твоея́, / я́ко разбо́йник испове́дася и слезя́: / помяни́ мя Го́споди во Ца́рствии Твое́м. / Бо́гу послужи́л еси́, послуша́ние мона́шеское соблю́л еси́, / чистоту́, смире́ние, нестяжа́ние и терпе́ние тя́жкими труды́ свои́ми обре́л еси́. / Те́мже и мы, почита́я тя, мо́лим: / преподо́бне о́тче Три́фоне, // помози́ и нам в сих доброде́телех преуспе́ти.
Стих: Честна́ пред Го́сподем // смерть преподо́бных Его́.
В пусты́ню ди́вию всели́лся еси́, / посто́м, покло́ны, стоя́нием на моли́тве, / бде́нием неуста́нным плоть умертви́л еси́, / в по́двизех дневны́х и нощны́х тече́ние соверши́л еси́ / и наро́д лопа́рский в ве́ре наста́вил еси́. / Све́ту Вели́кому, я́ко вене́чник святы́й, ны́не предстои́ши, / помина́й изря́дное твое́ достоя́ние, / е́же мно́гими труды́, о́тче, стяжа́л еси́, // да вси тя ублажа́ем.
Стих: Блаже́н муж боя́йся Го́спода, // в за́поведех Его́ восхо́щет зело́.
Пути́, вводя́щаго в жизнь, наста́вник и учи́тель был еси́ / и в после́дних конце́х се́верныя страны́ язы́ки просвети́л еси́, / породи́в водо́ю и Ду́хом Святы́м, / Его́же благода́тию неду́жныя цели́л еси́, / от грехо́в тя́жких очища́я, / и чу́вства покая́нная пробужда́л еси́, / и мно́гих
на путь спасе́ния и ве́ры наста́вил еси́, // о́тче наш Три́фоне.
Сла́ва, глас 8:
Прему́дрости сокро́вище быв, преподо́бне Три́фоне, / сердца́ неве́рных люде́й уче́нием твои́м просвети́л еси́, / благоче́стия семена́ насади́в. / Те́мже тя вси, я́ко учи́теля мона́хом и бельцо́м, / достодо́лжно ублажа́ем и мо́лимся: / моли́ся Христу́, Ему́же усе́рдно порабо́тал еси́, / изба́вити нас наве́т вра́жиих // и спасти́ся душа́м на́шим.
И ны́не, Богоро́дичен, глас то́йже:
Безневе́стная Де́во, / я́же Бо́га неизрече́нно заче́нши пло́тию, / Ма́ти Бо́га Вы́шняго, / Твои́х рабо́в мольбы́ приими́, Всенепоро́чная, / всем
подаю́щи очище́ние прегреше́ний, / ны́не на́ша моле́ния прие́млющи, // моли́ спасти́ся всем нам.
На благослове́нии хлебо́в тропа́рь свято́му два́жды, и
Богоро́дице Де́во: единожды. Тропа́рь, глас 8: Пути́, вводя́щаго в жизнь, наста́вник и учи́тель был еси́: / пе́рвее бо, преподо́бне о́тче наш Три́фоне, / прише́л еси́ в часть Норве́гския земли́ / и в после́дних конце́х се́верныя страны́ язы́ки просвети́л еси́, / породи́в водо́ю и Ду́хом Святы́м, / и свяще́нная твоя́ ча́да в безпло́дней пусты́ни, / я́ко древа́ ма́сличная, насади́л еси́, / ве́лию оби́тель Святы́я и Живонача́льныя, Единосу́щныя и Неразде́льныя Тро́ицы созда́л еси́, мона́хов мно́жество собра́в. / Тем, я́ко апо́столом и пустынножи́телем равноче́стна чту́ще тя, / приле́жно припа́дающе, вопие́м: / моли́ всех Бо́га за Ру́сскую зе́млю, за о́бласть твою́ и за вся лю́ди, // почита́ющия па́мять твою́.
Ин тропа́рь, глас 4: От мяте́жа мирска́го в пусты́ню удали́лся еси́, / к немерца́ющему Све́ту притека́я, / и слез твои́х тече́ньми, о́тче Три́фоне, / пусты́ни се́верныя возде́лал еси́, / поще́ньми и из глубины́ воздыха́ньми / чуде́с благода́ть от Бо́га прие́м, / мона́хов Пече́нжских роди́телю и лопля́н апо́столе, / моли́ Христа́ Бо́га // спасти́ся душа́м на́шим.
НА У́ТРЕНИ
На Бог Госпо́дь: тропа́рь свято́му два́жды.
Сла́ва, и ны́не:
Богоро́дичен, глас 4: Е́же от ве́ка:
По 1-й стихоло́гии седа́лен, глас 3:
Зе́млю оста́вил еси́ и небе́сных оби́телей жи́телем сподо́бился еси́ бы́ти, / чистото́ю жития́ своего́, любо́вию к Бо́гу и бли́жнему просия́л еси́. / У Престо́ла Бо́жия среди́ лико́в апо́столов, преподо́бных и му́чеников мо́лишися за ны, недосто́йныя. / Не оста́ви нас, преподо́бне о́тче Три́фоне, / моли́ Го́спода дарова́ти нам, гре́шным, ве́лию ми́лость / ко спасе́нию душ на́ших. (Два́жды).
Сла́ва, и ны́не, Богоро́дичен:
Я́ко Всенепоро́чная Неве́ста Творца́, / я́ко Неискусому́жная Ма́ти Изба́вителя, / я́ко прия́телище су́щи Уте́шителя, Всепе́тая, / беззако́ния мя су́ща скве́рное жили́ще / и бесо́в игра́лище в ра́зуме бы́вша, потщи́ся сих злоде́йствия мя изба́вити, / све́тлое жили́ще доброде́телей соде́лавши, Светода́тельная, Нетле́нная. / Отжени́ о́блак страсте́й и вы́шняго прича́стия сподо́би / и све́та невече́рняго моли́твами Твои́ми.
По 2-й стихоло́гии седа́лен, глас 5:
В да́льняя места́ и безве́стная прише́л еси́, о́тче наш Три́фоне, / и неве́дущим Бог тобо́ю позна́ся. / Иде́же пре́лесть почита́ема бя́ше, / та́мо же ны́не лю́дям во тме неве́рия лежа́щим ве́ра Христо́ва тобо́ю дарова́ся, / и оби́тель ве́лия процвете́. / Всех научи́л еси́ в Трие́х Ли́цех Еди́но Божество́ ве́ровати, / те́мже свяще́нную Твою́ па́мять достодо́лжно ублажа́ем. (Два́жды). Сла́ва, и ны́не, Богоро́дичен: Я́ко невозде́ланна, Де́во, лоза́, / прекра́сный Грозд, Христа́, возрасти́ла еси́, / источа́ющ нам вино́ спаси́тельное, / всех веселя́щее ду́ши и телеса́. / Те́мже я́ко вино́вну Тя до́брых ублажа́юще, / при́сно со А́нгелом вопие́м Ти: / ра́дуйся, Обра́дованная, Госпо́дь с Тобо́ю.
По полиеле́е велича́ние:
Ублажа́ем тя, / преподо́бне о́тче наш Три́фоне, / и чтим равноапо́стольныя труды́ твоя, / наста́вниче мона́хов // и собесе́дниче А́нгелов.
Псало́м избра́нный: Терпя́, потерпе́х Го́спода, и внят ми, и услы́ша моли́тву мою́. / Поста́ви на ка́мени но́зе мои́ и испра́ви стопы́ моя́. / Се удали́хся, бе́гая, и водвори́хся в пусты́ни. / Уподо́бихся нея́сыти пусты́нней. / Бдех и бых, я́ко пти́ца, осо́бящаяся на зде. / Коле́на моя́ изнемого́ста от поста́, / и плоть моя́ измени́ся еле́я ра́ди. / Предзре́х Го́спода пре́до мно́ю вы́ну, я́ко одесну́ю мене́ есть, да не подви́жуся. / Вси язы́цы обыдо́ша мя, и И́менем Госпо́дним противля́хся им. / Благослове́н Госпо́дь, И́же не даде́ нас в
лови́тву зубо́м их. / Храни́т Госпо́дь ду́ши преподо́бных Свои́х. / Восхва́лятся преподо́бнии во сла́ве и возра́дуются на ло́жах свои́х. / Честна́ пред Го́сподем смерть преподо́бных Его́. / По́йте Го́сподеви, преподо́бнии Его́, и испове́дайте па́мять святы́ни Его́, во всех лю́дех чудеса́ Его́. Сла́ва, и ны́не: Аллилу́ия: (Три́жды).
По полиеле́е седа́лен, глас 8:
Доброде́телей ты жесто́кий ше́ствовал еси́ путь, преподо́бне Три́фоне, / Бо́гом да́нный, А́нгеле Пече́нжский. / Душе́вныя стра́сти благопотре́бно, вку́пе же и теле́сныя, / духо́вным посе́кл еси́ мече́м, / к ли́ку преподо́бных сочета́лся еси́, / те́мже, покланя́ющеся, мо́лим тя, преподо́бне о́тче, / да́руй и нам си́лу душе́вную / усе́рдными подо́бниками бы́ти доброде́телей твои́х высо́ких. (Два́жды). Сла́ва, и ны́не, Богоро́дичен: О Тебе́ ра́дуется, Благода́тная, вся́кая тва́рь, / а́нгельский собо́р и челове́ческий ро́д, / освяще́нный хра́ме и раю́ слове́сный, / де́вственная похвало́, из Нея́же Бог воплоти́ся и Младе́нец бысть, / пре́жде век сый Бог наш, ложесна́ бо Твоя́ престо́л сотвори́ / и чре́во Твое́ простра́ннее небе́с соде́ла. / О Тебе́ ра́дуется, Благода́тная, вся́кая тварь, сла́ва Тебе́. Степе́нна, 1-й антифо́н, 4 гла́са. Проки́мен, глас 4: Честна́ пред Го́сподем / смерть преподо́бных Его́. Стих: Что возда́м Го́сподеви о всех, / я́же воздаде́ ми? Вся́кое дыха́ние: Ева́нгелие от Матфе́я, зача́ло 43.
По 50-м псалме́ стихи́ра, глас 6:
Три́фона доброхва́льнаго почти́м: / насажде́н бо в дому́ Госпо́дни / и процвете́ пра́ведно, я́ко ке́др в пусты́ни, / умно́жив вельми́ ста́до Христо́во слове́сных ове́ц, / в преподо́бстве всехва́льном и пра́вде, // в му́ченичестве сла́вном и страда́льчествовании.
Кано́н Богоро́дице со ирмосо́м на 6. И свята́го на 8, глас 4:
Песнь 1
Ирмо́с:
Наста́вльшему дре́вле Изра́иля, / бежа́щаго от рабо́ты фарао́новы, / и в пусты́ни пита́вшему, / пои́м Изба́вителю, Бо́гу на́шему, // я́ко просла́вися.
Запе́в: Преподо́бне отче наш Три́фоне, / моли́ Бо́га о нас. Аз Бог пе́рвый, Аз же по си́х, / ра́зве Мене́ несть Бо́га ктому́, я́коже Аз проро́ком Свои́м рече́; / Ты и нам отве́рзи плотяна́я уста́ воспе́ти раба́ Твоего́ Три́фона / и сего́ пою́щим сло́во вдохни́. Приими́ песнь рабо́в твои́х, о́тче преподо́бне, / и умоли́ Го́спода возда́ти грехо́м оставле́ние, / на Суде́ ми́лость и Небе́снаго Ца́рствия наслажде́ние, / иде́же ты пребыва́еши, о́тче всехва́льный. Ру́це просте́ртием чи́стых ти моли́тв / беспло́тныя враги́ струя́ми слез твои́х до конца́ потопи́л еси́, Три́фоне, / и купе́ль мы́сленную в них соде́лал еси́, / омыва́еши прегреше́ния восхваля́ющих тя, преподо́бне. Еди́наго естества́ Тро́ицы безме́рную си́лу со дерзнове́нием богосло́вил еси́ / и су́етных и́дольское служе́ние, всему́дре, обличи́л еси́, / боже́ственными наказа́нии укре́пль, / А́нгелом сожи́тельниче, Три́фоне, / па́мять тво́ю пра́зднующих соблюди́, / да спасе́ни, пое́м: / благослови́те, вся дела́ Госпо́дня, Го́спода. Ни гро́б, забве́ния хода́тай, / возмо́же твоя́ доброде́тели утаи́ти, о́тче Три́фоне, / трубы́ бо ясне́йше пропове́да твоя́ боле́зни по́стническия, / и́миже Бо́гови прибли́жися, вопия́: / благослови́те, вся дела́ Госпо́дня, Го́спода. Богоро́дичен: Из ложе́сн Твои́х возия́ пресла́вно / Вели́кое Со́лнце – Христо́с Бог, Богоро́дице Де́во, / и вся земны́я концы́ просвети́в, / и преподо́бных по́ты прия́л есть че́стно.
Песнь 3
Ирмо́с:
Да не хва́лится мудр хваля́йся, / но о сем, е́же разумева́ти, / я́ко несть свят, я́ко Бог наш, / вознося́й рог наш, // дая́й кре́пость царе́м на́шим.
Оте́чество твое́, преподо́бне, близ гра́да Торжка́ бя́ше / от освяще́нных благоче́стно живу́щих роди́телей, / и, взира́я на пра́ведное житие́ их, / от мла́дости своея́ изря́дно ты кро́ток и ми́лостив бы́л еси́. / Оба́че грызе́нием грехо́вным и ле́стною тьмо́ю миродержа́ния / помрачи́ся твое́ ю́ностное се́рдце, / и тьмонеи́стовство возоблада́ше. И не хотя́ Госпо́дь искорени́ти тще́тнаго и су́етнаго, наказу́я наказа́ тя Госпо́дь, сме́рти же не предаде́ тя. / А́нгелов подо́бника и бесо́в противобо́рца прови́дя тя всея́ тва́ри Зижди́тель, / на покая́ние огласи́ тя, я́ко втора́го Па́вла, / и человеколю́бно к Себе́ призва́, / правосла́вным смы́слом ю́ношская возжеле́ния возненави́дев, о́тче наш Три́фоне, / клевре́ты и во́и своя́ оста́вил еси́. Преше́д мо́ре, / прии́де в да́льнюю и незна́емую страну́, на примо́рие вели́каго мо́ря-окия́на, / и всели́лся еси́, иде́же благоче́стие ни сло́во слы́шашеся. / Бездо́мок и безкро́вен по лесо́м и гора́м / и в про́пастех земны́х скита́лся еси́, стра́нствуя, / непреста́нно во слеза́х, моли́твах и сокруше́нии се́рдца / помета́я себе́ о зе́млю пред Бо́гом. В ме́сто от ме́ста преходя́, / бе́гая мирски́я сла́вы от челове́к, / небе́сныя сла́вы рачи́тель бы́л еси́, о́тче преподо́бне Три́фоне, / в пусты́ни безчи́сленно прия́т от бесо́в вся́кая пусты́нная страхова́ния / в препя́тие спасе́нию твоему́, / оба́че ле́стных мечта́ний и тя́жких страсте́й мрак разгна́в, / к све́ту доброде́телей доше́д. Та́мо уткну́тися со преподо́бным Феодори́том Госпо́дь тя сподо́бил е́сть, / и пребыва́ше вку́пе со ста́рцем о́ным в прегорча́йшей пусты́ни, Бо́гом храни́мь бы́сть, / умуча́я и покоря́я плоть свою́ в порабоще́ние и послуша́ние ду́ху, / пита́яся от жесто́ких зе́лий и коре́ний, / я́же та́мо прозяба́ет пусты́ня лопа́рская. / Пребы́в со о́ным предрече́нным ста́рцем / два́десят лет во святе́м и непоро́чнем жи́тельстве, / по ступе́нем доброде́телей возше́л еси́, всехва́льне. Богоро́дичен: Пречи́стая Влады́чице, / ро́ждшая земны́м Окорми́теля и Го́спода, / страсте́й мои́х непостоя́нное и лю́тое разжени́ смуще́ние / и тишину́ пода́ждь се́рдцу моему́.
Седа́лен, глас 4:
Стра́стное порабо́тил еси́ плотско́е мудрова́ние / и го́ршее покори́л еси́ лу́чшему, о́тче пресла́вне, / сокруши́л еси́ вы́и бесо́м и посто́м возсия́л еси́ в ми́ре, / я́ко со́лнечная сия́ния суть твоя́ добродетели, // сего́ ра́ди тя почита́ем.
Сла́ва, и ны́не:
Богоро́дичен: Стена́ непобеди́мая нам христиа́ном еси́, Богоро́дице Де́во: / к Тебе́ бо прибега́юще невреди́ми пребыва́ем, / и па́ки согреша́юще, и́мамы Тя моли́твенницу. / Тем благодаря́ще вопие́м Ти: / ра́дуйся, Благода́тная, Госпо́дь с Тобо́ю.
Песнь 4
Ирмо́с:
Услы́шах сла́вное смотре́ние Твое́, Христе́ Бо́же, / я́ко роди́лся еси́ от Де́вы, / да от ле́сти изба́виши зову́щия: // сла́ва си́ле Твое́й, Го́споди.
Но́сиши, о́тче, кро́тостию наве́ты и ла́яния лука́вых бесо́в, / и челове́к злых нахожде́ния, / бесо́вскою пре́лестию подвиза́емых тя уби́ти. / Ты же, сия́ терпя́, / отхо́диши во вну́тренюю пусты́ню / на богому́дрие и безмо́лвие. Наро́д же ло́пский, омраче́нный неве́дением, / со но́йды, си́речь отлуче́нными слуга́ми диа́вольскими, / пря́шася с тобо́ю, Три́фоне пра́ведный, / и яря́шася, я́ко зве́рие, и неисповеди́мыя де́яша ти па́кости. / Но Госпо́дь Бог, обеща́выйся с тобо́ю бы́ти, / Свои́м Бо́жиим манове́нием наставля́ше тя сокрыва́тися / в гора́х и в рассе́линах ка́менных, / и иногда́, о́тче святы́й, прохожда́ше сквозь пога́ных, / зло́бою ослепле́нных, и неви́дим бы́сть. В том благове́стии, о́тче наш Три́фоне, / святы́й муж до́браго жела́ния, потруди́вся ле́та мно́гая / и разгна́в страсте́й мрак глубо́кий, ко све́ту доброде́телей доше́д / и све́тел быв, мра́чныя ду́хи лука́вствия отгна́л еси́ от наро́да ло́пскаго / и окре́ст рек Пече́нги и Па́зреки / про́поведию огласи́л еси́ их и Креще́нием просвети́л еси́.
Еди́ней любве́ Христо́ве ду́шу свою́, преподо́бне Три́фоне, / приложи́в, все́ю душе́ю потща́лся еси́ / искорени́ти е́линская бесо́вская мудрова́ния / и от зве́рскаго устремле́ния свободи́ти лю́ди, не́когда тя́жкия и суро́выя, / свои́ми моли́твами укроти́л еси́ лопь язы́ческую / и,
на па́жить живоно́сную наста́вив, ко Христо́ве ве́ре, / я́ко овча́та ма́лыя,
приве́л еси́. Во гра́де Ко́ле купи́, о́тче святы́й, же́рновы ручны́я нема́лы и тя́жкия / и на ра́мех свои́х во оби́тель нести́ изво́лил еси́. / Ученицы́ же моли́ша тя, да не труди́шися изли́ше. / Ты же рече́ им: / у́не на вы́и свое́й обе́сивый осе́льский ка́мень носи́ти, / не́жели бра́тию пра́зднством соблажня́ти. / И путе́м бла́тным и гори́стым со бре́менем тя́жким до Пече́нжския оби́тели идя́ше, / в посте́ вели́цем пребывая, ни ма́ло яды́й, / воспева́я Бо́гови, подаю́щему ти си́лы таковы́я: / благослови́те, вся дела́ Госпо́дня, Го́спода. Богоро́дичен: Ты еди́на су́щим на земли́ па́че естества́ благи́х Хода́таица, / Ма́ти Бо́жия, яви́ся, / те́мже Ти, ра́дуйся, вопие́м.
Песнь 5
Ирмо́с:
Часть моя́ еси́, Го́споди, / и сла́ва лица́ моего́: / Ты бо мя из тьмы неве́дения / еди́н изба́вил еси́ богоразу́мием. / И Тебе́ молю́ся, Христе́: // да́руй рабу́ Твоему́ мир, я́ко Человеколю́бец.
Святоблаже́ннаго учи́теля твоего́ Феодори́та / преподо́бию и целому́дрию поревнова́в, о́тче Три́фоне, / чистоту́ притяжа́в, и́миже на Боже́ственую любо́вь восше́д, / прия́т от Го́спода да́ры / исцеля́ти неду́ги душ и теле́с на́ших. Сла́ное, о́тче, неве́рия мо́ре / истека́ющими от тебе́ си́лами и зна́мении возмуща́ется, / и злоче́стие ло́пи благоче́стием изменя́ется, / и тьма неве́дения богоразу́мием просвеща́ется. И нача́т стро́ити на Пече́нзе реце́ це́рковь / во И́мя Святы́я и Живонача́льныя Тро́ицы, / сам же вся но́щи в непреста́нных моли́твах пребыва́я, / во дне́х же за три по́прища на ра́мех свои́х / на церко́вное строе́ние бре́вна и тес, / и и́но потре́бное ноша́ше.
Со благослове́нием приснопевáемаго Мака́рия, Но́ваго гра́да святи́теля, / це́рковь ту священнои́нок Илия́ со иеродиа́коном Феодори́том освяти́ша, / и от того́ иерои́нока блаже́нный оте́ц наш Три́фон остреже́ся / и ду́хом и се́рдцем пра́вый и́нок и знамено́сец соде́лася. Невозвра́тно ше́ствовал еси́ веду́щими к небеси́ стезя́ми боже́ственными, / о́тче преподо́бне Три́фоне досточу́дне, / от злых веду́щих до конца́ уклони́лся еси́ / и, непреста́нныя моли́твы, я́ко копие́, вручи́в кре́пко, / пробо́л еси́ бесо́вская ополче́ния. / Те́мже твою́ па́мять при́сно пе́сньми восхваля́ем ве́рно. Богоро́дичен: Очисти́лище естества́ Ты еси́, Еди́на Богоблаже́нная, /
на ра́мех бо херуви́мских седя́щаго Бо́га дла́ньма носи́ла еси́, вопию́щи: /
благослове́н Бо́г оте́ц на́ших.
Песнь 6
Ирмо́с:
Да не погрузи́т мене́ бу́ря водна́я, / ниже́ да пожре́т мене́ глубина́, / отве́ржен бо есмь во глубины́ се́рдца морска́го зол мои́х. / Тем зову́, я́ко Ио́на: // да взы́дет от тли зол живо́т мой к Тебе́, Бо́же.
И ненаселе́нная тобо́ю населя́ется земля́ се́верная, о́тче, / я́ко бо заря́ просия́ша твоя́ доброде́тели, / и́миже осия́вшеся, в пусты́ню, / я́ко во град, мно́жество мни́шеское стече́ся, / и нача́льник сего́ свяще́ннаго собо́ра яви́лся еси́, о́тче Три́фоне, / наказу́я и уча́, / и вся́ приводя́ к во́ли Бо́жией. Любо́вь и́стинную ко Христу́ возыме́л еси́, / и сподо́би тя Госпо́дь во и́мя Святы́я Тро́ицы / не то́кмо пресла́вный храм, но и оби́тель чу́дную устро́ити, / и во о́ную духо́вная лопа́рская ча́да мно́гая / к мона́шескому житию́ приве́л еси́ / из наро́да не́когда ва́рварскаго. Естество́м доброде́телей, о́тче, наве́ты нося́, / терпя́ же и от свои́х,
на тя восстаю́щих, / оте́ческим нра́вом после́дуя, тех житие́ в себе́ име́л
еси́. / Свяще́нная твоя́ ча́да в безпло́дней пусты́ни, / я́ко дре́ва ма́сличная, процвели́ суть. / Тем, я́ко апо́столом и пустынножи́телем / равноче́стна чту́ще, тя почита́ем.
И́же злы́ми при́сно обурева́емии / и страстьми́ содержи́мии, к тебе́ прибега́ем, / Бо́гови моли́твенника тя предлага́юще, Три́фоне преподо́бне. / Те́мже ми́лостивно посеща́й нас, о́тче, / да тобо́ю спасе́ни, па́мять твою́ почита́ем / присночестну́ю и свяще́нную. Я́рость бесо́в раздражи́, / егда́ но́йды ло́пския, уго́дники их, / Бо́гу уго́дники ты моли́твами соде́лал еси́, / осия́л еси́, богому́дре, земны́я концы́, / ко Све́ту, от Све́та возсия́вшему, уме́рый, преше́л еси́. / Со А́нгелы ны́не на небесе́х водворя́яся, / помина́й ве́рою чту́щих па́мять твою́, / преподо́бне Три́фоне приснопа́мятне. Богоро́дичен: Руно́ Богоно́сное Тя прообрази́, Де́во, / запечатле́нный Исто́чник присноживы́я воды́, / одр, его́же обстоя́т си́льнии, / Сего́ неискусому́жно вмести́ла еси́, Чи́стая. Конда́к, глас 8: Все твое́ у́мное жела́ние к Бо́гу впери́в, / Того́ зва́нию невозвра́тно от души́ после́довал еси́, / в пусты́ню коне́чную всели́вся, и, та́мо а́нгельски и равноапо́стольне пожи́в, / мно́гим путь был еси́ ко спасе́нию, / вели́ких царе́й Иоа́нна и Фео́дора Росси́йских чудесы́ удиви́л еси́. / Сего́ ра́ди и Христо́с тя просла́ви и да́ром чуде́с обо́гати. / Те́мже вси вопие́м ти: ра́дуйся, испове́дниче Христа́ Бо́га на́шего, // ра́дуйся, оби́тели твое́й неколеби́мое утвержде́ние, Три́фоне, о́тче наш.
И́кос:
Возлюби́в, преподо́бне, Христо́вы Боже́ственныя за́поведи / и возненави́дев ми́ра сего́ пре́жняя наслажде́ния, / прии́де усе́рдно ко Го́споду, / и бысть свети́льник, просвеща́я концы́ блиста́нием духо́вным. / Тем, припа́дая, молю́ тя: / просвети́ моя о́чи душе́вныя / воспе́ти твоя́ по́двиги, поще́ние, и бде́ние, / и сле́зы, боле́зни и изможде́ние те́ла, / блаже́нныя ра́ди бу́дущия жи́зни, ея́же ны́не наслажда́ешися, // моли́ непреста́нно о всех нас, Три́фоне, о́тче наш.
Песнь 7
Ирмо́с:
Не преда́ждь нас до конца́ И́мене Твоего́ ра́ди / и не разори́ Заве́та Твоего́, / и не отста́ви ми́лости Твоея́ от нас, // Го́споди Бо́же оте́ц на́ших, Препе́тый во ве́ки.
Доброде́телей труды́ и по́ты, Три́фоне, / поко́й со все́ми святы́ми прия́л еси́, / и́хже возвесели́л еси́ свои́м житие́м, / ве́лию оби́тель Святы́я Тро́ицы на Пече́нзе устро́ил еси́ / и мона́хов мно́жество собра́л еси́, поя́ Христо́ви: / благослове́н еси́, Го́споди, Бо́же оте́ц на́ших. Лука́вии мни́си тебе́ спо́ну / бесо́вским сове́том учини́ти хоте́ша, / е́же тебе́ с Пече́нзи изгна́ти или́ сме́рти преда́ти, / ты же сих, я́коже Моисе́й / ма́нною пита́ти не престае́ши, / до́ндеже я в благоразу́мие приведе́, со благодаре́нием поя́ Бо́гови: / благослове́н еси́, Го́споди, Бо́же оте́ц на́ших. Содруже́бник твой изве́стный, / на бесо́в ратобо́рец Варлаа́мий с Ке́рети, / устреми́ся к тебе́ на Пече́нгу уви́дети труды́ твоя́ и по́двизи / и предвозвести́тельно о составле́нии оби́тели прорече́: / о, Три́фоне, ты сподо́бился еси́ оби́тель вели́кую воздви́гнути и бра́тию собра́ти, / бу́дут бо лю́дие и се́ла зде неукроти́мы, / я́ко ди́вии зве́ри, твое́й пре́жней я́рости и остроже́лчию подо́бящиися. / Ты же, не престая́, Бо́гови воспева́л еси́: / благослове́н еси́, Го́споди, Бо́же оте́ц на́ших. Естество́м доброде́телей любве́ сопряже́ся ти содруже́бник твой Варлаа́мий / в духо́вных твои́х, Три́фоне, исправле́ниих, / в пу́сте мо́ря с тобо́ю озе́мствуяся / и на лади́ице ше́ствуя, / прича́стныя души́ не́мощи очища́ющи. Отоше́л еси́, о́тче святы́й, во стра́ны Вели́каго Но́ва гра́да / и та́мо пребы́л еси́ нищ и проси́тель, / от гра́да во град, от ве́си в весь стра́нствуя / и испроша́я ми́лостыни, я́же на пропита́ние бра́тий посыла́л еси́, / я́ко ко́кош, собира́я семена́ для птенце́в свои́х / и пита́я вся це́лыя осмь лет, / благода́рно воспева́я Бо́гови: / благослове́н еси́, Го́споди, Бо́же оте́ц на́ших. А́ще и пита́еми суть ропта́ти не престаю́т, / но ты сих зве́рство на кро́тость в благоразу́мие приведе́ / моли́твами непреста́нными, и пе́нием, и бде́нием, / до́ндеже их Христо́ви чи́сты предста́ви. / И, егда́ прии́де час муче́ния, / венцы́ добропобе́дныя у Го́спода испроси́л еси́ / и от оби́тели земны́я во оби́тель небе́сную / чад свои́х водвори́л еси́, поя́ Бо́гови: / благослове́н еси́, Го́споди, Бо́же оте́ц на́ших.
Богоро́дичен:
Лю́тыми страсте́й наве́ты обурева́емь есмь / и прилóги грехóвными погружа́емь; / к Твоемý еди́ному ти́хому и невла́емому приста́нищу прибега́ю, Всепе́тая: / уще́дривши, спаси́ мя, Присноде́во Благослове́нная, / Я́же Бо́га пло́тию Ро́ждшая.
Песнь 8
Ирмо́с:
В Вавило́не о́троцы, / Боже́ственною распала́еми ре́вностию, / мучи́теля и пла́мене преще́ние му́жески попра́ша, / и, посреде́ огня́ вве́ржени, ороша́еми, поя́ху: // благослови́те, вся дела́ Госпо́дня, Го́спода.
Глаго́лом си́ла Боже́ственная после́дующая познава́шеся / от ца́ря Иоа́нна чу́вственне, / он же по пре́жде рече́нным хоте́ние твое́, / е́же к Боже́ственным во́лю исполня́я, / возлюби́л есть нада́льну оби́тель страны́ Пече́нжския, / наипа́че же тебе́, преподо́бне, / и, воздарова́в гра́мотою несуди́мою, / и бога́тно колокола́ми и церко́вною у́тварию, / отпусти́л есть вели́кий Ца́рь с ми́лостивым призре́нием. / Ты же, дивя́ся таково́му попече́нию Бо́жию об оби́тели твое́й, воспева́л еси́: / благослови́те, вся дела́ Госпо́дня, Го́спода. Благочести́вому царю́ Фео́дору я́влься, о́тче преподо́бне, / от сме́ртельного зла́го умышле́ния сви́тцких не́мец / спа́сл еси сего́ руки́ прикоснове́нием, / о́ному же тя спаси́теля сея́ напа́сти получи́в, / и́мя твое́ уве́дети хотя́, / ты же и сие́ возвести́л еси́. / Сего́ ра́ди чудоде́ющему Бо́гу во святы́х Свои́х воспева́ем: / благослови́те, вся дела́ Госпо́дня, Го́спода. Еди́ножды прише́д в ке́ллию твою́, о́тче святы́й, / медве́дь ди́вий и зело́ вели́к / и нача́т угото́ванное те́сто просфо́рное я́сти. / Ты же И́менем Иису́са Христа́ повеле́л еси́ зве́рю: ста́нь се́мо кро́ток. / И ста́ зве́рь пред нога́ма твои́ма недви́жим. / Взем ве́лие дре́во, бия́ше зве́ря, / и, наказа́в, завеща́ близ оби́тели впредь не па́костити / и отосла́ того́ в пусты́ню. / Мы же, дивя́щеся си́ле Бо́жией, де́йствующей в тебе́, вопие́м: / благослови́те, вся дела́ Госпо́дня, Го́спода.
По про́поведи Христо́вой / и по мно́гих свои́х пусты́нных труде́х,
о́тче преподо́бне, / в ста́рости масти́те впаде́ в боле́знь и изнемо́же зело́. / Преше́дшей же бра́тии со игу́меном Гу́рием рече́: / не скорбите́, бра́тия
моя́, и в до́брый путь тече́ния моего́ не пресеца́йте, / и не люби́те ми́ра, ни я́же в ми́ре, / все упова́ние возложи́те на Бо́га; / са́ми бо ве́сте, коли́к окая́нен мир сей, / я́ко мо́ре неве́рен, мяте́жен, ветра́ми нечести́вых духо́в волну́ется, / наве́ты диа́вольскими пе́нится, о погруже́нии миролю́бцев тщи́тся, / всю́ду па́губы своя́ простира́ет / и наконе́ц вся сме́ртию осужа́ет. / Мы же, внима́я прему́дрым словесе́м твои́м, вопие́м: / благослови́те, вся дела́ Госпо́дня, Го́спода.
По сих прия́л еси́ коне́чне, о́тче наш Три́фоне, / Пречи́стое Те́ло и
Святу́ю Кровь Христо́вы, / зело́ изнемо́же и прослези́ся, рече́: / на оби́тель сию́ святу́ю бу́дет тя́жкое искуше́ние, / и от острия́ меча́ уму́чатся мно́зи; / но не ослабева́йте, бра́тия моя́, упова́йте на Бо́га: / не оста́вит бо жезла́ гре́шных на жре́бии Свое́м / и па́ки обнови́т оби́тель. / И просвети́ся лице́ твое́, / и предаде́ святу́ю ду́шу свою́, / Святе́й Тро́ице те́плый служи́телю / и Пречи́стей Богома́тери благода́рен. / Мы́ же, взира́я на блаже́нную кончи́ну твою́, си́це вопие́м: / благослови́те, вся дела́ Госпо́дня, Го́спода. Богоро́дичен: Вы́шняго освяще́нное Боже́ственное селе́ние, ра́дуйся: / Тобо́ю бо да́деся ра́дость, Богоро́дице, зову́щим: / благослове́нна Ты́ в жена́х еси́, Всенепоро́чная Влады́чице.
Песнь 9
Ирмо́с:
Моисе́й на горе́ неопали́мую купину́ ви́де, / Ио́сиф в верте́пе неизрече́нное Рождество́ слы́ша, / Нескве́рная Де́во, Безму́жная Ма́ти, // пе́сньми Тя, Богоро́дице, велича́ем.
Исцеле́ния безчи́сленная источа́еши нам, преблаже́нне Три́фоне, / и отгоня́еши боле́зни душе́вныя, / и теле́сныя стра́сти врачу́еши / похваля́ющих труды́ твоя́, всече́стне, и вопию́щих ве́рно, / и тя венча́вшаго Христа́ прославля́ющих. Стра́сти победи́в теле́сныя воздержа́ния уздо́ю, чудоде́йственне Три́фоне, / в безстра́стия облече́ся све́тлую ри́зу, / всю зло́бу обнажи́л еси́ дре́вле нас обнажи́вшаго / и ны́не жи́тельствуеши, в раи́ всегда́ веселя́ся, // моли́ спасти́ся душа́м на́шим.
Возсия́ дне́сь пресве́тлая и всепра́зднственная па́мять твоя́, пресла́вне Три́фоне, / созыва́ющи многочи́сленное по́стников сосло́вие и
преподо́бных ликостоя́ния, / и мона́хов ве́лие бра́тство, / ко́их стра́сти душетле́нныя успи́л еси́, блаже́нне, / бо́дренными бде́нии, моли́твами непреста́нными и поще́нием, / и сих ра́ди в черто́г Небе́сный ча́да своя́ всели́л еси́, / богому́дре Три́фоне. И́же па́мять твою́ свяще́нную творя́щим, о́тче, / не преста́й со все́ми святы́ми земли́ Ко́льския / моли́ти Изба́вителя дарова́ти согреше́нием оставле́ние / и Небе́сное Ца́рство восприя́ти, / иде́же глас пра́зднующих весели́т вся. О, тро́ице присноблаже́нная, / равноче́стнии отцы́: Феодори́те, Три́фоне и Варлаа́ме, / я́ко еди́но блаже́нство иму́щии от Бо́га, версто́ предо́брая, / нас призыва́ющих и восхваля́ющих вас от всех лю́тых спаса́йте / те́плым предста́тельством ва́шим ко Го́споду. Богоро́дичен: Изравни́тися Соде́телю жела́ние ми вложи́ змий вселука́вый, / я́ко пле́нника, мя восхи́ти. / Тобо́ю же, Пречи́стая, призва́н бых, обожи́вся и́стинно, / Ты бо, о Богома́ти, И́же мене́ Обожи́вшаго родила́ еси́. Свети́лен: Труды́ тя́жкими и по́двиги мно́гими / с кро́тостию и смире́нием наве́ты вра́жия и клеветы́ терпя́, / оте́ческим нра́вом после́довал еси́, тех житие́ в себе́ име́я. / И свяще́нная твоя́ ча́да в безпло́дней пусты́ни, / я́ко дре́ва ма́сличная, процвели́ суть, / ве́лию оби́тель Святы́я Тро́ицы созда́л еси́, / мона́хов мно́жество собра́в, / труд ко́рмчий твори́ти до сме́рти не преста́л еси́. / Та́ко твоя́ труды́, о́тче наш Три́фоне, // све́тло возсия́ли суть в се́верных конце́х Ру́сския земли́. (Два́жды).
Сла́ва, и ны́не, Богоро́дичен:
Тя пе́сньми немо́лчными ублажа́ем, Де́во, / я́ко от Тро́ицы Еди́наго родила́ еси́, Богоро́дице, / и но́сиши на Боже́ственных обя́тиих Пребога́тое Сло́во, // Невра́щное и Неизме́нное.
На хвали́тех стихи́ры на 4, глас 4:
Ева́нгельскою стезе́ю к покая́нию прише́л еси́ / и мир оста́вил еси́, о́тче наш Три́фоне, / в да́льняя незна́емая места́ прише́д, / креще́нием ко Христо́ву позна́нию язы́ки ди́вии приве́л еси́. / Ору́жием и́ноческим, посто́м, смире́нием и послуша́нием, ца́рству тьмы проти́вился еси́, / пра́вило ве́ры и о́браз кро́тости духо́вныя яви́лся еси́, / ве́тхаго челове́ка совле́клся еси́, / и, стяжа́в благода́ть Ду́ха Свята́го, / в но́ваго челове́ка обле́клся еси́, // в пра́ведности и и́стине Бо́жией я́сно утвержда́яся. (Два́жды).
Зри́те, христиа́не време́н ны́нешних, / вои́стину сие́ удивле́нию досто́йно: / ки́я хра́брии обрета́лися суть ста́рцы / в правосла́вней христиа́нстей стране́, / во правове́рных догма́тех воспита́ннии, / Ко́льския земли́ просвети́тели. / Сих святы́х оте́ц тро́ицу: Три́фона, Феодори́та и Варлаа́ма, / приво́дим Тебе́ в моли́тву, Христе́ Бо́же, / и́хже моле́ние прие́мь и от вра́жия кова́рства сохраня́я, // Ду́хом Твои́м Святы́м наста́ви нас во ве́ки Тя велича́ти.
О, преподо́бне и досточу́дне о́тче наш Три́фоне! / Живонача́льней предстоя́ Тро́ице, / в непристу́пнем све́те и ра́дости неизглаго́ланней, / приими́ сие́ от умиле́ннаго ти се́рдца возноси́мое хвале́ние / и не преста́й моля́ся о нас, / да пожи́вше благоче́стне, / по успе́нии на́шем сре́тени от тебе́ обря́щемся на Небесе́х / и воспое́м с тобо́ю Бо́гови песнь вели́кую, // в вы́шних трегу́бо песносло́вимую.
Сла́ва, глас 7:
Еда́ не мо́щно есть от Бо́га вся́кое сло́во? / Умиле́нною душе́ю поклони́мся Христу́, пла́чуще и стеня́ще к Нему́, / и да́ст Госпо́дь Всемогу́щий исполне́ние вся́каго проше́ния, / его́же про́сим от Него́, / и обря́щет прося́щий благода́ть Бо́жию пред очи́ма Его. / Те́мже и мы умиле́нною душе́ю вопием ко Го́споду, / благодаря́ще и славосло́вяще Всеще́драго Бо́га, / дарова́вшаго нам се́вернаго апо́стола сла́внаго, / блаже́ннаго Три́фона, // земли́ Ко́льския просвети́теля.
И ны́не, Богоро́дичен, глас то́йже:
Моли́, Де́во, c преподо́бным отце́м на́шим Три́фоном / обрести́ нам
на Суде́ преста́вльшимся // ве́лию ми́лость.
Славосло́вие вели́кое и отпу́ст.
НА ЛИТУРГИ́И
Блаже́нны от кано́на преподо́бнаго: пе́сни 3-я и 6-я на 8. Проки́мен, глас 7: Честна́ пред Го́сподем / смерть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Гала́том, зача́ло 213. Аллилу́ия, глас 6: Блаже́н муж боя́йся Го́спода, / в за́поведех Его́ восхо́щет зело́. Сти́х: Си́льно на земли́ бу́дет се́мя его́, / род пра́вых благослови́тся. Ева́нгелие от Луки́, зача́ло 24. Прича́стен: В па́мять ве́чную: