Ака́фист преподо́бному Варлаа́му, Ке́ретскому чудотво́рцу. Па́мять 6/19 ноября́.
Конда́к 1
Избра́нный чудотво́рче и уго́дниче Христо́в, преподо́бне о́тче наш Варлаа́ме, / ве́рный учени́че преподо́бнаго Феодори́та и дру́же преподо́бнаго Три́фона, / ско́рый неду́гов душе́вных и теле́сных цели́телю, / путь свой слеза́ми моли́твы омы́вый / и о́браз покая́ния нам дарова́вый, / приими́ от нас с любо́вию приноси́мое тебе́ хвале́бное пе́ние / и, я́ко име́яй дерзнове́ние ко Го́споду, / моли́твами твои́ми от вся́ких бед и скорбе́й свободи́ нас, // зову́щих ти: Ра́дуйся, преподо́бне Варлаа́ме, // земли́ се́верныя пресла́вный чудотво́рче.
Икос 1 Ду́ха Свята́го теплото́ю, му́дре, / жела́ние се́рдца твоего́ согре́яв / и зи́му страсте́й умертви́в, / погрузи́л еси́ страсте́й все воста́ние / в пучи́не скорбе́й, свяще́нный о́тче Варлаа́ме, / в ладии́ те́сней вози́мь по полно́щному окия́ну-мо́рю, / многоко́зненную си́лу де́монскую низложи́л еси́ / и вконе́ц не́мощны ты́я показа́л еси́. / Мы же, таковы́м по́двигом твои́м дивя́щеся / и благогове́йне чту́ще тя, // воспева́ем ти си́це: Ра́дуйся, я́ко от ю́ности своея́ Бо́га возлюби́л еси́; Ра́дуйся, я́ко в ю́нем телеси́ кре́пость му́жескую яви́л еси́.
Ра́дуйся, си́л диа́вольских без стра́ха посрами́телю; Ра́дуйся, соверше́ннаго послуша́ния духо́вному отцу́ своему́ ревни́телю.
Ра́дуйся, я́ко во искупле́ние согреше́ния суеты́ ми́ра сего́ отре́клся еси; Ра́дуйся, я́ко в ма́ле лади́ице по вода́м ше́ствие твори́л еси́. Ра́дуйся, в покая́нии и ско́рби в зе́льнем обурева́нии носи́мый; Ра́дуйся, на ду́хи нечи́стыя вла́сть от Го́спода прие́мый. Ра́дуйся, преподо́бне Варлаа́ме, // земли́ се́верныя пресла́вный чудотво́рче.
Конда́к 2
Освяще́н у́бо быв Боже́ственною благода́тию / служи́ти свято́му же́ртвеннику, / всесожже́ние слове́сное прине́сл еси́ прия́тно Бо́гови, / А́гнца нескве́рнаго и богоприя́тнаго рука́ма закала́я, / а́нгельскому житию́ поревнова́в непреста́нными моли́твами, / зри́тель и жрец сподо́бися бы́ти, / благода́тию соверша́емь Свята́го Ду́ха. / Мы же, ре́вность твою́ по Бо́зе прославля́юще, // воспои́м Бо́гу песнь: Аллилу́иа.
Икос 2 Христо́ву Плоть раздробля́я рука́ма, / служи́тель Сего́ и́стинный я́влься, / возноше́ния в преми́рная вознося́ / и отту́ду и мир лю́дем свои́м снося́, Варлаа́ме пречу́дне. / Сего́ ра́ди, любо́вию подвиза́еми, // воспева́ем тебе́ такова́я: Ра́дуйся, из мла́да добро́ту Влады́ки Христа́ возлюби́вый; Ра́дуйся, в правове́рии и благоче́стии ве́рно послужи́вый.
Ра́дуйся, прему́драго Феодори́та ча́до духо́вное; Ра́дуйся, страда́нием трехле́тним покры́вый дея́ние грехо́вное. Ра́дуйся, преподо́бнаго Три́фона дру́же и собесе́дниче; Ра́дуйся, святы́х Ио́ны и Ге́рмана сла́вный сподви́жниче. Ра́дуйся, от лю́да помо́рскаго любо́вию прославля́емый; Ра́дуйся, подви́жниче, благода́тию Бо́жиею охраня́емый. Ра́дуйся, Це́ркве Ру́сския украше́ние;
Ра́дуйся, си́лам бесо́вскаго зла устраше́ние. Ра́дуйся, преподо́бне Варлаа́ме, // земли́ се́верныя пресла́вный чудотво́рче.
Конда́к 3
Лука́вый змий не терпя́ше зре́ти тя, вы́ну Бо́гу предстоя́ща / и моли́тву о лю́дех принося́ща, / подхо́дит на твою́ супру́гу, вадя́ насмеше́ние стра́нно. / Ты же ю я́ко узре́в, с я́ростию на ню устреми́вся, / поража́еши ю сме́ртною я́звою / и гро́бу предае́ши. / В себе́ же прише́д, в сокруше́нии серде́чнем, / в ско́рби и в го́рести, наше́дшей на тя, // возопи́ к Бо́гу: Аллилу́иа.
Икос 3 Уби́йству у́бо соверши́вшуся, земли́ те́ло преда́в, / отхо́диши во град Ко́лу / к та́мошнему иере́ю блаже́нному Феодори́ту, / известву́я о уби́йстве и прося́ проще́ния, / слеза́ми зе́млю омака́я, / о соде́янных в я́рости и невоздержа́нии. / Мы же, зря́ще тя, о́тче, зе́льною ско́рбию скорбя́ща, / стеня́ща и пла́чуща вельми́, // глаго́лем ти словеса́ уте́шна: Ра́дуйся, покоре́ние отцу́ духо́вному я́сно яви́вый; Ра́дуйся, слеза́ми скорбе́й путь свой морски́й ороси́вый.
Ра́дуйся, я́ко воста́л еси́, стеня́ и пла́ча о бы́вшем тебе искуше́нии; Ра́дуйся, я́ко во страда́ниих твои́х да обря́щеши спасе́ние. Ра́дуйся, ста́рцем прему́дрым земли́ Полно́щныя воспита́нный; Ра́дуйся, я́ко во смире́нии по́двиг твори́л еси́ покая́нный. Ра́дуйся, во страда́ниих твои́х плоть бе́дне смири́вый; Ра́дуйся, пло́д досто́йный покая́ния сотвори́вый. Ра́дуйся, преподо́бне Варлаа́ме, // земли́ се́верныя пресла́вный чудотво́рче.
Конда́к 4
Повини́ся у́бо ста́рцу Феодори́ту о соде́янных тобо́ю, / и дае́т ти ста́рец и́го ле́гко: / е́же ме́ртваго носи́ти во гро́бе, до́ндеже изгние́т те́ло уме́ршия, / самому́ же в посте́ и моли́тве пребыва́ти / и таково́ воздержа́ние име́ти, / я́ко и ры́бе то́чию еди́ною на Па́сху причаща́тися. / И та́ко жре́бий гре́шника да не спаде́т на тя, / и нераска́янный да не поги́бнеши. / Научи́ и нас, о́тче Варлаа́ме, / воздыха́нием сле́зным сотвори́ти пло́д досто́ин покая́ния // и со умиле́нием серде́ц взыва́ти Бо́гу: Аллилу́иа.
Икос 4 О уби́йстве у́бо ме́ртваго таково́е запреще́ние прии́м, / теча́ше, ра́дуяся, / и, сие́ откопа́в, в ладию́ вложи́в во гро́бе, / сам же в сей второ́й гроб устреми́ся, / с ме́ртвым ше́ствуя ле́том двана́десят путе́й по окия́ну-мо́рю, / по непрохо́дным ме́стом. / Мы же, дивя́щеся сему́ достохва́льному твоему́ послуша́нию, // ублажа́ем тя си́це: Ра́дуйся, ве́ру соверше́нную отцу́ духо́вному яви́вый; Ра́дуйся, с терпе́нием мно́гим го́ресть изгна́ния вкуси́вый.
Ра́дуйся, я́ко многотру́дным путе́м во́днаго стра́нствия ше́ствовал еси́; Ра́дуйся, я́ко гла́дом и жа́ждею плоть свою́ иста́ял еси́. Ра́дуйся, на по́двиг покая́ния, я́ко на крест, взойти помысливый; Ра́дуйся, во дни́ смире́ния своего́ со уме́ршими себе́ сочи́сливый. Ра́дуйся, лю́ду морско́му о́браз хра́брства души́ показа́вый; Ра́дуйся, муже́м море́й полно́щных похвало́ и сла́во. Ра́дуйся, преподо́бне Варлаа́ме, // земли́ се́верныя пресла́вный чудотво́рче.
Конда́к 5
Но́сиши за плещми́ ме́ртвое те́ло, / подо́бяся дре́вним ски́тским отце́м, / терпя́ вся́ку скорбь от ме́ртваго телесе́ три́ ле́та, / до́ндеже ме́ртвое те́ло изгни́ до конца́, и та́ко па́ки земли́ предаде́ е́, / тем исцеле́ния дар от Го́спода сподо́бися прия́ти, Варлаа́ме преподо́бне. / Моли́ Христа́ Бо́га грехо́в оставле́ние пода́ти / чту́щим любо́вию святу́ю па́мять твою́ // и во умиле́нии серде́ц вопию́щим ко Го́споду: Аллилу́иа.
Икос 5 Ви́дел еси́ окия́нскую пучи́ну нечи́сту / и челове́ки непроходи́му от мно́жества че́рвия, / и́же осто́вы верте́ти корабле́й естество́м навы́кших. / А́ще и естество́м непобеди́ми че́рвие бы́ша, / но твоея́ моли́твы Бо́гу послу́шаша, / я́ко отбе́гнути и отыти́ повелева́еши им в непроходи́мая ме́ста от Свята́го Но́са, / иде́же тма и мрак глубо́к безпреста́ни су́ть. / Таковы́м зна́мением и чудесе́м твои́м дивя́щеся, // восхваля́ем тя си́це:
Ра́дуйся, я́ко триле́тне стра́нен и стра́ждущ пла́вствовал еси́;
Ра́дуйся, я́ко че́рвие морсти́и твоея́ моли́твы Бо́гу повину́лися.
Ра́дуйся, я́ко творе́ние сие́ во свое́м ро́де преобразова́лося есть;
Ра́дуйся, я́ко лю́дие ра́довахуся зело́, услы́шавше благу́ю ве́сть.
Ра́дуйся, я́ко путь морски́й стро́ен и благопоспе́шен созда́л еси́;
Ра́дуйся, я́ко во́лю Бо́га Вы́шняго всем се́рдцем взыска́л еси́.
Ра́дуйся, я́ко тобо́ю же о Си́ле Бо́жией естества́ уста́вы премени́шася;
Ра́дуйся, я́ко ны́не корабли́ с пе́снию в мо́ре устреми́шася.
Ра́дуйся, преподо́бне Варлаа́ме, // земли́ се́верныя пресла́вный чудотво́рче.
Конда́к 6
Му́жеством души́ в ве́ру вооружи́вся, / бу́рю, и дождь, и вся́кую возду́шную нужду́ терпя́, / потща́лся еси́ сохрани́ти за́поведь отца́ своего́ духо́внаго / и того́ ра́ди прия́л еси от Вседержи́теля Бо́га вене́ц побе́дный на стра́сти / и на бе́сы исцеле́ние, // воспева́я Бо́гу чудотворя́щему: Аллилу́иа.
Икос 6 Но́сиши ме́ртваго, я́ко жи́ва, в пусты́ню в Чупу́ с собо́ю, / и та́мо моли́твою на врага́ вооружа́ешися, / нестерпи́мыя его стре́лы сокруша́я посто́м и терпе́нием, и обновля́ешися, я́ко оре́л, преподо́бне, / измы́вся и очи́стився в пусты́ни от всех стра́стных дея́ний, / и, я́ко еле́нь, быстротеки́й ко исто́чником вод, / очища́яся змии́ныя я́ди. / Мы же, дивя́щеся таково́му о тебе́ Бо́жию смотре́нию, // ра́достно воспева́ем ти:
Ра́дуйся, я́ко Боготе́чней звезде́ Полно́щней уподо́бился еси́;
Ра́дуйся, я́ко в мо́ри путие́ твоя́ и стези́ твоя́ в вода́х мно́гих соде́ял еси́.
Ра́дуйся, я́ко вся брега́ страны́ се́верныя с пла́чем и слеза́ми обте́кл еси́;
Ра́дуйся, я́ко про́тив зе́льнаго обурева́ния во дни́ и в нощи́ пла́вал еси.
Ра́дуйся, я́ко тобо́ю бы́сть спасе́ние рыбаре́м, в вода́х мно́гих ги́бнущим;
Ра́дуйся, о́браз кре́пости духо́вныя яви́вый всем на мо́ри стра́ждущим.
Ра́дуйся, в пла́вании триле́тнем крест свой терпели́вно носи́вый;
Ра́дуйся, му́жеству во искуше́ниих ве́лиих всех нас научи́вый.
Ра́дуйся, преподо́бне Варлаа́ме, // земли́ се́верныя пресла́вный чудотво́рче.
Конда́к 7
Ви́дел еси́ зи́ждему святы́м Три́фоном оби́тель в Пече́нзе, за окия́ном-мо́рем, / и та́мо устреми́ся ви́дети того́ труды́ и по́двиги. / И, пребы́в немно́го вре́мя, / оставля́еши бо Три́фоново селе́ние, / и возвраща́ешися па́ки к Ке́рети, проро́чески то́му прорече́: / о, Три́фоне, сподо́бился еси́ оби́тель воздви́гнути и бра́тию собра́ти, / бу́дут бо лю́дие и се́ла зде зле неукроти́мы, я́ко ди́вии зве́ри, / твое́й ве́тхой я́рости и остроже́лчию подо́бящиися. / Мы же, дивя́щеся благо́му твоему́ прорече́нию, // Вразуми́вшему тя благода́рственную песнь прино́сим: Аллилу́иа.
Икос 7 Мо́ре у́бо на плещу́ свое́ю тебе́ ноша́ше / из Пече́нги в пусты́ню в у́стие Чупы́, / влеко́м корабли́ свои́ми стру́ями, иде́же ядови́тыя че́рви очи́стил еси́, / и по то́ням телеса́ ме́ртвых, востаю́ща бесо́вским де́йством, ви́де, / и сим усну́ти до Христо́ва Втора́го Прише́ствия повелева́еши, / да не безсме́ртно пребу́дет зло́е, / я́коже рече́ и́же богосло́вию тезоимени́тый Григо́рий. / Мы же, помина́юще толи́кую твою́ к по́двигу духо́вному ре́вность, // со умиле́нием взыва́ем ти такова́я: Ра́дуйся, дни́ вины́ своея́ му́жественне испо́лнивый; Ра́дуйся, триле́тным покая́нным пла́ванием тя́жкий грех исцели́вый.
Ра́дуйся, ре́вностным путе́м твои́м де́моны опали́вый; Ра́дуйся, мно́ги бо от жесто́ких напа́стей и ско́рбей разреши́вый. Ра́дуйся, Бо́жий свети́льниче златы́й неугаса́емый. Ра́дуйся, житию́ и по́двигов дре́вних оте́ц ревни́тель сый; Ра́дуйся, злостра́ждущих от духо́в зло́бы ско́рый засту́пниче.
Ра́дуйся, ско́рбех и смире́нии мно́зем ве́рный помо́щниче; Ра́дуйся, преподо́бне Варлаа́ме, // земли́ се́верныя пресла́вный чудотво́рче.
Конда́к 8
Все у́мное свое́ жела́ние к Бо́гу впери́в, / жите́йския молвы́ до конца́ отри́нул еси́, / в моли́твах, и слеза́х, и злострада́ниих плоть свою́ изнуря́я, / до́бре подвиза́вся про́тиву неви́димаго врага́ ко́зней, / и, победи́в я, путь морски́й от ядови́таго че́рвия / челове́ком без вре́да сотвори́л еси́, / и, веселя́ся, прише́л еси́ к небе́сным черто́гом, / и мно́гими чудесы́ просла́вися, / темже, к тебе с любо́вию притека́юще, // вопие́м Бо́гу: Аллилу́иа.
Икос 8 Отве́рзи ми устне́, преблаже́нне, / богоприя́тными ти моли́твами предстоя́ Бо́гови, / да воспою́ пресла́вное твое́ житие́ и боле́зненну я́зву твою́, / я́же на мо́ри Христа́ ра́ди соверши́л еси́, преподо́бне. / Столп бо яви́ся лю́ду помо́рскому на мо́ри / и пра́вило све́тло – и́ноком на земли́, / ра́вно А́нгелом стяжа́в житие́, / в незаходи́мая вои́стину всели́вся, / многоко́зненнаго врага́ победи́л еси́, / да твои́ми моли́твами спасе́мся, // славосло́вяще тя си́це: Ра́дуйся, во а́нгельский чин облече́нный; Ра́дуйся, к ли́ку преподо́бных сопричте́нный.
Ра́дуйся, исто́чниче, жа́жду грехо́вную утоля́ющий; Ра́дуйся, во́ине Христо́в, бесо́в моли́твою устраша́ющий. Ра́дуйся, боля́щих душе́ю и те́лом безме́здный цели́телю; Ра́дуйся, коле́блющимся в ве́ре о́браза до́браго пода́телю. Ра́дуйся, научи́вый моли́твою кре́пкою тяготы́ морски́я носи́ти; Ра́дуйся, научи́вый на мо́ри наде́жду на спасе́ние храни́ти. Ра́дуйся, преподо́бне Варлаа́ме, // земли́ се́верныя пресла́вный чудотво́рче.
Конда́к 9
Госпо́дь просла́ви Своего́ уго́дника, / я́ко ни гро́б, хода́тай забве́ния, того́ доброде́тели сокры́ти возмо́же, / трубы́ бо ясне́йши вопие́м: / истека́ющими от него́ зна́меньми чу́дне, / не то́чию же бли́жняя, но и да́льняя оглаша́я, / пропове́даем му́жа по́двиги и труды́. / Сего́ ра́ди лю́дие помо́рстии просла́вльшаго тя Го́спода сла́вят, // с ни́миже и мы вопие́м Ему́: Аллилу́иа.
Икос 9 Богоно́се преблаже́нне Варлаа́ме, / все плотско́е мудрова́ние ду́ху повину́л еси́, / поще́ния и изнуре́ния теле́снаго страда́ньми утверди́вся, / я́ко зла́то, в горни́ле искуше́но, сия́я, яви́вся, / прия́телище был еси́ Ду́ха Пресвята́го. / Помина́й нас, чту́щих па́мять твою́ при́сно свяще́нную / и моще́м твои́м покланя́ющихся, / умоли́ Го́спода, да, послу́шая нас, ми́лостив нам бу́дет / во мно́жестве Своея́ бла́гости. / Мы же, иму́ще таково́е безце́нное сокро́вище, // воспева́ем ти си́це: Ра́дуйся, ра́дость Го́спода твоего́ вкуси́вый; Ра́дуйся, мно́гая чудеса́ и знаме́ния от моще́й свои́х яви́вый.
Ра́дуйся, припа́дающим к тебе́ ско́рую по́мощь подава́яй; Ра́дуйся, со всего́ кра́я Помо́рскаго де́моны изгоня́яй. Ра́дуйся, исто́чниче чуде́с, неду́гующих исцеля́яй; Ра́дуйся, в море́х отча́янных и безнаде́жных ободря́яй. Ра́дуйся, я́ко стяжа́л еси́ му́жество и на Бо́га наде́яние; Ра́дуйся, земли́ полно́щныя ве́рное от бед спасе́ние. Ра́дуйся, преподо́бне Варлаа́ме, // земли́ се́верныя пресла́вный чудотво́рче.
Конда́к 10
Прииди́те, лю́бящии пресла́вныя по́двиги святы́х, / восхва́лим преподо́бнаго Варлаа́ма из Ке́рети, / той бо благобытие́ ми́ра сего́ превреди́л есть / и, живо́т свой нивочто́же вмени́в, крест тя́жкий
взем, / Христу́ смире́нием и до́блестию после́довал е́сть. / Мы же Бо́га, Ди́внаго во святы́х Свои́х, / подаю́щаго нам приука́з безприкла́дный и ве́лие наде́яние, // благода́рственне прославля́ем си́це: Аллилу́иа.
Икос 10 Волнобу́рныя молвы́ жития́ избежа́в, / три́ ле́та ше́ствоваше по ледова́тому мо́рю, / земны́х и тле́нных наслажде́ние презре́в, / Христу́ после́довал еси́ / и безмо́лвныя жи́тели возлюби́л еси́, / ко оти́шию же пеще́ры святы́я дости́гнув, со зверьми́ озе́мствуяся, / пусты́нное озлобле́ние усе́рдно подъя́л еси́, / де́монская же ополче́ния и их многоко́зненную си́лу посрами́л еси́. / Те́мже твою́ па́мять при́сно пе́сньми восхваля́ем ве́рно // и вопие́м ти с любо́вию такова́я: Ра́дуйся, в пу́сте мо́ри превели́кий в напа́стех защи́тниче; Ра́дуйся, все́х чрез моря́ стра́нствующих и́стинный засту́пниче.
Ра́дуйся, я́ко в пусты́ни поко́я вита́лище после́днее обре́л еси́; Ра́дуйся, я́ко стра́ждущих от духо́в нечи́стых исцеля́л еси́. Ра́дуйся, скорбя́щим и неча́емым на мо́ри по́мощь подава́яй; Ра́дуйся, жи́знь боле́зненну в пусты́х ме́стех вкуша́яй. Ра́дуйся, богомы́слия и молча́ния и́стинный люби́телю; Ра́дуйся, моли́твиниче, ди́вных чуде́с при́сный пода́телю. Ра́дуйся, преподо́бне Варлаа́ме, // земли́ се́верныя пресла́вный чудотво́рче.
Конда́к 11
Яви́лся еси́ исцеле́ний струя́ оби́льная, / богоблаже́нне о́тче наш Варлаа́ме, / многомяте́жнаго пла́мене у́глие страсте́й угаси́л еси́. / У́зкий и приско́рбный ше́ствовав путь, / вои́стину сна твои́ма очи́ма не дал еси́, / ниже́ пло́ти твоея́ упокое́ния, / и теле́сне у́бо преста́вился еси́, / ду́хом же жив сый, предстои́ши Бо́гу, / Ему́же в житии́ рабо́тал еси́, // благода́рственно воспе́вая: Аллилу́иа.
Икос 11 Сокро́вище моще́й твои́х, Варлаа́ме, / исто́чник показа́ся исцеле́ний, / к ни́мже всяк притека́яй, я́ко от окри́на воды́, почерпа́ет исцеле́ние незави́стно / и избавля́ется вся́ких страсте́й душе́вных и теле́сных. / Сего́ ра́ди тя ублажа́ем, преподо́бне, / благода́рственно взыва́ем // и те́пле вопие́м: Ра́дуйся, я́коже сокро́вище неоску́дно, мо́щи твоя́ нам да́шася; Ра́дуйся, я́ко изба́ви я Господь от запале́ния, и ти́и от огня́ спасо́шася.
Ра́дуйся, я́ко моще́й твои́х бе́си бежа́ху в безво́дное; Ра́дуйся, сердца́ на́ша обраща́яй к покая́нию всепло́дному. Ра́дуйся, я́ко де́монская свире́пства запрети́л еси́; Ра́дуйся, я́ко си́лу язы́ческия тмы́ моли́твою отгоня́л еси́. Ра́дуйся, я́ко и нас благода́тным све́том осиява́еши; Ра́дуйся, я́ко Кол-звездо́, на зе́млю Полно́щную свет излива́еши. Ра́дуйся, преподо́бне Варлаа́ме, // земли́ се́верныя пресла́вный чудотво́рче.
Конда́к 12
Цели́ши незави́стно ве́рно призыва́ющия тя, / цели́тель от Бо́га показа́лся еси́, / очи́стник, блаже́нне, и прогони́тель лука́вых духо́в, / я́ко звезда́ всесве́тлая от пусты́ни, воссия́в чуде́с луча́ми, / просвеща́я вопию́щих: прииди́те, мона́шествующих мно́жество, / днесь Варлаа́ма пе́сньми и пе́ньми восхва́лим, // и ку́пно с ним возра́дуемся Го́сподеви, и воскли́кнем: Аллилу́иа.
Икос 12 Е́же по о́бразу соблю́д невреди́мо, / ум Христо́в на немощно́е естество́ по́стнически поста́вив, / во е́же по подо́бию я́ко мо́щно возше́л еси́: / му́жески в пу́сте мо́ри со гро́бной ше́ствовал еси́ / и сотвори́л еси́ ладию́ во гроб се́жде, / естество́ на по́двиг пону́див, /
потща́лся еси́ плоть порабо́тити ду́ху. / Те́мже жи́тель пусты́нный яви́лся еси́, / пра́вило доброде́тели изве́стнейшее, о́тче наш Варлаа́ме, / вне бо пло́ти и ми́ра быв, / па́че ви́димых пожи́л еси́ и́стинно: / не бо жил еси́ тебе́ самому́, / живя́ше же па́че в тебе́ Христо́с Бо́г на́ш. / Того́ моли́ спасти́ся душа́м на́шим, // вопию́щим ти такова́я: Ра́дуйся, пресла́вне Варлаа́ме, Помо́рия пресве́тлый свети́льниче; Ра́дуйся, в воздержа́нии и благотерпе́нии ско́рый помо́щниче.
Ра́дуйся, я́ко мно́га чудеса́ о Христе́ сотвори́л еси́; Ра́дуйся, я́ко и́миже бесо́в я́рость укроти́л еси́. Ра́дуйся, жа́жды и безпи́щия сто́лпе непоколеби́мый; Ра́дуйся, де́йства диа́вольскаго прогони́телю неодоли́мый. Ра́дуйся, от беснова́ния лю́таго стра́ждущих свободи́телю; Ра́дуйся, почита́ющих па́мять твою́ небе́сный покрови́телю. Ра́дуйся, преподо́бне Варлаа́ме, // земли́ се́верныя пресла́вный чудотво́рче.
Конда́к 13
О, вели́кий уго́дниче Бо́жий, преподо́бне о́тче наш Варлаа́ме, / все у́мное свое́ жела́ние к Бо́гу впери́в, / жите́йския молвы́ до конца́ отри́нул еси́, / в моли́твах, и слеза́х, и злострада́ниих плоть свою́ изнуря́я, / до́бре подвиза́вся про́тиву неви́димаго врага́ ко́зней, / и, победи́в я, веселя́ся, прише́л еси́ к небе́сным черто́гом, / иде́же ны́не мо́лишися непреста́нно, / сохраня́я нас от враг ви́димых и неви́димых / и ненаве́тны соблюда́я от скорбе́й, зол и боле́зней, / да твои́ми моли́твами сподо́бимся в Ца́рствии Небе́снем с тобо́ю и со все́ми Небе́сными Си́лами // А́нгельскую песнь воспева́ти: Аллилу́иа, Аллилу́иа, Аллилу́иа. (Этот Конда́к читается трижды, затем И́кос 1 и Конда́к 1)
Икос 1 Ду́ха Свята́го теплото́ю, му́дре, / жела́ние се́рдца твоего́ согре́яв / и зи́му страсте́й умертви́в, / погрузи́л еси́ страсте́й все воста́ние / в пучи́не скорбе́й, свяще́нный о́тче Варлаа́ме, / в ладии́ те́сней вози́мь по полно́щному окия́ну-мо́рю, / многоко́зненную си́лу де́монскую низложи́л еси́ / и вконе́ц не́мощны ты́я показа́л еси́. / Мы же, таковы́м по́двигом твои́м дивя́щеся / и благогове́йне чту́ще тя, // воспева́ем ти си́це: Ра́дуйся, я́ко от ю́ности своея́ Бо́га возлюби́л еси́; Ра́дуйся, я́ко в ю́нем телеси́ кре́пость му́жескую яви́л еси́.
Ра́дуйся, си́л диа́вольских без стра́ха посрами́телю; Ра́дуйся, соверше́ннаго послуша́ния духо́вному отцу́ своему́ ревни́телю. Ра́дуйся, я́ко во искупле́ние согреше́ния суеты́ ми́ра сего́ отре́клся еси; Ра́дуйся, я́ко в ма́ле лади́ице по вода́м ше́ствие твори́л еси́. Ра́дуйся, в покая́нии и ско́рби в зе́льнем обурева́нии носи́мый; Ра́дуйся, на ду́хи нечи́стыя вла́сть от Го́спода прие́мый. Ра́дуйся, преподо́бне Варлаа́ме, // земли́ се́верныя пресла́вный чудотво́рче.
Конда́к 1
Избра́нный чудотво́рче и уго́дниче Христо́в, преподо́бне о́тче наш Варлаа́ме, / ве́рный учени́че преподо́бнаго Феодори́та и дру́же преподо́бнаго Три́фона, / ско́рый неду́гов душе́вных и теле́сных цели́телю, / путь свой слеза́ми моли́твы омы́вый / и о́браз покая́ния нам дарова́вый, / приими́ от нас с любо́вию приноси́мое тебе́ хвале́бное пе́ние / и, я́ко име́яй дерзнове́ние ко Го́споду, / моли́твами твои́ми от вся́ких бед и скорбе́й свободи́ нас, // зову́щих ти:
Ра́дуйся, преподо́бне Варлаа́ме, // земли́ се́верныя пресла́вный чудотво́рче.
Молитва преподобному Варлааму Керетскому О, преподо́бне о́тче наш Варлаа́ме, я́ко име́яй дерзнове́ние ко Творцу́, Изба́вителю всех, И́же в Тро́ице Святе́й покланя́емому и́стинному Христу́ Бо́гу на́шему, помяни́ нас, гре́шных и недосто́йных щедро́т Его́, у стра́шнаго Престо́ла Го́спода Сла́вы и Судии́ всех, иде́же ты в со́нме пра́ведных предстои́ши. Да пода́ст Госпо́дь нам непотре́бным, погруже́нным в бе́здну грехо́вную, покая́ние серде́чное, слез излия́ние и пла́мень стыда́ во утро́бах на́ших. В сем же пла́мени да сгоря́т вся на́ша беззако́ния и непра́вды, я́же соде́лали есмы́ во вся дни живота́ на́шего, да не бу́дем насле́дницы пла́мене гее́ннскаго, гото́ваго пожре́ти ду́ши на́ша. Мо́лим тя, о́тче святы́й, умоли́ Го́спода Вседержи́теля дарова́ти нам сил и мудро́сти, во е́же изба́витися от вся́каго тлетво́рнаго стра́стнаго де́йства, от поползнове́ния грехо́внаго. Упроси́, о́тче Варлаа́ме, Всеми́лостиваго Бо́га дарова́ти нам ре́вность о житии́ ми́рнем и безгре́шнем, о стяжа́нии моли́твы чи́стыя, о пребыва́нии в посте́ и доброде́телех христиа́нских. Не премолчи́, вопия́ за ны ко Го́споду, да с терпе́нием тече́м на предлежа́щий нам по́двиг, иму́ще в житии́ твое́м о́браз назида́ния не то́кмо лико́м и́ноческим, но и лю́дем мирски́м. Научи́ нас, богоно́сне о́тче Варлаа́ме, ка́ятися твои́м покая́нием суро́вым, полага́тися несумне́нно на во́лю Го́спода на́шего, я́ко да и ма́лая лади́ица сме́ртнаго сего́ телесе́ на́шего без препя́тия одоле́ет бу́рный океа́н грехо́вных страсте́й ми́ра сего́ и к ти́хому приста́нищу притече́т, иде́же ты и вси от ве́ка Бо́гу угоди́вшии пребыва́ют во Христе́ Иису́се Го́споде на́шем, Ему́же подоба́ет вся́кая сла́ва, че́сть и поклоне́ние, со Безнача́льным Его́ Отце́м, и Пресвяты́м, и Благи́м, и Животворя́щим Его́ Ду́хом, ны́не, и при́сно, и во ве́ки веко́в. Ами́нь.
Ина молитва преподобному Варлааму Керетскому О, преподо́бне о́тче наш Варлаа́ме, я́ко име́яй дерзнове́ние ко Творцу́, Изба́вителю всех, И́же в Тро́ице Святе́й покланя́емому и́стинному Христу́, Бо́гу на́шему, помяни́ нас в моли́твах свои́х и всех нас моле́ния, Бо́гу возсыла́емая, приими́ и принеси́ я хода́тайственне. Мо́лим тя, о́тче святы́й, изба́ви ны от вся́кия напа́сти, и на мо́ри от зе́льнаго обурева́ния, и от всех ви́димых и неви́димых враг ненаве́тны соблюди́, я́ко да твои́ми моли́твами, свя́те, согреше́ний на́ших оставле́ние получи́м и ве́чных благ сподо́бимся благода́тию и человеколю́бием Го́спода на́шего Иису́са Христа́, Ему́же сла́ва со Отце́м и Святы́м Ду́хом, ны́не, и при́сно, и во ве́ки веко́в. Ами́нь.