МЕ́ СЯЦА НОЯБРЯ́ В 6-Й ДЕНЬ, (19 ноября́ по н. ст.)
Преподо́бнаго и Богоно́снаго отца́ на́шего Варлаа́ма Ке́ретскаго, чудотво́рца
НА МА́ЛОЙ ВЕЧЕ́РНИ
На Го́споди, воззва́х: стихи́ры на 4. Глас 4:
Ду́ха Свята́го теплото́ю, му́дре, жела́ние се́рдца твоего́ согре́яв / и зи́му страсте́й умертви́в, / погрузи́л еси́ страсте́й воста́ние в пучи́не скорбе́й, / свяще́нный о́тче Варлаа́ме, / в ладии́ те́сней вози́мь по мо́рю полно́щному, / многоко́зненную си́лу де́монскую низложи́л еси́ / и в коне́ц не́мощны ты́я показа́л еси́, / небе́сная же во́инства удиви́в терпе́нием свои́м, / я́ко по́стников подража́тель и преподо́бных сожи́тель, / с ни́миже моли́ся Го́сподеви поми́ловатися душа́м на́шим. (Дважды). Яви́лся еси́ исцеле́ний струя́ оби́льная, / богоблаже́нне о́тче наш Варлаа́ме, / многомяте́жнаго пла́мене у́глие страсте́й угаси́л еси́. / У́зкий и приско́рбный ше́ствовав путь, / вои́стину не дал еси́ сна очи́ма твои́ма, / ниже́ пло́ти твоея́ упокое́ния, / и теле́сне у́бо преста́вился еси́, / ду́хом же жив, предстои́ши Бо́гу, / Ему́же в житии́ име́я дерзнове́ние рабо́тал еси́, // моли́ спасти́ся душа́м на́шим.
Волнобу́рныя молвы́ жития́ избежа́в, / три ле́та ше́ствоваше по Ледова́тому мо́рю, / земны́х и тле́нных наслажде́ние презре́в, / Христу́ после́довал еси́ / и пусты́нныя жи́тели возлюби́л еси́, / ко оти́шию же пеще́ры святы́я дости́гнув, / со зверьми́ жи́тельствуя, / пусты́нное озлобле́ние усе́рдно подъя́л еси́, / де́монская же ополче́ния и их многоко́зненную си́лу посрами́л еси́. // Те́мже твою́ па́мять при́сно пе́сньми восхваля́ем ве́рно.
Сла́ва, глас 8:
Прииди́те, мона́шествующих мно́жество, днесь / Варлаа́ма пе́сньми и пе́ньми восхва́лим, глаго́люще: / ра́дуйся, пресла́вне Варлаа́ме, Помо́рия пресве́тлый свети́льниче; / ра́дуйся, благочести́ваго отца́ духо́внаго о́трасле; / ра́дуйся, я́ко звезда́ полно́щная воздержа́ния и благотерпе́ния, высота́ми сия́я, яви́лся еси́, / ра́дуйся, я́ко мно́га чудеса́ о Христе́ сотвори́л еси́; / ра́дуйся, целому́дрия и безпи́щия сто́лпе, / и́мже де́монская
свире́пства искорени́шася; / ра́дуйся, я́ко увяди́л еси́ плотска́я мудрова́ния; / ра́дуйся, преподо́бне Варлаа́ме, // ду́ши на́ша просвеща́яй покая́нием.
И ны́не, Богоро́дичен, глас то́йже:
Влады́чице, приими́ моли́твы раб Твои́х // и изба́ви нас от вся́кия ну́жды и печа́ли.
Проки́мен дне.
На стихо́вне стихи́ры, глас 1.
Подо́бен: Небе́сных чино́в: Блаже́нне Варлаа́ме, / дре́вняго челове́ка совле́клся еси́ со страстьми́ / и во Христа́ обле́клся еси́ вои́стину: / те́мже обличи́л еси́, преподо́бне, мно́гая вра́жия ополче́ния. / Ве́рно ны́не соше́дшеся в па́мять твою́, о́тче, / ублажа́ем тя любо́вию, // велича́юще Просла́вльшаго тя.
Стих: Честна́ пред Гóсподем // смерть преподóбных Егó.
Страсте́й победи́телю, / пло́ти томи́телю, / язы́ка воздержа́телю, / о всех моле́бник быв, о́тче Варлаа́ме, // приими́ торжеству́ющия любо́вию всесвяще́нную па́мять твою́.
Стих: Блаже́н муж, боя́йся Го́спода, // в за́поведех Его́ восхо́щет зело́.
Чи́стыми твои́ми моли́твами / Бóгови прибли́жився, / благода́ть и́маши нечи́стыя отгоня́ти дýхи от челове́к. / Приими́ ны́не пе́ние чад твои́х, преподо́бне, / ра́достно торжеству́ющих в честне́й твое́й па́мяти, // Варлаа́ме, о́тче наш.
Сла́ва, и ны́не, Богорóдичен, глас тóйже:
Обра́дованная, ра́дуйся, / Я́же Ра́дость ми́ру рóждшая, / Христа́ Жизнода́вца, // и прама́тернюю, Де́во, печа́ль отъе́мшая.
Тропа́рь пи́сан на Вели́цей вече́рни. Ектения́ ма́лая и отпу́ст.
НА ВЕЛИ́ЦЕЙ ВЕЧЕ́РНИ
Блаже́н муж: 1-й антифо́н.
На Го́споди, воззва́х: стихи́ры на 8, глас 8.
Подо́бен: Му́ченицы Госпо́дни: Прииди́те, лю́бящии пресла́вныя по́двиги святы́х, / восхва́лим преподо́бнаго Варлаа́ма из Ке́рети, / той бо благобытие́ ми́ра сего́ превреди́л есть / и живо́т свой ни во что́же вмени́в крест тя́жкий взем, / Христу́ смире́нием и до́блестию после́довал есть. / Мы же прославля́ем Бо́га, ди́внаго во святы́х Свои́х, // подаю́щаго нам мир и ве́лию ми́лость. (Три́жды).
Страда́нием ненача́емым пе́рвее тя́жко искуси́вся, / в пусты́ни же посто́м тече́ние боже́ственное соверши́в, / на небеса́ возше́л еси́ и ны́не Христу́ предстои́ши, / Варлаа́ме, о́тче преподо́бне, // моля́ся те́пле за ны, пою́щия тя. (Три́жды).
Яви́лся еси́, богоблаже́нне, му́драя плени́ца, / преподо́бне о́тче наш Варлаа́ме, / связу́я мно́гая враго́в ополче́ния, / Бо́жиею си́лою укрепля́емь, / над страстьми́ воцари́лся еси́. / И упра́влен есть, доброхва́льне, в Ца́рствии Бо́жии // во спасе́ние душ на́ших. (Два́жды).
Сла́ва, глас 6:
Е́же по о́бразу соблю́д невреди́мо, / ум Христо́в на немощно́е естество́ по́стнически поста́вив, / во е́же по подо́бию я́ко мо́щно возше́л еси́: / му́жески в пу́сте мо́ри с ме́ртвою ше́ствовал еси́ / и сотвори́л еси́ ладию́ во гроб, / естество́ на по́двиг пону́див, / потща́лся еси́ плоть порабо́тити ду́ху. / Те́мже жи́тель пусты́нный яви́лся еси́, / пра́вило доброде́тели изве́стнейшее, о́тче наш Варлаа́ме, / вне бо пло́ти и ми́ра быв, / па́че ви́димых пожи́л еси́ и́стинно: / не бо жил еси́ тебе́ самому́, / живя́ше же па́че в тебе́ Христо́с Бог наш. // Того́ моли́ спасти́ся душа́м на́шим.
И ны́не, Богоро́дичен:
Кто Тебе́ не ублажи́т, Пресвята́я Де́во? / Кто ли не воспое́т Твоего́ Пречи́стаго Рождества́? / Безле́тно бо от Отца́ возсия́вый Сын Единоро́дный, / То́йже от Тебе́, Чи́стыя, про́йде, / неизрече́нно вопло́щься, / естество́м Бог Сый / и естество́м быв Челове́к нас ра́ди, / не во двою́ лицу́ разделя́емый, / но во двою́ естеству́ / несли́тно
познава́емый. / Того́ моли́, Чи́стая, Всеблаже́нная, // поми́ловатися душа́м на́шим.
Вход. Проки́мен дне. Чте́ния три. Прему́дрости Соломо́новы чте́ние: Пра́ведницы во ве́ки живу́т, и в Го́споде мзда их, и попече́ние их у Вы́шняго. / Сего́ ра́ди прии́мут Ца́рствие благоле́пия и вене́ц добро́ты от руки́ Госпо́дни, зане́ десни́цею покры́ет я и мы́шцею защити́т их. / Прии́мет всеору́жие рве́ние свое́ и вооружи́т тварь в месть враго́м. / Облече́тся в броня́ пра́вды и возложи́т шлем – суд нелицеме́рен. / Прии́мет щит непобеди́мый – преподо́бие, поостри́т же напра́сный гнев во ору́жие, спобо́рет же с ним мир на безу́мныя. / По́йдут праволу́чныя стре́лы мо́лниины и, я́ко от благокру́гла лу́ка облако́в, на наме́рение полетя́т. / И от каменоме́тныя я́рости испо́лнь паду́т гра́ды, вознегоду́ет
на них вода́ морска́я, ре́ки же потопя́т я на́гло. / Сопроти́в ста́нет им дух
си́лы и, я́ко ви́хор, разве́ет их, и опустоши́т всю зе́млю беззако́ние, и злоде́йство преврати́т престо́лы си́льных. / Слы́шите у́бо, ца́рие, и разуме́йте, навы́кните, судии́ конце́в земли́. / Внуши́те, держа́щии мно́жества и гордя́щиися о наро́дех язы́ков, я́ко дана́ есть от Го́спода держа́ва вам и си́ла от Вы́шняго. Прему́дрости Соломо́новы чте́ние: Пра́ведных ду́ши в руце́ Бо́жией, и не прико́снется их му́ка. / Непщева́ни бы́ша во очесе́х безу́мных умре́ти, и вмени́ся озлобле́ние исхо́д их, и е́же от нас ше́ствие – сокруше́ние, они́ же суть в ми́ре. / И́бо пред лице́м челове́ческим а́ще и му́ку прии́мут, упова́ние их безсме́ртия испо́лнено. / И вма́ле нака́зани бы́вше, вели́кими благоде́тельствовани бу́дут, я́ко Бог искуси́ я и обре́те их досто́йны Себе́. / Я́ко зла́то в горни́ле, искуси́ их и, я́ко всепло́дие же́ртвенное, прия́т я. / И во вре́мя посеще́ния их возсия́ют и, я́ко и́скры по сте́блию, потеку́т. / Су́дят язы́ком и облада́ют людьми́, и воцари́тся Госпо́дь в них во ве́ки. / Наде́ющиися Нань разуме́ют и́стину, и ве́рнии в любви́ пребу́дут Ему́. / Я́ко благода́ть и ми́лость в преподо́бных Его́, и посеще́ние во избра́нных Его́. Прему́дрости Соломо́новы чте́ние: Пра́ведник, а́ще пости́гнет сконча́тися, в поко́и бу́дет. / Ста́рость бо честна́ не многоле́тна, ниже́ в числе́ лет исчита́ется. / Седи́на же есть
му́дрость челове́ком, и во́зраст ста́рости – житие́ нескве́рное. / Благоуго́ден Бо́гови быв, возлю́блен бысть, и живы́й посреде́ гре́шник, преста́влен бысть. / Восхище́н бысть, да не зло́ба измени́т ра́зума его́, или́ ле́сть прельсти́т ду́шу его́. / Раче́ние бо зло́бы помрача́ет до́брая, и паре́ние по́хоти пременя́ет ум незло́бив. / Сконча́вся вма́ле, испо́лни ле́та до́лга, уго́дна бо бе Го́сподеви душа́ его́, сего́ ра́ди потща́ся от среды́ лука́вствия. / Лю́дие же ви́девше и не разуме́вше, ниже́ поло́жше в помышле́нии таково́е, я́ко благода́ть и ми́лость в преподо́бных Его́ и посеще́ние во избра́нных Его́.
На литии́ стихи́ра хра́ма и свята́го стихи́ры, глас 5:
Преподо́бне о́тче Варлаа́ме, / ты, измла́да возлюби́в добро́ту Влады́ки Христа́ / и к Нему́ жела́ние невозвра́тно име́яй, / в правове́рии и благоче́стии подвиза́лся еси́. / Егда́ супоста́т диа́вол искуси́ тя, о́тче преподо́бне, / ты ру́ку свою́ на ве́сла кре́пко возложи́л еси́, / и отню́д вспять не зрел еси́, / и мно́ги ско́рби претерпе́л еси́. / Но, пря́мо стопы́ твоя́ по словеси́ отца́ духо́внаго направля́я / вся ко́зни вра́жия препобеди́л еси́ // и вене́ц побе́дный от Го́спода прия́л еси́.
Бу́ри океа́на хла́дна не убоя́вся, / любо́вию Христо́вою согрева́емь, / проти́ву зе́льнаго обурева́ния пла́ваше, досточу́дне Варлаа́ме, / чу́вственныя стра́сти победи́в воздержа́ния брозда́ми, / ре́вность к небе́сным на мо́ри и на земли́ показа́л еси́ / и вся́кое плотско́е жела́ние ду́хови повину́л еси́. / Тем ны́не в небе́сных селе́ниих водворя́ешися, // моли́ о душа́х на́ших.
Прииди́те, возра́дуемся, лю́дие земли́ се́верныя, / пра́зднующе па́мять добропобе́днаго му́жа, / преподо́бнаго отца́ на́шего Варлаа́ма, / той бо, многотру́дным путе́м земна́го и водна́го стра́нствия ше́ствуя, / ве́рою несумне́нною и терпе́нием кре́пким востече́ на предлежа́щий ему́ по́двиг / и лю́тыя ко́зни вра́жия посрами́. / Сего́ ра́ди сла́вою ве́чною // увенча́ Человеколю́бец Госпо́дь уго́дника Своего́.
Сла́ва, глас то́йже:
Боготе́чней звезде́ полно́щной уподо́бился еси, / досточу́дне Варлаа́ме, / в мо́ри путие́ твои́ бы́ша, / и стези́ твоя́ в вода́х мно́гих, / вся бре́ги страны́ се́верныя обте́кл еси́, / я́ко денни́ца, Со́лнцу Пра́вды преходя́щая, / Тому́ Еди́ному после́довав, / равноа́нгельно в пеще́ре
пожи́л еси́, / те́мже ны́не на небесе́х со А́нгелы Христу́ предстои́ши, // со дерзнове́нием моля́ся о душа́х на́ших.
И ны́не, Богоро́дичен:
Храм и дверь еси́, / пала́та и престо́л Царе́в, / Де́во Всечестна́я, / Е́юже Изба́витель мой, Христо́с Госпо́дь, / во тьме спя́щим яви́ся, / Со́лнце Сый пра́вды, просвети́ти хотя́, / я́же созда́ по о́бразу Своему́ руко́ю Свое́ю. / Те́мже, Всепе́тая, / я́ко ма́терне дерзнове́ние к Нему́ стяжа́вшая, // непреста́нно моли́ спасти́ся душа́м на́шим.
На стихо́вне стихи́ры, глас 1.
Подо́бен: Небе́сных чино́в: Наста́, богоно́сне Варлаа́ме, / со́лнца светле́йший твой пра́здник, / озаря́ет приходя́щия к Тебе́ ве́рою, / и безсме́ртием благоуха́ет, / и душа́м источа́ет исцеле́ния, // Варлаа́ме преподо́бне, моли́твенниче о душа́х на́ших.
Стих: Честна́ пред Го́сподем / смерть преподо́бных Его́.
Волне́ний мно́жество невла́жно проходя́, / безпло́тныя враги́ струя́ми слез твои́х кре́пко погрузи́л еси́, / богому́дре Варлаа́ме преподо́бне, / и, чуде́с дар прии́м, вся́кия многоразли́чныя стра́сти исцеля́еши, // моли́ непреста́нно о всех нас.
Стих: Блаже́н муж, боя́йся Го́спода, / в за́поведех Его́ восхо́щет зело́.
Я́ко хра́брый во́ин Христо́в, / благословле́н был еси́ духо́вным свои́м отце́м и наказа́телем, / проти́ву нача́л и власте́й те́мных, / мироде́ржцев ве́ка сего́ воста́л еси́, / епитимию́ многоболе́зненну блюдя́. / Мы же, дивя́щеся неизрече́нному о тебе́ Бо́жию Про́мыслу, / припа́даем ко Христу́ Влады́це, Подвигополо́жнику, // ско́рби на́ша в ра́дость Претворя́ющему.
Сла́ва, глас 8:
На ве́сла возложи́л еси́, страда́льче, / де́лание рук твои́х, / исполня́я
Боже́ственная повеле́ния, / и не возврати́лся еси́ зря вспять: / но ше́ствовал еси́ путе́м те́сным и приско́рбным / до конца́ вчине́ннаго испыта́ния, // имже Госпо́дь па́мять о тебе́ сотвори́.
И ны́не, Богоро́дичен:
Безневе́стная Де́во, / Я́же Бо́га неизрече́нно заче́нши пло́тию, / Ма́ти Бо́га Вы́шняго, / Твои́х рабо́в мольбы́ приими́, Всенепоро́чная, / всем
подаю́щи очище́ние прегреше́ний, / ны́не на́ша моле́ния прие́млющи, // моли́ спасти́ся всем нам.
На благослове́нии хлебо́в тропа́рь свято́му два́жды,
и Богоро́дице Де́во: еди́ножды. Тропа́рь, глас 1: Боже́ственною свы́ше просвети́вся благода́тию, / ева́нгельски Христу́ после́довал еси́, / благослове́нием духо́внаго отца́ своего́/ всем се́рдцем твори́л еси́ во́лю Бо́жию, / и, сего́ ра́ди восприи́м си́лу на врага́ сопроти́внаго, / не убоя́лся еси́ морски́я тяготы́ и хла́да, ниже́ уклони́ся, / в свое́м пла́че по Бо́зе не усыпа́я, / в ма́ле ладии́ по вода́м ше́ствие твори́л еси́, проти́ву зе́льнаго обурева́ния пла́вая, / и, равноа́нгельное житие́ пожи́в, / те́мже и по преставле́нии источа́еши чуде́с благода́ть, / да вси тебе́ возопие́м: Варлаа́ме преблаже́нне, // моли́ Христа́ Бо́га, да спасе́т ду́ши на́ша.
НА У́ТРЕНИ
На Бог Госпо́дь: тропа́рь свято́му два́жды.
Сла́ва, и ны́не:
Богоро́дичен: Гаврии́лу веща́вшу:
По 1-й стихоло́гии седа́лен, глас 4.
Подо́бен: Ско́ро предвари́: Путе́м те́сным и приско́рбным / три ле́та ше́ствовал еси́ по Ледова́тому мо́рю, / крест свой на ра́мо возложи́в, преподо́бне о́тче наш Варлаа́ме. / Тьма же́стока и мраз нощны́й тща́хуся запина́ти ти. / Сту́дный ветр се́верный яри́ся и возопи́, я́ко зверь, / и вода́, я́ко во броню́, в лед облече́ся и бысть же́стока зело́. / Ужасе́ся не́бо о сем, и океа́н ве́лий вострепета́ зело́, / мы же умолча́хом, и возскорбе́хом, / и убоя́хомся Го́спода, / вси бо святи́и в руце́ Его́ суть. Сла́ва, и ны́не, Богоро́дичен: Обнови́ла еси́, Чи́стая, Боже́ственным Рождество́м Твои́м / истле́вшее страстьми́ земноро́дных ме́ртвенное существо́/ и воздви́гла еси́ вся от сме́рти к животу́ нетле́ния. / Те́мже Тя по до́лгу блажи́м вси, Де́во Препросла́вленная, / я́коже прорекла́ еси́.
По 2-й стихоло́гии седа́лен, глас 5.
Подо́бен: Собезнача́льное Сло́во: Земны́х и тле́нных наслажде́ние презре́в, / Христу́ после́довал еси́ и пусты́нныя жи́тели возлюби́л еси́, / обре́те пеще́ру и жили́ще / и две́ри загради́, со зверьми́ жи́тельствуя, / претерпе́л еси́ пусты́нное озлобле́ние усе́рдно, / полки́ же отрази́л еси́ де́монов му́жественне. / Те́мже твою́ па́мять при́сно пе́сньми восхваля́ем ве́рно. Сла́ва, и ны́не, Богоро́дичен: Ужа́сно чу́до зача́тия, / и несказа́нен о́браз рождества́ в Тебе́ позна́ся, Присноде́во Чи́стая, / ужаса́ет мой ум и удивля́ет помышле́ние, / сла́ва Твоя́, Богоро́дице, всем простре́ся / во спасе́ние душ на́ших.
По полиеле́и седа́лен, глас 1.
Подо́бен: Гроб Твой, Спа́се: Погрузи́л еси́ страсте́й все восста́ние / в пучи́не скорбе́й, свяще́нный о́тче, / в ладии́ те́сней вози́мь три ле́та, / с ме́ртвою ше́ствуя в ко́еждо ле́то двана́десят путе́й по полно́щному мо́рю, / до́ндеже те́ло ея́ изгни́ до конца́, / тем исцеле́ния дар от Го́спода прия́л еси́, Варлаа́ме преподо́бне, / и та́ко преше́л еси́ жите́йскую пучи́ну / и жизнь безконе́чную по сме́рти прия́л еси́: / те́мже днесь Христо́ва Це́рковь пра́зднует твою́ досточу́дную па́мять, / преподо́бных украше́ние. Сла́ва, и ны́не, Богоро́дичен: Наста́ви ны на путь покая́ния, / уклоня́ющияся при́сно к злым безпу́тием/ и Преблага́го прогне́вающия Го́спода, / Неискусобра́чная, Благослове́нная Мари́е, / прибе́жище отча́янных челове́ков, / Бо́жие обита́лище. Степе́нна, 1-й антифо́н, 4 гла́са. Проки́мен, глас 4: Честна́ пред Го́сподем // смерть преподо́бных Его́.
Стих: Что возда́м Го́сподеви о всех, // я́же воздаде́ ми? Вся́кое дыха́ние: Ева́нгелие от Матфе́я, зача́ло 43.
По 50-м псалме́ стихи́ра, глас 6:
Преподо́бен и че́стен был еси́, свети́льник Боже́ственный и светоно́сный, / не убоя́ся морски́я тяготы́ и хла́да, ниже́ уклони́ся, / в пла́че по Бо́зе не усыпа́я, / в ма́ле ладии́ по вода́м ше́ствие твори́л еси́, / преди́вная чудеса́ явля́я пред наро́дом се́верным в земли́ Помо́рстей. /
Того́ моли́твами, Христе́, // да́руй нам преспе́яние жития́, и ве́ры, и ра́зума духо́внаго.
Кано́н Богоро́дице со ирмосо́м на 6 и преподо́бнаго1 на 6, глас 8.
Песнь 1
Ирмо́с:
Мо́ре огусти́л еси́, / погрузи́вый со ору́жием го́рдаго фарао́на, / и лю́ди спасл еси́ немо́кренно, Господи, / и ввел еси́ я в го́ру святы́ни, вопию́щия: // пои́м Тебе́, Бо́гу на́шему, песнь побе́дную, я́ко просла́вися.
Запе́в: Преподо́бне о́тче наш Варла́аме, / моли́ Бо́га о нас. Препе́тая Соесте́ственная Тро́ице, / Преблаги́й Бо́же, И́же па́че ума́ да́ры рабо́м сим дая́/ и нам све́тлую посли́ благода́ть, всех страсте́й очища́ющую, / песнь ны́не начина́ющим. Освяще́н быв Боже́ственною благода́тию / служи́ти свято́му же́ртвеннику, / всесожже́ние прине́сл еси́ прия́тно Бо́гови, / я́ко же Ааро́н
по зако́ну а́гнца во всесожже́ние, / прообра́жая во́льное страда́ние / и
смерть Христо́ву за весь мир. Христо́ву Плоть раздробля́я рука́ма, / служи́тель Сего́ и́стинный я́влься, / возноше́ния в преми́рная вознося́ / и отту́ду мир лю́дем свои́м принося́, / Варлаа́ме пречу́дне. Благода́тию Бо́жиею победи́тель на ду́хи лука́выя показа́лся еси́, о́тче Варлаа́ме, / зело́ кре́пко смири́лся еси́ покая́нием, / тя́жкия ско́рби и боле́зни претерпе́л еси́, / псалмо́в пе́ние усе́рдно ко Христу́ вознося́. / Помози́ и нам, преподо́бне, се́тей лука́ваго избе́гнути. Ве́лиим посто́м гре́шную плоть свою́ усмири́л еси́, / стра́сти душетле́нныя победи́в воздержа́ния брозда́ми, / ду́шу свою́ слеза́ми покая́ния омы́л еси́. / Моли́ о нас, о́тче преподо́бне, / да скве́рны грехо́вныя очи́стимся. Богоро́дичен: Вели́кий во проро́цех Моисе́й Тя написа́ иногда́: / Скрижа́ль богообра́зне, / Све́щник све́та, и Сень, / и Жезл процве́тший, Всенепоро́чная, / и Ру́чку, ма́нну нося́щую, Е́юже возведо́хомся / от земли́ к высоте́.
«Канон преподобному Варламу Керетьцкому, новому чюдотворцу». Сочинение Соловецкого архимандрита Сергия (Шелонина) (1-я пол. XVII в.). Рукописное собрание Псковского музея-заповедника Ф. Никандровой пустыни. № 292. Лл. 413–420 об. С незначительными правками.
Песнь 3
Ирмо́с:
Утвержде́й руко́ю Твое́ю, Сло́ве Бо́жий, небеса́, / просвеще́нием Твоего́ и́стинннаго позна́ния, // утверди́ и нас, на Тя наде́ющихся, сердца́.
А́гнца нескве́рнаго и Богоприя́тнаго рука́ма закала́я, / а́нгельскому житию́ поревнова́в непреста́нными моли́твами, / зри́тель и жрец сподо́бися бы́ти, / благода́тию соверша́емь Свята́го Ду́ха. Лука́вый змий не терпя́ зре́ти тя, вы́ну Бо́гу предстоя́ща / и моли́тву о лю́дех принося́ща, / ва́дит на супру́жницу твою́. / Ты же с я́ростию на ню устреми́вся, / поража́еши ю сме́ртною я́звою / и гро́бу предае́ши. Уби́йству соверши́вшуся, земли́ те́ло преда́л еси́, / отхо́диши во град Ко́лу / ко иере́ю блаже́нному Феодори́ту, / изве́ствуя о уби́йстве и жела́я проще́ния, / слеза́ми зе́млю омака́я, / о соде́янных в я́рости и невоздержа́нии. Услы́шав иере́й о соде́янных тобо́ю, / дае́т ти и́го / носи́ти ме́ртвую во гро́бе, до́ндеже изгние́т те́ло ея́, / самому́ же в посте́ и моли́тве пребыва́ти / и таково́ воздержа́ние име́ти, / я́ко и ры́бу то́чию на Па́сху вкуша́ти. Таково́е запреще́ние прии́м, / теча́ше, ра́дуяся, / и, те́ло откопа́в, в ладию́ вложи́в во гро́бе, / и сам я́ко во гро́б устреми́вся в ню, / с ме́ртвою ше́ствоваше ле́том двана́десят путе́й по мо́рю, / по непрохо́дным место́м. Богоро́дичен: Ю́же ле́ствицу дре́вле Иа́ков ви́де, / прообразу́ющу о Тебе́, Богома́ти, рече́: / степе́нь Бо́жия сия́, я́же досто́йно слы́шиши;/ ра́дуйся, Обра́дованная, / Госпо́дь с Тобо́ю. Седа́лен, глас 8: Но́сиши за плещма́ ме́ртвое те́ло, / подо́бяся дре́вним ски́тским отце́м, / превита́я по гора́м и по верте́пам, я́ко пти́ца, / терпя́ смрад и вся́ку скорбь от ме́ртваго телесе́, / я́коже Ники́фор, вели́кий патриа́рх, / терпе́ от разбо́йника, уме́ршаго в верте́пе. / Он у́бо три ме́сяцы, ты же три ле́та, / до́ндеже ме́ртвое те́ло изгни́ до конца́, и та́ко па́ки е земли́ предаде́, / тем исцеле́ния дар от Го́спода сподо́бися прия́ти, Варлаа́ме преподо́бне, о́тче наш. / Моли́ Христа́ Бо́га грехо́в оставле́ние пода́ти / чту́щим любо́вию святу́ю па́мять твою́.
Сла́ва, и ны́не, Богоро́дичен:
Я́ко Де́ву и Еди́ну в жена́х, Тя, без се́мене Ро́ждшую Бо́га пло́тию, / вси ублажа́ем, ро́ди челове́честии: / огнь бо всели́ся в Тя Божества́, и я́ко Младе́нца млеко́м пита́еши Зижди́теля и Го́спода. / Те́мже, а́нгельский и челове́ческий род, / досто́йно сла́вим пресвято́е Рождество́ Твое́ и согла́сно вопие́м Ти: / моли́ Христа́ Бо́га согреше́ний оставле́ние дарова́ти воспева́ющим досто́йно сла́ву Твою́.
Песнь 4
Ирмо́с:
Услы́шах, Го́споди, слух Тво́й и убоя́хся, / я́ко неизре́ченным сове́том, Бог сый Присносу́щный, / от Де́вы проше́л еси́, вопло́щся. / Сла́ва снисхожде́нию Твоему́, Христе́, // сла́ва си́ле Твое́й.
Ви́дел еси́ морску́ю пучи́ну нечи́сту / и челове́ки непроходи́му от мно́жества че́рвия, / корабле́й осто́вы верте́ти естество́м навы́кших. / Сих же, Варлаа́ме, cвяще́нныя воды́ кропле́нием / отгна́л еси́ на пучи́ну мо́ря. А́ще и естество́м непобеди́ми че́рвие бе́ша, / но твоея́ моли́твы Бо́гу послу́шаша, / я́ко изы́ти повелева́еши им от Свята́го Но́са в непроходи́мая места́, / иде́же тьма и мрак глубо́к безпреста́ни суть. Ру́це, иногда́ уби́йством окрова́вленнии, / ны́не же чи́сте и свя́те, возде́еши к Вы́шнему, о нас моля́, преподо́бне, / во е́же обрести́ нам благода́ть и грехо́в оставле́ние / и бу́дущих благ сподо́битися моли́твами твои́ми. Лю́дие возра́довашася ра́достию неизглаго́ланною, / получи́вше путь морски́й стро́ен, и благопоспе́шен, и благополу́чен, / тя, своего́ засту́пника, воспева́юще / и Христа́ велича́юще. А́ще не бы предста́л и помо́гл еси́, / не бы́хом толи́ких грызу́щих че́рвий изба́вилися. / Ны́не же тебе́ благода́рная возглаша́ем, / корабли́ с пе́снию отпуща́юще, / вспять возвраща́ющияся це́лы и невреди́ми прие́млюще, зове́м: / сла́ва, Христе́, прише́ствию Твоему́. Му́жеством души́ в ве́ру вооружи́вся, / бу́рю и дождь, и вся́кую возду́шную тя́гость терпя́, / потща́лся еси́ за́поведь отца́ своего́ духо́внаго сохрани́ти, / те́мже прия́л еси́ от Вседержи́теля Бо́га вене́ц побе́дный, да́руя страсте́й исцеле́ние и бесо́в отгна́ние. Богоро́дичен: Уста́ви неуста́вное смуще́ние, Чи́стая Ма́ти Бо́жия, / е́же к Сы́ну Твоему́ направля́ющи движе́ние воспева́ющих: / Сла́ва си́ле Твое́й, / сла́ва, Христе́, прише́ствию Твоему́.
Песнь 5
Ирмо́с:
Мрак души́ моея́ разжени́, Светода́вче Христе́ Бо́же, / началоро́дную тьму изгна́в бе́здны, / и да́руй ми свет повеле́ний Твои́х, Сло́ве, // да, у́тренюя, сла́влю Тя.
Но́сиши ме́ртвую, я́ко жи́ву, в пусты́ню Чупу́ с собо́ю / и та́мо моли́твою на врага́ вооружа́ешися, / нестерпи́мыя его стре́лы сокруша́я посто́м и терпе́нием, / до́ндеже прия́л еси́, преподо́бне, / по́мощь от Вы́шняго. Обновля́ешися, я́ко оре́л, преподо́бне, / измы́вся и очи́стився в пусты́ни от всех стра́стных дея́ний, / и, я́ко еле́нь, быстротеки́й ко исто́чником вод, / очища́яся змии́ныя я́ди. Ви́дел еси́ за мо́рем зи́ждему святы́м Три́фоном оби́тель в Пе́чензе, / и се́мо устреми́ся ви́дети того́ труды́ и по́двиги. / И, ту пребы́в ма́лое вре́мя, / проро́чески тому́ об устрое́нии оби́тели прорече́. Оставля́еши Три́фоново селе́ние / и возвраща́ешися па́ки к Ке́рети, вся тому́ изре́к: / о, Три́фоне, сподо́бился еси́ оби́тель воздви́гнути и бра́тию собра́ти, / бу́дут же лю́дие ме́ста сего́ зле неукроти́мы, я́ко ди́вии зве́ри, / твое́й ве́тхой я́рости и остроже́лчию подо́бящиися. Мо́ре на плещу́ свое́ю тебе́ ноша́ше / из Пе́ченги в пусты́ню во у́стие Чупы́, / вле́кше корабли́ свои́ми струя́ми, в ни́хже ядови́тыя че́рви очи́стил еси́, / и по то́ням телеса́ ме́ртвых, восстаю́щая бесо́вским де́йством, ви́де, / и сим усну́ти до Христо́ва втора́го прише́ствия повеле́, / да не безсме́ртно пребу́дет зло́е, / я́коже рече́ и́же богосло́вию тезоимени́тый Григо́рий. Богоро́дичен: Улови́ти мя всегда́ и́щет прелука́вый, / и от того́ мя сете́й исхити́, Влады́чице, / и Боже́ственным кро́вом крилу́ Твое́ю це́ла соблюди́. Пеcнь 6 Ирмо́с: Бе́здна грехо́в и прегреше́ний бу́ря мя смуща́ет / и во глубину́ ну́жднаго ре́ет мя отча́яния, / но Твою́ кре́пкую ру́ку мне простри́, я́ко Петро́ви, // о Упра́вителю, и спаси́.
Чу́вственныя стра́сти победи́в воздержа́ния брозда́ми, чудоде́йственне Варлаа́ме, / чистото́ю душе́вною боже́ственно вооружи́ся, / стяжа́в безстра́стие и целому́дрие, / и́миже Бо́гови па́че прибли́жися.
Богозда́нная Чу́пская пу́стынь, я́ко путь, в не́бо веды́й, прия́т тя, всехва́льне о́тче Варлаа́ме, / иде́же со зверьми́ ди́виими му́жески подвиза́лся еси́, дре́вним отце́м подража́я, / и, благода́ть Ду́ха Свята́го оби́льно стяжа́в, / мно́гим путь спасе́ния яви́л еси́. Ю́ности цвет умертви́в воздержа́нием, / в вы́шний вни́де черто́г, / во оде́жду, досто́йну зва́ния, облече́ся, / приуготовля́яся к Ве́чери, / на ню́же и зван бысть, украше́н доброде́тельми, / в неве́стнице неизрече́нныя сла́вы возле́гл еси́. Доброде́тели, труды́ и поко́й, Варлаа́ме, / прия́л еси́ со все́ми святы́ми Ко́льскими,/ и́хже возвесели́л еси́ свои́м житие́м. О́браз быв и подо́бие к доброде́тели, о́тче, / возводи́л еси́ всех к высоте́ Боже́ственнаго раче́ния, / наказу́я доброде́тели прилежа́ти. Богоро́дичен: Тя, о́бщее любоче́стие, Всенепоро́чная, / на́шего естества́, вси сла́вим, / уста́ еди́ны бы́вше и еди́но согла́сие соверши́вше. Конда́к, глас 1: Все у́мное свое́ жела́ние к Бо́гу впери́в, / жите́йския молвы́ до конца́ отри́нул еси́, / в моли́твах, и слеза́х, и злострада́ниих плоть свою́ изнуря́я, / до́бре подвиза́вся проти́ву неви́димаго врага́ ко́зней, / и, победи́в я, путь морски́й челове́ком без вреда́ от ядови́таго че́рвия сотвори́л еси́ / и, веселя́ся, прише́л еси́ к небе́сным черто́гом, / иде́же ны́не со А́нгелы Святе́й Тро́ице предстоя́, / мо́лишися непреста́нно, / сохраня́я нас от враг ви́димых и неви́димых / и ненаве́тны соблюда́я от скорбе́й, зол и боле́зней, / да твои́ми моли́твами спасе́мся, // Варлаа́ме преподо́бне, о́тче наш.
И́кос
Отве́рзи ми устне́, преблаже́нне, / богоприя́тными ти моли́твами предстоя́ Бо́гови, / да воспою́ пресла́вное твое́ житие́ и боле́зненную я́зву твою́, / я́же на мо́ри Христа́ ра́ди претерпе́л еси́, преподо́бне. / Столп бо яви́ся наро́ду Помо́рскому на мо́ри / и пра́вило све́тло и́ноком на земли́, / ра́вно А́нгелом стяжа́в житие́, / в незаходи́мая вои́стину всели́вся, / многоко́зненнаго врага́ победи́л еси́, да твои́ми моли́твами спасе́мся, / Варлаа́ме преподо́бне, о́тче наш.
Песнь 7
Ирмо́с:
О́троцы благочести́вии в Вавило́не о́бразу злато́му не поклони́шася, / но посреде́ пе́щи о́гненныя, ороша́еми, / песнь воспева́ху, глаго́люще: // превозноси́мый отце́в и нас Бо́же, благослове́н еси́.
В моли́твах бо́дренное и в поще́нии крепкоду́шное, / терпе́ние во искуше́ниих неосла́бное, / ума́ чистото́ю, преподо́бне, показа́л еси́, / земли́ бо и земны́х досто́йно отступи́в, / небе́сное обре́л еси́ наслажде́ние, воспева́я: / благослове́н Бог оте́ц на́ших. Остр ум име́я к Бо́гу внима́ти, / стра́сти душетле́нныя успи́л еси́ / и снопы́ благопло́дия пожа́л еси́, / пита́я благоче́стно восхваляю́щих тя и пою́щих: / благослове́н Бог оте́ц на́ших. Ре́вностию Христо́вою я́рость поостри́в, / непрекло́нно слеза́ми и сле́зными ка́плями и́стиннаго пла́ча / я́рости и напра́снства весь пла́мень погаси́в, / и жела́ния безче́стия несы́тна, /молча́нием вопия́ше: / благослове́н Бог оте́ц на́ших. Целому́дрие, о́тче, притяжа́в, / и́мже на Боже́ственную любо́вь возше́д, / прия́т да́ры исцеля́ти неду́ги душ и теле́с на́ших, / и́миже к Бо́гу прибли́житися мо́жем, вопию́ще: / благослове́н Бог оте́ц на́ших. Кро́ток, и ми́лостив, и чист быв, / кро́тких зе́млю дости́гл еси, о́тче Варла́аме, / укроти́ настоя́щую бу́рю се́рдца моего́, / да, в тишине́ Боже́ственней быв, / песносло́влю твоя́ по́двиги и воспева́ю: / благослове́н Бог оте́ц на́ших. Естество́ плотско́е повину́в ду́хови посто́м и воздержа́нием, / ду́шу же Боже́ственными дарова́ньми просвети́в, / превысо́к умо́м су́щих в веще́х я́влься, / невеще́ственна дарова́ния Ду́ха Свята́го прия́л еси́, воспева́я: / благослове́н Бог оте́ц на́ших. Богоро́дичен: Угле́м Иса́ия от Серафи́ма от алтаря́ очища́ется, / возопи́ велегла́сно: се, Де́ва во чре́ве прии́мет и роди́т Сы́на, и нареку́т и́мя ему́ Емману́ил, е́же есть сказа́емо: с на́ми Бог. / Ему́ же вопие́м: / благослове́н Бог оте́ц на́ших.
Песнь 8
Ирмо́с:
Мусики́йским орга́ном согласу́ющим / и лю́дем безчи́сленным, покланя́ющимся о́бразу в Деи́ре, / три о́троцы не повину́вшеся, // Го́спода воспева́ху и славосло́вяху во вся ве́ки.
Цели́ши незави́стно ве́рно призыва́ющия тя, / цели́тель от Бо́га показа́лся еси́, / очи́стник, блаже́нне, и прогони́тель лука́вых духо́в, / я́ко звезда́ всесве́тлая от пусты́ни, воссия́в чуде́с луча́ми, / просвеща́я вопию́щих: / Го́спода по́йте и превозноси́те Его́ во ве́ки. Ору́жие пе́ние име́л еси́, / моли́тву же сте́ну, / непоро́чную слезу́ умыва́ние, / омыва́лище скве́рнам душе́вным, / па́мять же сме́ртную сожи́тельницу стяжа́в, преподо́бне, / е́юже ум очи́стив, Бо́га зре́ти сподо́бися, поя́: / Го́спода по́йте и превозноси́те Его́ во ве́ки. Морско́е не́дро освяти́л еси́, преподо́бне, / кропле́нием свяще́нныя во́ды, я́ко паучи́ну, че́рви отгоня́, / мы же, не терпя́ще кре́пости твоея́ духо́вныя зре́ти / и нечу́вственная отбега́юще, / Го́споду, тя в сем просла́вльшу, я́ко ве́рна Своего́ раба́, вопие́м: / Го́спода по́йте и превозноси́те Его́ во ве́ки. Естество́м доброде́телей любве́ сопря́глся еси́ отцу́ Три́фону / в духо́вных ему́ исправле́ниих, / в пу́сте мо́ри с ним озе́мствуяся, / соприча́стное души́ очища́юще, воспева́юще: / Го́спода по́йте и превозноси́те Его́ во ве́ки. Кро́тостию, о́тче, наве́ты нося́, / терпя́ же и своя́, на тя восстаю́щия, / оте́ческим нра́вом после́дуя, тех житие́ в себе́ име́я, / прии́м от Бо́га де́йство благода́ти, поя́ше: / Го́спода по́йте и превозноси́те Его́ во ве́ки. Мо́щи твоя́ источа́ют ве́рным исцеле́ние, / па́мять же твоя́, блаже́нне, сия́ющи па́че со́лнца / и всем ду́ши просвеща́ющи, / ми́ра мы́сленнаго восхища́ет, пою́щих: / Го́спода по́йте и превозноси́те Его́ во ве́ки. Богоро́дичен: Ум у́бо есть Нерожде́нный Оте́ц, / обра́зно прему́дрыми предрече́ся; / Сло́во же собезнача́льно, соесте́ственный Сын; / и Дух Святы́й, еже в Де́ве от Сло́ва созда́ воплоще́ние.
Песнь 9
Ирмо́с:
Тя, Неискусобра́чную Ма́терь Бо́га Вы́шняго, / Тя, па́че ума́ ро́ждшую сло́вом вои́стину Бо́га, / вы́шшую пречи́стых Сил, // немо́лчными славословле́нии велича́ем.
Сле́зныя ка́пли я́ко гаси́ло стяжа́л еси́ / вои́стину стра́стным разгоре́нием / и любо́вию огня́ Боже́ственнаго росе́ безстра́стия совокупи́лся еси́, Христу́ Бо́гу на́шему, / те́мже тя чтим, Варлаа́ме богому́дре, / и ве́рою ублажа́ем.
Еди́ной любви́ Христо́вой приложи́в свою́ ду́шу, Варлаа́ме преподо́бне, / я́ко за́поведей Бо́жиих исполни́тель, / мно́гих чуде́с прия́л еси́ благода́ть, всехва́льне, / те́мже тя почита́ем. Сокро́вище моще́й твои́х, Варлаа́ме, / исто́чник показа́ся исцеле́ний, / к ни́мже всяк притека́я, я́ко от окри́на, воды́ почерпа́ет незави́стно / и избавля́ется вся́ких страсте́й душе́вных и теле́сных. / Сего́ ра́ди тя ублажа́ем, / преподо́бне. Госпо́дь просла́ви Своего́ уго́дника, / я́ко ни гроб, хода́тай забве́ния, того́ доброде́тели сокры́ти возмо́же, /мы же, истека́ющими чу́дне от него́ зна́меньми / не то́чию бли́жняя, но и да́льняя оглаша́я, / трубы́ ясне́йши вопие́м и пропове́даем по́двиги и труды́ его́. Па́мять твою́ свяще́нную творя́щим, о́тче, / не преста́й моля́ Изба́вителя дарова́ти согреше́ний оставле́ние / и Небе́сное Ца́рство восприя́ти, / иде́же глас пра́зднующих весели́т вся. О, тро́ице присноблаже́нная, / равноче́стнии отцы́, Феодори́те, Три́фоне и Варлаа́ме, / я́ко еди́но блаже́нство иму́щии от Бо́га, версто́ предо́брая, / призыва́ющих и восхваля́ющих вы от всех лю́тых спаса́йте / те́плым предста́тельством ва́шим. Богоро́дичен: Тесни́т мя широта́ вели́чий Твои́х, Влады́чице, / подавля́ющи сло́во от ча́стости, / и пресла́вно ми случа́ется е́же недоумева́тися от благомо́щества, / те́мже толи́ко Тя Возвели́чившаго сла́вим. Свети́лен: Подо́бен: Жены́ услы́шите: Чу́вственныя стра́сти теле́сныя победи́в мно́гими по́двиги / тягото́ю ве́лиею и терпе́ния брозда́ми, чудоде́йственниче Варлаа́ме, / и ре́вности безпло́тных на земли́ и на мо́ри показа́в, / вся плотска́я жела́ния ду́ху повину́л еси́: / тем ны́не в небе́сных селе́ниих водворя́яся, // моли́ о душа́х на́ших.
Сла́ва, и ны́не, Богоро́дичен:
Тя пе́сньми немо́лчными ублажа́ем, Де́во, / я́ко от Тро́ицы Еди́наго родила́ еси́, Богоро́дице, / и но́сиши на Боже́ственную руку́ пребога́тое Сло́во, // непреме́нно и неизме́нно.
На хвали́тех стихи́ры на 4, глас 6:
Благода́ть Ду́ха, о́тче Варлаа́ме, / тебе́ возсия́вши, све́тло просвети́ тя, / отсю́ду ума́лил еси́ страсте́й нощь / и безстра́стия день пости́гл еси́, / чи́сте чисте́йшему Све́ту совоку́плься, / в Не́мже жи́тельствуя, не забу́ди, богогла́се, // ве́рою пою́щих свяще́нную твою́ па́мять.
Благода́ть, жела́нную тебе́, Варлаа́ме, нося́ небе́сную, / земны́х небре́гл еси́, / сего́ ра́ди избра́ тя Госпо́дь на страда́льческое житие́, / я́ко безпло́тен пребыва́я, / ско́рби и боле́зни понесе́, / слеза́ми изсуши́л еси́ му́тный исто́чник стра́сти грехо́вныя. / Ны́не же присносу́щныя сла́дости исто́чника воды́, / теку́щия в живо́т ве́чный, // благоче́стно наслажда́ешися, богоприя́тне.
Благода́ть исцеле́ний духо́вных, Варлаа́ме, / от благода́ти Боже́ственныя досто́йно прия́л еси́: / отсю́ду духо́в тебе́ лука́вых низлага́ется пре́лесть, / ратобо́рец на бесо́в яви́лся еси́, / и неду́г неудо́бных тли отбе́г преше́л еси́, преподо́бне, / источа́еши бо я́ко во́ды, благода́тныя твоя́ струи́ / от ни́хже напая́еми // воспева́ем па́мять твою́.
Сла́ва, глас 2:
Богоно́сне преблаже́нне Варлаа́ме, / все плотско́е мудрова́ние ду́ху повину́л еси́, / поще́ния и изнуре́ния теле́снаго страда́ньми утверди́вся, / я́ко зла́то, в горни́ле искуше́но, сия́я, яви́вся, / прия́телище был еси́ Ду́ха Пресвята́го. / Помина́й нас, чту́щих па́мять твою́ свяще́нную, / умоли́ Го́спода, да ми́лостив нам бу́дет// во мно́жестве Своея́ бла́гости.
И ны́не, Богоро́дичен:
Все упова́ние мое́ на Тя возлага́ю, / Ма́ти Бо́жия, // сохрани́ мя под кро́вом Твои́м.
Славосло́вие вели́кое и отпу́ст.
НА ЛИТУРГИ́И
Блаже́нны от кано́на, пе́сни 3-я и 6-я. Проки́мен, глас 7: Восхва́лятся преподо́бнии во сла́ве // и возра́дуются на ло́жах свои́х.
Стих: Воспо́йте Го́сподеви песнь но́ву: Апо́стол к Кори́нфяном, зача́ло 176.
Аллилу́ия, глас 6: Блаже́н муж, боя́йся Го́спода: Стих: Си́льно на земли́ бу́дет се́мя его́. Ева́нгелие от Луки́, зача́ло 24. Прича́стен: В па́мять ве́чную: